Reference el kirel a Subeled er a Miting er a Klengar me a Omesiunged
July 1-7
MEKREOS EL TEKOI EL NGAR ER A BIBLIA | KOLOSE 1-4
“Bedebedii el Choitii Sel Mechut el Klechad e Bilemiu er a Beches el Klechad”
Bo Mukrael er Sel Oureor el Klisichel a Dios el Diak el Blekeradel er a Beluulechad
12 A omerellek me a uldesuek ngolecholt er a ngera el blekeradel? (Monguiu er a Kolose 3:8-10, 13.) A blekeradel er a beluulechad a melisiich a urerel a tech. (Galatia 5:19-21) A omelsemai a mo er ngii el meketeklii el kmo kede mukrael er a ngera el blekeradel er sel taem el lebo er ngii a chetituokel el tekoi. El ua tiang, kede mo mekerang a lsekum a Kristiano el odam me a lechub e ngodos a olechib er ngii er kid, me a lechub e ngmelibas er kid me a lechub e ngmeruul er a klengit el omtok er kid. Me a lmuut el tang, a omerelled me a uldesued a obeketakl el kmo kede melisiich er a ngera el blekeradel er a chelsel a delengchekled. Me ngkmal kired el mo ungil el merriter er kid. Me di lekau el merriter er kau el kmo, ‘Aika el merekong el elolem el buil e a blekerdelek ngmeleketek el ua blekerdelel a Kristus me a lechub e ngua blekerdelel tia el beluulechad?’
13 A klisichel a Dios a sebechel el ngosukid el “medebedii el choitii ngikel mechut el chad ma chomerellel,” e mla omail er kid er “ngikel beches el chad.” Me tiang a mla rullid el lmuut el mo oubltikerreng e dirrek el meruul a ungil tekoi. Kede kltmokl el mo ousubes el mo lmuut er a taem el bo dechelebangel er a ngar ngii a ungil el uchul el mondai. Ngmo sebechel el klou a rengud el outekangel a chelebirukel e mengoit a “rokuil cheluached, ma ngasechereng, ma klsiberreng, ma teloketok, ma chomelaes.” Me ngoeak itiang, e kede mo er a tkurrebab el sebeched el mo ‘bekokuii e chubechub.’—Efesus 4:31, 32.
Kau ke mla melodech A blekerdelem?
18 A lsekum e ngsoad a Tekingel a Dios a lolodech a blekerdeled, e ngar er ngii a lmuut el bebil er a tekoi el kired el meruul el diak di el omengiued me a omesubed e lemerekong. A rebetok el chad a menguiu er a Biblia e dirrek el medengei a betok el tekoi el losaod. Ke locha mla metik er chouaitirka el chad er a taem el moldingel a obliil. Te ngar er ngii a rebebil er tir el mla mo chausbengdik a bebil er a bades er a Biblia. Engdi tiang a diak lengedechii a uldesuir me a rolel a klengar er tir. E ngerang? E le Tekingel a Dios a di sebechel el melodech a blekerdelel a chad a lsekum e ngmera el mo rutechii a rengul ngii el chad. Ngkmal kired el melebedebek aike el tekoi el desuub er a Biblia. Ngkired el di kid el oker el kmo: ‘Ngak a kuumerang el kmo tiang a diak di losisecheklel a klechelid e lemerekong? Ak mla mes a tekoi el duubech er a klengar er ngak el meketeklii el kmo tiaikid a klemerang? Ak kultaut er a klengar er ngak a tekoi el kusuub el diak di kulisechakl el mo er a rebebil e lemerekong? Ak kuumerang el kmo a tekoi el kusuub a mla er a Jehovah el mei el ua longedecheduch er ngak?’ Sel dolebedebek chouaika el ker e ngsebeched el lmuut el mo kmeed er a Jehovah. Me a tekoi el dosuub sel lebo leretechii a rengud e ngmo soad el melodech er a klengar er kid el mo oldeu er a rengul a Dios.—Osi. 4:23; Lk. 6:45.
19 Sel deblechoel el menguiu er a Biblia e dolebedebek er ngii, e ngmo ngosukid el ‘medebedii el mo mecherei sel di mla klengar er kid el obengkel a omerellel’ e ‘milid er a beches el klengar.’ (Kol. 3:9, 10) Me a lsekum e kede mo ungil el medengei a osisecheklel a Biblia e oltaut aike el desuub, e ngmelisiich er kid el mo olecholt a blekerdelir a Rekristiano me ngmo diak dobedikl er a bedeklel a Satan.
