Reference el kirel a Subeled er a Miting er a Klengar me a Omesiunged
August 5-11
MEKREOS EL TEKOI EL NGAR ER A BIBLIA | 2 TIMOTHY 1-4
“Ele Reng el Le Bilskid a Dios a Diak Le Rellid el Mo Medakt”
w09 5/1 15 par. 9
Kemiu el Ngeasek—Mocholt a Ngelsechekliu
9 A bo lolengeseu er a Timoteus, e a Paulus a ulemklatk er ngii er a uriul el kmo: “Ele le bilskid a Dios a diak le reng ra dakd, e ngbai reng ra klisiich, ma bltikerreng, ma ulserechakl.” (2 Timoteus 1:7) A “ulserechakl” a uldimukl er a lsebeched el ungil el omdasu e domes a urrebetellel a omesodel a tekoi. Nguldimukl er sel sebeched el omes a mera el blekerdelel a tekoi el ngar er ngii, el diak el oeak sel di soal a osenged. A rebebil er a rengeasek a olecholt er a dakt el reng e melasem el chemiis a meringel el blekeradel el oeak a imis el cheliuaiu me a lechub a osengel a TV me a usbechel a mekngit el kar me a imis el omelim, e mo chad er a omilil, me a lechub e te kiei el ngar er a deleboes. A Rekristiano a longelechel er tir el mo ‘mengoit a ikel tekoi el diak le ko Dios ma ngibes er tial belulechad, me le ngar er tial belulechad el ulserechakl a rengrir, e le melemalt, e loluu ra Dios.’—Titus 2:12.
‘Bo Mesisiich E Bekeu!’
7 A Paulus, er a loluches el mo er a Timoteus, e ngmellekoi el kmo: “Ele le bilskid a Dios a diak le reng ra dakd, e ngbai reng ra klisiich, . . . Misei e lak merur lolecholt ra Rubak er kid.” (2 Timoteus 1:7, 8; Markus 8:38) Kede mla menguiu aika el tekoi, me ngsebeched el oker er kid el kmo: ‘Ngak ak merur er a klaumerang er ngak, ma lechub ak bekeu? Me sel kngar er a urerek (ma lechub e kngar er a skuul), a kuuchais er tirke el meliuekl er ngak el kmo ngak a ta er a Sioning er a Jehovah, ma lechub e a kumart er tia el tekoi er tir? Ngak ak merur e le kngodech er a rebebil, ma lechub e ngdmeu a renguk el kltukl el ngodech e le ngdeleongel er ngak ma Jehovah a uchul?’ A lengar er ngii a kora medakt el omerk er a ungil el chais ma lechub e le kora merur el mo dechor el kirel a klaumerang er ngii, e ngungil a bo lolatk er a uleklatk er a Jehovah el mo er a Josua el kmo: “Bo mesisiich e bekeu.” Kele mobes el kmo, ngdiak a belkul a uldesuir tirke el dedak el oureor me tirke el dedak el ngar er a skuul e ngbai osengel a Jehovah ma Jesus Kristus seikid a klou a ultutelel.—Galatia 1:10.
