Lmuut el Mo Ungil a Duch er Kid el Ngar er a Omesiunged—Olecholt er a Rolel a Omesubel a Biblia el Ousbech er a Biblia Olisechakl el Babier

A Uchul Me Ngklou a Ultutelel: A rebetok el chad a kora rrau a rengrir sel dolengit el mesuub a Biblia el obengterir el diak locheraol. Te locha omdasu el kmo ngkirir el mo teloi er a rebetok el chad el mesuub me a lechub e te mo melai a bebil er a bedengel a class. Kede bai ochotii a rolel a dosuub el obengterir er a bai doker er tir el kmo ngsorir el mesuub? E le ngdi chelsel a sesei el bung, er a medal a tuangel er a blai, e ngsebechem el ochotii er a chad el kmo ngkmal beot e sebechel el mo semeriar el mesuub er a Biblia.

Rolel a Moruul er Ngii:

A uriul er a omouchais el kmo ke techang, e moker er a chad er a blai a lsekum e ngsuebek a rengul el kirel a ngar medal el klebesei.
Mouchais er ngii el kmo a rebetok el chad a osisiu a uldesuir el kirel tia el tekoi, e mochotii a Biblia Olisechakl el babier me a bldeklel a suobel er a chelsel. Mosaod el kmo tia el babier a ngar er ngii a beot el omesodel a suobel el olecholt aike el lolisechakl a Biblia el kirel a ngar medad el klebesei me a kuk bebil er a suobel, e moker er ngii el kmo ngera el bliongel a lesemeriar er ngii.
Bsang a babilengel e mochotii sel bliongel el lengiltii. Mosaod el kmo aike el ker er a uchelel a bliongel a monger er aike el parakurab el ngar er a suobel.
Molengit er a chad er a blai me lechiuii a kot el parakurab a lsekum e ngsoal. E sola e mchiuii a ker er sel parakurab, e mdak el mesaod er a nger er ngii. Momes e mosaod a ngii di el bades el ngar er a parakurab el melisiich a nger er a ker. Mochotii er ngii el kmo ke milekerang er a omolecha er a olengchelel a nger er kau er a babilengem.
Mdak el mesaod er a ongingil el parakurab, engdi chelechang e molengit er a chad er a blai me lolasem el onger er a ker el olab a di tekingel.
Mchetengii, e mketmeklii a taem el sebechem el lmuut el mong el mo merekui er a suobel.
A lsekum e ngsebechel, e mochotii a video el ngar er a jw.org el dai er ngii a kmo Ngera Meketmokl er a Omesubel a Biblia?

Molasem er Tiang er Chelecha el Buil:

Moluluuch me a Jehovah lomekngeltengat er kau el kmal melasem el mo omuchel er a beches el omesubel a Biblia el obengkel a chad.—Fil. 2:13.
Molasem el ochotii a olechotel a omesubel a Biblia el ousbech er a Biblia Olisechakl el babier, me a lechub e mochotii a video el Ngera Meketmokl er a Omesubel a Biblia? a lekesengil e ngtang sel moruul er a omesiungem.