Morriter er a Tekingel a Dios
it-2-E 169 par. 3-5
Rengedel a Dios
“Renged ra Betik ra Rengul el Ngelekel.” Teruich el klebesei er a uriul er a le bora eanged a Jesus er a Pentekost er a 33 C.E., e a rechapostol er ngii a ngiluu a sioko el kmo ngmla mora “kadekmel a Dios el Demal” sel taem el Jesus a milsterir a chedaol reng. (Rel 1:8, 9; 2:1-4, 29-33) Me a “beches el telbiil” a mlo oureor el bedul tir, me tirka tirke el mle kot el mo chedal tia el “chedaol renged,” el Israel er a klereng.—Heb 12:22-24; 1Pe 2:9, 10, BT; Gal 6:16.
Me a Jesus a mlo dengchokl er a kadekmel a Demal e mlo bdelul a ongdibel. (Efe 5:23; Heb 1:3; Fil 2:9-11) A bades ochotii el kmo ngulemuchel er a Pentekost 33 C.E. e a Jesus a mlo mengedereder er a redisaiplo. Me a Paulus er a loluches el mora rekot el Kristiano el ngar er a Kolose e ngmilsaod er a Jesus el ua le bla bo er ngii a rengedel: “A Dios a ulsobelid ra klisichel a ilkolk e uliulid el mora renged ra betik ra rengul el Ngelekel.”—Kol 1:13, BT; momekesiu er a Rel 17:6, 7.
Me ngulemuchel er a Pentekost er a 33 C.E. e a Kristus a mlo mengedereder er a Israel er a klereng, el tir a Rekristiano el mla nguu a chedaol reng el mo ta er a ngelekel a Dios. (Jn 3:3, 5, 6) Me tirka el Kristiano sel lenguu a omeltkir er a eanged e te mo diak le ngar cheungel omengederederel a Kristus, te bai mo king lobengkel a Kristus el ngar er a eanged.—Och 5:9, 10.
A Omesodel a Babier er a Galatia me a Efesus me a Filipi me a Kolose
2:8—Ngera “bechachau lomengeblad el llomeserreng el mengetiit ra belulechad” el lulmeklatk a Paulus el kirel? Aikang aike el klekedellel tia el beluulechad er a Satan—el tekoi me a omellach el lousbech el lomekrael e oldubech a omerellel a tekoi er tia el beluulechad. (1 Johanes 2:16) Uldimukl er aikang, aike el rolel a llomes er tia el beluulechad, me a kerruul er ngii, me a klsuul el klechelid el ngar er a chelsel tia el beluulechad.
July 8-14
MEKREOS EL TEKOI EL NGAR ER A BIBLIA | 1 THESALONIKA 1-5
“Molemolem el Kasisiich a Rengmiu e Mkaingeseu”
“Bo Mongull er Tirkel Meringel Loureor ra Delongeliu”
12 A remechuodel el lomtebechel er a ongdibel a diak di lolisechakl e lemerekong. Tia el osisiu el tekoi a medung er a 1 Timoteus 3:4. A Paulus a dilu el kmo a remechuodel a kirir el mo ‘ungil el merreder ra blirir, e omekeroul rar ngelekir el mo bekongesenges.’ Ngar tiang e tia el tekoi el “merreder” a diak di lolekoi el kmo a remechuodel a di olisechakl er a rengelekir e lemerekong, e ngdirrek el kirir el omekrael er a telungalek er tir ‘e omekeroul rar ngelekir el mo bekongesenges.’ Nguaisei a remechuodel a omtebechel er a ongdibel e olengeseu er a rokui el chad el mo chederedall er a Jehovah.—1 Timoteus 3:5.
