Reference el kirel a Subeled er a Miting er a Klengar me a Omesiunged
March 6-12
MEKREOS EL TEKOI EL NGAR ER A BIBLIA | JEREMIA 1-4
“Ngak a Mo Obengkem el Mo Mesebechakl er Kau”
Molemolem el Klekar el Ua Omerellel a Jeremia
4 Ngmle bekord el 25 a rekil a Jeremia er sel taem er a ltetkii a Jehovah el mo oureor el profet er ngii. (Jeremia 1:1, 2) Me ngulemdasu el kmo ngkmal dirk ngeasek, e dirrek el metitur el mengedecheduch er a remechuodel el chad er a beluu el tir a klou a klemedengei er tir er a betok el tekoi, e dirrek el olab a ngarbab el deruchall er a omengedereder. (Jeremia 1:6) Ngmle kirel el mo ouchais er a rechad el kirel a meringel el omelebeakl er a Jehovah el mo er tir, e dirrek el ouchais er tir el kirel a kerrekeriil el mochu er ngii, el ileakl el kirel el mesubed aika el tekoi el mo er a reprist me a reklsuul profet me a remengeteklel a beluu, el mo lmuut er tirke el sorir el “di melemolem a omerellir” me a dirrek el tirke el “di ngemokel a chebirukel el sisebel a udoud.” (Jeremia 6:13; 8:5, 6) A merael a chisel el templo er a King Salomon el ngii a mle blil a bliochel el omengull er a chelsel a bekord el eua el dart el rak a mle kirel el mo metemall. Me a Jerusalem me a Juda a mo cheloit el beluu, e a rechad er ngii a mo mengai el mo blebaol er a ta er a beluu. Me tiang a meketeklii el kmo a klumech el mloterekokl er a Jeremia el kirel el mo ouchais a kmal mle orechudel er sel taem!
Ngtechang A Obo Moltirakl Er Ngii—Dios Me a Lechub E Ngchad?
18 A Dios a millekoi er a profet el Jeremia el kmo: “Ngak a mo obengkem el mo mesebechakl er kau.” (Jeremia 1:8) Ngmekerang a Jehovah e mesebechakl er kid er a odechelakl er a chelecha el sils? Nglocha sebechel el ousbech er a tabesul a uldesuel el chad er a kerrekeriil el ua Gamaliel. Me a lechub e ngsebechel el mesa el kmo a ta er a omtok el merreder a mo mutechei er a kuk ta er a chad el oba tabesul el uldasu. Engdi lebebil er a taem, e a Jehovah a mo kongei er a rechedal el mo modechelakl. (2 Timoteus 3:12) Me alta e a Jehovah a mechikid me kede modechelakl, engdi ngmo meskid a klisiich me bo lsebeched el outekangel. (1 Korinth 10:13) Me a ngii di el ngerang el lekengei er ngii a Dios, e ngulterekokl a rengud er aike el mo duubech er a orekil: Tirke el omtok er a rechedal a Dios a omtok er a Dios, e a ruumtok er a Dios a diak bo lekats.
jr-E 88 par. 14-15
‘Ak Mo Smisiicheterir Tirkel Mesulang’
KE MO MELISIICH ER TIRKE EL MESULANG?
14 Ngsoad el mo kerekikl el melatk er a rolel e a Jeremia a ngilai a omelisiich me a dirrek el rolel e ngmillisiich er “tirkel mesulang.” (Jer. 31:25) Ngika el profet a ngilai a omelisiich er a Jehovah. Ke locha omelechesiu er kau el kmal mocha mesisiich a lsekum ke rirengesii a Jehovah el melekoi el kmo: “Chelechal sils e ak rullau . . . mo ua oucheuatel beluu . . . Ng diak el sebechir el mo mesisiich er kau, ele ngak a mo obengkem el mesebechakl er kau. A ika tekingek, ngak el Rubak.” (Jer. 1:18, 19) Me a Jeremia a kmal mle ulterekokl a rengul el melekoi el kirel a Jehovah el kmo “ng kau a omecheliu er ngak e melisiich er ngak; kolengeseu er ngak er a belsechel a chelebuul.”—Jer. 16:19.
