Reference el kirel a Subeled er a Miting er a Klengar me a Omesiunged
February 6-12
MEKREOS EL TEKOI EL NGAR ER A BIBLIA | ISAIA 47-51
“A Dolengesenges er a Jehovah e Ngmo Uchul a Klengeltengat”
ip-2-E 131 par. 18
A Jehovah a Olisechakl er Kid el Mo Uchul a Klungioled
‘Morrenges a Tekingek!’
18 A chedaol reng er a Jehovah a millisiich er a Isaia el mo melekoi el kmo: “Chelechang e a Rubak el Dios a mla meskak a klisichel e oderchak. A osebeliu el Rubak el Dios el di tal chedaol er a Israel a kmo, ‘Ngak a Rubak el Dios el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiu ngii.’” (Isaia 48:16b, 17) Aika el tekingel a Jehovah el mo er a renged er a Israel a oterekokl a rengrir el kmo a Jehovah a kmal betik a rengul er tir e mo olsobel er tir er a Babilon. Ngii a Osebelir. (Isaia 54:5) A urungulel a Jehovah a kmo a rengalek er a Israel el lluut el mo ungil a deleongel er tir el obengkel e bo lorrenges a tekingel. A mera el omengull a mengai a uchetemel er a dolengesenges a llechul a Jehovah. A rengalek er a Israel a diak el sebechir el merael er a melemalt el rael a lak el mosisechakl el mo merael er a ‘rael el kirir el okiu ngii.’
ip-2-E 131 par. 19
A Jehovah a Olisechakl er Kid el Mo Uchul a Klungioled
19 A tekingel a Jehovah a ochotii el kmo ngsoal a rechedal a lebo el cheroid er a telemall e bo loldeu a rengrir er a klengar. Ngmelekoi el kmo: “Ulekum me kom rirenges a tekingek! Seikid e a budech er kemiu a omaoch el ua omoachel ma llemeltiu a ua chedesaoch er a daob.” (Isaia 48:18) Tia kmal klebokel el olechotel a bltkil a rengul ngika el kmal mesisiich el Ulemeob! (Duteronomi 5:29; Psalm 81:13) Me a rengalek er a Israel a mo diak el blebaol, e te bai mo oldeu a rengrir er a budech el ua omoachel el di omaoch. (Psalm 119:165) E a ungil el omerellir a diak lengemed el ua chedesaoch er a daob. (Amos 5:24) A Jehovah a kmal omekerreu er tir me ngolecholt er a melemalt el rael e olengit er tir el mo okiu ngii. Ulekum me te mo orrenges a tekingel!
ip-2-E 132 par. 20-21
A Jehovah a Olisechakl er Kid el Mo Uchul a Klungioled
20 Ngera el klengeltengat a mo er ngii a lsekum e te obult? A Jehovah a melekoi el kmo: “Ma ruldidellel a rsechiu a mo ua ildisel a chelechol, e ngak a mo kerekikl er tir me ng diak le ngemed.” (Isaia 48:19) A Jehovah a ulemeklatk er tir el kirel a telbilel el mo er a Abraham el kmo ngmo betok a ruldidellel a rsechel “el mo ua ildisel a btuch er a eanged ma lechub e ng chelechol er a rriil.” (Genesis 22:17; 32:12) Engdi a ruldidellel a rsechel a Abraham a dimlak lorrenges e dimlak el rredemelel a mo nguu a otutel tia el telbiil. Tir el kmal dimlak lolengesenges a llechul a Jehovah a uchul me ngbai mle kirel ngii el renged el mekimd el mo diak. (Duteronomi 28:45) Engdi a Jehovah a diak el soal a rechedal a lemokngemed, e dirrek el diak el soal el mengoit er tir.