“Bo Mongull er Tirkel Meringel Loureor ra Delongeliu”
19 Ke mo mekerang a lsekum e ke ngiluu a sengk el mileketmokl el ileakl el di kirem? Ke mo olecholt a omereng el saul er kau el kirel el oeak a mousbech er ngii? Tirka el “chad [el] ngat” a lebilskid a Jehovah el oeak a Jesus Kristus. A ta er a rolel e ngsebechem el olecholt a omereng el saul er kau el kirel aika el ngat a oeak a omkerekikl el orrenges a cheldecheduch el loltobed a remechuodel e molasem el oltaut aike el losaod. Ngdirrek el sebechem el olecholt a omereng el saul er kau el oeak a moltobed a ungil el nger sel omngar er aike el miting er kid. Molisiich er a ureor el remechuodel a mengetmokl er ngii el ua ureor er a berkel a klumech. A lsekum e ke mla ngmai a klungiolem er a omellach el lebilskau a ta er a remechuodel, e ngungil a omouchais er ngike el odam el kirel. Ngdirrek el sebechem el olecholt a omereng el saul er kau el kirel a telungalek er ngii. Kele mobes el kmo, a telungalek er tirka el mechuodel a melenget aike el techellir el obengkel, me bo el sebechel el meringel el oureor el kirel a ongdibel.
“Doba Chomeruul ma Klemerang el Kaubltikerreng”
13 Molengeseu er tirke el mechitechut. A Biblia a mengelechel er kid el mo ‘ngosuterir a re mechitechut a rengrir e [mo] klou a rengud el kirir el rokui’ me dochotii el kmo ngbliochel a bltkil a rengud. (1 Thesalonika 5:14) A rebetok el rudam er kid a mle mechitechut a rengrir engdi uriul e ngmlo mesisiich a klaumerang er tir. Engdi a rebebil a dirk melemolem lousbech er a kllourreng me a bltkil a rengud el mo ngosuterir. Me ngmekera dengesuterir? Ngsebeched lousbech er a Biblia el mo melisiich er tir, e dirrek el olengit er tir me dedak loldingel a obliil, me a lechub e kede di orrenges er tir sel longedecheduch. Ngdirrek el diak el kired el mo omes er a rudam me a rudos er kid el ua le “mesisiich” me a lechub e te “mechitechut.” Ngbai ungil a lak dobes el kmo kede rokui el di chemur a klisiched me a dirrek el chelitechetud. Ngmo lmuut er a apostol el Paulus me ngkilengei el kmo ngar er ngii a chelitechetul. (2 Korinth 12:9, 10) Me kede rokui el dirk ousbech a ngeso me a omelisiich.
Moukerebai er a Klengariourreng me a Klechubechub er a Jesus
16 A ungil el cheldechedechad. A ungil el uldesued a rullid el mo soad el ‘ngosuterir a re mechitechut a rengrir.’ (1 Th. 5:14) Ngera sebeched el melekoi el mo melisiich er tir? Ngsebeched el ouchais er tir el kmo ngbetik a rengud er tir. Ngdirrek el sebeched el chemat er tir e ngosuterir el mo melemalt a uldesuir el kirel a ungil el blekerdelir me a duch er tir. Ngsebeched el omeklatk er tir el kmo a Jehovah a ngilsuterir el mo medengelii a klemerang me te ulterekokl el kmal mekreos er a osengel. (Jn. 6:44) Ngdirrek el sebeched el ouchais er tir el kmo a Jehovah a kmal omekerreu er a remesiungel el tir a “chelam a rengrir” e ‘dikea omeltkir.’ (Psa. 34:18) Me a ungil el cheldechedechad a sebechel el mengelaod er tirke el chormang.—Osi. 16:24.
Morriter er a Tekingel a Dios
it-1-E 863-864
Deleboes
A chad el mora er a durs er a chebechiil el obengkel a chad el diak lebechil a kmal oberaod el tekoi le ngsebeched el mo uchul me ngmesuld a ngklel er a ongdibel. (1Ko 5:9-13; Heb 12:15, 16) Me a apostol Paulus a silodii el kmo a Kristiano el mora deleboes lomeruul a mora klengit el kirel a bedengel, e le ngousbech a klekedellel a bedengel el diak el ngar er a melemalt el rolel. Tia kmal klou a letemellii er a deleongel er ngii me a Jehovah, el luchul e ngrullii a ongdibel el mo diak leklikiid, e sebechel ngika el chad el mo uchul e ngmai a mekngit el rakt. (1Ko 6:18, 19) Nguchul a temellir a rudam er ngii el Kristiano (1Th 4:3-7) e le (1) ngmo uchul a otuub el mora ongdibel e dirrek el rullii a ongdibel me ngmo diak le klikiid (Heb 12:15, 16), (2) ngdirrek rullii ngike el chad el blo lebad lobengkel me ngmo diak el klikiid er osengel a Jehovah e a lsekum e ngika el chad a diak lebechiil e sel bo le bechiil e ngdiak le klikiid a chebechiielel, (3) a telungalek er ngii a mo diak el klikiid er osengel a Dios (4) e dirrek me a delal me a demal ngike el le blo er a klengit el obengkel me a dirrek el bechil, me a lechub ngike el telbiil el mo bechil me ngmo diak le klikiid. Ngika el chad a mengemikr er a Dios el ngii a mo melsii el kirel a klengit el lurrebet er ngii.—1Th 4:8.