15 Ngutebengall a tekingel a Jehovah el mo er a Jeremia el kmo: “Ngak a mo obengkem.” Ke mtebengii a tekoi el sebechem el rullii a lsekum a chad el modengelii a ousbech a omelisiich? Nglocha sebeched el mesa el kmo a ta er a odam, e ngodos me a lechub a ta er a chedal a telungalek er kid a ousbech a omelisiich, engdi ngkuk ta er a tekoi a lsekum e kede mo olengeseu er tir. Me nguaisei, oumesingd el taem e te ousbech er kid el mo obengterir el ua Jehovah el ulebengkel a Jeremia. Mosiik er a ungil taem el sebechem el mo melisiich er tir engdi diak el bo el betok a tekoi el molekoi. A di mekesai el tekoi a sebechel mo ngosuterir a lsekum e ngmelisiich er tir. Tia diak el belkul a kmo ngkirel kmal mo dmolech a tekingem. Sel mousbech a di beot el tekoi el olecholt el kmo komdasu er tir, e soam el olengeseu er tir, e betik a rengum er tir, e seikid a kot el ungil.—Monguiu er a Osisechakl 25:11.
Morriter er a Tekingel a Dios
Omesodel a Babier er a Jeremia
2:13, 18. A rumtok el Chad er a Israel a riruul a teblo el kmal mekngit el tekoi. Te chilitii a Jehovah, el ngike el uchul a klengeltengat me a ulekrael me a ulekerreu. E di mle tir el mengiis er a chido er tir er a lomak a delongelir tir me a Rechad er a Egipten me a Asiria. Me chelecha el taem, e sel dechitii a mera el Dios e dosiik a llomes me a uldasu er a klechad me a tekoi er a balatiks e ngdi ua domtechei er a “madedok er a beches el ralm” er a “chemars el chido.”
Omesodel a Babier er a Jeremia
4:10; 15:18—Ngoeak a ngera el rolel e a Jehovah a ‘chilebeldeterir’ [“milengeuid er tir,” NW] a rechedal? Ngmla er ngii a reprofet el “di melekoi a blulak” er a taem er a Jeremia. (Jeremia 5:31; 20:6; 23:16, 17, 25-28, 32) A Jehovah a dimlak lolekebai er tir er a lomerk a klsuul el tekoi.
March 13-19
MEKREOS EL TEKOI EL NGAR ER A BIBLIA | JEREMIA 5-7
“Te Mlo Diak Loruul a Soal a Dios”
w88-E 4/1 11-12 par. 7-8
Jeremia a Profet el Dimlak a Soal el Orrenges er Ngii e le Nguluuchais a Kerrekerilel a Dios
7 A Jehovah a dilu er a Jeremia el kmo: “Ng diak el sebechir el mo mesisiich er kau, ele ngak a mo obengkem el mesebechakl er kau.” (Jeremia 1:19) Ngera uchul me a Rechijudea me a remengeteklir a mle sorir el omtok er ngika el profet? E le tekingel a Jeremia a ulecholt aike el omengull er tir el kmo te di mirruul e le ngmle siukang er tir. A Jeremia a mle bekeu el melekoi el kmo: “Ng medecherecher a rengrir e diak el sorir el orrenges a klmechem. Ng tuobed a cherrir er a ikel mdu er ngak mak melekoi er tir. A re meklou ma re mekekerei a dul di ngemokel a chebirukel el sisebel a udoud. Ng mo lmuut er a re profet ma re prist me te mengeblad er a re chad.”—Jeremia 6:10, 13.