21 A omellach el mlo er tir a dirrek el mo er a remesiungel a Jehovah er chelecha taem. A Jehovah a uchul a klengar me Ngii a kmal ungil medengei el kmo ngerang a ungil el rolel e ngsebeched el ousbech er a klengar er kid. (Psalm 36:9) Ngdiak lomeskid a ulekrael e le Ngii el chetil a doldeu a rengud, e ngbai omeskid e le nguchul a klungioled. A remera el Kristiano a osiik a ulekrael el mla er a Jehovah. (Mika 4:2) Aika el ulekrael a omekerreu er a deleongel er kid me Ngii e ngosukid el mo oltngakl a ongetikaik el mla er a Satan. Sel bo doba omereng el saul el kirel aika el omellach el dengai er a llechul a Jehovah, e ngsebeched el mesa el kmo aike el rokui el lolisechakl er kid a Jehovah a di mo uchul a klungioled. Kede medengei el kmo a “llechul a diak le meringel” me kid a sebeched el mo kiei el diak a ulebengelel.—1 Johanes 2:17; 5:3.
Morriter er a Tekingel a Dios
Omesodel a Babier er a Isaia—II
49:6—Ngmekerang a Mesias e mo “llomes el mor a bek el beluu,” alta sera lengar er a chutem e a omesiungel a di mlo er a rengalek er a Israel? Tiang a mlo uaisei el oeak a tekoi el dilubech er a uriul er a kodellel a Jesus. A Biblia a oltaut er a Isaia 49:6 el mo er a redisaiplo er ngii. (Rellir 13: 46, 47) Chelecha el taem, e a rengellitel el Kristiano, me a klou el seked el olengeseu er tir, a mesiou el ua le “llomes el mor a bek el beluu,” el omekllomes er a rechad er a “beluulchad el rokir.”—Mateus 24:14; 28:19, 20.
it-1-E 643 par. 4-5
Dertel a Chebechiil
Okesiu el kirel a Dertel a Chebechiil. A Biblia a ousbech er a deleongel er a reteru el chad el bechiil el ua el okesiu. (Isa 54:1, 5, 6; 62:1-6) Ngdirrek el ngar er ngii a omesodel a okesiu el kirel a dertel a chebechiil me a loldik er a bechiil el redil.—Jer 3:8.
A renged er a Juda a milechoit me a Jerusalem a miltemall er a rak er a 607 B.C.E., e a rechad el mle kiei er a beluu a milengai el mo blebaol er a Babilon. Betok el rak er a uchei, e ngngar er a ulochel a Jehovah el mo er tirke el mo blebaol el Rechijudea, e ngdilu el kmo: “A le ua isei, e ng ngar ker a babier er a dertel a chebechiil?” (Isa 50:1) Ngika el “bechil” el ngii a derrir me a lechub e tia el cheldebechel el rokir a mlo er cheroid e le tir el tilemall a Llach er a telbiil, ngdiak el Jehovah a tilemellii a telbilel e mirrort er a chebechiielir. Engdi ngmla er ngii a remekesai el chad er a Israel el ulebult e milluluuch el sorir el lmuut el mesumech er a delongelir tir me a Jehovah er a belurir. A Jehovah a liluut el ngoititerir el mo er a Jerusalem er a rak er a 537 B.C.E. el ngii a mlo ulebengelel a 70 el rak er a lecheloit el ua lemedung er a ulaoch. A Jehovah a mirruul aika el rokui el tekoi el kirel a ngklel.—Psa 137:1-9; momes er a MARRIAGE.
February 13-19
MEKREOS EL TEKOI EL NGAR ER A BIBLIA | ISAIA 52-57
“A Kristus a Mlo Chuarm el Kired”
w09 1/1 26 par. 3-5
A Mesiungel a Jehovah—“Mlechetechat el Kngtid a Uchul”
Te “Ultubii” e “Ulekor er Ngii el Di ua Lak le Chad”
3 Monguiu er a Isaia 53:3. Ka di molatk er sel omerellel a di ta el Ngelekel a Dios el mle kirel el choitii a delengcheklel er a eanged er a bita er a Demal, e mlei er tia el chutem el mo tongetengii a klengar er ngii el kirel a osebelel a klechad er a klengit me a kodall! (Filipi 2:5-8) Sel omeruul el melenget a charm el ngar er a cheungel a Llach er a Moses a di mle chungel a mera el mei el tengetengel a Jesus el ngii a mlo uchul a mera el klausubes er a klengit. (Hebru 10:1-4) Me a Rechijudea a kmal mle kirir el loutkeu e mengull er ngika el telbiil el Mesias. (Johanes 6:14) Me nguaisei engdi a Kristus a ‘mlotuub’ er a Rechijudea, e te dirrek el “ulekor er ngii el di ua lak le chad,” el ua lulemlaoch a Isaia. A apostol el Johanes a milluches el kmo: “Ngii a mlei ra belulechad er ngii, e ar chedal a dimlak le nguu.” (Johanes 1:11, BT) A apostol el Petrus a uluuchais er a Rechijudea el kmo: “[A] Dios rar mla mad el demad a kilebkellii a mesiungel el Jesus, e kemiu a ulterekeklii e okor a tikingel a Pilatus er medal ra bo lsoal melubet er ngii. E kemiu a dimlak mnguu ngiil Chedaol e Melemalt.”—Rellir 3:13, 14, BT.