A “Osebeliu a Kmedang”!
14 Ngera mo duubech er sel taem el lomuchel a Kok er a Makok el oldechelakl er a rechedal a Dios? A babier er a Mateus me a Markus a dul mesaod er tia el tekoi el kmo: “[A Ngelekel a Chad a] mo odercheterir a re anghel el mor a ikel eual uchul a eolt el mengideb er a re ngellitel er a Dios el melai er tir er a beluulchad el rokir.” (Mk. 13:27; Mt. 24:31) Me tia el ureor er a omengudel a diak losaod el kirel a taem el Dios a ulemuchel el mengudel er a rengellitel me a lechub e lebesterir a ulebongel el olangch. (Mt. 13:37, 38) A rengellitel a mo nguu a ulebongel el olangch er a uchei er a lomuchel a kloul ringel. (Och. 7:1-4) Me tiang ngera el omengudel el lulsaod er ngii a Jesus? Tia sel taem el tirke el ngellitel el dirk ngar tia el chutem a mo mengai el mo er a eanged. (1 Th. 4:15-17; Och. 14:1) Me tia el tekoi a mo duubech er a telkib el uriul er a lomuchel a odelecheklel a Kok er a Makok. (Ese. 38:11) Seikid e ngmo tmaut a tekingel a Jesus el kmo: “Isei e a re chedal a Dios a mo ngar a Rengedel a Demerir e mo medidiich el ua sils.”—Mt. 13:43.
15 A rebetok el chedal a klsuul el Klekristiano a oumerang el kmo te mo omes er a Jesus sel lluut el mei e melai er tir el rokui el mo er a eanged. Me nguaisei, engdi a Biblia a ouchais el kirel a “olengchelel a Ngelekel a Chad” el mo chemolt er a eanged me a temel el lemei “el ngar a eabed.” (Mt. 24:30) Me aikang a dul di mesaod a tekoi el diak el sebeched el mes. Me a lmuut el tang, “a tech ma rasech a diak el sebechel el mediukes er a Rengedel a Dios.” Me tirke el mo mengai el mo er a eanged a kirir el “mo obult, el kmal di mereched, el ua tal busechmad, sel le mekimd a ulebongel el ngerel a trombetang.” (Monguiu er a 1 Korinth 15:50-53.) Me tiang a ochotii el kmo, tirke el blak a rengrir el ngellitel el dirk ngar tia el chutem a mo mechudel el di ua rechedel a ta el busechmad.
July 15-21
MEKREOS EL TEKOI EL NGAR ER A BIBLIA | 2 THESALONIKA 1-3
“A Olechotel Ngike el Mekngit”
it-1-E 972-973
Blakerreng el Mora Dios
Tia dirrek el ochotii a ta er a berrotel el tekoi el ngii a omtok er a “berrotel el uldesuel” a Jehovah. Tiang a “berrotel klisichel a chelebirukel.” Tia el tekoi a mle berrotel er a remera el Kristiano e le ngar er a taem er a Paulus e ngika el “chad el diak lolab a llach” a dirkak lobeketakl el kmo ngtechang. Me a dirrek el sel taem el ngika el “chad” a mukdubech, e ngdirk melemolem el berrotel er osengir a oumesingd el chad e le aika el chebirukel el omerellel a loruul el lekong blakerreng el mora Dios. E a mera er ngii e ngbai omtok a mera el osisechakl. A Paulus a dilu el kmo a “berrotel klisichel a chelebirukel” a mla er ngii er a temir e le ngmla er ngii a klisichel a chelebirukel el mengitikaik er a ongdibel er a Rekristiano, el ngii a uriul e ngmo rullii a tia el cheldellel a remle Kristiano el tir a mla momtok a mera el osisechakl. Tirka mo mokngemed sel be el duum a Jesus Kristus. Ngika el “chad” el ngii tirke el omtok a mera el osisechakl el lousbech er ngii a Satan a mo “mekiis el mo dechor el omtok ra bek lokedongall el kmo chelid malechub e ngkuoll” (tekoi er a Grik, seʹba·sma). Me ngika el klou el omtok er a Dios el bo lousbech er ngii a Satan a kmal meduch el mengeuid e ngii a mo uchul a klou el telemall el mo er tirke el rokui el oltirakl er ngii. Me ngika el “chad el diak lolab a llach” a kmal klou a klisichel el mengebirukel e le ngousbech er a leko ngblakerreng el mora Dios el mengeuid er a rechad.—2Th 2:3-12, BT; momekesiu er a Mt 7:15, 21-23.