8 Me nguaisei, alta te milengelechel er a renged el mo meruul a tenget engdi ngdimlak el ngar er a rengrir a meruul. A siukang er tir a lmuut el mle klou a ultutelel er a melemalt el omeruul. A osisiu el taem, e a remengeteklel a klechelid a di milengebelung er a rechad el kmo, “Ng budech, ng budech” engdi mera er ngii ngdimlak a budech. (Jeremia 6:14; 8:11) Ochoi, te ulumulak er a rechad el kmo ngmle budech a delongelir tir me a Dios. Te ulemdasu el kmo ngdiak a mekngit el duubech el mo er tir e le Jehovah a ulsebelterir, e tir a mla er a chedaol mats e uleba templo. Engdi ngmle ua ngerang a osengel a Jehovah el kirel tiang?
w88-E 4/1 12 par. 9-10
Jeremia a Profet el Dimlak a Soal el Orrenges er Ngii e le Nguluuchais a Kerrekerilel a Dios
9 A Jehovah a dilu er a Jeremia me bo el dechor er a medal a templo er a basio el sebechir a rokui el chad el mesang, e louchais er a klemechel a Jehovah el mo er a rokui el mo tmuu er a templo. Ngmle kirel louchais er tir el kmo: “Le mereko e lak moumerang a ikal blulak el tekoi el kmo, ‘Tia Templo er a Rubak, tiang a Templo er a Rubak, tiang a Templo er a Rubak!’ . . . kom oumerang a diak a belkul.” A Rechijudea a dimlak el lorael el ngar er a klaumerang, e di ulemdasu el kmo a templo a mo olsobel er tir. Te ulebes a tekingel a Jehovah el kmo: “A eanged a kingellek er omerreder, ma chutem a deruchellel ochik. A le ua isei e ng ngeral . . . blai a sebechiu el mekedecherur el kirek, ng ua ngeral basio a bo kkiei er ngii?” A Jehovah, el ngii a Merreder er a eanged me a chutem, a diak el kiei er a templo er tir, alta e ngkmal mle klebokel!—Jeremia 7:1-8; Isaia 66:1.
10 A Jeremia a millemolem el melekoi el kmo: “Kom merechorech, e omekoad, e mor a laokreng, e melekoi a blulak el oba osichel a tekoi, e melenget a tenget el mor a Baal, e mengull el meluluuch a ngodech el chelid el diak modengei a blekerdelel. . . . e sola e mei el me dechor er medak el ngar a Templo er ngak e kmo, ‘Ng ungilbesmam el diak kim mekesakl!’” A Rechijudea el tir a mle ngellitel el chedal a Dios a ulemdasu el kmo a Jehovah a di kongei er tir a lsekum e te millemolem el melenget er a templo. Engdi a lsekum te ulemdasu el kmo a Jehovah a melemolem a blekerdelir el ua chedam el mengeleoch er a di ta el ngelekel e te kmal mo kibetiekl!—Jeremia 7:9, 10; Exodus 19:5, 6.
jr-E 21 par. 12
Mesiou el Ngar er “A Ikel Mei el Sils”
12 Ngar er a uchelel a omengederederel a Jehoiakim, e a Jehovah a dilu er a Jeremia el mo er a templo e lolecholt a kngterir a Rechijudea. Te ulemdasu el kmo a templo a mle melusch me ngdimlak a mekngit el sebechel el duubech el mo er tir. Me nguaisei, a lsekum e ngdimlak lechoit aike el blekerdelir el “merechorech, e omekoad, e mor a laokreng, e melekoi a blulak el oba osichel a tekoi, e melenget a tenget el mor a Baal, e mengull el meluluuch a ngodech el chelid,” e a Jehovah a mo otngeklii a templo er ngii. Ngdirrek el mo meruul a osisiu el tekoi el mo er tirke el cheblad el chad el milengull er ngii, el di ua lultngeklii a chedaol el tento er a taem er a Ngarbab el Prist el Eli. A beluu er a Juda “a di mo cheloit.” (Jer. 7:1-15, 34; 26:1-6) Ka di molebedebek er a blekeu el mle kirel a Jeremia el obang el mo ouchais aika el klemechel a Jehovah! Nglocha mle kirel el ouchais aika el tekoi er a mederir a rengarbab el chad er a beluu. A rebebil er a rudam me a rudos er chelecha el taem a dirrek el oba osisiu el blekeu sel lousioning el mo er a buai e longedecheduch er a rebetok a ududir me a lechub e te ngarbab el chad. Engdi ngsebeched el mo ulterekokl a rengud el kmo: a Dios a mo obengked el di ua lulebengkel a Jeremia.—Heb. 10:39; 13:6.
