Reference el kirel a Subeled er a Miting er a Klengar me a Omesiunged
October 7-13
MEKREOS EL TEKOI EL NGAR ER A BIBLIA | JAKOBUS 3-5
“Molecholt er a Llomeserreng el Mla er a Dios el Mei”
cl-E 221-222 par. 9-10
A “Llomeserreng el Mla er Bab el Mei” Ngoureor er a Chelsel a Klengar er Kau?
9 “A kot e ngklikiid.” A bo deklikiid e ngbelkul a kmo, ngkired el bliochel el diak a chesechesemel a klengit er kid el ngar omerelled me a dirrek el rengud me a uldesued. A Biblia blechoel el mesaod el kmo a llomeserreng a ngar er ngii a lerellii er a rengul a chad, me nguaisei engdi a llomeserreng el mla er bab el mei a diak el sebechel el soiseb er a rengul a chad a lsekum e ngchelsechusem er a mekngit el uldasu me a ngibeserreng e diak lungil a moktek er ngii. (Osisechakl 2:10; Mateus 15:19, 20) Engdi a lsekum a rengud a klikiid el mo er sel tkurrebab el sebechel a di chad el rullii el mo klikiid, e kede ‘obult er a mekngit e mo meruul a ungil.’ (Psalm 37:27; Osisechakl 3:7) Me ngdiak le kmal utebengall el kmo, a klikiid a sel kot medung el blekeradel el tedebechel a llomeserreng? Nguaisei, a lak deklikiid er a tekoi er a klereng me a dirrek el klechad e ngmekera sebeched el mo olecholt aike el bebil blekeradel el tedebechel a llomeserreng el mla er bab?
10 “Soal a budech.” A Llomeserreng el mla er bab a odbechid el mo chad er a budech, el ngii a ta er a rodech er a reng er a Dios. (Galatia 5:22) Kede dirrek el mora tkurrebab el sebeched el mo meleketek er a budech a lsekum ngmetemall. (Efesus 4:3) Ngera uchul me tia kmal klou a ultutelel? A Biblia melekoi el kmo: Bo “mdak el kie el ngar a budech. Ma Dios er a bltikrreng ma budech a mo obengkemiu.” (2 Korinth 13:11) Me sel dolemolem el kiei el ngar er a budech, e a Dios er a budech a mo obengked. A blekerdeled el mora rekldemed el Kristiano a sebechel tomellii me a lechub e ngtoketekii a deleongel er kid me a Jehovah. Ngmekera e sebeched el lochotii el kmo kede chad er omeruul el budech? Molatk er tia el kerebai.
cl-E 223-224 par. 12
A “Llomeserreng el Mla er Bab el Mei” Ngoureor er a Chelsel a Klengar er Kau?
12 “Medemedemek.” Ngera belkul a bo demedemedemek? A doltirakl a tekingir a remellomes a rengrir el chad, e sel tekoi er a Grik el moiuid el “medemedemek” el ngar er a Jakobus 3:17, BT a meringel a doliuid er ngii. A ruliuid a ousbech er a tekoi el “ulserechakl” me a “meduch el melatk er a rebebil.” A footnote el ngar er a New World Translation a ochotii el kmo sel mera el belkul tia el tekoi a “tabesul el omeruul.” Ngmekera dochotii el kmo tia el tedebechel a llomeserreng el mla er bab a oureor er a chelsed?
cl-E 224-225 par. 14-15
A “Llomeserreng el Mla er Bab el Mei” Ngoureor er a Chelsel a Klengar er Kau?
14 “Mechechedereder.” Ngar er aike el bades el tekoi er a Grik e tia el tekoi el moiuid el “mechechedereder” a di debetik er ngii er tia el bades. A doltirakl a tekingel a ta el mellomes a rengul el chad e tia el tekoi “a blechoel el lousbech er ngii el kirir a resoldau.” Tia el tekoi a meskid a uldasu el kirel a chad el ngii a “beot el muchelechel” e dirrek el “chederedall.” Me a chad el ngii a mecherei a llomeserreng el mla er bab me ngmengedereder er ngii a oltirakl a tekoi el medung er a bades. Ngdiak lerellii a uldesuel e bo le chetil loltirakl a tekoi el ngii a diak loltirakl er a soal. Ngbai ngike el chad el cheldereder er a llomeserreng el mla er bab a kltmokl el mo melodech er a uldesuel a lsekum e ngmesa er a bades el kmo ngmla rullii a cheleuid me a lechub e ngdiak le melemalt a uldesuel. A rechad te medengelkau el uaisei a blekerdelem?