it-2-E 245 par. 7
Blulak
A Jehovah a mechei a “mesisiich el ongeuid” me ngduubech el mora rechad el tir a kongei a klsuul tekoi me ng “rulleterir el mo oumerang a blulak el tekoi” er a bai lorrenges er a ungil chais el kirel a Jesus Kristus. (2Th 2:9-12) Choua tia el osisiu el blekeradel a dilubech el mora king er a Israel el Ahab er a betok el rak er a mla memong. A rebetok el klsuul el profet a millisiich er a Ahab el kmo ngmo kats er a mekemad er a Ramothgilead alta profet er a Jehovah er a Mikaia a dilu el kmo ngdiak le uaisei. Me ngdi uai sel mlara ues el lilsang a Mikaia, a Jehovah a milecherei a ta er a anghel me ngmlo “mengeuid” er a reprofet er a Ahab. Tia belkul a kmo ngika el anghel a rirelleterir tirka el profet me te mlo melekoi a diak el klemerang el tekoi, e bai mlo melekoi aike el tekoi el mle sorir el melekoi e dirrek el mle ungil oderengesall er a dingal Ahab. Me alta Ahab a mluklatk er a telemall el mo duubech engdi ngbai kilengei lorrenges a blulekngir tirka el profet, el ngii a mlo uchul me ngoridii a klengar er ngii.—1Ki 22:1-38; 2Kr 18.
Morriter er a Tekingel a Dios
it-1-E 834 par. 5
Ngau
A Petrus a milluches el kmo a “eanged ma chutem el ngar ngii er chelechang a kldmokl . . . e medechel el kirel el mo metemall er a ngau.” Me sel donguiu er tiang e domes a bebil bades e ngbleketakl el kmo tia diak losaod er a mera el ngau e ngbai melutk el kirel a diak ulebengelel el tellemall. Me ngdi ua taem er a Ieleb er a sils er a Noah el dimlak le mera el metemall a eanged me a chutem te bai miltemall tirke el mekngit el chad el dimlak el sorir lolengesenges er a Dios, me ngdi osisiu el Jesus Kristus me a remesisiich el anghel er ngii el ngar e a kerdel a ngau a mo olekngemed er a mekngit el blekeradel er tia el chutem me tirke el mekngit el chad el uldimukl er ngii.—2Pe 3:5-7, 10-13; 2Th 1:6-10; momekesiu er a Isa 66:15, 16, 22, 24.
it-1-E 1206 par. 4
Mlukreng
“Mlukreng er a Dios.”—Mera el Mla er a Dios me a Diak. A tekoi er a Grik el pneuʹma (reng) a lousbech er ngii el ngar er a ileakl el rolel er a bebil er aike el babilengir a rechapostol. El uai tiang, ngar er a 2 Thesalonika 2:2, BT e a apostol Paulus a millekoi er a rudam el mlara Thesalonika me lak bo le mechas a rengrir me a lechub e bo louedikel a rengrir a “le borngii a tekoi el oeak a reng malechub e ngomelekoi, malechub e ngbabier el leko ngmlar kemam, el kmo ngmla me klsel a Rubak.” Me ngbleketakl el kmo a Paulus a uluusbech er a tekoi el reng el melutk el kirel a cheldecheduch el oeak omelekoi me a lechub e ngbabier. Sei a uchul me a babilengel a Lange el dai er ngii a Commentary on the Holy Scriptures (p. 126) a melekoi el kirel tiang el kmo: “A tekingel ngika el Apostol a mesaod el kirel a klemechel me a lechub a ues er a profet.” (Mloiuid e melluches el oeak a P. Schaff, 1976) E a Word Studies in the New Testament er a Vincent a melekoi el kmo: “Oeak a reng. Ngulaoch el mlara rechad er a ongdibel er a Rekristiano el tir a kmo te mlukreng er a Dios.” (1957, Vol. IV, p. 63) Me nguaisei, alta bebil oidel oliuid er ngii el pneuʹma er tiang me a dirrek ngar er aike bebil bades e ngmoiuid el reng, engdi bebil er a oidel a moiuid el “klemechel a reng” (The Bible—An American Translation), “ulaoch” (The Jerusalem Bible), “mlukreng”(D’Ostervald; Segond [tekoi er a France]), “mlukreng er a Dios” (NW).
