Rolel a Omngai a Klungiolem er a Field Service Group er Kau
1. Ngera el ungil tekoi er a Book Study er a Ongdibel a dirk ngar er ngii el okiu a field service group er kid?
1 Kau ke dirk oureng a bebil el tekoi el mla er ngii er a Book Study er a Ongdibel? Nglocha mle chelellakl a rengud e le ngdi mle mekesai a rechad. E tiang a mlo uchul e kede mlo medengelterir a rebebil el tir a mle sebechir el ngosukid el mo mesisiich a klaumerang er kid. (Osi. 18:24) Ngike el odam el uluungerachel er a book study er kid a mle medengei a ileakl el blekeradel el dechelebangel e mle sebechel el melisiich er kid. (Osi. 27:23; 1 Pe. 5:2, 3) Aika el ungil el tekoi a dirk ngar er ngii el okiu a field service group er kid.
2. Ngmekerang a bo desechelirir tirke el ngar er a field service group er kid el sebechir el melisiich er kid?
2 Momuchel el Meruul a Tekoi: Tirke el ngar er a field service group a di osisiu a ildisir er tirke el mla er a book study group. Me sel ‘dedak’ el oldingel el obengterir, e ngmo kmes a deleuill er kid me tir. (Fil. 1:27) Te tela el ngar er a group er kau a bla moldingel el obengterir? Ngsebechem el oldingel el obengterir a rekakerous el chad? (2 Ko. 6:13) Ngdirrek el sebeched el outkeu er a ta er a chad el ngar er a group er kid el me obengked er a temel a Omengull el Ongalek er kid me a lechub e kede dmak el omengur. Ngar er a bebil el ongdibel, e aike el field service group a mo er ngii a techellir el omeka er ngike el odam el oltobed a cheldecheduch. Me sel sandei el kirir el meruul er tiang, e te mo dmak el omengur e kasisiich alta e ngdiak el sebechel ngike el odam el mei.
3. Ngera bebil er a rolel e ngsebeched el ngmai a ngeso el okiu aike el field service group er kid?
3 Me alta ongdibel er chelechang a di mo kldibel el eru el taem er a ta el sandei, engdi kede dirk melai aike el ngeso el dousbech. A rudam el mlengilt el mo oungerachel a group a omesterir a rederta el chad aike el ileakl el omelisiich el lousbech me a osisechakl el kirel a omesiou. A lsekum ngike el odam el oungerachel er a group er kau a dirkak a ta el loldingel el obengkem, e ngungil a molengit el mo oureor el obengkel. Me a lmuut el tang, ngike el odam el oungerachel a tekoi er a odingel a obliil a oldingel el obengkel a kakerous el group er a ta el Sebadong me a lechub e ng Sandei er a bek el buil. Ngar er aike el mekekerei el ongdibel el di mekesai a field service group er tir, e nglocha oldingel aika el group el eru el taem er a ta el rak. Kau ke mla kutmokl a chelsengum me bo el sebechem el mo oldingel sel lemei ngika el odam?
4. (a) Ngmekerang e meketmokl aike el miting er a odingel? (b) Ngera me ngungil a domes el kmo ngsebeched el ousbech er a blid el kirel aike el miting er a odingel me a lechub e ngdiak?
4 Ngungil a lsekum a derta el group a mo kldibel er a kakerous el basio el kirel a miting er a odingel. A lebetok a basio el sebechir el mo kldibel er ngii er a osisiu el taem e ngmo beot er tirke el omerk er a klumech el mo er a miting er a odingel me a dirrek el basio el loldingel er ngii. Ngdirrek el sebechel el mereched el meketmokl a group me bo el sebechir el mo er a basio el loldingel er ngii. Me a lmuut el tang, ngbeot er ngike el odam el oungerachel a group el mo kerekikl er tirke el ngar er a ulekerreuil. Nguaisei, engdi a lebebil er a taem e ngmo kirel a erung me a lechub e ngkuk betok el group el mo dmak. A lsekum a ongdibel el rokir a mo dmak el kirel a odingel er sel kot el Sebadong er a chelsel a buil me a lechub e nguriul er a Omesubel a Ongkerongel, e ngungil a derta el group a bo ledak el dengchokl me ngike el odam el oungerachel er a group bo lousbech a sesei el bung el kutmeklterir a rechedal er a uchei er a temel a nglunguuch.—Momes er a baks el “Ngsebeched el Ousbech er a Blim?”
5. Me alta e ngmla mo diak a Book Study er a Ongdibel, engdi ngulterekokl a rengud el kirel a ngerang?
5 Me alta e ngmla mo diak a Book Study er a Ongdibel, engdi a Jehovah a dirk melemolem el omeskid aike el rokui el dousbech el mo meruul a soal. (Heb. 13:20, 21) Me ngngar cheungel a ulekerreuil, e ngdiak a bo dengesonges er ngii. (Psa. 23:1) Ngbetok el klengeltengat a mo er ngii el okiu a field service group er kid, me a lsekum e kede melasem el mo ‘betok a dolalem’ e ngmo ‘betok a doridm.’—2 Ko. 9:6.
[Baks el ngar er a 6 el llel]
Ngsebeched el Ousbech er a Blim?
A bebil el ongdibel a oldak aike el service group sel Sebadong me a lechub e ng Sandei e le ngdiak a kmal blai el sebechir el ousbech. Aika el miting el kirel a odingel a tekoi er a ongdibel a uchul me ngklou el techall a lengar er ngii aika el miting er a blid. Ngsebeched el ousbech er a blim? Lak momai er a rengum a lsekum a blim a diak el sal ileakl el blai. A remechuodel a mo omes er a basio el lengar er ngii a blid me a kuk bebil el tekoi el lulemes er sera losiik a basio el kirel a book study. A lsoam a dousbech er a blim, e mouchais er ngike el odam el oungerachel er a group er kau.