4 A Isaia a dirrek el ulemlaoch el kmo a Jesus a mle sebechel el medengei a secher. Ngar er a omesiungel, e a Jesus alta e ngmlo mesaul a bedengel, engdi ngdiak a olechotel el kmo ngmlo smecher. (Johanes 4:6) Me nguaisei engdi ngii a mle sebechel el melechesuar a ringelir tirke el smecher el lulisechakl er tir. Ngkmal mlo chubteterir e ulemekungil er tir. (Markus 1:32-34) Misei, e ngultutii a ulaoch el kmo: “Ngdi ngii a miltekengelii a rengul el chuarm er a mle kired el chuarm er ngii; ma ringel el mle kired el oltekau er ngii.”—Isaia 53:4a; Mateus 8:16, 17.
Ngua ‘Blo Lecharm el Kerrekeriil el Mlar a Dios el Mor Ngii’ a Uchul
5 Monguiu er a Isaia 53:4b. Ngbetok el chad er a taem er a Jesus a dimlak lodengelii a uchul e ngmlukringel e mlad. Te uluumerang el kmo a Dios a ulemlals er ngii. (Mateus 27:38-44) A Rechijudea a ultelecheklii el kmo nguleltuub er a Dios. (Markus 14:61-64; Johanes 10:33) Me nguaisei, engdi a Jesus a dimlak el mekngit me a ka luleltuub er a Dios. Engdi sel klou el bltkil a rengul el mo er a Demal a rullii ngii el Mesiungel a Jehovah el mo chuarm a uldesuel sel lolatk el kmo ngmo mad el ua luleltuub er a Dios. Me nguaisei, engdi ngii a kilengei el rullii tia el soal a Dios el tekoi.—Mateus 26:39.
w09 1/1 27 par. 10
A Mesiungel a Jehovah—“Mlechetechat el Kngtid a Uchul”
“Ng ua Ngelekel a Sib el Kmedul mo Mokoad”
10 Monguiu er a Isaia 53:7, 8. Me a Johanes el Techolb er a lomes er a Jesus el mermang, e ngdilu el kmo: “Mesa Ngelekel a sib ra Dios, el melai a kngtil a belulechad el mengeroid!” (Johanes 1:29, BT) Me a lolekoi er a Jesus el ua Ngelekel a Sib, e ngmillatk a tekingel a Isaia el kmo: “Ng ua ngelekel a sib el kmedul mo mokoad.” (Isaia 53:7) A Isaia a ulemlaoch el kmo: “Ng di mle ungil er a rengul el odersii a klengar er ngii.” (Isaia 53:12) Me nguaisei, ngar er sel kesus er a longetmokl er a Chedaol Belsoil er a kodellel, e a Jesus a milsterir tirke el 11 el blak a rengrir el apostol er ngii a kob er a bilong e dilu el kmo: “Tia rsechek, el rasech era beches el telbiil, el mo moitel el kirir ar betok el kirel a chitel a klengit.”—Mateus 26:28, BT.
