Reference el kirel a Subeled er a Miting er a Klengar me a Omesiunged
October 2-8
MEKREOS EL TEKOI EL NGAR ER A BIBLIA | DANIEL 7-9
“A Daniel a Ulemlaoch el Kirel a Demiel a Mesias”
it-2-E 902 par. 2
Euid el 70 el Rak
Ngmo diak a chelebirukel me a klengit. A kodellel a Jesus me a okisel me a luut er ngii el mo er a eanged a uchul e ngmo diak a ‘chelebirukel’ me a klengit a musubes. (Dan 9:24) A Llach er a telbiil a ulecholt el kmo a Rechijudea a mla er a klengit me te mildebeakl e le tir el dimlak loltirakl a llach. Me a Llach er a Moses a ulechotii el kmo ngkmal mle klou a klengit, engdi klechubechub me a kengei er a Dios a lmuut el klou el mlocholt el okiu a Mesias. (Rom 5:20) Me ngokiu a tengetengel a Mesias, e a rechad el ulebult er a kngterir a mle sebechir el musubes e mo diak el mutaut er a llach.
it-2-E 900 par. 7
Euid el 70 el Rak
A Mesias a Duum er a Uriul er a 483 el Rak. Me aike el “434 el rak” (Dan 9:25) a mo melemolem er a uriul er a “49 el rak.” Me nguaisei, sel taem er a “le tobed a tekoi el bo lluut el meteketek a Jerusalem el mor sel le mei ngiil ngellitel er a Dios” a mo 49 el rak el uldak er aike el 434 el rak, el belkul a kmo ngmo 483 el rak. Tia ulemuchel er a rak er a 455 B.C.E. el mo er a 29 C.E. Me ngdi ua dulsaod er a uchei, sera October er a 29 C.E., e a Jesus a miltecholb, e mloitel a chedaol reng er ngii, e ulemuchel er a omesiungel el “ngellitel er a Dios.”—Lk 3:1, 2, 21, 22.
it-2-E 901 par. 2
Euid el 70 el Rak
“Mokoad” er a uriul er a edei me a tedobech el rak. A Gabriel a dilu er a Daniel el kmo: “E sel ulebengelel ngiil taem, e ngikel le ngiltii a Dios el mo merreder a mo mokoad el okiu a chelebirukel.” (Dan 9:26) Me ngedei me a tedobech el rak er a uriul er a 483 el rak, e a Kristus a mlokoad er a teluo el kerrekar el mo olubet el tenget el kirel a klechad. (Isa 53:8) A reksi a ochotii el kmo a Jesus a uluusbech aike el edei el rak me a tedobech el meruul er a omesiungel. Nglocha mle October er a rak er a 32 C.E., e a Jesus a milsaod er a okesiu el kirel a kerrekar el fig el dimlak lourodech el “edel rak,” el ngii a locha millutk el kirel a renged er a Juda (momekesiu er a Mt 17:15-20; 21:18, 19, 43). Me ngike el chad er a sers er a bilong a dula er a merrederel el kmo: “Rubak, becherei el lmuut el tal rak; e ak mo kiesii a uchul el meliuekl e locha bebil er a ramek er ngii. Ma lsekum ng mo ourodech er tial mel rak, e ng ungiang; e a lsekum ng di diak, e seikid e mukelii kung.” (Lk 13:6-9) Me a okesiu el lulsaod er ngii a Jesus a locha mle kirel a omesiungel el edei me a tedobech el rak el bedul a renged er a Juda el ngii a dimlak el sorir el orrenges er ngii.
it-2-E 901 par. 5
Euid el 70 el Rak
Me a edei me a tedobech el rak el ngii a mlo uriul er aike el 483 el rak a ulemuchel er a October er a rak er a 29 C.E. er a lemetecholb a Jesus e lemucheluch el mo Kristus, e millemolem el mo er a taem er a Baskua (Nisan 14) er a rak er a 33 C.E. Me a doltirakl er a kalender er chelecha el taem er kid e tia mle April 1 33 C.E. (Momes er a LORD’S EVENING MEAL [Time of Its Institution].) A apostol el Paulus a ouchais er kid el kmo a Jesus a mlei el ‘me meruul a ikel soal a Dios’ me bo ‘el olsiich er sel ongerung, e rullii sel kot [aika aike el tenget me a uldars el oltirakl er a Llach] el mo diak a blkul.’ Me a Jesus a rirellii tiang er a lodersii a bedengel el mo olubet el tenget.—Heb 10:1-10, BT.