“Mui ra Klechubechub ma Ungil Rodech”
15 “Mui ra klechubechub ma ungil rodech.” A klechubechub a klou a ultutelel er a llomeserreng el mla er bab e le tia el llomeserreng a “mui er a klechubechub.” Kede mesa el “klechubechub” me a “ungil rodech” a dmak. Tia uaisei le ngar er a Biblia e a klechubechub a melutk el kirel a chad el ngii a kerekikl er a rebebil, el ngii el klechubechub a uchul me kede meruul a ungil el mora rebebil. A ta er a reference a oliuid er a klechubechub el “chubur a chad el ngii a ulsiseb er a chelsel a meringel el blekeradel me kede mo melasem el mo olengeseu er ngii.” Me a leuaisei a llomeserreng er a Dios a diak el tekoi el loruul er ngii a chad el oltirakl er a llemesel a rengul. Ngbai mekeald el bltikerreng el mera el ngar er a rengul a chad. Ngmekera dochotii el kmo kede mui er a klechubechub?
cl-E 226-227 par. 18-19
A “Llomeserreng el Mla er Bab el Mei” Ngoureor er a Chelsel a Klengar er Kau?
18 “Diak lolekiakl.” A llomeserreng er a Dios a mesisiich er a omengetukel. A lsekum e kede mukrael er tia el llomeserreng er a Dios e ngkirel mo diak a ngii di el rolel a omengetukel er a chelsel a rengud. (Jakobus 2:9) Ngdiak el kirel kakerous a omerelled el bedul a rechad el tir a ngarbab a skulir, ngbetok a ududir, me a ngar er ngii a ileakl el ngerechelir er a ongdibel er a rechad el diak, me a lechub e lemetengel a osenged er a rekldemed el Kristiano el tir a di hutsu el chad. A lsekum a Jehovah mla kongei er tir e mesterir a bltikerreng er Ngii e tir me te dirrek el rredemelel a bltkil a rengud.
19 “Diak longesuul.” A tekoi er a Grik el moiuid el “mengesuul” a sebeched el ousbech er ngii el mesaod el kirel a “actor el ngii a ousekool el ta er a chad.” Ngar er a mo el taem e a rechad er a Grik me a Rom el mle actor a uluusbech a meklou el mask sel le act. A uchul me a tekoi er a Grik el moiuid el “mengesuul” a blo lousbech er ngii el mesaod er a chad el ngii a di pretend e mengeblad. Tia el tedebechel a llomeserreng er a Dios a kirel rullid el mo melatk er a diak di le blekerdeled el bedul a rekldemed el Kristiano e ngdirrek el uldesued el kirir.
Morriter er a Tekingel a Dios
A Omesodel a Babier er a Jakobus me a Petrus
4:5—Ngar er tiang e a Jakobus ngmelekoi a tekoi el mildung er a ngera el bades? Ngdiak a ulterekokl el bades el lullekoi a tekoi er ngii. Engdi aika el mlukreng el tekingel a ulterekokl el mle ultuil er sel uldasu el lolisiich er ngii a bades el ngar er a Genesis 6:5; 8:21; Osisechakl 21:10; me a Galatia 5:17.
A Klaumerang a Rullid el Mo Oba Klourreng e Mo Meluluuch
8 Ng klengit a lolaes er a ta er a chad el oba osisiu el klaumerang. (Jakobus 4:11, 12) Ngdi a rebebil a melaes er a redul Kristiano, e le te omdasu el kmo te melemalt ma lechub sorir el mengedidai er tir er a lolaes er a rebebil. (Psalm 50:20; Osisechakl 3:29) A tekoi er a Griik el uliuid el ‘melaes’ a olecholt a klauketui e melutk el kirel a chad el melekoi a klsuul el tekoi. Me tiang a olecholt el kmo ng meringel el oukerrekeriil a odam er ngii. Ng mekerang e tiang a uai a chad el ‘melaes e oukerrekeriil a llach er a Dios’? A rechellimosk er a llach ma Refarisee a ‘uleiit er a llach er a Dios’ a mlo oukerrekeriil el oeak a llach er tir. (Markus 7:1-13) Me ngosisiu, a lsekum kede oukerrekeriil a ta el odam el ua le mekngit el chad el dimlak loukerrekeriil er ngii a Dios el uaisei, ng diak ‘doukerrekeriil er a llach er a Dios’ e kede bai ngar er a klengit el olecholt el kmo ngar er ngii a ngesonges er ngii? Me sel diak de melemalt el melaes er a odam er kid, e ngdiak doltaut er a llach er a bltikerreng.—Rom 13:8-10.