Morriter er a Tekingel a Dios
Kau Ke Mo Merael El Obengkel A Dios?
11 Kid kede mera el kongei er a Tekingel a Dios me lomekrael er kid? Me ngklou a ultutelel a bo dekerekikl el merriter er kid. Ka molatk er a bades el sebechel el ngosukid: “A Rubak a dmu er a re chedal el kmo, ‘Bo mdechor er a metengal a rael, e momes; mker a ikel rael er a irechar, e mkerir a le ngar ngii sel kot el ungil rael. Bo mokiu ngii e ng mor ngii a budech er kemiu.’” (Jeremia 6:16) Aika el tekoi a kora mekltkid er a chad el merael el mo er a metucheklel a rael e oker er a melemalt el rael. Me ngdi osisiu el kirir a ruumtok er a Jehovah el chad er a Israel a mle kirir el oker a ker. Ngmle kirir el osiik er a rolel el lmuut el mo er aike el “rael er a irechar.” Tia el “ungil rael” a luleltirakl er ngii a reblak a rengrir el demerir er a irechar, engdi a beluu er a Israel a dimlak loltirakl er ngii. Ngmekngit a rengud, e le Israel a dimlak el kengei el oltirakl er a ungil el uleklatk er a Jehovah. A osisiu el bades a melemolem: “Ng di tir a kmo, ‘Ng diak kim okiu ngii!’” Chelecha el taem e a rechedal a Dios a kuk ngodech a nger er tir.
w88-E 4/1 13 par. 15
Jeremia a Profet el Dimlak a Soal el Orrenges er Ngii e le Nguluuchais a Kerrekerilel a Dios
A Juda a Harau er a Blals
15 Ngar er a bekord el 632 B.C.E. e a Asiria a mlo mechitechut er a rechad er a Kaldea me a Media, e a Ekipten a dimlak a kmal klisichir el beluu el ngar er a dimes er a Juda. A odechelakl a mo oeak a diluches el mei. Me a Jeremia a mle kirel el mo ouchais er a Rechijudea a kmal mekngit el chais! “A re chad a ngar a beluu er a diluches el mei; . . . ng kmal mekngit a tekingir e diak a klechubechub er tir. Te kldmokl el kirel a mekemad el omtok er a Sion.” A mlo beches el renged el mo mengedereder a Babilon el ngii a bo lousbech er ngii a Jehovah el mo omals er a Juda.—Jeremia 6:22, 23; 25:8, 9.
March 20-26
MEKREOS EL TEKOI EL NGAR ER A BIBLIA | JEREMIA 8-11
“A Rechad a Sebechir el Mo Ungil a Klengar er Tir a Lultuil er a Jehovah”
it-1-E 555
Kiuri
Ngmla er ngii a teluo el kerrekar el kora teletelel a chad el dechor er a sers el omekdakt a charm me ngdiak el bo er a sers. Me a Jeremia a ulemekesiu a bleob el chederir a rechad er a ngodech el beluu el “ua ikel dechor el orriik a suebek el charm er a sers er a kiuri.”—Jer 10:5.
Te Rua Techang A Mengebkall Er A Dios Er A Chelecha El Sils?