July 22-28
MEKREOS EL TEKOI EL NGAR ER A BIBLIA | 1 TIMOTHY 1-3
“Molengeriakl el Mo Meruul a Lmuut el Ungil Ureor”
Ke Medengelii a Klungel a Ultutelel a Dolengeriakl er a Omesiunged?
3 Monguiu er a 1 Timothy 3:1. A apostol el Paulus a chilat er a rudam el tir a “semeriar el mo mengeteklel a ikelesia.” Tirkang a ua chad el melasem el melai er a klalo el cheroid er ngii me ngtometii a chimal el mo melai er ngii. Me ka molatk er a odam el soal el mo ta er a remesiou er a ongdibel. Ngmedengei el kmo ngkirel el mo blak a rengul el omekeroul a blekerdelel a Kristiano. E sel taem el bo leta er a remesiou er a ongdibel, e ngkirel el melemolem el blak a rengul el meruul er a omesiungel me ngmo sebechel el rredemelel a ngmai a lmuut el betok el ngerachel er a chelsel ongdibel.
km-E 9/78 4 par. 7
Tirke el “Mo Ungil er a Ngerchelir”
7 Ngbeot er kid a mesa uchul me a Paulus a dilu el kmo, tirka “mo ungil a chisir.” Tia diak le belkul a kmo te mo melai a ngarbab el deruchall el uai a lolekoi a rebebil. Ngbai tirka el odam lolengeseu er a remechuodel el tir a “ungil er a ngerechelir” a lolisiich er tir el kmo te mukngeltengat er a Jehovah me a Jesus, te dirrek el nguu a omengull er a ongdibel. Me te “mimokl el ouchais el kmo toumerang er a Kristus.” Me tir el kmal loltaut er a belkul a ngerechelir, me kede kmal mereng a sulir er a meringel el urerir, te mesisiich a klaumerang er tir e mimokl e bekeu el louchais el kirel a klaumerang er tir.
Morriter er a Tekingel a Dios
it-1-E 914-915
Ruldidellel a Rasech
Ngkmal diak a belkul a bo de dmolech el mesuub e mesaod a ruldidellel a rasech, el ua sel taem el Paulus a loluches el mora Timothy. Ngar tia el taem e ngmlo diak el klou a ultutelel a doruul a record er a ruldidellel a rasech el olecholt el kmo kede ngar er a telungalek le ngar er a chelsel a ongdibel er a Rekristiano e a Dios a omes er a Rechijudea me a Rechisentael el diak a klekakerous er tir. (Gal 3:28) Me aike el record er a ruldidellel a rasech a mla meketeklii el kmo a Kristus a ngar er a ruldidellel a rsechel a David. E dirrek el diak el meketeket el taem er uriul er a llechesii tiang a Paulus e a Jerusalem a mo metemall el uldimukl er aike el record er a Rechijudea. A Dios dimlak le terebengii a telemellel aikang. Sei a uchul me a Paulus kmal mle soal a Timothy me a rechad er a ongdibel a lak bo le mechesang el kirel aika el tekoi el dimlak a ngera el lerellii er a klaumerang er tir. A ruldidellel a rasech el debetik er a Biblia a kmal ungil lochotii el kmo a Kristus a Mesias el ngii a ruldidellel a rasech el klou a ultutelel er a Rekristiano. Aike el bebil er a ruldidellel a rasech el debetik er a Biblia a ochotii el kmo, a Biblia a klemerang el meketeklii el kmo ngmelemalt a omesodel er a tekoi er a reksi.