October 14-20
MEKREOS EL TEKOI EL NGAR ER A BIBLIA | 1 PETRUS 1-2
“Bo Mchedaol”
A Olubet el Tenget a “Cherrungel Sengk” el Mla er a Chedam
5 Kede mekerang e ochotii el kmo, ngbetik a rengud er a ngklel a Jehovah? Ngokiu a omerelled, e a Jehovah a dirrek el mengerechir er kid el mo chedaol. (Monguiu er a 1 Petrus 1:15, 16.) E tiang a belkul a kmo, ngdi ngii el tang a kired el mengull er ngii e olengesenges er ngii el oba rengud el rokir. Ngmo lmuut er sel taem el demodechelakl, me kid a di kired el melemolem el kiei el oltirakl er a rolel el bla losisecheklid er ngii a Jehovah. Me sel dekiei el oltirakl a llechul a Jehovah, e kede mo kobkellii ngii el ngakl. (Mateus 5:14-16) Kede dirrek el mo meketeklii el kmo a llechul a kot el ungil, e a Satan a ngike el bulak. Kid a diak demecherrungel me kede dirrek el mo remuul a cheleuid. Engdi sel bo leuaisei, e ngkired el ouuchel er a rengud, e olengit a klausubes, e mo diak doruul a ngii di el tekoi el mo uchul a otuub el mo er a ngklel a Jehovah.—Psalm 79:9.
lv bliongel 6 par. 6
A Rolel e Kede Mo Ungil el Melilt a Tekoi er a Ongelaod
6 A Paulus a milengelechel er a Rekristiano er a Rom el kmo, lak “beche di telkib er kemiu me le mechedereder er a klengit.” (Rom 6:12-14) Ngar er a Rom 3:13-18 e a Paulus a milsaod a mekngit el omerellir a rechad el kmo: “A ngerir a mui er a cheluached el omelebeakl.” A Kristiano a tomellii a bedengel el rokir a lsekum e ngousbech a klekedellel a bedengel el meruul a chouaika el mekngit el tekoi. El ua tiang, a lsekum e ngdurengul el omes a tekoi el ua siasing er a remeau me a kmal kdekudel el koadelchad, e ngua lekengei me a telkib er a bedengel “le mechedereder er a klengit.” Me seikid e a Dios a dikea lekengei er a omengull er ngii, e le ngua tenget el dikea el chedaol. (Duteronomi 15:21; 1 Petrus 1:14-16; 2 Petrus 3:11) Me a mekngit el tekoi er a ongelaod a kmal klou a letemellii er a klengar er a chad!
Morriter er a Tekingel a Dios
A Omesodel a Babier er a Jakobus me a Petrus
1:10-12. A rechanghel a oureng el sorir el mo medengei aike el dmolech el tekoi er a klemerang el lulluches a reprofet er a Dios er a irechar el kirel a ongdibel er a rengellitel el Kristiano. Engdi aika el tekoi a di mlo bleketakl er a taem el bocha el omuchel a Jehovah el meruul a tekoi el obengkel ngii el ongdibel. (Efesus 3:10) Me kid ngdiak bai bo doltirakl er a kerebai er a rechanghel e dolasem el “tiriter a rokuil tekoi, el mo lmuut er sel dmolech ra Dios”?—1 Korinth 2:10.
it-2-E 565 par. 3
Tebechelel
Kot el Ngarbab el Tebechelel. A kot el Petrus 2:25, BT a omelekl a tekoi el debetik er a Isaia 53:6 el mesaod er tirke el “ua sib el milecheuid er a rael,” engdi dirrek el dilu el kmo: “Kom liluut el mor ngikel Klekar e Tebechelel a reng er kemiu.” Tia melutk el kirel a Jehovah e le tirke lulluches a Petrus el mo er tir a dimlak le mecheuid el mo cheroid er a Jesus Kristus te bai oeak ngii e te liluut el mora Jehovah el Dios, el Ngii ngike el Ngarbab el Klekar er a rechedal. (Psa 23:1; 80:1; Jer 23:3; Ese 34:12) A Jehovah a dirrek el tebechelel, el ngike el chad er omerriter. (Psa 17:3) Tia el omerriter (tekoi er a Grik, e·pi·sko·peʹ) a mesaod el kirel a mesisiich el kerrekeriil er Ngii, el ua sel taem er a kot el dart el rak er a loukerrekeriil er a Jerusalem el ngii a dimlak lodengelii ‘sel taem er chodngelel [Gr., e·pi·sko·pesʹ] ra Dios.’ (Lk 19:44, BT) Me a lechub e ngdirrek el omerriter el sebechel el mo uchul a klengeltengat el mo er tirke el mengebkall er a Dios er sils er ‘chodngelel [Gr., e·pi·sko·pesʹ].’—1Pe 2:12.