Morriter er a Tekingel a Dios
Mosiik er a Mera el Ilteet
13 A Timothy a chad el uluumerang er a Dios. A Paulus a ulemekedong er a Timothy el “ungil soldau er a Kristus Jesus,” e a uriul e ngdilu er ngii el kmo: “A soldau el oureor, a diak longesengsang er ngii er a tekingir a re di chad el diak le soldau, ele ng soal di kldmokl el mor a ikel lomdasu a merreder er ngii.” (2 Timothy 2:3, 4) Me a rultirakl er a Jesus er chelecha el taem el uldimukl er a kuk betok er a ta el miliol el mui el taem el mesiou, a blak a rengrir el oltaut er tia el ulekrael er a Paulus. Me te oltngakl a ngii di el tekoi el lousbech tia el beluulechad el di melisiich a rechorecherreng el mengesuseu er a rechad. Te dirrek el blechoel el melatk er a omellach er a Biblia el kmo: A “meleng a udoud a sibil a lulleng a udoud er ngii.” (Osisechakl 22:7) A Satan a kmal soal a bo dongoit a rokui el temed me a klisiched el oureor er a chelsel tia el beluulechad er ngii. Me a rebebil a meleng a kmal betok el udoud el mo omechar a blirir me a mlirir me a skulir me a lechub a chebechiielir. Me a lsekum ngdiak dekerekikl, e ngkmal sebeched el mo blals el betok el rak. Engdi a lsekum kede olecholt er a llomeserreng, e kede omekbeot a klengar er kid e diak domals er kid, e dirrek el melasem el mo diak di dongoit a udoud. Ngokiu tiaikid el rolel e kede mo mimokl el mesiou er a Dios, e diak bo desibil tia el beluulechad el di melisiich a siobai.—1 Timothy 6:10.
A Rechedal a Jehovah a ‘Mengeroid er Tir er a Klengit’
10 Chelecha el taem e ngdiak leblechoel el mo er ngii a rechad el ngar er a chelsel a ongdibel el omtok a mera el osisechakl. Me nguaisei, engdi kede locha dirk mo remenges a uldasu el omtok a osisecheklel a Biblia. Me a ngii di el rolel e kede remenges aika el klsuul el osisechakl me kid a di kired el mo mesisiich el oltngakl el rokui. Ngdiak luchul a llomeserreng el bo dongedecheduch er tirke el omtok a mera el osisechakl me a lechub e dongedecheduch er tir el okiu a Internet me a lmuut el bebil er a rolel. Me alta ngsoad el olengeseu er tir, engdi a bo dongedecheduch er tir me kid a di mo omtok a llechul a Dios, el Ngii a kmal mengelechel er kid el mo oltngakl e mengeroid er kid er tirke el omtok a mera el osisechakl.
August 12-18
MEKREOS EL TEKOI EL NGAR ER A BIBLIA | TITUS 1–FILEMON
“Tutketerir a Re Mechuodel”
w14-E 11/15 28-29
A Ker el Mla er a Remenguiu
Me alta a bades a diak a komakai el omesodel el kirel a rolel e te millutk er a rederta el mechuodel engdi ngsebeched el mesa rolel e ngmileketmokl. Kede menguiu el kmo, ngar sel kot el omerolel a Paulus me a Barnabas e te “millilt rar mechuodel ra dertal eklesia, el kirir ar Ubengkel a Jesus, me tulelsengerenger e meluluuch lolterekokl er tir er ngikel loumera er ngii el Rubak el Jesus.” (Rel 14:23, BT) Betok el rak er uriul e a Paulus a milluches el mora kldemel er a Titus el kmo: “A uchul mak milechikau er a Krete a kirem el mo rukui el sumechokl a ikel dirk teleu el ureor, e tutketerir a re mechuodel er a ikelesia er a bek el beluu el oltirakl a ikel kdilu er kau.” (Titus 1:5) Ngdirrek el Timothy el ngii a mirrael el obengkel a Paulus me ngilai a osisiu el ulekrael. (1 Ti. 5:22) Me ngbleketakl el kmo aika el omelutk er a remo mechuodel a lurruul a rudam el oldingel a ongdibel el dimlak el rechapostol me a lechub e te remechuodel el ngar er a Jerusalem.