Morriter er a Tekingel a Dios
w01-E 5/15 27
A Ker el Mla er a Remenguiu
Ngoingera e ngmlechedaol a “Kmal Chedaol el Delemerab” el ua losaod a Daniel 9:24, NW?
A Daniel 9:24-27 a ulaoch el mesaod er a demiel a “ngellitel er a Dios” el Kristus. Me a omengedolel a “Kmal Chedaol el Delemerab” a diak losaod el kirel a omengedolel sel Kmal Chedaol el ngar er a templo er a Jerusalem. Tia el tekoi el “Kmal Chedaol el Delemerab” a bai mesaod el kirel sel Kmal Chedaol el ngar er a templo er a Dios er a klereng.—Hebru 8:1-5; 9:2-10, 23.
Tia ngmileketmokl er a oingerang? Me bo dosaod a tekoi el dilubech er a bo lemetecholb a Jesus er a rak er a 29 C.E. Ngulemuchel er tiakid el taem er a lemetecholb, e a Jesus a uleltaut a tekoi el ngar er a Psalm 40:6-8. A apostol el Paulus a dirrek el milsaod er a nglunguchel a Jesus el mo er a Dios el kmo: “Kau a diak el soam a tenget el charm ma uldars; me ke mla rullii a kirel el mo bedengek.” (Hebru 10:5) Me a Jesus a mle medengei el kmo a Dios a ‘dimlak el soal’ a tenget el charm a lolemolem el modars er a templo er a Jerusalem. A Jehovah a bai kiltmeklii a cherrungel el bedengel a Jesus el mo olubet el tenget. Me ngmillemolem a Jesus el melekoi louchais er a urungulel el kmo: “Dios, ngak tiang, el kldmokl el mo meruul a ikel soam, el di ua llechukl er a babier er a Llach el kirek.” (Hebru 10:7) Me ngngera mle uldesuel a Jehovah el kirel? A Ebangkelio er a Mateus a kmo: “Me ng di meltecholb a Jesus e mo tokerekl, e sola e a eanged a ulebok me ng milsa Reng er a Dios el ua teletelel a belochel el mer bebul. E a ngor a mlar a eanged e melekoi el kmo, ‘Ngkaikid a betik er a renguk el Ngelekek, el ngii odeuir a renguk.’”—Mateus 3:16, 17.
Me a Jehovah el Dios el kilengei er tia el tengetengel a Jesus a mle belkul a kmo, ngmla mo er ngii a lmuut el ngarbab el olengetongel er sel olengetongel el mla er a templo er a Jerusalem. Ngolengetongel er a “soal a Dios” el ngii a lekiltmeklii lolecholt el kmo, ngkongei er a olubet el tengetengel a Jesus. (Hebru 10:10) Me a Jesus er a lemucheluch er a chedaol reng e ngmlo uchul e ngmocha sebeched el mo sechelil a Dios e mo mesiou er Ngii. Me ngar sel taem er a lemetecholb a Jesus, e a eanged a mlo “Kmal Chedaol el Delemerab” er a templo er a Dios er a klereng.
A Omesodel a Babier er a Daniel
9:27—Ngera el telbiil a millemolem el ngar er ngii el mo lmuut er a ulebengelel a 490 el rak, me a lechub e ngrak er a 36 C.E.? A Llach er a telbiil a mlo diak loureor er a rak er a 33 C.E. er a lemedeel er a teluo el kerrekar a Jesus. Engdi, a telbilel a Jehovah el mo er a Abraham a millemolem el mo lmuut er a rak er a 36 C.E., e le Jehovah a ulemesterir a techall a Rechijudea e le tir el mle uldidellel a rsechel a Abraham. Tia el telbiil el mlo er a Abraham a dirk melemolem er chelecha el sils el kirel a “Israel ra Dios.”—Galatia 3:7-9, 14-18, 29; 6:16, BT.