w09 1/1 28 par. 13
A Mesiungel a Jehovah—“Mlechetechat el Kngtid a Uchul”
Ngii el Mesiou a “Rulleterir [a Rechad] Me Ng Mo Blak a Rengrir”
13 Monguiu er a Isaia 53:11, 12. A Jehovah a millekoi el kirel ngii el ngellitel el Mesiungel el kmo: “Ingii a melemalt el mesiungek; . . . [ng] rulleterir me ng mo blak a rengrir el chedak.” El oeak a ngera el rolel? A ulebongel er a bades er a 12 a meskid a omesodel. Ngii el Mesiou a “ulumtechei er a re betok el mekngit el chad.” A rokui el ngelekel a Adam a di mechell e ngar er a klengit, el “mekngit” el chad, me te mo nguu a “uduudel ra klengit” el ngii a kodall. (Rom 5:12; 6:23, BT) A smechel a deleuill er a rediak lemecherrungel el chad me a Jehovah a klou a ultutelel. A ulaoch el ngar er a 53 el bliongel er a Isaia a kmal ungil el smodii a Jesus el ngii a ‘ulemtechei’ er a klechad el ngar er a klengit, el kmo: “A blals el le chilarm er ngii a mla rullid el mo mimokl, a chelebed el le ngilai omekungil er kid.”—Isaia 53:5.
Morriter er a Tekingel a Dios
w06-E 3/15 11 par. 2
“Chokesiu” el Ngar er Ngii a Belkul el Kired
Ngomtechei er techang a “kebai el dil” el Sara me a ngelekel er a Isak? A Paulus a dilu el kmo a Sara el ngii a “kebai el dil” a omtechei er a bechil a Jehovah el ngii a tedebechel a cheldebechelel a Jehovah el ngar er a eanged. Ngika el redil a mle kebai, el belkul a kmo a Jesus er a uchei er a lemei er a chutem, e ngdirkak a mengilt el okiu a chedaol reng el mo “ngelekel” ngika el redil el ngar er a chutem. (Galatia 4:27; Isaia 54:1-6) Me nguaisei, engdi ngar er a Pentekost er a rak er a 33 C.E. e a chedaol reng a mloitel er bebrir a kekerei el delebechel er a resechal me a redil el tir a mlucheluch er a chedaol reng el mo ngelekel ngika el redil. Tia el klengelakel el mlo er ngii el okiu tia el cheldebechel a mirrodel el mo ngelekel a Dios e mlo oudiukes el mo obengkel a Jesus Kristus el ngar cheungel a beches el telbiil el obengkel a Dios. (Rom 8:15-17) A ta er tirka el ngelekel a Dios el apostol el Paulus a mle sebechel el meluches el kmo: “Sel Jerusalem el ngarbab a mimokl dil, el ngii a delad.”—Galatia 4:26, BT.
Omekeroul er a Klengariourreng
Sel Kot el Ngar er a Bab el Kerebai er a Klengariourreng
3 A Jehovah a kot el ngar er a bab e kedidai, engdi “a osengel a Rubak a mekelekelii a beluulchad el rokir, me ng omesterir a klisichir tirkel blak a rengrir er ngii.” (2 Kronika 16:9) A Jehovah ngmekerang sel lebetik er a remechebuul el chedal el chuarm a rengrir er a betok el ongarm? Me ngii a ua bo “le kiei” el obengterir choua itirkang el oeak a chedaol reng er ngii, me seikid e ngii a “lmuut el omekngar a reng er tir e melisiich a rengrir.” (Isaia 57:15) Me a leuaisei, e tirka el mla mo mesisiich el mesiungel a mo sebechir el lmuut el mo mesiou er ngii el oba deurreng. Ngkol ua ngera el klengariourreng a lolecholt er ngii a Dios!
February 20-26
MEKREOS EL TEKOI EL NGAR ER A BIBLIA | ISAIA 58-62
“Mesubed el Kmo a Taem a Mla Mei el Rubak a Mo Olsobel”
ip-2-E 322 par. 4
Lmuut el Mo er Ngii a Llemalt er a Sion
“Taem a Mla Mei el Rubak a Mo Olsobel”
4 A Isaia a milluches el kmo: “A Reng er a Rubak el Dios a ngar ngak. Ng mla ngiltak e oderchak el oba ungil chais el mor a re mechebuul, el mo omkar a chelemuurreng, e mo mesubed er a ngbetir a re mlengai el mo blebaol, ma otebedir a re kelebus.” (Isaia 61:1) Ngtecha ngike el mla mengilt el mo ouchais er a ungil chais? Nguaisei, nglocha Isaia el ngii a mlukreng el mo meluches er tia el ungil chais el mo er tirke el blebaol er a Babilon. Engdi a Jesus a ulechotii sel kot el klou a ultutelel el otutel tia el ulaoch er a lulsaod el kmo tia el ulochel a Isaia a melutk er ngii. (Lukas 4:16-21) Ochoi, a Dios a ulderchii a Jesus el mei er tia el chutem el mo ouchais er a ungil chais el mo er a remedemedemek el chad me a uchul e ngmlucheluch er a chedaol reng er a taem er a lemetecholb.—Mateus 3:16, 17.