Ngoeak aika el tekoi el ngar er a Biblia e a Chelechad er a Ruungerachel er a Resioning er a Jehovah a mla ngodechii a rolel e te melutk er a remo mechuodel me a dirrek el tirke el mesiou er a ongdibel. Me ngulemuchel er a September 1, 2014, e a rolel omelutk a mlo uai tiang: A derta el odam el oldingel a ongdibel a mo kerekikl el merriter aike el recommendation er aike el ongdibel el loldingel. Ngar aike el temel loldingel er a derta el ongdibel e ngmelasem el mo medengelterir tirka el odam el ble le recommend er tir e melasem el oureor lobengterir el oldingel obliil. E a uriul er a lechadecheduch ngii me a chelechad er a remechuodel el kirir tirke el ble le recommend er tir, e ngerechelel ngika el odam loldingel ongdibel el melutk er a remo mechuodel me a rudam el mesiou er a ongdibel. Ngoeak tia el rolel e tia blekeradel a meketmokl el ua lurruul er ngii a Rekristiano er a kot el dart el rak.
Te rua techang a ulemekrael er tia el tekoi? Nguaisei, a “blak a rengul e mellomes a rengul el mesiou” a ngerechelel el omeka er tirke el bebil er a mesiou. (Mt. 24:45-47) Tia uldimukl er ngii a merriter a bades el ousbech er a ngelseuil a chedaol reng me bo el sebechir el oltirakl a omellach er a Biblia e locholt a ulekrael el kirel a oketmeklel ongdibel el meliuekl er a beluulechad el rokir. A chelechad er a ruungerachel a dirrek el melutk er a remo odam el oldingel ongdibel me a dirrek el tirke el mo oungerachel aike el meklou el obis er kid. E tirke el ngar er aika el meklou el obis a omekrael tekoi me bo el sebechir a ongdibel el mo oltirakl a ulekrael el lomeskid. Me a derta el chelechad er a remechuodel a ngerechelir el momes aike el bades el olecholt aike el kirir a rudam el meruul a lsekum e ngsorir el mo mesiou er a ongdibel el kmo, tirka rudam el le recommend er tir te oltirakl. E a Derta el odam el oldingel ongdibel a ngar ngii a oberaod el ngerechelir el mo merriter e meluluuch el kirel tirke el ble le recommend er tir a remechuodel e mo melutk er a rredemel a ngmai aika el ngerachel.
Morriter er a Tekingel a Dios
w89-E 5/15 31 par. 5
A Ker el Mla er a Remenguiu
Tia diak el belkul a kmo a Paulus a kilengei aike el uldesuir a rechad el kirir a rechad er a Krete. Ngsebeched el mo ulterekokl a rengud el kirel tiang e le Paulus a mle medengei el kmo a beluu er a Krete a mla er ngii a reblak a rengrir el Kristiano el Dios a kilengei er tir e dirrek el milesterir a chedaol reng er Ngii. (Rellir 2:5, 11, 33) Te mla er ngii a rebetok el blak a rengrir el Kristiano me a uchul e ngmla er ngii a ongdibel er a “bek el beluu.” Me alta tirka el Kristiano er a beluu er a Krete a dimlak el lemecherrungel, engdi ngulterekokl a rengud el kmo tirka dimlak le bulak e lemesaik e ngemokel, le kede medengei el kmo a ble leuaisei a blekerdelir e te diak loba kengei er a Jehovah. (Filipi 3:18, 19; Ocholt 21:8) Me ngdi uai chelecha el taem er a chelsel a bek el beluu, te mla ngar ngii a melemalt a rengrir chad el mla Krete el mle mekngit a rengrir er a ike el mekngit blekeradel el iliuekl er tir e mle kltmokl el mo kongei er a klemechel a Rekristiano.—Esekiel 9:4; momekesiu er a Rellir 13:48.
Omesodel a Babier el Mo er a Titus, me a Filemon, me a Rechad er a Hebru
15, 16—Ngera uchul me a Paulus a dimlak el lolengit er a Filemon me lebsa Onesimus a ilmokl? A Paulus a mle kerekikl el di oltirakl er sel ngerechelel el “omerk ra rengedel a Dios el olisechakl a tekoi ra Rubak el Jesus Kristus.” Misei a uchul me ngdimlak el bo el chelsechusem er a tekoi er a klsibai.—Rellir 28:31.
