Reference el kirel a Subeled er a Miting er a Klengar me a Omesiunged
June 3-9
MEKREOS EL TEKOI EL NGAR ER A BIBLIA | GALATIA 4-6
“A ‘Okesiu’ el Ngar Ngii a Belkul el Kired”
it-1-E 1018 par. 2
Hagar
A tekingel a apostol Paulus a ochotii el kmo ngika el Hagar a okesiul a renged er a Israel el rrengodel er a Jehovah el oeak Llach er a telbiil el miltib er a Rois Sinai el ngii el telbiil a “omechell rar mo sibai.” Me nguaisei, tia el renged a dimlak el sebechel el lomelemii tia el telbiil e le tir el di mirruul a klengit. Me te dimlak el sebechir el mo mimokl te bai mle urrebet er a klengit el rredemelel a nguu a kodall me a uchul me te mle sibai. (Jn 8:34; Rom 8:1-3) Me a Jerusalem er a taem er a apostol Paulus el ngii a mle capital er a renged er a rechad er a Israel, a melutk el kirel a Hagar el sibai ngii me a rengelekel. Engdi a rengellitel el Kristiano a ngelekir a “Jerusalem el ngar bab,” el ngike el okesiul a redil er a Jehovah. Ngika el Jerusalem a di ua Sara el mle mimokl el dirkak a ta el bo el sibai. Engdi ngdi ua Isak el mlodechelakl er a Ismael, me ngdi osisiu a rengelekir a “Jerusalem el ngar bab” alta te mla mo mimokl loeak a Ngelekel a Dios, engdi te dirrek el mlodechelakl er a rengelekel ngika el sibai el Jerusalem. Me nguaisei, engdi a Hagar me a ngelekel a mlodik, el lomtechei er sel taem el Jehovah ultngeklii a renged er a Israel.—Gal 4:21-31; dirrek el momes er a Jn 8:31-40.
Bo Mesisiich el Oumerang er a Rengedel a Dios
11 A kot el otutel a telbilel a Jehovah el mo er a Abraham a mlo er ngii er sel taem el rengelekel a Abraham a mlo oudiukes er a Beluu er a Nglat. Engdi a Biblia a meketeklii el kmo tia el telbiil a dirrek el mo uchul a lmuut el betok el klungiaol. (Gal. 4:22-25) A apostol el Paulus a silodii el kmo ngike el kot el klou a ultutelel el chad er a otutel a telbiil el kirel a uldidellel a rsechel a Abraham, a Jesus Kristus. Me tirke el 144,000 a dirrek el uldimukl er a otutel tia el telbiil. (Gal. 3:16, 29; Och. 3:21; 14:1, 4) A redil el losaod er ngii a ulaoch el medung er a Eden a omtechei er a tedebechel a cheldebechelel a Dios el ngar er a eanged. E ngika el redil a okedongall el “Jerusalem el ngar bab,” el ngii a cheldellir a reblak a rengrir el anghel. (Gal. 4:26, 31) Me ngokiu a uldidellel a rsechel a redil e a beluulechad el rokir a mo mukngeltengat, el oltirakl er a telbilel a Jehovah el mo er a Abraham.
Morriter er a Tekingel a Dios
w09-E 4/1 13
Ke Medengei el Kmo Ngerang?
Ngera uchul me a Jesus er a loluluuch el mora Jehovah e ngulemekedong er ngii el “Abba! Chedam”?
A tekoi er a Aramaic el ʼab·baʼʹ a belkul a “ng chedam” me a lechub “E Chedam.” Ngar er aike el edei el taem el debetik er tia el tekoi er a Biblia, e tia el tekoi a ngar er a nglunguuch el lousbech er ngii el melutk el kirel a Chedam, el Jehovah. Tia ngerang me ngutebengall?
A The International Standard Bible Encyclopedia a melekoi el kmo: “Ngar er a taem er a Jesus e a tekoi el ʼabbāʼ a luluusbech er ngii a rengalek el omekedong er a redemerir el mle olechotel a ileakl el deleongel me a omengull el bedul a demerir.” Me tia ileakl el tekoi a lousbech er ngii a rengalek el omekedong er a redemerir el olechotel a bltikerreng e ta er a kot el tekoi el bo lemeduch a ngalek el melekoi er ngii. A Jesus er a longedecheduch er a demal e ngulemekedong er ngii el ousbech er tia el tekoi el ngar er a kmal ileakl nglunguuch er ongit el mora Jehovah. Sera lengar er a sers er a Gethsemane er a kedeb el taem er uchei er a kodellel e ngii el Jesus a milluluuch el mora Jehovah e omekedong er ngii el “Abba, Chedam.”—Markus 14:36.