cl-E 12 par. 15
“Ka Mesang, Ngkaikid a Dios er Kemam”
15 A ta er a dui el di mora Jehovah el di ngii el tang a “King ra ikel bek el taem.” (1 Timothy 1:17, BT; Ocholt 15:3) Tia ngngera belkul? Tia el tekoi a meringel er kid a redi chad el mo mtebengii engdi a Jehovah a diak a ulebengelel er a irechar me a dirrek el ngar medad. A Psalm 90:2 a melekoi el kmo: “Kau a diak a ulebengelem el Dios, el diak a uchelem el diak a ulebengelem.” Me a Jehovah a diak a uchelel; ngkaikid er a lengar er ngii. Me ngkmal melemalt a dedu el kmo “ngikel mle ngar er a irechar el mei” e le ngkmal irechar er a uchei er a lobeob a rechad me tia el melidiul, e a Dios ngkaikid er a lengar er ngii! (Daniel 7:9, 13, 22) Me ngtecha ngar ngii a llemeltel el mo oukerrekeriil el kmo ngika merreder er a cherrengelel a eanged me a chutem?
July 29–August 4
MEKREOS EL TEKOI EL NGAR ER A BIBLIA | 1 TIMOTHY 4-6
“Omeluu er a Dios me a lechub e Ngskel a Kerruul”
w03-E 6/1 9 par. 1-2
Mesuub er a Rolel e Ngmo Diak Olengesonges er Kid
A klou luchul me a Paulus a mle dmeu a rengul a ngii el dimlak olengesonges er ngii. Ngera belkul a bo lak olengesonges er kid? Ngbelkul a kmo ngdmeu a rengud er aike el ngar er ngii er kid. Me a Paulus a milsaod el kirel tiang el mora Timothy el kmo: “Ng klou a klungiolel a deko Dios el ungilbesul er a rengud a ikel ngar ngii er kid; ele ng dimlak a ngeral dobang el mer tial beluulchad, e diak a tal ngeral de nguu el tuobed er tial beluulchad; Me bo lungilbesul er a rengud a le ngar ngii a biled ma keled.”—1 Timothy 6:6-8.
A utebengall el tekoi a kmo a Paulus uldekiar a omeluu er a Dios me a diak olengesonges er kid. Ngmiltebengii el kmo a mera el deurreng a mei loeak omeluu er a Dios el ngii sel denguu a omesiunged el mora er a Dios el mo kot er a chelsel a klengar er kid el diak el ilteet me a lechub e le kerruul. A lsekum e ngmla er ngii a ‘kelel me a bilel’ e aika mle ungiang el lousbech el mo nguu a omesiungel el mo kot. Me ngar osengel a Paulus e a bo lak a olengesenges er kid, e ngbelkul a kmo kede mo mui lultuil er a Jehovah er a chelsel a ngii di el blekeradel el bo dechelebangel er ngii.
g-E 6/07 6 par. 2
A Lsekum e Ngmoktek er Kau a Mo Merau, e Tiang Ngera Ngrullii el mo er Kau?
A chad a diak le mad a lsekum e ngar er a skel a ilteet. Me nguaisei engdi ngsebechel el kmal mo mechesang losiik a ilteet e a klengar a mei lengelakl er ngii. Ngdirrek el sebechel a sebekreng me a ngelsengesel a udoud el mo uchul a panic attacks, e mo di diak a cheliuir, e smecher el di meringel a bderrir, e dirrek el mo ulcers el aika secher el sebechel el kodebengii a klengar er tir. Me alta uriul e ngika el chad a mo ngodechii a uldesuel el ilteet a mo diak lekot er a klengar er ngii engdi nglocha mla mo too late. E le bechil a locha mla mo diak loumerang er ngii, e mla mo diak a ungil deleongel er ngii me a rengelekel, me a dirrek el locha mla mo er ngii a secherel a bedengel el diak el sebeched el mekerang. Me alta bebil er a tekoi el miltemall a sebechel el meruul engdi ngmo ousbech er a klou el taem. Tirka el uaisei el chad a mera el “mla mo chuarm a rengrir er a betok el bedengel a ringel.”—1 Timothy 6:10.