October 9-15
MEKREOS EL TEKOI EL NGAR ER A BIBLIA | DANIEL 10-12
“A Jehovah a Ulemlaoch el Kirel a Tekoi el Mo Duubech el Mo er a Reking er a Persia”
dp-E 212-213 par. 5-6
Teru el King el Mo Kautok
5 Tirke el tedei el uleak uchei el king a mle Cyrus the Great, me a Cambyses II, me a Darius I (Hystaspes). Me a Bardiya (me a lechub nglocha mera el ngklel a Gaumata) el di milengedereder el euid el buil, a uchul me tia el ulaoch a diak lomasech er ngii. Sera rak er a 490 B.C.E., e ngike el ongedei el king el Darius I a mlo ongeru er a taem el lolasem el mo soiseb er a beluu er a Gris, engdi te mla er a Marathon e mo mechitechut me te chiliis el mo er a Asia Minor. Me alta Darius a kmal mle kerekikl el mengetmokl a tekoi me bo el sebechel el lmuut el mo melai er a beluu er a Gris, engdi ngmlo diak el sebechel e le ngmlad er a eua el rak er a uriul. Me tia mlo ngerechelel a ngelekel el ngii a mlo “ongeual” king el Xerxes I, el ngii a King Ahasuerus el mlo bechil a Esther.—Esther 1:1; 2:15-17.
6 A Xerxes I a mlo “meruul a uldikel el omtok er a renged er a Gris,” el belkul a kmo aike el rokui el beluu el mo dmak e rullii a Renged er a Gris. A babier el The Medes and Persians—Conquerors and Diplomats a melekoi el kmo, “A rengarbab el chad er a kort er a Xerxes a kmal uleldubech er ngii me ngulemuchel a mekemad er a daob me a beluu.” Me a chad er a reksi er a Grik el Herodotus el kiliei er a rak er a 400-500 B.C.E. a milluches el kmo “ngdimlak a mekemad el mlo uai tiang.” Ngmelekoi el kmo a urrurt el mla er a daob a mle 517,610. E tirke el mla er a beluu a mle 1,700,000; e a remla er a uos a mle 80,000, e a rechad er a Arab el mla er a kiamo, me a rechad er a Libya el mla er a kuruma, a locha mle 20,000. Me a cherrengelir el rokui el ngar er a daob me a beluu a mle 2,317,610.
dp-E 213 par. 8
Teru el King el Mo Kautok
8 A anghel a dilu el kmo: “E sola e a bekeu el king a me duum. Ng mo merreder er a klou el renged e mo meruul a ikel di soal.” (Daniel 11:3) A lluich a rekil el Alexander a mlo king er a Macedonia er a rak er a 336 B.C.E. Ngmlo “bekeu el king” el Alexander the Great. Ngngilai aike el beluu er a Persia el mla er a Middle East e le ngmle soal kutmeklii sel mle uldesuel a rengul a demal er a Philip II. E ngii me a re 47,000 el soldau er ngii a mlo imuul er a omoachel er a Eufrates me a Tigris e mlo mesisiich er a 250,000 el soldau er a Darius III el ngar er a Gaugamela. Me a Darius a chiliis e mlokoad e tia mlo ulebengelel a omengedereder er a Persia. Me a Gris a mlo oba klisichel a omerreder, e a Alexander a mlo “merreder er a klou el renged e mo meruul a ikel di soal.”
dp-E 214 par. 11
Teru el King el Mo Kautok
11 Uriul er a kodellel a Alexander, e a rengedel a ‘miltiud el mo eual bliongel.’ Tirke el betok el merreder er a resoldau er ngii a mlo kaiberober a dereder er a delongelir e melai a beluu. A balech a medal el General Antigonus I a millasem el mo mengedereder er a rengedel a Alexander el rokir, engdi ngmlad er a mekemad el mla er a Ipsus el ngar er a beluu er a Phrygia. Me ngar er a rak er a 301 B.C.E., e a reteua el merreder er a resoldau er a Alexander a mlo mengedereder aike el beluu el mla er a cheungel a omengederederel. A Cassander a milengedereder er a Macedonia me a Gris. E a Lysimachus a milengedereder er a Asia Minor me a Thrace. A Seleucus I Nicator a ngiluu a Mesopotamia me a Syria. E a Ptolemy Lagus a ngiluu a Ekipten me a Palestine. Me ngtilaut a ulaoch el kmo, tia el klou el renged er a Gris el lulengedereder er ngii a Alexander a mo obii el mo eua el bliongel.