A The International Standard Bible Encyclopedia a melemolem el melekoi el kmo: “Ngkmal diak debetik er a chelsel aike el babier er a Rechijudea er a taem er a rechad er a Grik me a Rom er a irechar, a rechad el meluluuch el mora Dios lousbech er tia el tekoi e le ngdiak lolechotel omengull el mora Dios.” Me nguaisei, engdi a “Jesus . . . er a lomekedong er a Jehovah el Abba e ngochotii sel ileakl el deleongel er ngii lobengkel a Dios el ua ngalek el lomekedong er a demal.” Aike el eru el bebil el bades lousbech er tia el tekoi el “Abba” el lulluches a Paulus a ochotii el kmo a Rekristiano er a kot el dart el rak a dirrek el luluusbech er tia el tekoi el ngar er a nglunguchir.—Rom 8:15; Galatia 4:6.
w10-E 11/1 15
Ke Medengei el Kmo Ngerang?
A apostol Paulus ngmilsaod el kirel a ngerang er a ledu el kmo ngar er ngii er a bedengel a “olengchelel a Jesus”?—Galatia 6:17.
▪ A Tekingel a Paulus a mle sebechel el betok a belkul er a osengir tirke lulerrenges er ngii er a temir a rekot el Kristiano. El uai tiang, ngmla er ngii a mekeald el deel lullab el melul er a rechad el olecholt el kmo te kelebus er a mekemad, me a remirrechorech er a templo, me a resibai el tir a chiliis. Aika el olangch el mlara rechad a mle olechotel a klou el otuub.
Me nguaisei, engdi chouaika el olangch a dimlak le blechoel el mekngit. Te betok el chad er a irechar a dirrek el mirruul el uaisei lolecholt el kmo te mle chedal a ngera el kebliil me a lechub e ngklechelid. El uai tiang, a Theological Dictionary of the New Testament a melekoi el kmo, “a rechad er a Siria olecholt el kmo te mla tongetengii a klengar er tir el mora chelid el Hadad me a Atargatis loeak sel lolab a ileakl el olangch el rruul er a mekeald el deel el nguu el durur a berreberel a chimal me a lechub e ngchiklel . . . A llel a dellomel el ivy a kuk mle olengchelir tirke el milengull er a Dionysus.”
Me a rebetok el commentators er chelecha el taem omdasu el kmo a Paulus a milsaod el kirel aike el telemellel a bedengel el lengilai er a le missionari e a rechad a chillebedii. (2 Korinth 11:23-27) Me nguaisei, engdi a Paulus a locha dimlak losaod el kirel a olangch el ngar er a bedengel, e ngbai a blekerdelel a klengar er ngii a ochotii el kmo ng Kristiano.
June 10-16
MEKREOS EL TEKOI EL NGAR ER A BIBLIA | EFESUS 1-3
“A Otutel a Moktek er a Jehovah me Aike el Longetmokl”
it-2-E 837 par. 4
Berrotel el Uldasu
Rengedel a Mesias. Ngar er aike el babilengel a Paulus e ngsmodii tia el berrotel el uldasu el kirel a Kristus. Ngar er a Efesus 1:9-11 e ngmesaod el kirel a Dios el louchais er tia el ‘berrotel el uldasu’ el kirel a moktek er ngii el kmo: “Dios a riruul a ikel lulemdasu, e mileketeklii el mer kid a berrotel el uldesuel el bla le tibir er a rengul el mo oltaut el oeak a Kristus. Tiaikid el uldasu, el bo loltaut er ngii a Dios sel bo le belsechel, a mo oldak a ikel rokui el mle duubech el ngar a eanged ma beluulchad, e a Kristus a mo bdelul. A rokui el tekoi a meruul el oltirakl er a uldesuel me a telbilel a rengul a Dios; e a Dios a millilt er kid el mo chedal el oeak a deleuill er kid ma Kristus el oltirakl er a uldesuel, el ultuil er a ikel telbilel a rengul er a kot el uchul.” Tia el ‘berrotel el uldasu’ a uldimukl er ngii a kabelment, el ngii a Rengedel a Dios el longedereder er ngii a Mesias. A “ikel . . . el ngar a eanged” el losaod a Paulus a melutk el kirir tirke el mo er ngii a techellir el mo mengedereder el obengkel a Kristus el ngar er a eanged. A “ikel . . . el ngar a . . . beluulchad” a melutk er kirir tirke el mo kiei el ngar er a chutem el ngar cheungel omengederederel tia el kabelment. Me a Jesus a ulechotii el mora redisaiplo er ngii el kmo tia el ‘berrotel el uldasu’ a melutk el kirel a Renged er a ledu el kmo: “Kemiu a bla le rellemiu el mo medengei a bertelel a Rengedel a Dios.”—Mk 4:11.