g-E 11/08 6 par. 4-6
Elolem el Rolel e Ngmo Ungilbesul a Klengar er Kid
Me ngdi ua dulsaod er ngii er a uchei, tirke el omdasu el kmo a bo le betok a ududed e ngii a mo ungil besul a klengar er kid a di tir el mecheblad er tir. Tirka diak di bo louuchel a rengrir e merekong ngdirrek el mo uchul a klou el klengiterreng. El uai tiang, tirke el blak a rengrir el mengereker a betok el udoud a mengemikr er a telungalek er tir me a sechelirir. A rebebil a dirrek el mo olengesonges a cheliuir, e le te di oureor me a lechub e ngsebekreng er a urerir a uchul. A Olisechakl 5:12 a melekoi el kmo: “Ngkmal ungil a cheliuel a chad er a ureor, alta ngbetok a kelel me a lechub e ngdiak; engdi a iltetel a chad el merau a rullii me ngdiak a cheliuel.”—Hebrew Names Version.
A udoud a diak di le mekngit el mastang ngdirrek el cheblad. A Jesus Kristus a milsaod el kirel a “chelebldil a ilteet.” (Markus 4:19, BT) El belkul a tekingel a kmo a ilteet a tibir el kmo a bo lebetok a ududed e ngmo a dmeu a rengud engdi tia tekoi el diak el sebechel a ilteet el rullii. Ngbai a udoud a di mo ngesonges a rengul a chad. A Olisechakl 5:10 a melekoi el kmo: “Ngike el betik a rengul er a udoud a di olengesonges a rengul er a udoud.”—The New English Bible.
Me a chad el betik a rengul er a udoud a diak el bo el deu a rengul ngdirrek el mo uchul a kngtil a rengul e sebechel mo uchul e ngremuul a delengerenger. (Osisechakl 28:20) Aike uldimukl er a uchul me a chad a mo ungilbesul a klengar er ngii a sel bo lebekururau, e bo loba reng er a klausubes, e leklikiid, e loba bltikerreng, e lemesisiich a deleongel er ngii el obengkel a Dios.
Morriter er a Tekingel a Dios
lv bliongel 2 par. 17
Ngmekerang e Melemolem el Klikiid a Ukltkem?
17 A apostol el Petrus a milluches el kmo: “Mkerekikl ma ukltkel a rengmiu di le bliochel.” (1 Petrus 3:16) Ngklou el klengeltengat a lsekum a ukltked a bliochel er a osengel a Jehovah el Dios. Ngkuk ngodech er a ukltkir a rebetok el chad er chelechang, el ua lolekoi a Paulus el kirir el kmo: A “rengrir a ua lulekoad me ng dikea lolechesuar a klekakerous er a ungil ma mekngit.” (1 Timothy 4:2) Te betok a mla mo ua lulekoad a ukltkir, me ngdikea lsebechel el omeklatk e lomekringel e lomekrur er tir el kirel a mekngit el omerellir. Me ngdi ua lungil a rengrir, e le ngdikea tekoi el omekringel a uldesuir.
it-2-E 714 par. 1-2
Omengiuel a Chedaol Llechukl el mora Ongdibel
Chelsel Ongdibel er a Rekristiano. Ngar er a chelsel a kot el dart er rak, e te di mle kesai a olab a copy er aike el iluil el babier er a Biblia me a uchul omengiuel Chedaol Llechukl a kmal mle klou a ultutelel. A apostol Paulus a dilu el kmo ngmle kirir el menguiu aike el tengami er ngii er aike el miting er a Rekristiano e dilu er tir me te dirrek el mo kerous ngii el babilengel er a delongelir el lemechuiu el rokui er aike el blil ongdibel. (Kol 4:16; 1Th 5:27) A Paulus a milengelechel er a Timothy el mo blak a rengul er a “chomengiuel a chedaol Llechukl el mora kldibel, ma chomengelechel ma chosisechakl.”—1Ti 4:13, BT.
Ngkirel a chad el menguiu a Chedaol Llechukl el ungil menguiu. (Hab 2:2) Ngika el chad el meruul er tiang a meruul er ngii el mo klungiolir tirke el orrenges er ngii me a uchul me ngkirel el medengelii a tekoi longuiu er ngii e medengei belkul a tekingel ngike el milluches, e kerekikl er a omengiuel me a rurrenges er ngii le mtab a belkul a tekingel a milluches. A doltirakl er a Ocholt 1:3, e tirke el menguiu a ulaoch me tirke lorrenges e oltirakl a mo ngeltengat.