August 19-25
MEKREOS EL TEKOI EL NGAR ER A BIBLIA | HEBRU 1-3
“Bo Lebetik a Rengum er a Llemalt e Mouketui a Chelebirukel”
Modengesii a Kristus el Kebkall el King!
8 Sera rak er a 1914, e a Jehovah a tiltkii a Ngelekel el mo Mesias el King el ngar er a eanged. Ngmo ‘mengedereder er a rechedal el oba llemalt,’ me ngulterekokl a rengud el kmo a omengederederel a di blechoel el melemalt. Ngar er ngii a llemeltel el mengedereder e le ‘omerrederel a le bilsang a Dios,’ e ngii a mo mengedereder el “diak a ulebengelel.” Ngkmal dmeu a rengud el mesiou er a Jehovah el ngar cheungel omengederederel ngika el mla metutk el King!
Modengesii a Kristus el Kebkall el King!
7 Monguiu er a Psalm 45:6, 7. A Jesus a kmal betik a rengul er a llemalt e ouketui a ngii di el tekoi el sebechel el oltuub er a Demal a uchul me a Jehovah a ngileltii el mo King er a Rengedel a Mesias. A Jesus a mlechilt er a “cheluch ma deurreng” el kuk ngar uchei er a “re bek el king,” el mesaod el kirir a reking er a Juda el dirrek el uldidellel a rsechel a David. Ngoeak a ngera el rolel? A kot, e a Jehovah a ngileltii a Jesus. Ongerung, a Jehovah a ngileltii a Jesus el mo mengedereder el King e dirrek el mo mesiou el Ngarbab el Prist. (Psa. 2:2; Heb. 5:5, 6) Ongedei, ngdimlak lemengilt el okiu a cheluch el ua reking er a Israel, e ngbai milengilt el okiu a chedaol klisichel a Dios. E a ulebongel er ngii, e ngmengedereder el ngar er a eanged, el diak lengar tia el chutem.
Morriter er a Tekingel a Dios
it-1-E 1185 par. 1
Okesiul
A Jesus ngkaikid er a lecherrungel el okesiul a Demal?
A kot el ngelekel a Dios el Sechal ketengel el uriul e ngmle chad el Jesus, a okesiul a Demal. (2Ko 4:4) Ngkaikid ngike el Ngelekel lulengedecheduch er ngii a Dios el kmo, “bo doruul er a chad; kede mo rullii el ua ikid el ua teleteled,” tiakid el klaisisiu er a Chedam el ngike lulemeob, me a Ngalek a mla er ngii er sel taem er a lobeob a Ngalek. (Gen 1:26; Jn 1:1-3; Kol 1:15, 16) Me sera lemei er a chutem el cherrungel el chad, e ngullecholt a blekerdelel me a teletelel a Chedam el mo er sel kot el ngarbab el rolel e a di chad a sebechel rullii, me a uchul me ngmle sebechel el melekoi el kmo “ngikel mla mesekak a mla mesa Chedam.” (Jn 14:9; 5:17, 19, 30, 36; 8:28, 38, 42) A Jesus a liluut el kmal mo uai a Chedam er sel taem er a lemokiis el mora er a eanged e a Demal el Jehovah el Dios a milsang a “rokui el klisiich er omerreder er a eanged ma beluulchad.” (1 Pe 3:18; Mt 28:18) Me a Dios el ulengesecheklii el mora “ngarbab el deruchall” me chelecha Ngalek a mla ochotii a klebkellel a Chedam el kuk ngarbab er sel lullecholt er ngii er a uchei lemei er tia chutem me sera lengar tia el chutem. (Fil 2:9; Heb 2:9) Chelecha e ng “meral blekerdelel a teletelel a Dios.”—Heb 1:2-4, BT.
it-1-E 1063 par. 7
Eanged
A tekoi el debetik er a Psalm 102:25, 26 a melutk el kirel a Jehovah el Dios engdi a Paulus a uluusbech er ngii el mesaod er a Jesus Kristus. Tia uaisei le ngika el di ta el Ngelekel a Dios a luluusbech er ngii a Dios el omeob a rokui el tekoi. Me a Paulus olecholt er a klekakerous er a Ngalek el ngii a diak el bo lengemed me a aike el tekoi el lulemeob el sebechel a Dios el “imuil el ua ikrel a bail” e ngmai el imakl.—Heb 1:1, 2, 8, 10-12; momekesiu er a 1Pe 2:3.