A Jehovah a Mengudel er a Telungalek er Ngii
3 A Moses a dilu er a rechad er a Israel el kmo: “A RUBAK el di ngii el tang el RUBAK a Dios er kid.” (Duteronomi 6:4) Me a rokui el tekoi el loruul a Jehovah a melisiich er a moktek er ngii. Me sera bo el temel er a rengul e ngulemuchel el oldak er a rengar er a eanged me a chutem el mo chimo el telungalek. (Monguiu er a Efesus 1:8-10.) Ngar er ngii a eru el tekoi el kirel meketmokl. A kot, e a Dios a kutmeklterir a rengellitel el mo kiei er a eanged e mo oureor el chederedall er a Kristus. Tiang a ulemuchel er a Pentekost er a rak er a 33, er sel taem el Jehovah a millilt er tirke el mo mengedereder el ngar er a eanged. (Rellir 2:1-4) Me ngokiu a olubet el tengetengel a Kristus e a Dios a omes er tirka el ngellitel el melemalt e rredemelel a nguu a klengar. Me a rengellitel a medengei el kmo te mla merodel el mo “ngelekel a Dios.”—Rom 3:23, 24; 5:1; 8:15-17.
4 Ongerung, e a Dios a mengetmokl er tirke el mo kiei er a Paradis el chutem el tir a kongei el chederedall er a Rengedel a Messias. A “kloul seked” er a rechad el mo suobel er a Armageddon a tirke el kot el mo kiei er a chelsel a Paradis. (Chocholt 7:9, 13-17; 21:1-5) E ngar er a chelsel a ta el telael el rak el omengederederel a Kristus, e a rebetok el biliol el chad a mo mekiis er a kodall el mo kiei er a chutem el teloi er a “kloul seked.” (Chocholt 20:12, 13) Me a taem er a okiis a meskid a techelled el mo melisiich er a kltarreng er a delongeled! Me a “kloul seked” me tirke el mo mekiis er a kodall a mo ‘ikel tekoi el ngar a beluulechad.’ Me a ulebengelel a ta el telael el rak, e te mo measem a klaumerang er tir. E tirke el melemolem el blak a rengrir a mo merodel el mo “ngelekel a Dios” el kiei er tia el chutem.—Rom 8:21; Chocholt 20:7, 8.
Morriter er a Tekingel a Dios
Lak Mrellau el Mo Diak Mchetengakl
15 Kede mekerang e ngosuterir a rebebil el mo nguu a klebkall er a Dios? A ta er a rolel a kerebai er kid el kirel a ducherreng. A Paulus a milluches el mo er a ongdibel er a Efesus el kmo: “Ma kulengit er kemiu me lak le moalech a rengmiu el kirel a ikel ringel el mer ngak el kiriu, e tia klebkelliu.” (Efe. 3:13, BT) Ngera uchul me a Paulus a dilu el kmo a ringelel a mlo uchul a klebkellir a rechad er a Efesus? Alta e ngmle chelebangel a ringel, engdi a omerellel el ullengeseu er a rudam er ngii a meketeklii el kmo a omesiunged el mo er a Dios a kirel mo kot el klou a ultutelel er a klengar er a Kristiano. Oleko a Paulus a mlo mechitechut a rengul, e a rudam er ngii a mle sebechir el mo omdasu el kmo a klausechelei er tir me a Jehovah, omesiungir, me a omeltkir a diak a ultutelel. Me ngokiu a kerebil el kirel a ducherreng e a Paulus a ulechotii el kmo a bo doltirakl er a Kristus e ngkuk klou a belkul er a ngii di lengerang.