10 Me a omolanges el bedul a eanged me a lechub e ke di omseues aike el bleob el ngar er tia el chutem, e ngkmal meketeklii a olechotel a Dios. (Jeremia 10:12) Me a rengud a kmal kirel el kongei er a tekingir tirke el bleob el ngar er a eanged el melekoi el kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi.” (Chocholt 4:11) Engdi, rebetok el hakase a diak lomes e lolab a ‘medal a rengrir’ er aike el olechotel a Dios, e uldimukl er sel lomes er a mengasireng el teletelel ngii el bleob el lolab a di mederir. (Efesus 1:18) Ngsebeched el mesaod er tia el blekeradel el ua tiang: A lsekum kede chemat er a klebekelel me a teletelel a bleob el meliuekl er kid e sola e dmu el kmo ngdimlak a Klou el Omeob el merruul aikang e tiang a kmal klou el klebelung el tekoi el di ua sodel a desal chemat er a meringelchad el sunga e a osisiu el taem e kede outekangel el dmu el kmo ngdimlak a chad el ousunga er a bechachau el tabolei e rullii el mo meringelchad el klalo. Me tirke el diak el oumerang er a Dios a lolekoi el kirir el kmo “ngdiak a cheldechulir e lsodeterir”!
w15-E 9/1 15 par. 1
Kau Ngdiak el Ungil a Rengum el Kirel a Dios?
Aika el mekngit el blekeradel el domes er chelecha el taem a bleketakl el ochotii el kmo, a rechad a kmal diak el sebechir el di tir el mengedereder er tir. A kabelment er a rechad a diak el sebechel mekdebechii a budech, me a ulekerreu, me a deurreng, te bai mla tomellii tia el beluulechad. Tia kmal ochotii a klemerang el ngar er a Biblia el kmo: “Diak a chad el sebechel el chodereder a blekeklel.” (Jeremia 10:23) Ngdi ta el omengederederel a Dios a sebechel mesterir a rechad a mera el budech, me a deurreng, me a ungilbesul klengar e le tiang a moktek er a Dios.—Isaia 45:18.
Morriter er a Tekingel a Dios
Molemolem el Olekeed er Kau er a Jehovah
16 Ngkmal dmeu a rengud e le kede Sioning er a Jehovah. (Jer. 9:24) E tiang a uchul me kede blechoel el melasem el melilt a ungil tekoi e oltirakl a ngarbab el llechul a Dios. Engdi ngkired el kerekikl me ngdiak bo lekedidai a rengud e domdasu el kmo a uldesued a kuk ngarbab er a uldesuel a Jehovah, e le tia sebechel rullid el mo cheroid er ngii.—Psa. 138:6; Rom 12:3.
Omesodel a Babier er a Jeremia
3:11-22; 11:10-12, 17—Malta e a Samaria a miltemall er a rak er a 740 B.C.E., engdi ngera uchul me a Jeremia er a loltobed er a sbedel el mo er a buai e ngdirrek el milsubed el mo er aike el teruich el klebliil er a diluches? E le telemellel a Jerusalem er sera 607 B.C.E. a mle olechotel a kerrekerilel a Jehovah el mo er a renged er a Israel el rokir, el dimlak el di leblo er a Juda e lemerekong. (Esekiel 9:9, 10) E dirrek, alta e ngmla metemall aike el teruich el klebliil er a diluches, engdi aike el omerellir a dirk mla er ngii er a Jerusalem, e le a ruderuchel er a reprofet er a Dios a millemolem el melutk el kirir.