August 26–September 1
MEKREOS EL TEKOI EL NGAR ER A BIBLIA | HEBRU 4-6
“Bo er a Tkurrebab el Sebechem el Mo Soiseb er a Ulengull er a Dios”
Ngerang a Ulengull er a Dios?
3 A eru el olechotel a tekoi a ngosukid el mo medengei el kmo sel ongeuid el sils a dirk millemolem er a taem er a Jesus me tirke el kot el Kristiano. A kot, e ka molatk a tekingel a Jesus el mo er tirke el uluukerrekeriil er ngii er a lomekungil er a chad er a Ulengull el Sils, e le te ulemdasu el kmo tiang a mle ta er a rolel a ureor. Me a Jesus a dilu er tir el kmo: “A Demak a uluureor el me lmuut er chelechang, me ngak ma kdirrek loureor.” (Johanes 5:16, 17) Ngera mle belkul a tekingel a Jesus? Ngmle belkul a kmo: “A Demak me ngak a meruul er a osisiu el ureor. E a Demak a mla oureor er a chelsel a betok el Ulengull el Sils e dirk melemolem el oureor, me ngak a sebechek el oureor er a Ulengull el Sils.” A tekingel a Jesus a olecholt el kmo a ongeuid el sils, el ngii a Ulengull el Sils er a Dios, a dirk millemolem er a taem er ngii.
4 E sel ongeru el olechotel a tekoi a losaod er ngii a apostol el Paulus. Me sera losaod er a Genesis 2:2 el kirel a ulengull er a Dios, e a Paulus a mlukrael el mo meluches el kmo: “E kid ar uumerang a soiseb er ngiil ulengull.” (Hebru 4:3, 4, 6, 9) Me a ongeuid el sils a dirk millemolem er a taem er a Paulus. Me tia el ulengull el sils ngmo merek er a oingerang?
5 Me a bo el sebeched el onger er tia el ker, e ngkired el melatk er a moktek er a ongeuid el sils. A Genesis 2:3 a mesaod el kirel el kmo: “Ng ulemekngeltengat er ongeuid el sils e ileklii el mo ngodech er a bek el sils.” Sel sils a mle ngodech er a bek el sils e le ngmle chedaol me a lechub e a Jehovah a ileklii me bo el sebechel el churrengelii a moktek er ngii. A Jehovah a mle soal a rebekongesenges el sechal me a redil a bo lekiei er tia el chutem e lomekerreu er ngii me aike el rokui el klengar el ngar er a chelsel. (Genesis 1:28) Sel uchul me a Jehovah el Dios me a Jesus Kristus, el ngii a “rubak ra ulengull el sils,” “a uluureor el me lmuut er chelechang” a mo oltaut er a moktek er a Dios el kirel tia el chutem. (Matteus 12:8) Me a ulengull el sils er a Dios a melemolem el dimerekmo lemecherrungel a moktek er ngii er a ulebengelel a Ta el Telael el Rak er a Omengederederel a Kristus.
Ngerang a Ulengull er a Dios?