cl-E 299 par. 21
“Bo Modengelii a Bltikerreng ra Kristus”
21 A Tekoi er a Grik el moiuid el “bo modengelii” a belkul a kmo “ke modengei loeak a tekoi el bla charm.” Sel bo dolecholt er a bltikerreng el uai lullecholt er ngii a Kristus el ngii a ngilai aike luluusbech a rechad el mo ngaruchei er aike el soal, e mle chubechubechad er a rolel a lolengeseu er tir er aike lousbech, e mera el mla er a rengul e ousubes er a rebebil, e ngsebeched el moba omereng el saul el bedul ngii el Jesus. Ngoeak tia el rolel e kede mo chormii, me kede mo ‘medengelii a bltikerreng ra Kristus el lengelakl ra klemedengei rar chad.’ Ngdirrek el diak el kired el obes el kmo a blekerdeled sel bo lemui el uai blekerdelel a Kristus, e kid a lmuut el mo kmeed er ngike el Jesus a mle cherrungel el oukerebai er ngii, el ngii a betik a rengul Dios el Jehovah.
June 17-23
MEKREOS EL TEKOI EL NGAR ER A BIBLIA | EFESUS 4-6
“Mousbech a Rokui el Klekedall er a Mekemad el Le Beskemiu a Dios”
Remekekerei el Chad, Bo Mesisiich er a Diabelong
A APOSTOL el Paulus a ulemekesiu er a Rekristiano el mora resoldau. Kid a ngar er a mekemad, e mera el ngar er ngii a recherroued engdi ngdiak doumekemad lomtok er a redi chad, e kede bai omtok er a Satan me a remekngit el anghel. Tirka mla oumekemad el betok el telael el rak me te kmal meduch el oumekemad me kede locha mo omdasu el kmo, ngdiak el sebeched el mo kats er tia el mekemad el ileakl a lsekum kede mekekerei el chad. Me ngsebechir a remekekerei el chad el mo kats er a mekemad lomtok er a remesisiich el cheraro? Choi, ngkmal sebechir el melemolem el di kats! E ngera uchul? E le te nguu a klisiich el mlara Jehovah. E ua rulsemuul el soldau, te ‘ousbech a rokui el klekedall er a mekemad el le besterir a Dios’ me bo el sebechir el kltmokl el mo oumekemad.—Monguiu er a Efesus 6:10-12.
Remekekerei el Chad, Bo Mesisiich er a Diabelong
4 A klemerang el desuubii er a Tekingel a Dios a omekerreu er kid er a klsuul el osisechakl el uai a olekesongel. (Johanes 8:31, 32; 1 Johanes 4:1) Sel lemengal el mo betik a rengud er aika el klemerang el ngar er a Tekingel a Dios e ngmo beot er kid el kiei el oltirakl a llechul a Dios me a lechub kede oubail er a ‘tekerengel a ulud.’ (Psalm 111:7, 8; 1 Johanes 5:3) Ngdirrek sel bo dungil el medengei aika el klemerang e ngsebeched el mo ungil el mesebechakl er a klaumerang er kid er a recherroued.—1 Petrus 3:15.
7 A melemalt el llechul a Jehovah el ngii a omekerreu er a ‘rengul’ a chad a sebeched el omekesiu er ngii el mora tekerengel a ulul a soldau. (Osisechakl 4:23, NW) A soldau a kmal diak el kengei el mo omtechei er a tekerengel a ulul loba chimong el rruul er a mechitechut el deel. Me ngdi osisiu, ngkmal diak dekengei el mo omtechei a melemalt el llechul a Dios el ousbech er a di uldesued el kirel a llemalt. Ngkmal diak el sebeched el di kid el omekerreu er a rengud. (Osisechakl 3:5, 6) Me seikid a uchul me ngkired el blechoel el kerekikl el merriter er a “tekerengel” a ulud me di leblechoel el omekerreu er a rengud.
