Molemolem el Olengeriakl el Mesiungel a Rubak
1. Ngera el kerebai er a kot el dart el rak a meketeklii el kmo ngkired el olengeriakl el mesiungel a Rubak?
1 A Rekristiano el mesiungel a Rubak a kirir el olengeriakl. Sei a uchul me a Jesus a ullisechakl er a rulebengkel me bo el sebechir el lmuut el mo meduch el omerk er a klumech. (Lk. 9:1-5; 10:1-11) Ngdirrek el uchul me a Akuila me a Prisila a ngiluu a Apolos el mo er a blirir e “liluut el mo ungil mesaod er a Rolel a Dios el mor ngii.” (Rel. 18:24-26) Tiakid a dirrek el uchul me a Paulus a millisiich er a Timothy el mle ulsemuul er a ureor er a berkel a klumech el mo melemolem el oltirakl aike el lolisechakl, “ma re bek el chad bo lomes” er a ngelsecheklel a urerel. (1 Ti. 4:13-15) Ngdiak el belkul a kmo ngmla mo ua ngera klemengetel el dosiou er a Rubak el publisher er a ungil chais, me kid a dirk kired el lmuut el mo ungil er a duch er kid el omerk er a klumech.
2. Ngmekerang a dosuub er a rebebil?
2 Mosuub er a Rebebil: A ta er a rolel a bo demeduch el omerk er a klumech a oeak sel dosuub er a rebebil. (Osi. 27:17) Me a leuaisei, e bo mkerekikl el orrenges er a rekldemem er a klaumerang er a rolel sel longedecheduch. Moker a bebil er a ulterekokl e ungil el ulekrael er tirke el ngar er ngii a duch er tir el omerk er a klumech, e bo mungil el orrenges a tekoi el lolekoi. (Osi. 1:5) Kau ngdiak modengei el kmo ngmekerang a omluut el mo oldingel er tirke el chad el semeriar, e omuchel a omesubel a Biblia, me a lechub e ke mo meruul a kuk bebil er a telengtengil a omesiungem? Di lekau el mo olengit a ngeso er a odam el oungerachel er a group er kau me a lechub a publisher el meduch el olisechakl. E lak mobes el kmo a chedaol reng er a Jehovah a sebechel el mekurulii a duch er kau, me bo blechoel el olengit er ngii el ngar er a nglunguuch.—Lk. 11:13.
3. Ngkirel el mo ua ngera uldesued a lsekum e kede ngmai a ulekrael el dimlak doker er a chad el kirel?
3 Lak el metirm a rengum a lsekum e ke ngmai a ulekrael er a rolel a omluut el mo meduch el omerk er a klumech el dimlak moker er a chad el kirel. (Oli. 7:9) Ngdi ua Apolos, mkengei a ngeso el oba klengariourreng me a omereng el saul. A omoruul el uaisei e ngolechotel a llomeserreng.—Osi. 12:15.
4. A Jesus ngmilskid a ngera el kmal mesisiich el uchul me lsebeched el olengeriakl sel domerk er a klumech?
4 A Dolengeriakl e Ngkobkellii a Dios: A Jesus a uluusbech a okesiu el melisiich er a rulebengkel el mo olengeriakl er a omesiungir. Ngulemekesiu er ngii el mo er a dellomel el bilong e a rengellitel el oltirakl er ngii a lulemekesiu er tir el mo er a rachel. Ngmillekoi el kmo, a Chedam a mengimd a bek el rachel el lourodech “me ng meloseb e mengal mo bekerredechel.” (Jn. 15:2) Me ngdi ua chad el ouklalo er a sers er a bilong el soal a rechelel a dellemelel el grape a lemengal mo bekerredechel, a Jehovah me ngsoal a dolemolem el omekeroul er a duch er kid er a rolel a domsa “odanges el mor a Dios.” (Heb. 13:15) Ngera kmal ungil el tekoi el sebechel duubech sel dolengeriakl er a rolel a domerk er a klumech? A Jesus a meskid a nger: “Sel bo bekerredechel e ng mukebkall a Demak.”—Jn. 15:8.