6 A Dios a mle bleketakl el ouchais er a Adam me a Eba er a moktek er ngii el kirel a beluulechad, engdi tir a dimlak loltaut er ngii. Nguaisei, engdi ngdimlak el di el tir el tang a mlo diak lolengesenges. Seikid el taem el mei e te betok el miliol el chad a dimlak lolengesenges. A renged er a Israel, el ngellitel el chedal a Dios, a dirrek el mlo diak lolengesenges. E a Paulus a ulemeklatk er a Rekristiano er a kot el dart el rak el kmo a rebebil er tir a dirrek el mle sebechir el ruebet er tiakid el bedikl el uai a rechad er a Israel er a irechar. Ngmilluches el kmo: “Misei e bo le blak a rengud el mo soiseb er tial ulengull, me lak a chad el mo ruebet loltirakl er sel blekeradel el diak lolengesenges.” (Hebru 4:11) A Paulus a dilu el kmo a rediak el bekongesenges el chad a diak bo el siseb er a ulengull er a Dios. Tiang ngera belkul el kired? Tiang ngbelkul a kmo a lsekum e kede mo omtok er a moktek er a Dios, e ngdiak bo desiseb er a ulengull er a Dios? Nguaisei, a nger er tia el ker a klou a ultutelel el kired, me kede mo mesaod er ngii. Engdi kot e kede mo mesaod er a mekngit el blekerdelir a rechad er a Israel me a uchul e ngmlo diak el siseb er a ulengull er a Dios.
Ngerang a Ulengull er a Dios?
16 Ngdiak a ta er kid er chelechang el loumerang el kmo a Rekristiano a kirir el mo olengesenges er a Llach er a Moses me bo el nguu a osobel. A tekingel a Paulus el mo er a Rekristiano er a Efesus a bleketakl el kmo: “Ele kemiu a mlosobel loeak a grazia, el kloumera uchul; el diak di ble le kemiu, ngbai sengk ra Dios-ngdiak lomeruul a uchul, el kirel me lak a chad el di ngii el chotengii.” (Efesus 2:8, 9) Me a leuaisei, e te mekerang a Rekristiano e mo soiseb er a ulengull er a Dios? A Jehovah a ileklii a ongeuid el sils, el ulengull el sils er ngii, me bo el sebechel el otutii a moktek er ngii el kirel tia el chutem me a rebekongesenges el chad. A Jehovah a ousbech er a cheldebechellel el ouchais er kid el kirel a moktek er ngii me aike el soal a bo doruul. Ngsebeched el mo soiseb er a ulengull er a Jehovah a lsekum e kede olengesenges er ngii me a dirrek el cheldebechellel.
17 Engdi a lsekum e ngdiak dolengesenges a ulekrael er a blak a rengul e mellomes a rengul el mesiou, e di kid el melilt aike el meklou a ultutelel el tekoi, e kede mocha omtok er a moktek er a Dios. E tiang a sebechel el tomellii a ungil el deleuill er kid me a Jehovah. Ngar er a ongingil el suobel, e kede mo mesaod a bebil el blekeradel el meskid a techelled el olecholt el kmo kede olengesenges me a lechub e ngdiak. Aike el tekoi el bo dolilt a ochotii el kmo kede mla soiseb er a ulengull er a Dios me a lechub e ngdiak.
Morriter er a Tekingel a Dios
w16.09-E 13
A Ker el Mla er a Remenguiu
Ngera “tekingel a Dios” el losaod er ngii a Hebru 4:12 el kmo ng “di ngar e mesisiich”?
▪ Sel donguiu a bades e ngochotii el kmo a Paulus a milsaod el kirel a klumech me a lechub a moktek er a Dios el debetik er ngii er a Biblia.
Tia el bades er a Hebru 4:12 a blechoel el debetik er ngii er aika el babilenged el mesaod el kirel a Biblia el ngar er ngii a klisichel el ngmodech a klengar er kid, e melemalt a dousbech er ngii el ngar tia el rolel. Me nguaisei engdi ngklou a lengesukid er ngii tia el bades a lsekum e kede omes er ngii er sel dmolech el belkul. Ngar tia el bades e a Paulus a millisiich er a Rekristiano el chad er a Hebru el mo oureor el obengkel a moktek er a Dios. El betok a debetik er a chedaol llechukl. Me a Paulus a uluusbech er sel taem el rechad er a Israel a silobel er a klsibai er a beluu er a Ekipten el mo olisechakl er tir er tia el tekoi. A rechad er a Israel a mla er ngii a omeltkir el mo soiseb er a beluu er a nglat el “ungil chutem el mededaes, el kmal ungil chutem el ungil a dellomel er ngii” el lebo er ngii e ngsebechir el metik er a mera el ulengull.—Exo. 3:8; Dut. 12:9, 10.