Morriter er a Tekingel a Dios
w13 7/1 19 par. 16, bebil el omesodel
“E Ngak a Mo Obengkemiu el Di Blechoel”
A Daniel 12:3 a kmo: “Tirkel mellomes a rengrir [el tir a ngellitel el Kristiano] a mo dmiich el ua dichel a melidiul sel ungil a eanged.” Sel taem el dirk lengar er a chutem e te dmiich el ua dichel a sils el oeak a urerir er a berkel a klumech. Me nguaisei, engdi a Mateus 13:43 a melutk el kirel sel taem el tir a mo dmiich el ngar er a Rengedel a Dios el ngar er a eanged. Engdi a uchei e kede ulemdasu el kmo aika el eru el bades a di milsaod el kirel a chimo el tekoi el ngii a berkel a klumech.
dp-E 315 par. 18
A Jehovah a Tilbir el Mo er a Daniel a Kmal Ungil el Omelatk
18 A ulebengelel a babier er a Daniel a ouchais el kirel a ta er a kmal ungil el telbiil el Dios a mla tibir el mo er a chad. A anghel er a Jehovah a dilu er a Daniel el kmo: “Ke mo mekiis el mo melai omeksullem er sel ulebongel taem.” Ngera mle belkul a tekingel? A uleak uchei el tekingel a kmo, a Daniel a mo “mad.” Me a di ta el belkul a “mekiis” a kmo, ngmo mekiis er a kodall! A rebebil el chellimosk el chad a melekoi el kmo a Daniel 12 el bliongel a kot el omesodel a okiis el ngar er aike el Bades el tekoi er a Hebru. (Daniel 12:2) Engdi tia diak el klemerang e le Daniel a kmal mla er ngii a klemedengei er ngii el kirel a omelatk er a okiis.
October 16-22
MEKREOS EL TEKOI EL NGAR ER A BIBLIA | HOSEA 1-7
“A Jehovah a Soal a Dolecholt er a Diak Lemengodech el Bltikerreng—Kau Nguaisei a Uldesuem?”
w10 8/1 27 par. 18
A Diak Lemengodech el Bltikerreng Lomtebechel a Cheldechedechad
18 A diak lemengodech el bltikerreng a kirel el mocholt er a delongelir a remesiungel a Jehovah. Me ngmo lmuut er a chelsel a meringel el taem me ngkirel a diak lemengodech el bltikerreng el melemolem el mocholt er a delongeled. Ngar er aike el taem el diak lemengodech el bltikerreng er a rechad er a Israel a mlo “ua nguches el nguemed er a dirk tutau,” e ngmlo uchul a kngtil a rengul a Jehovah. (Hos. 6:4, 6) Me nguaisei, engdi a Jehovah a kmal dmeu a rengul sel deblechoel el olecholt er tia el diak lemengodech el bltikerreng. Ngsebeched el mes a klengeltengat el lengilai tirke el uleltirakl er tia el tekoi.
A Omesodel a Babier er a Hosea
6:6. A dolemolem el meruul a klengit e ngochotii el kmo, ngdiak dolecholt a diak el lemengodech el bltikerreng el mo er a Jehovah. Ngdiak sebeched lomdasu el kmo a betok el tengetenged el mo er a Jehovah a dokedek a klengit el doruul.
A Blekongesenges er Kau a Klou a Ultutelel el Mo er a Jehovah
7 Me nguaisei, a Jehovah a mileketeklii el mo er a rechedal er a irechar el kmo a blekongesenges a ngar er a uchei er a tenget el charm. (Osisechakl 21:3, 27; Hosea 6:6; Mateus 12:7) Me ngera uchul me a Jehovah a milellach er tir el mo meruul a tengetengir? Ka molatk er tiang, ngera moktek er ngike el chad el oldars a tenget? Ngmeruul el uaisei e le ngsoal el odeuir a rengul a Dios, me a lechub e ngmeruul e le ngdi siukang? A lsekum a chad a mera el soal el mo odeuir a rengul a Dios, e ngkirel el mo kerekikl el oltirakl a rokui el llechul a Dios. A Dios a diak el ousbech a tenget el charm, ngdi ta el blekongesenges er kid el mo er ngii a klou a ultutelel el tekoi el sebeched el msang.