ip-2-E 326-327 par. 13-15
Lmuut el Mo er Ngii a Llemalt er a Sion
13 Ngulemuchel er a rak er a Pentekost er a 33 C.E., e a Dios a millalem er tirke el “meloseb el ua kerrekar” el tir a rengellitel el Kristiano el ngar tia el beches el renged, el “Israel ra Dios.” (Galatia 6:16, BT) Ngar er a chelsel aika el betok el dart el rak, e a ulecherengelir tirka el “meloseb el ua kerrekar” a 144,000, e tir a omekdubech a rodech er a reng el ngii a menglebokel me a lechub e ngmengebkall er a Jehovah el Dios. (Ocholt 14:3) Tirke el oeakuriul el “kerrekar” a meloseb er a chelsel aika el mla mo merek el rak el ulemuchel er a 1919. Tia sel taem el Jehovah a mlo olekiis er tirke el mle medechel el chedal a Israel er a Dios el tir a milechiuaiu. A Jehovah a milsterir a betok el tekoi er a klereng e ulemekdubech a betok el kerrekar el bekerredechel el meloseb e omung.—Isaia 27:6.
14 A Isaia er a losaod el kirel a urerir tirka el “meloseb el ua kerrekar” e ngmelemolem el melekoi el kmo: “Te mo lmuut el toketek a ikel beluu el mle meketeket el telerruud.” (Isaia 61:4) Ngar cheungel a tekingel a King el Sairus er a Persia, e a reblak a rengrir el Rechijudea el mle blebaol er a Babilon a mlo remei el mo meleketek er a Jerusalem me a templo, el ngii a meketeketang er a lecheloit. Tia el ureor er a omeleketek a ngar er ngii a olengchelel er aike el merael el mei el rak er a 33 C.E. me a rak er a 1919.
15 Ngar er a rak er a 33 C.E. e a redisaiplo er a Jesus a kmal mlo mekngit a rengrir er a Jesus a bo lekelebus, e lemukerrekeriil, e lemad. (Mateus 26:31) Me nguaisei, engdi te milengodech a uldesuir er a Jesus a bo el duum er tir er a uriul er a okisel. Me a uriul er a lemoitel a chedaol reng er tir, e te mle blak a rengrir el omerk er a ungil chais, el mo er a “Jerusalem, ma Judea el rokir, ma Samaria el mo lmuut ra bek el beluu er a beluulchad.” (Rellir 1:8) Me a bliochel el omengull a liluut el meteketek. Me ngosisiu, ngulemuchel er a rak er a 1919 e a rengellitel el odam er a Jesus a mlo meleketek “a ikel el beluu el meketeket el telerruud.” Ngmlo betok el dart el rak el remengeteklel a klechelid a diak lolisechakl er a klemerang el kirel a Jehovah e bai mtechei a mera el osisechakl el olab a di siukang er tir me a osisechakl el ngii a diak el mengai er a Biblia. Me a rengellitel el Kristiano a milengikiid a ongdibel er a aika el klsuul el osisechakl me bo el sebechel a mera el omengull el melemolem el meleketek. Te dirrek el ulemuchel er a kot el klou el ureor el ousioning el beluulechad el rokir a mla mesang.—Markus 13:10.
A Rechad el Di “Ultechakl” e Dmak el Mengull er a Dios
5 A rebebil a locha mo melatk el kirel sel ulaoch el ngar er a 61 el bliongel er a babier er a Isaia el kirel a ongdibel er a Rekristiano. A 6 el kekerei el bades a mesaod er a rebebil el mo mesiou el “prist er a Rubak.” E a 5 el kekerei el bades a mesaod er a “re chad er a ngodech el beluu” el olengeseu er tir. Ngera uchul me ngmesaod er a “re chad er a ngodech el beluu”?