Tiang a mle moktek er a Dios. Engdi a uriul e a rechad er a Israel a dillecherecher a rengrir e mlo diak lolecholt er a klaumerang me ngoumesingd er tir a dimlak le soiseb er a ulengull er a Dios. (Ule. 14:30; Jos. 14:6-10) Me nguaisei engdi a Paulus a dilu el kmo ngdirk ngar er ngii a ‘telbiil er a mo soiseb er a ulengull [er a Dios].’ (Heb. 3:16-19; 4:1) Tia el “telbiil” a bleketakl el kmo nguldimukl er a moktek er a Dios. Me ngdi uai a Rekristiano el chad er a Hebru, kid a dirrek el sebeched el menguiu a moktek er a Dios el ngar er a tekingel e oureor el oltirakl er ngii. Me a Paulus a millekoi a bades el ngar er a Genesis 2:2 me a Psalm 95:11 el melisiich el kmo tia el telbiil a mle uldimukl er a moktek er a Dios.
Me ngkmal kirel remutech a rengud el kmo ng “dirk . . . medechel ngiil telbiil er a mo soiseb er a ulengellel.” Me ngulterekokl a rengud el kmo tia el omeltked el debetik er ngii er a Biblia el ngii a mo soiseb er a ulengull er a Dios a sebechel meketmokl, e kid a mla remuul a tekoi me bo el sebeched el soiseb er ngii. Kid a dimlak doruul er tiang loeak a otirekled er a Llach er a Moses me a lechub e loeak a ngodech el tekoi. Ngbai loeak a klaumerang er kid e ngdmeu a rengud el oureor e melemolem el oureor lobengkel a mla mocholt el moktek er a Dios. E dirrek el di ua dulenguiu er a uchei, te betok el telael el chad el meliuekl er a beluulechad el rokir a mla omuchel el mesuub er a Biblia e mesuub el kirel a moktek er a Dios. Betok er tir a mla ngmodech a klengar er tir, e olecholt er a klaumerang er tir, e mla metecholb el Kristiano. Me a tekingel a Dios el oureor er a chelsel a klengar er tir ochotii el kmo a “tekingel a Dios a di ngar e mesisiich.” Me a moktek er a Dios el debetik er ngii er a Biblia a ngar ngii a bla lerellii er a klengar er kid e melemolem el ngar ngii a klisichel er a klengar er kid.
it-1-E 1139 par. 2
Omelatk
Tia el omelatk er a diak a ulebengelel el klengar el diak el sebechel metemall el mo er tirke el “mlokedong er chokedong ra eanged” (Heb 3:1, BT) a ngar ngii a uchetemel e sebechel el ulterekokl a rengud el kirel. Ngar er ngii a eru el uchetemel loeak ngii e kede medengei el kmo ngdiak el sebechel a Dios el omulak, e aikang a telbilel me a tekingel, me a dirrek el omelatk el ngar er a Kristus el ngii a ngar er a eanged el anghel el diak el sebechel el metemall me a lechub e lengemed. Me tia el omelatk a lolekoi er ngii el kmo “otil a klengar er kid. Ng ungil el kldmokl e ulterekokl, e soiseb el engelakl er a chebill el mor sel kmal chelsel a blil a nglunguuch. A Jesus a mla oeak uchei el mo soiseb er ngii el omtechei er kid, el mla mo ngarbab el prist el diak a ulebengelel, el oltirakl er a deruchellel a Melkisedek.”—Heb 6:17-20.