Morriter er a Tekingel a Dios
A Omesodel a Babier er a Hosea
1:7—Ngoingerang e a rechad er a Juda a mlocholt er tir a klechubechub e mlosobel? Aika el tekoi a tilaut er a rak er a 732 B.C.E., er a leking a Hesekia. Tia sel taem el Jehovah ulderchii a ta el anghel el mo mekodeterir a re 185,000 el soldau er a Asiria er a chelsel a di ta el kesus e le tir el kmal mle mesisiich el omecheracheb er a rechedal. (2 King 19:34, 35) A Jehovah a ulsebelii a Juda el dimlak “lokiu a mekemad, el diak lokiu a saider me a lechub e ng balech, el diak lokiu a uos me a lechub e te chad el ngar a uos,” e ngbai ulekiu a di chimo el anghel.
A Ulochel a Hosea a Ngosukid el Mo Merael el Obengkel a Dios
16 A Dios a dirrek el mle otutii a telbilel el kmo: “Ak mo rullii a telbilek el mor a rokui el tebelik el charm ma suebek el charm, me ng diak bo lolemall er a re chedak. Ak mo ngmai a rokui el klekedall er a mekemad er a beluu, ng rokuil saider ma balech, ma re chedak a mo kiei el ngar a budech e ungil selebechakl.” (Hosea 2:18) Tirke el mlo medechel el chad er a Judea el liluut el mo remei er a belurir a kiliei el selebechakl, el dimlak lemedakt er a ngii di el tebelik el charm. Tia el ulaoch a dirrek el mla er ngii a otutel er a rak er a 1919 C.E., el mo er a Israel er a Dios, er sera bo lemimokl er a “kloul Babilon,” el ngii a cheldellel a rokui el klsuul el klechelid. Me chelechang e te kiei el selebechakl e dmeu a rengrir er a ungil el blekeradel er a klengar el obengterir a rechad el tir oba osisiu el omelatk el mo kiei er a chutem el mo cherechar. A remera el Kristiano a diak lolab a mekngit el blekeradel er tia el beluulechad.—Ocholt 14:8, BT; Isaia 11:6-9; Galatia 6:16, BT.
g05-E 9/8 12 par. 2
Sel Bo el Budech a Rokui el Tekoi
Ngmo budech a rokui el tekoi e le Dios a mo osisecheklterir a reblak a rengrir el chedal el mo ungil mengedmokl er tia el chutem el bo lekiei er ngii. E mo ‘rullii a telbilel’ el obengkel a tebelik el charm me bo el sebechir el mo chederedall er a rechad.—Hosea 2:18; Genesis 1:26-28; Isaia 11:6-8.
October 23-29
MEKREOS EL TEKOI EL NGAR ER A BIBLIA | HOSEA 8-14
“Bsa Jehovah Aike el Kot el Ungil er Kau”
w07-E 4/1 20 par. 2
Moldars a Tenget el Odeuir a Rengul a Dios
A Biblia a dirrek el ochotii el kmo ngsebeched el oldars a tenget er a odanges el mo er a Jehovah. A profet el Hosea a uluusbech er a tekoi el “tengetenged er a odanges” el olecholt el kmo a Dois a omes er tiang el ta er a kot el ungil el tenget. (Hosea 14:2, NW) A apostol el Paulus a milengelechel er a Rekristiano el chad er a Hebru el kmo: “Me doeak a Jesus, e de blechoel el oldars a tenget er odanges el mor a Dios, el ngii a urerel a ngor el olecholt er a ngklel.” (Hebru 13:15) Chelecha el sils, e a Resioning er a Jehovah a kmal mechesang el omerk er a ungil chais e meruul er a redisaiplo er a bek el renged. (Mateus 24:14; 28:19, 20) Meliuekl er a beluulechad el rokir e te oldars a tenget er a odanges el mo er a Dios er a llomes me a klebesei.—Ocholt 7:15.