10 Me ngdi uaike el oecherir a resoldau er a Rom el ngilsuterir me te mlo kats er a mekemad, me a okesiu el oeacher el doueacher er ngii a ngosukid el mo “omerk er a Ungil Chais er a budech.” (Isaia 52:7; Rom 10:15) Me nguaisei engdi lebebil er a taem e ngusbechall a klou el blekeu el mo omerk er a klumech. A Bo el 20 a rekil a melekoi el kmo: “Ngak el mle merur a uchul me ngmle meringel er ngak lousioning el mo er tirke el kimdak el skuul. Me sel kumes el bedul uriul, e ngmo diak kudengei el kmo ngera uchul me ak mle uaisei engdi chelechang e ngmera el dmeu a renguk lousioning el mo er tirke el ua meklungek.”
Remekekerei el Chad, Bo Mesisiich er a Diabelong
13 Ngera el ‘kmard el balech’ a lousbech a Satan el omalech er kau? Nglocha oldechelakl er kau lokiu a blulak el tekoi el kirel a Jehovah. A Satan a soal a bo momdasu el kmo a Jehovah a diak lebetik a rengul er kau, e diak a ngii di lechad lomekerreu er kau. A Ida el 19 a rekil a melekoi el kmo: “Ak mle blechoel el omdasu el kmo a Jehovah a cheroid er ngak, e diak el soal el Sechelik.” Me ngera ngmeruul er ngii sel bo uaisei a uldesuel? “Aika el miting a kmal melisiich er a klaumerang er ngak. A uchei e ak mle blechoel el di dengchokl, e diak kunger le kulemdasu el kmo ngdiak a chad el soal lorrenges aike el bo kulekoi. Engdi chelechang e ak mengetmokl er ngak el kirel a miting, e melasem el eru me a lechub e ngedei el taem el kunger. Alta ngmeringel engdi ngkot el mo ungil a renguk sel kuruul el uaisei. E a rudam me a rudos a kot el melisiich er ngak. Me a uriul er a bek el miting, e ak melechesuar el kmo a Jehovah a betik a rengul er ngak.”
16 A ‘osebeled’ a omekerreu er a uldesued el kmal di ua lkou el omekerreu er a no er a bdelul a soldau. (1 Thesalonika 5:8; Osisechakl 3:21) Me a omelatk a ngosukid el mo ultaut a osenged er a telbilel a Dios me ngdiak bo lemechitechut a rengud el mondai er kid a uchul. (Psalm 27:1, 14; Rellir 24:15) Me a lsoad a omeltked a bo lomekerreu er kid, e ngkmal kirel mo mera el tekoi er a rengud. Ngkmal kirel a lkunged el ngar er a bdelud el diak di debeldoel er ngii!
20 A apostol el Paulus a dilu el kmo a Tekingel a Dios a uai a saider. A Jehovah a mla meskid a Tekingel engdi ngkmal kired el mesuub el mo meduch el ousbech er ngii el mesebechakl er a klaumerang er kid, me a lechub kede melodech a rolel a domdasu. (2 Korinth 10:4, 5; 2 Timothy 2:15) Me kede mekerang e lmuut el mo meduch el ousbech er ngii? A Sebastian el 21 a rekil a melekoi el kmo: “Ak luchesii a chimo el bades er a bek el bliongel er a Biblia el kunguiu, e oldekdak aike el kot el soak el bades.” Me tia ngilsuir el mo ungil medengelii a rolel a lomdasu a Jehovah. E a Daniel a dilu el kmo: “Sel kunguiu er a Biblia, e ak lemuches aike el bades el kumdasu el kmo ngmo ngosuterir a rechad el bo kungedecheduch er tir sel kuldingel a obliil. E ak mla metik el kmo, a rechad a blechoel el ungil a tekingir el mei er kid sel lomes er kid el kmal semeriar el mesaod er a Biblia, e meruul aike el sebeched el ngosuterir.”