6 Tirke el “prist er a Rubak” a rengellitel el Kristiano el tir a mo nguu a “kot el okiis” e dirrek el mo “prist er a Dios ma Kristus, e mo mengedereder el obengkel el 1,000 el rak.” (Ocholt 20:6) Ngdirrek el ngar er ngii a lmuut el bebil el Kristiano el omeltkir a mo kiei er a Paradis el ngar a chutem, el tir a mo oureor el obengterir tirke el mo er a eanged. Me tirkang a diak el chedal a “Israel ra Dios” me te ua lechad er a ngodech el beluu. Ngdmeu a rengrir el oureor el obengterir a re “prist er a Rubak” el “meruul a sers” e ‘mengedmokl a sers er a bilong’ er a temel a omeridm. El belkul a kmo te olengeseu er a rengellitel el mengebkall er a Dios sel lomerk er a klumech e lolisechakl er a rebebil el kirel a klemerang. A rengellitel me a ‘rekuk bebil el sib’ a dmak el olisechakl er a rechad el kirel a klemerang e olengeseu er tir el mo oltirakl er ngii.—Johanes 10:16.
Morriter er a Tekingel a Dios
Molengeseu el Meleketek er a Ungil el Blekeradel er a Klengar
14 Cherengel a rak e a remechudelang el ngar er a delongeled a mla mes a bebil el omelodech el ngii a mla lmuut el menglebokel er tia el cheldebecheled. Te dirk melatk er a taem el mla er ngii a di ta el odam el oungerachel a derta el ongdibel er a bai chelechad er a remechuodel. Me sel taem el kakerous el beluu a mla er ngii a di ta el odam el oungerachel er a bai loungerachel a Branch Committee. Me a dirrek el sel taem el ulekrael a mei el okiu a president er a Watch Tower Society er a bai Chelechad er a Ruungerachel. Me alta e te mla er ngii a rullengeseu er tirka el blak a rengrir el odam, engdi ngdi ngii el tang a mle ngerechelel el melilt a tekoi el ketmekill er a chelsel a ongdibel me a branch office me a dirrek el klou el obis er kid. Me ngar er aike el rak er a 1970 e ngmlo er ngii a omelodech el olterekokl a ngerachel el mo er a chelechad er a remechuodel me ngmlo diak di lengerechelel a ta el chad.
15 Me aika el omelodech ngmlo uchul a klungiaol? Ochoi. E ngera uchul? E le aika el omelodech a mileketmokl el oltirakl er a mukeroul el klemedengei er kid er a Bades. Me a omeruul el di millai er a uldesuel a ta el odam a mlo diak, e bai mlo sebechir el odak a ungil el uldesuir a rokui el chad, el tir a “sengk” er a Jehovah el mo uchul a klungiolel a cheldebechelel.—Efe. 4:8, 11; Osi. 24:6.
16 Ka di molatk a lmuut el bebil er a omelodech el dirk mlo er ngii. El ua tiang, a babilenged a kmal mla mo klebokel. Ngdirrek el blechoel el mesaod a semecheklel a mondai el lechelebangel a rechad er chelechang. Kede dirrek el merous el okiu a betok el rolel. Me a chouaika el tekoi a mla rullid me kede semeriar el merous a babilenged. Me sel dousbech a beches el technology el ua sel website er kid el jw.org el ngar er a omesiunged, e kede oukerebai er a Jehovah el ngii a soal a rokui el chad a bo lengai a ulekrael el tir a kmal ousbech.
17 A ta er a klou a ultutelel el omelodech el mlo er ngii a mlo sebechel el mo er ngii a temel a Omengull el Telungalek me a lechub e ngtechelled el mesuub el di kid el tang. Kede dirrek el oba omereng el saul e le prokuram er aika el meklou el ongdibel er kid a kmal mla lmuut el mo ungil! Ngdirrek el kmal ungil a rengud el kirel a lmuut el betok el osisechakl el mei el okiu aike el skuul el oltobed a cheldebecheled. Me ngkmal bleketakl a chimal a Jehovah el oureor el okiu aika el omelodech. Ngkmal blak a rengul el menglebokel er a cheldebechelel me tia el ungil el blekeradel er a klengar el kid a dmeu a rengud el ngar er a chelsel!