A Kengei er a Dios a Mo Uchul a Diak a Ulebengelel el Klengar
15 A sechal kerbou a kot el mle meringel a cheral el charm el rechad er a Israel a mle sebechir el melenget el mo er a Jehovah. Me nguaisei, a “tengetenged er a odanges” el lomekesiu er ngii el ua kekerei el sechal el kerbou a belkul a kmo kede mo ungil el dobedebek a cheldechedechad me ngmo uchul a odanges el mo er a mera el Dios. Ngmle ua ngerang a osengel a Jehovah el kirir tirke el meruul er tia el rolel a omelenget? Ngdilu el kmo: “Ng mo betik a renguk er tir el oba renguk el rokir.” (Hos. 14:4) Me a Jehovah a mo ousubes a kngterir, e mo kongei, e dirrek el mo sechelirir tirke el chad el meruul er chouaitia el ungil el rolel a omelenget el mo er Ngii.
jd-E 87 par. 11
Mosiou er a Jehovah el Oltirakl er a Ngarbab el Llechul
11 A Hosea 14:9 a dirrek el mesaod el kirel a klungiolel a doruul a llemalt. Kede mo ngmai a klengeltengat me a klungiaol a doltirakl a llechul a Dios. Ngii el ulemeob er kid a uchul me ngmedengei el kmo kede rruul er a ngerang. Me aike el longerechir er kid a mo uchul a klungioled. Ngsebeched el omekesiu er a deleuill er kid me a Dios el mo er a mlai me a chad el mirruul er ngii. A chad el meruul a mlai a medengei el kmo tia el mlai ngrruul er a ngerang. Ngmedengei el kmo tia el mlai a kirel blechoel el change a oil er ngii. Me ngera mo duubech a lsekum a chad a diak loltirakl er tia el tekoi, el melatk el kmo tia el mlai a di ungil merael? Ngcherengel a taem e a mesil er a mlai a metemall. Me ngdi osisiu, a Ulemeob er kid a mla meskid a llechul el doltirakl e ngmo uchul a klungioled. (Isaia 48:17, 18) Me a bo dodengelii tiang e ngsmisichid el mo kiei el oltirakl a llechul a Dios.—Psalm 112:1.
Morriter er a Tekingel a Dios
“A Rolel a Rubak [el Jehovah] a Melemalt”
7 A dosiou er a Jehovah er a melemalt el klikiid el rolel, e kede mo nguu a diak lemengodech el bltikerreng er ngii. A rechad er a Israel el tir a dimlak sorir lolengesenges a mluklatk el kmo: “Mosib er a beches el chutem el kiriu, e mdelemii a llemalt, e moridm a klengeltengat el blakerreng er kemiu er ngak a mo mekdubech. Ng mla mo taem el mobult el mer ngak el RUBAK er kemiu, me kikong e kuiitel a klengeltengat er kemiu.”—Hosea 10:12.
Te Milengiil er a Mesias
10 A Mesias a mo tuobed er a beluu er a Ekipten el di ua rechad er a Israel. (Hos. 11:1) Uchei er a letobed a meirei er a Herodes el kirel a okodellir a rengalek, e a anghel a dilu er a Josef me a Maria me a Jesus me lebo er a beluu er a Ekipten. Te kiliei er isei el mo lmuut er a “le mad a Herodes. Tial tekoi a mlo ua isei el oltaut er sel le dillii a Rubak el oeak a profet [el Hosea] el kmo, ‘Ak milekedongii a Ngelekek el sechal el otebedii er a Ekipten.’” (Mt. 2:13-15) Nguaisei, ngii el Jesus a dimlak el sebechel el di ngii el omtebechel aike el tekoi el dilubech er a taem er a cherellel me a klengar er ngii er a lengalek.
October 30–November 5
MEKREOS EL TEKOI EL NGAR ER A BIBLIA | JOEL 1-3
“A Rengelekiu el Sechal me a Redil a Mo Omlaoch”
Bo Mesisiich el Oeak Aike el “Mengasireng el Tekoi el Bla Leruul a Dios”
4 A redisaiplo el ngar er a Jerusalem a mlo er tir a chedaol reng, me te di mle mereched el mo omerk er a ungil el chais el kirel a osobel el mo er a rechad, el ulemuchel er tirke el mle kldibel er sel tutau. A tekoi el lerirellii a ultutii a ulaoch el lilechesii a Joel el ngelekel a Pethuel, er a eai el dart el rak er a uchei el kmo: “Ak mo oitelii a reng er ngak el mo er a rokui el chad. A rengelekiu el sechal me a redil a mo omlaoch, me a remechuodel chad er kemiu a mo omerrous, me a remekekerei el chad er kemiu a mo omes a ues. Isel taem e ak dirrek el mo oitelii a reng er ngak el mo er a remesiou el sechal me a redil . . . er uchei er a lemei ngii el klou e kdekudel sils er a Jehovah.”—Joel 1:1; 2:28, 29, 31, NW; Rellir 2:17, 18, 20.