March 27–April 2
MEKREOS EL TEKOI EL NGAR ER A BIBLIA | JEREMIA 12-16
“A Rechad er a Israel a Ulebes er a Jehovah”
jr-E 51 par. 17
Momekerreu er Kau er a Rengum el Ngii a Cheblad
17 A ngerachel el mlo er a Jeremia a mle uldimukl er ngii a lolengesenges er a ulekrael er a Jehovah. Ulekum e ke mle Jeremia, e ke mlo kongei a ngii di el ulekrael el mngilai? A ta el taem, e a Jeremia a mle kirel el nguu a olekesongel el linen el lochetii er a debosel. Ongingil, e a Jehovah a dilu er ngii me lorael el mo er a Eufrates. A lsekum e komes er a map e ngsebechem el mesa el kmo, tia el omerael a mle bekord el 300 el mael a klemengetel. Sera lebo er a Eufrates e ngmle kirel el mertii tia el olekesongel er a delongelel a bad, e lmuut el mo er a Jerusalem. E a uriul, e ngliluut el mo er a Eufrates el mo melai er tia el olekesongel. (Monguiu er a Jeremia 13:1-9) Me a klemengetel tia el rokir el omerollel a Jeremia a mle 1,200 el mael. A rengarbab a skulir el chad el merriter a tekoi er a Biblia a meringel er tir a oumerang el kmo a Jeremia a mle rolii tia el omerael el rokir, el ngii a locha mlo melai a betok el buil. (Esra 7:9) Me nguaisei, engdi aika mle tekingel a Jehovah el Jeremia a uleltirakl.
jr-E 52 par. 18
Momekerreu er Kau er a Rengum el Ngii a Cheblad
18 Ka molebedebek er ngika el profet el merael er aike el rois er a Juda, e a rael el lokiu ngii a locha dirrek el mirrael er aike el cheliliik el beluu el mo er a Eufrates. E ngika mirruul aikang me bo el sebechel el mertii tia el olekesongel el linen! A retonari er ngii a locha mlo rrau a rengrir el kmo ngerang me ngkmal meketeketa er a ledibus. E a luut er ngii, e ngdimlak lobang tia el olekesongel. Me a Dios a kuk luueta el kmo, morael el mo nguu a olekesongel el ngii a “mla mo mechut el dikea ultutelel.” Nglocha kmal mle beot er ngii a mo omdasu el kmo: ‘Tia kora kmal klou el ureor el kirel a diak a belkul el tekoi.’ Engdi a Jeremia a dimlak el lomdasu el uaisei e le ngkilengei er a Dios el mo mesmechokl er ngii. Me ngbai riruul a rokui el dilu er ngii a Jehovah.
jr-E 52 par. 19-20
Momekerreu er Kau er a Rengum el Ngii a Cheblad
19 A ongeru el taem er a lebo er a Eufrates a Jeremia, e a Jehovah a silodii el mo er ngii a belkul tia el tekoi. A blekeradel el bla er ngii a Jeremia a ngilsuir el mo ouchais er a meringel el klemechel a Dios el kmo: “Tirka mekngit el chad el chiloit a tekingek, e millecherecher a rengrir, e di uleltirakl a ikel sorir me te mlo mengull el meluluuch e mesiou a ngodech el chelid. Te di mo ua ikal mekedeb el ochil a bail el di mo diak a ultutelel.” (Jer. 13:10) Tiang ngdiak el kmal ungil rolel a lolisechakl er a rechedal? A blekongesenges er a Jeremia el mo er a Jehovah er tia el kora ua lekekerei el tekoi a mla er ngii a rellii er a moktek er a Jehovah el melasem el merutech a rengrir a rechedal.—Jer. 13:11.