Omesodel a Babier er a Isaia—II
Ker er a Biblia a Mlonger:
61:8, 9—Ngerang sel “diak a ulebengelel telbiil,” me a rua techang a “mo merael a chisir”? Tiang a sel beches el telbiil el Jehovah a mla kutmeklii el obengterir a rengellitel el Kristiano. A “[re]merael a chisir” a tirke el “ngodech el chermek el sib,” el tirke el miliol el kongei er a klemechir.—Johanes 10:16.
February 27–March 5
MEKREOS EL TEKOI EL NGAR ER A BIBLIA | ISAIA 63-66
“A Beches el Beluulechad me a Beches el Melidiul a Mo Uchul a Klou el Deurreng”
ip-2-E 383 par. 23
“Di Le Blechoel el Dmeu a Rengmiu er Sel Kumeob er Ngii”
23 Ngar er a babier er a Ocholt, e a apostol el Johanes a mesaod er a ues el lilsang el kirel a sils er a Jehovah, el ngii a taem el Jehovah a mo olekngemed a mekngit el blekeradel er tia el beluulechad. Uriul er tiang, e a Satan a mo obidokl er a diak a btil deliobech. (Ocholt 19:11–20:3) Me a uriul er a losaod el kirel tiang, e a Johanes a ulemelekl er a ulochel a Isaia er a ledu el kmo: “Ak milsa beches el eanged ma beches el beluulchad.” Aike el oeakuriul el bades el kirel tia el mengasireng el ues a ouchais er kid el kirel a taem el Jehovah a mo melodech a blekeradel er tia el beluulechad el mo ungil. (Ocholt 21:1, 3-5) Nguaisei, tia el telbiil el lulsaod er ngii a Isaia a locha kmal mo er ngii a dmolech el belkul er a chelsel a beches el blekeradel! Ngar er a cheungel tia el kabelment el ngar er a eanged, e ngmo er ngii a beches el klechad el mo kiei el ngar er a baradis er tia el chutem el ungil a deleuill er tir me a Dios. Ngkmal mengelaod er kid tia el telbiil el kmo “a ikel dilubech el tekoi er a ngar a mong [secher, me a ringel, me a ngii di el chelebuul el rechad a chuarm] a kmal di mo diak a melatk.” Ngii di el tekoi el bo delatk a diak bo luchul a ringel me a lechub a kngtil a rengud el ngii a tekoi el rechad a kmal chuarm el kirel er chelechang.
ip-2-E 384 par. 25
“Di Le Blechoel el Dmeu a Rengmiu er Sel Kumeob er Ngii”
25 Chelecha taem e a Jehovah dirrek el rullii a Jerusalem el mo uchul a klou el deurreng. Ngmekerang e meruul er tiang? A beches el melidiul, el mileketmokl er a rak er a 1914 a di kmedung e ngmo mecherrungel a ildisir el 144,000 el tir a mo mengedereder el ngar er a eanged. Tirka medung er a ulaoch el kmo te “beches el Jerusalem.” (Ocholt 21:2) Me a Dios er a losaod er tia el beches el Jerusalem e ngdilu el kmo: “A beches el Jerusalem el kuruul er ngii a mo mui er a deurreng, ma re chad er ngii a mo ungil a rengrir.” A beches el Jerusalem a bo lousbech er ngii a Dios el mo omekngeltengat er a rechad el tir a kongei el olengesenges er Ngii. Ngdiak bo derengesii a chad el lemangel e le Jehovah a mo ‘meskid aikel desal oureng er ngii.’—Psalm 37:3, 4.
A Budech el Ta el Telael el Rak e Melemolem!
TE MO TOKETEK A BLAI E DUALEM A SERS ER A BILONG
4 A rechad a sorir el mo er ngii a blirir el sebechir el kiei er ngii tir me a rengelekir el ulekerreu. Engdi ngar er tia el beluulechad e ngkmal meringel el debetik a ungil delengchekled. A rebetok el chad a ketitech er a chelsel a mats. E a rekuk bebil a kiei er a mechut el blai, me a lechub e te betok el chad el kiei er a chelsel a chimo el kekerei el blai. Me te di oureng el mo er ngii a ileakl el blirir.