Morriter er a Tekingel a Dios
it-1-E 1128 par. 3
Cheledaol
Chedaol Reng. A oureor el klisichel a Jehovah me a lechub a reng a ngar cheungel a klisichel e blechoel loltaut er a moktek er ngii. Ng klikiid, e bliochel, e chedaol, e mla meakl el kirel lousbech er ngii a Dios el meruul a ungil tekoi. Me a uchul me ngokedongall el “Chedaol Reng” me a “Reng el Cheledaol.” (Psa 51:11; Lk 11:13; Rom 1:4, BT; Efe 1:13) Me a chedaol reng a loureor er a chelsel a chad e ngklisiich el kirel a cheledaol me a lechub a omengikiid. Me a ngii di el omeruul el diak el klikiid me a lechub e ngmekngit a ‘melirm er a rengul’ a chedaol reng. (Efe 4:30) Me alta chedaol reng a diak a klengar er ngii, engdi ngolechotel a chedaol el blekerdelel a Dios me a uchul me ngsebeched el ‘melirm er a rengul.’ Me a chad el meruul er a mekngit a ‘omekoad ra ngeuil a Reng.’ (1Th 5:19, BT) E a lsekum e ngmelemolem el meruul er tia el klengit e a chedaol reng er a Dios a mo “mekngit a rengul” luchul me ngrullii a Dios el mo cherrouel ngika el chad el omtok a llechul. (Isa 63:10, NW) Me a chad el melirm er a rengul a chedaol reng a sebechel mo oltuub er ngii, e tia klengit el Jesus a dilu el kmo ngdiak sebechel el musubes er chelecha el taem me sel merael el mei el beches el blekeradel.—Mt 12:31, 32; Mk 3:28-30.
it-1-E 1006 par. 2
Merechorech a Rengul
Sel Bocha Lecholt er a Omerelled. A rechorecherreng a me der er a omerellel a chad el mochotii a mekngit el ngelbesel a rengul. A Jakobus el ta er a milluches er a Biblia ouchais er kid el kmo a ngibeserreng sel mukeroul e ngmechellii a klengit. (Jak 1:14, 15) Me a chad el merechorech a rengul a sebechel medangch loeak a omerellel. A apostol Paulus a dilu el kmo a chad el merechorech a rengul a mengull a bleob el chelid. (Efe 5:5) Me tia el mekngit el ngelbesel a rengul a rullii tia el tekoi el lemerechorech a rengul el kirel el mo ua le chedul, e le ngmla rullii el mo ngarbab er a omesiungel me a omengull er ngii el mo er Ngike el Ulemeob.—Rom 1:24, 25.
June 24-30
MEKREOS EL TEKOI EL NGAR ER A BIBLIA | FILIPI 1-4
“Lak el Sebek a Rengmiu er a Ngii Di Le Ngerang”
“A Budech er a Dios, el Diak el Sebechel a Chad el Mo Cherrungel el Medengelii”
10 Ngera sebechel ngosukid me ngmo diak di ‘el suebek a rengud’ e bai mo er ngii a “budech er a Dios” er a rengud? A tekingel a Paulus el mo er a rudam er a beluu er a Filipi a ochotii el kmo sel bo lsebek a rengud er a mondai, engdi kired el meluluuch. Me sel bo debekikl, e ngkmal kired el meluluuch el ouchais a sebekreng er kid. (Monguiu er a 1 Petrus 5:6, 7.) Me sel moluluuch el mo er a Jehovah, e bo lulterekokl a rengum el kmo Ngii a kot el omekerreu er kau. Bo blechoel el mereng a sulel el kirel a rokui el klengeltengat el lomeskau. E lak mobes el kmo, a Jehovah a kmal “sebechel kudmokl a lmuut el kmal obdois el tekoi er a ikel sebeched el olengit, ma me soiseb er a uldesued.”—Efesus 3:20.