20 A Rekristiano er chelecha el sils a diak lorael a kemanget el omerael me bo lengai a klubelir er a ulekrael el mla er a Jehovah. Engdi a tekoi el moruul ngsebechel el mo uchul me a retonari er kau, me a rechad el moureor el obengterir, me a lechub tirke el omdak el ngar er a skuul, a mo rrau a rengrir me a lechub e te mo mesaod er kau? Ngsebechel el rolel a omoubail, me a uldesuem el kirel a skuul, me a ureor el molilt, me a lechub a osengem er a usbechel a rrom. Kau ke mo rullii er a rengum el mo oltirakl a ulekrael er a Dios el ua Jeremia? A omelilt el moruul e le kau el mla kongei er a Jehovah me ngmesmechokl er kau a sebechel mo uchul a ungil el sioning. Me nguaisei, sel molengesenges a ulekrael el ngar er a Tekingel e mkengei a ulekrael el mla er a blak a rengul el mesiou e ngmo uchul a klungiolem el diak a ulebengelel. Me ngsoad el mo ua Jeremia el dimlak el di ngii el mengeblad er ngii, e mo kongei er a Dios me ngmesmechokl er kid el mo ua bekai el sebechel el ousbech er ngii.
it-1-E 1121 par. 2
Deboes
A Jehovah a ulemekesiu er a klebliil er a Israel me a Juda el ua olekesongel el llechotel er a debosel, te kmal mle kmeed er a bedengel el uchul a klebkellel me a klebekelel. (Jer 13:11) A ulaoch a mesaod er a Jesus Kristus el mengedereder el llechotel er a debosel er a olekesongel er a llemalt me a blakerreng. E tia locha mesaod er a klisichel a Jesus Kristus el blechoel el dmak loureor el lobengkel a llemalt me a blakerreng. Ngdi ua olekesongel el olengeseu er kid, tia el blekerdelel a Jesus el melemalt a tekoi el loruul a melisiich er ngii el mo meruul er a ngerechelel el Chad er a Kerrekeriil er a Jehovah.—Isa 11:1, 5.
Morriter er a Tekingel a Dios
jr-E 118 par. 11
Kau Ngbek El Sils El Moker El Kmo, “Ng Ngar Ker A Rubak?”
11 A Jeremia er a lomes er a remekngit el lungilbesrir, e ngmla er ngii a ker el di milengesang er a uldesuel. (Monguiu er a Jeremia 12:1, 3) Me alta ngdimlak loukerrekeriil er a llemeltel a Jehovah, engdi a Jeremia a mle soal el mo medengelii a nger er a ‘keril.’ Ngii el mle sebechel el bleketakl loker er a Jehovah a ochotii el kmo, ngkmal mle kmes a deleongel el tir el terung el di ua chedam me a ngalek. Jeremia a dimlak el sebechel el mtebengii el kmo, ngera uchul me a Rechijudea a di merael el mo ungilbesrir alta te di meruul a mekngit. Me a Jeremia ngmlo medengelii a nger er a keril? A Jehovah a milengelaod er a Jeremia el kmo, ngmo ngoititerir el mo er cheroid el ua beldull el dellomel. (Jer. 12:14) Me a Jeremia er a lomes a otutel a tekoi el lululuuch el mo er a Jehovah el kirel, e nglocha kmal mlo ulterekokl a rengul er a melemalt el rolel a Jehovah a loukerrekeriil a tekoi. Me nguaisei, a Jeremia a locha mlo blechoel el meluluuch el mesaod aike el rokui el ngar er a uldesuel el mo er a Demal.
Bo Bekeu el Ua Jeremia
Mo Klekar er a Klausechelei er Kid
16 A Jeremia a ouchais er a ta er a tekoi el ngilsuir el mo bekeu. Ngdilu el kmo: “Ngdimlak kungoit a temek el obenterir ar ngodech el chad el ocherechur e kuldeu ra renguk er tial klengar. Ngureor el cho bilskak a uchul mak di mle ileakl el mui ra ngasecherreng.” (Jeremia 15:17) A Jeremia a mle soal el di mle ileakl er a bai bo loruul a delengerenger el obengterir a remekngit el sechelil. Kid er a chelechang me kede oba uaisei el uldasu. Ngdiak dobes er a uleklatk er a Paulus el kmo “A mekngit el klausechelei a tomii a ungil blekeradel,” el mo lmuut er a ungil blekeradel el dullab er a betok el rak el me er a chelechang.—1 Korinth 15:33.