5 Me tia ngbelkul a kmo a Dios a mo oldurech er a reprofet el sechal me a redil, el mo uai a David, me a Joel, me a Debora, el mo omlaoch el kirel aike el mo duubech er a ngar medad el klebesei? Ngdiak. A belkul a Rekristiano el ‘rengalek el sechal me a redil me a remesiou el sechal me a redil’ a mo omlaoch a kmo, a chedaol reng er a Jehovah a mo melisiich er tir el mo ouchais el kirel a “mengasireng el tekoi” el bla leruul a Jehovah me aike el dirk bo loruul. Me te mo mesiou el melekingel ngike el Kot el Ngarbab. Engdi ngmle ua ngera uldesuir tirke el mla er sei?—Hebru 1:1, 2.
jd-E 167 par. 4
“Momerk er Tiang el Mo er a Rechad”
4 Ka momes er tia el tekoi el ngar er a kuk ta er a rolel. A Jehovah el Dios a uluuchais er a profet el Joel el kirel a taem el kakerous el bedengir a rechad a mo omlaoch, el kmo: “E a uriul e ak mo oitelii a reng er ngak el mo er a rokui el chad. A rengelekiu el sechal me a redil a mo omlaoch, me a remechuodel chad er kemiu a mo omerrous, me a remekekerei el chad er kemiu a mo omes a ues.” (Joel 2:28-32, NW) Sera Pentekost er a rak er a 33 C.E., e a apostol el Petrus a millekoi el kmo tia el ulaoch a mesaod el kirel a tengelel a chedaol reng el mo er tirke el mle kldibel er sel blai el mla er a Jerusalem me a dirrek a urerir el omerk el kirel a “mengasireng el tekoi el bla leruul a Dios.” (Rellir 1:12-14; 2:1-4, 11, 14-21) A ulochel a Joel a dirrek el ngar er ngii a otutel er chelecha el taem. A klou el otutel a ulemuchel er aike el rak er a 1900 el mei. A rengellitel el Kristiano el sechal me a redil, el meklou me a remekekerei a ulemuchel el ‘omlaoch’ el belkul a kmo te omerk el kirel a “mengasireng el tekoi el bla leruul a Dios” el uldimukl er a ungil chais er a Renged, el ngii a mla meketmokl er a eanged.
A Omesodel a Babier er a Joel me a Amos
2:32—Ngera belkul a ‘domekedong er a ngklel a Jehovah’? A domekedong er a ngklel a Dios a belkul a kmo kede mo medengelii a ngklel, e mo oba dmolech el omengull el kirel, e mo oumerang e ultuil er ngike el oungakl er tia el ngakl.—Rom 10:13, 14.
Morriter er a Tekingel a Dios
A Omesodel a Babier er a Joel me a Amos
2:12, 13. A mera el bult a ngar er a reng el mei. Ngngar a chelsel a rengum el mei el ‘chelemuul reng’ el diak di ‘molat a biliu’ e lemerekong.
A Omesodel a Babier er a Joel me a Amos
3:14—Ngera “dellas er a Kerrekeriil”? Tia diak lemera el basio e ngbai di okesiul a basio el Dios a moltaut a kerrekerilel er ngii. Sera taem er a King el Jehosafat el ngklel a belkul a kmo “Jehovah a Oukerrekeriil,” e a Dios a ulsebelii a Juda er aike el beluu el meliuekl er ngii er a leruul a urrurt er a mekemad er tir el mo ketokl er a rraurreng. Sei a uchul me tia el basio a dirrek el ulengakl el kmo “dellas er a Jehosafat.” (Joel 3:2, 12) Chelecha el taem e tiang a okesiul a basio el bo lorderd er ngii aika el renged el di ua lorderd a chomeseokl er a bilong.—Ocholt 19:15.