Eim el Rolel e Ngsebeched el Metik er a Chad el Bo Dosuub a Biblia el Obengkel
1. A lsekum e ngmeringel el debetik er a rechad el bo dosuub a Biblia el obengterir, e ngera kired el meruul, e ngera uchul?
1 Ke mla metik er ngii el meringel a obetik er a chad el bo mosuub a Biblia el obengkel? Lak meterob. A Jehovah a omekngeltengat er tirke el melemolem el meruul aike el soal. (Gal. 6:9) Aika el ngariou a eim el rolel el sebechel el ngosukau el mo omuchel a omesubel a Biblia.
2. Ngmekerang a domuchel a omesubel a Biblia sel doldingel a obliil?
2 Moker er a Chad: A rebetok el chad a medengei el kmo kede merous er A Ongkerongel me a Awake!, engdi nglocha diak lodengei el kmo ngdirrek el sebeched el mesuub a Biblia el obengterir a rechad. Sel moldingel a obliil e nglocha ungil a moker er a chad el kmo ngsoal mesuub a Biblia me a lechub e ngdiak. Ngdirrek el sebechem el oker er a osisiu el tekoi el mo er tirke el semeriar. A lsekum e ngchetirir, e ngsebechem el melemolem el omesterir a babier e omekeroul er a klemeriarreng er tir. A ta el odam a uleldingel er a ta el obekel e omesterir a magazine el kemanget el taem. A ta el taem er a uriul er a lebesterir a beches el magazine, e nguleker er tir el kmo: “Ngsomiu el mesuub er a Biblia?” Ngika el odam a kmal mlo mechas a rengul e le te kilengei el mo mesuub, e chelechang e tirka el obekel a mla metecholb.
3. Ngungil a domdasu el kmo tirke el mei er a miting a mesuub a Biblia el obengkel a kmung techang? Mosaod.
3 Tirke el Mei er a Miting: Lak momdasu el kmo tirke el semeriar el mei er a miting er a ongdibel a mesuub a Biblia. A ta el odam a melekoi el kmo: “Ngbetok er tirke el kulsuub a Biblia el obengterir a mleuuchel e le ak milengedecheduch er tirke el mei er a miting.” A ta el odos a tilbir el mo mengedecheduch er a ta el redil el kmal sekemerur el mla er ngii a rengelekel el redil el mla metecholb el ngar er a ongdibel er ngii. Ngika el redil a mla mo kmeed el 15 el rak el lomais el mei er a miting e mle blechoel el mei er a Blil a Ongdibel sel lomuchel a miting e mereched el merael sel bo lemerek. Ngika el redil a kilengei el mo mesuub e a uriul e ngmlo metecholb. Ngika el odos a kmo: “Ngmera el mekngit a renguk e le ak milengiil el 15 el rak el mo oker er ngii el kmo ngsoal mesuub a Biblia me a lechub e ngdiak!”
4. Ngmekerang e sebeched el metik er a rekuk bebil el semeriar el sorir el mesuub a Biblia?
4 Moker el Kirir a Rebebil: A ta el odos a obengterir a rebebil el mo oldingel er tirke losuub el lobengterir. E a uriul er a omesuub, e ngoeak a kengei er ngike el olisechakl, e ngoker er a chad el mesuub el kmo ngngar er ngii a lodengelii el soal mesuub a Biblia me a lechub e ngdiak. Sel bsang a chad el moldingel er ngii a Biblia Olisechakl el babier, e ngsebechem el oker er ngii el kmo: “Ngar ngii a chad el modengelii el dirrek el soal el menguiu er tia el babier?” A lebebil er a taem, e tirke el publisher me tirke el pioneer a diak el sebechir el mesuub a Biblia el obengterir a rechad el lebetik er tir el ngar er a territory. Me a leuaisei e ngungil a omouchais er a rebebil el kmo ngsebechem el mesuub a Biblia el obengterir a rechad.
5. Ngera uchul me ngungil a doker er a rebecherir a resioning el diak el ngar er a klemerang a lsekum e ngsorir el mesuub a Biblia?
5 Rebecherir a Resioning el Diak el Ngar er a Klemerang: Te ngar er ngii a resioning el ngar er a ongdibel er kau el becherir a diak el ngar er a klemerang? A rebebil el diak el ngar er a klemerang a diak el sorir el mesaod el kirel a Biblia el obengterir a rebecherir el Kristiano, engdi te kongei el mo mesuub el obengkel a kuk ta er a chad. Ngblechoel el ungil a lsekum e kede mengedecheduch er a bechil ngika el chad el ngar er a klemerang er a uchei, me bo el sebeched el mo medengei el kmo ngera kot el ungil el rolel a bo dongedecheduch er ngii.
6. Ngua ngera klungel a ultutelel a nglunguuch sel dosiik er a chad el bo dosuub el obengkel?
6 Nglunguuch: A nglunguuch a ngar er ngii a klou el klisichel. (Jak. 5:16) A Jehovah a tibir el kmo ngmo orrenges aike el tekoi el dolengit a loltirakl a soal. (1 Jn. 5:14) A ta el odam el mle blechoel el mechesang a milluluuch me lebo er ngii a chad el losuub el obengkel. Me a bechil a mlo melatk el kmo ngmo sebechel el omekerreu er ngika el chad me a lechub e ngdiak, tokubets a lsekum e ngbetok a mondai er ngii. Me nguluuchais aika el mla er a uldesuel er a loluluuch el mo er a Jehovah me bo el sebechel a bechil el metik er a chad el losuub el obengkel. A nglunguchir a mlonger er a uriul er a eru el sandei, e le a ta el pioneer el ngar er a ongdibel er tir a miltik er a chad el mle soal el mesuub me ngngiluu el msa ngika el odam. A bechil a kmo: “A lengar er ngii a chad el omdasu el kmo ngmeringel er ngii a mesuub el obengkel a chad, e ak dmu el kmo: Bo bleketakl sel omoluluuch, e lak meterob el meluluuch el kirel. Ngmera el klou el deurreng aki bla bo molechesuar er ngii.” Ngoeak a blakerreng, e kau me ngdirrek el sebechem el metik er a chad el mosuub a Biblia el obengkel e dirrek el mo melechesuar er a deurreng e le kau el olengeseu er a chad el mo er a “siseball el mor a klengar.”—Mt. 7:13, 14.