“A Budech er a Dios, el Diak el Sebechel a Chad el Mo Cherrungel el Medengelii”
7 Ngmlo uangera uldesuir a rudam el ngar er a Filipi er sera lechiuii a babilengel a Paulus? A ruumesingd er tir a locha mlo melatk a tekoi el kmal di mle mereched el duubech el mo er a Paulus me a Silas, me sel rolel e a Jehovah a ngilsuterir. Me a Paulus ngmilluches el mle soal lolisechakl er tir er a ngera el tekoi? A suobel a kmo: Lak lsebek a rengmiu. Di moluluuch, e seikid ‘e a budech er a Dios a mo mtebechel a rengmiu,’ el ngii a budech er a Dios “el diak el sebechel a chad el mo cherrungel el medengelii.” Me tiang ngera belkul? A bebil el oidel a Biblia a mesaod er ngii el kmo, “ngremuul a tekoi el engelakl er aike el dulemdasu” me a lechub e “ngremuul a tekoi el engelakl er aike el lomdasu a rechad.” Me a Paulus a millekoi el kmo a “budech er a Dios” a lmuut el mengasireng er a ngii di el tekoi el kid a sebeched el mdesuii. Me a lebebil er a taem e ngmo diak dodengelii a rolel e kede sumechokl a mondai er kid, engdi a Jehovah a kmal ungil medengei, e kmal sebechel el remuul a ngii di el tekoi el kid a dimlak domdasu el kmo ngsebechel el meketmokl.—Monguiu er a 2 Petrus 2:9.
“A Budech er a Dios, el Diak el Sebechel a Chad el Mo Cherrungel el Medengelii”
16 Ngera mo duubech a lsekum kede nguu a “budech er a Dios el diak el sebechel a chad el mo cherrungel el medengelii”? A Biblia a kmo, ngmo “mtebechel” er a rengud me a uldesued. (Filipi 4:7) Sel dimla tekoi el ‘omtebechel’ a tekoi el lousbech er ngii a resoldau el mesaod er a delebechel el soldau el mla moterekokl er tir a ngerachel el mo omekerreu er a beluu. Me a beluu er a Filipi a mla er ngii a redelebechel el mengkar er ngii. Me ngmle sebechir a rechad el ungil mechiuaiu e le te medengei el kmo, a belurir a ngar er a ulekerreu. Me ngdi osisiu, sel lebo er ngii a “budech er a Dios” er a rengud, e ngmo diak di lsebek a rengud e mo chelellakl a uldesued. Kede medengei el kmo, a Jehovah a omekerreu er kid e kmal soal a bo lungil a klengar er kid. (1 Petrus 5:10) E tiang a omekerreu er kid me ngdiak bo lemechitechut a rengud el sebekreng me a chelitechetul a rengud a uchul.
Morriter er a Tekingel a Dios
it-2-E 528 par. 5
Tenget
Tenget el Ilumel. Aika el ilumel a luleldars el obengkel aike el bebil tenget, tokubets a uriul er a lebo er a Beluu er a Nglat. (Ule 15:2, 5, 8-10) Aike el tenget el ilumel a mle bilong (“mesisiich el ilumel”) el mloitel er a olengetongel. (Ule 28:7, 14; momekesiu er a Exo 30:9; Ule 15:10.) A apostol Paulus a milluches el mora Rekristiano el ngar er a Filipi el kmo: “A lta te mo mekodkak e tia ia mo ua le moitel a rsechek el uldars el ngar bebul a tenget el mekedmokl el mor a Dios ele kom oumerang. A lsekum ng ua isei, e ng ungil a renguk, e obengkemiu el rokui el oldeu er a renguk.” Ngar tia e a Paulus a mesaod el kmo ngkongei el mo mad el kirir a rekldemel el Kristiano. (Fil 2:17) Kedeb el taem er a uchei er a lemad e ngmilluches el mora Timothy el kmo: “Ak moitel el tenget el ilumel, ngmerma blsechel a bo kcheroid er tia el beluulechad.”—2Ti 4:6, NW.
A “Kot Lokiis”—A Dirk Melemolem!
5 Ma uriul, e a rengellitel el chedal a “Israel ra Dios” a kirir el mo obengkel a Jesus Kristus el ngar er a klebkellel er a eanged, el “mo obengkel a Rubak el diblechoel.” (Galatia 6:16; 1 Thesalonika 4:17) Tia el omeruul a lomekedong er ngii el kmo a “kot lokiis.” (Filipi 3:10, 11; Chocholt 20:6) Me sel bo lemerek ngii el okiis, e ngmochu temir tirke el betok el milliol el mo mekiis el mo nguu a techall el mo kiei er a Paradis el chutem el diak a ulebengelel. Ma lsekum a omeltked a mo er a eanged ma lechub e ngchutem, e kede ulterekokl el kmal semeriar er tia el “kot lokiis.” Me tia ngua ngera el rolel a okiis? E mo er ngii er a oingerang?