5 Sel bo longedereder er tia el chutem a Rengedel a Dios e a rechad el rokui a mo er ngii a blirir. A Isaia a ulemlaoch el kmo: “A re chad a mo toketek a blai e mo kiei er ngii; . . . te mo dualem a sers er a bilong, e mo dmeu a rengrir er a bilong.” (Isaia 65:21) A rechad a dirrek el omes el beduluchei el kirel a betok el ungil el tekoi el diak di el delengcheklir e lemerekong. Alta e a rebebil a kiei er a rekeblirir er chelechang e a rekuk bebil a kmal meklou a blirir, engdi te di suebek a rengrir el melatk el kmo ngmo diak el sebechir el mengkad er ngii, me a lechub e te bekikl er a remerechorech a lesiseb el ruchorech a kloklir. Sel lebo longedereder a Rengedel a Dios e ngmo diak a chad el suebek a rengul er chouaika el tekoi. A profet el Mika a dilu el kmo: “A re bek el chad a mo kiei el ngar a budech er bita er a dellemelir el bilong ma kerrekar er tir el fig, el diak a mo omekdakt er tir.”—Mika 4:4.
Morriter er a Tekingel a Dios
Omesodel a Babier er a Isaia—II
63:5—Ngmekerang a cheldechuderreng er a Dios e melisiich er ngii? A cheldechuderreng er a Dios a ultebechel e le ngmelemalt a rolel. Tia el cheldechuderreng a melisiich er ngii el belkul a kmo ngrullii el mo oltaut a melemalt el kerrekerilel.
Becherei a Jehovah Me Losmechokl er Kau
A JEHOVAH A DI UA CHAD EL OMEOB A CHUTEM
3 A Biblia a mesaod er a Jehovah el di ua chad el omeob a chutem e le ngar er ngii a klisichel me a llemeltel el mengedereder er a rechad me a renged. A Isaia 64:8 a kmo: “Kau a Demmam e RUBAK. Kemam a ua chutem e kau a ua omeob olekang. Kulemeob er kemam.” A chad el omeob a chutem a sebechel el omeob er ngii el oltirakl er sel soal, me a chutem a diak el sebechel choderderii ngika el omeob. Me ngdi osisiu el mo er a rechad me a Dios. Ngdiak a llemelted el mengedereder er a Dios el di ua chutem el diak el sebechel el choderderii ngike el omeob er ngii.—Monguiu er a Jeremia 18:1-6.
4 A Jehovah a milsmechokl er a rechad er a Israel el ua chad el omeob a chutem. Engdi ngmekerang a Jehovah e kuk ngodech er a chad el omeob a chutem? Ngmesterir a rechad a ileakl el sengk el ngii a llemeltir el di tir el melilt a tekoi. Ngdiak loruul er a rebebil er a rechad el mo ungil me a rebebil el mo mekngit, me a lechub e lousbech er a llemeltel el mengedereder el orrimel er a rechad el mo olengesenges er ngii. A rechad a bai kirir el di tir el melilt el kmo te kongei er a Jehovah me losmechokl er tir me a lechub e ngdiak.—Monguiu er a Jeremia 18:7-10.
5 E kuk mekerang a lsekum a chad a kedidai a rengul me ngdiak lekengei er ngika el Omeob el Jehovah me losmechokl er ngii? Ngmekerang a Jehovah e oltaut er sel llemeltel el mengedereder er a rechad? A lsekum a omeob a mo meringel er ngii el mebii a bekai e ngsebechel el ngodechii a loruul er ngii me a lechub e nguu el choitii. Tia mo duubech e le ngika el omeob a dimlak lungil el omeob er tia el bekai. Engdi a Jehovah a blechoel el mesmechokl er a rechad el ngar er a melemalt el rolel. (Dut. 32:4) Me a lsekum a chad a diak el kengei er a Jehovah me losmechokl er ngii, e ngkngtil ngika el chad. A Jehovah a mesmechokl er a rechad el oltirakl er a rolel a loruul a tekoi tirka el chad. Me a lsekum te olengesenges er ngii e ngmo sebechel el ousbech er tir. El ua tiang, ngmla mesmechokl er a rengellitel el Kristiano me te mo ua bekai el “mo osongel er a klebekelel.” Engdi ngmo kesib a rengul er tirke el diak lolengesenges a ulekrael er ngii e mo diak el sebechel el ousbech er tir.—Rom 9:19-23.