October 21-27
MEKREOS EL TEKOI EL NGAR ER A BIBLIA | 1 PETRUS 3-5
“A Ulebongel er a Rokui el Tekoi a Di Kmedang”
Di Mklekar e Bo Blechoel el Meluluuch
A CHAD el uluureor a leklebesei a millekoi el kmo: “Sel kot el meringel el taem el dolemolem el mekar a sel mochu tutau.” A rechad el kirir el mekar el ta el kesus a dirrek el locha kongei er tia el tekoi. Tiang a sebeched el omekesiu er ngii er a taem el dekiei er ngii er chelechang e le kede kiei er a ulebongel er tia el beluulechad er a Satan. Me ngdi ua sel kot el milkolk el taem a leklebesei me a Rekristiano a kirir el melemolem el blak a rengrir el di klekar. (Rom 13:12) Me ngkmal kdekudel a lsekum e kede mo mechiuaiu el belkul a kmo ngdiak doruul a soal a Dios. Me a leuaisei, e ngkired el ‘ultebechel a rengud e di klekar’ e mo blechoel el meluluuch.—1 Pe. 4:7.
w99-E 4/15 22 par. 3
Ngmekera Sebeched el Dmangch Aike el Mo Choitechetur a Klaumerang er Kid me a Rolel e Bo Demesisiich er Ngii
A ulebongel, e bo blechoel el melatk a omengelechel er a Petrus el kmo: “A ulebongel er a rokui el tekoi a di kmedang; ng kiriu el mo ultebechel a rengmiu e di klekar, me bo le sebechiu el meluluuch. E a ngar uchei er a rokui el tekoi, e bo meral kaubltikerreng, ele bltikerreng a dokedek a betok el klengit.” (1 Petrus 4:7, 8) Ngkmal beot er kid a mechei a chelitechetud me a chelitecheterir a rebebil me bo luchul omelibas el mei er kid. E a Satan a kmal medengelii tia el kse er kid a rechad. E tia ta er a tekoi el blechoel el lousbech er ngii. Me ngkmal kired el di mereched el dokedek aikaikid el tekoi el loba bltikerreng e ‘lak debsa techall a Diabelong.’—Efesus 4:25-27.
A Klungel a Ultutelel a Domtechakl er a Rechad!
2 A Petrus a milengelechel er a rudam er ngii el mo ‘omtechakl’ er a rechad. (1 Petrus 4:9) A tekoi er a Grik el ‘kautechakl’ a belkul a kmo kede “olecholt er a bltikerreng el mora rengodech el chad.” Engdi Petrus a milengelechel er a rudam me a rudos er ngii el mo kautechakl er a delongelir alta te mle kaodengei e dmak el meruul a tekoi. Me te mekera mongeseu a lsekum te omtechakl er a rechad?
3 Te mirruul el uaisei me bo lekes a deleuill er tir el rokui. E kau a kuk mekerang? Ke dirk melatk er sel taem el chad a milengemedaol er kau el mora blil? Sel momtechakl er a rechad el mei er a blim, e nglmuut el okesengii a deleuill er kemiu. E a ungil rolel e ngsebechem el mo medengelterir a rudam me a rudos a okiu sel momtechakl er tir. A Rekristiano er a taem er a Petrus a mle kirir el olekes er a deleuill er tir er a lorael el kmal mo meringel a mondai el chelebangel. Me chelecha el dekiei er a “ulebongel er a beluulchad,” e ngkired el meruul el uaisei.—2 Timothy 3:1.
Morriter er a Tekingel a Dios
w13-E 6/15 23
A Ker el Mla er a Remenguiu
A Biblia a melekoi el kmo a Jesus a mlo er “tirikel reng el ngara kelebus el mlo mesubed er tir.” (1 Pe. 3:19, BT) Tia ngera belkul?
▪ A apostol Petrus a mesaod el kirir tirka el reng el kmo tirka “itirikel luleba kllourreng a Dios el mengiil er tir, e diak lolengesenges er sera loruul ra arhe a Noah ra irechar.” (1 Pe. 3:20, BT) Me ngbleketakl el kmo a Petrus a milsaod el kirir tirke el anghel el ngileltii el mo obengkel a Satan el omtok er a Jehovah. A Judas a melekoi el kirir tirka el anghel el kmo tirka “tirkel anghel el mlo engelakl er a deruchellir e chiloit a delengcheklir. Te llechotel el mo cherechar el ngar a milkolk er iou el lomechei er tir er ngii a Dios, e mengiil er sel klou el Sils el bo le medebeakl er ngii.”—Jude 6.
Ngoeak a ngera el rolel e tirka el anghel a dimlak loba blekongesenges? A uchei er a ieleb e tirka el anghel a riruul a bedengir el mo chad el ngii a tekoi el dimlak le moktek er a Dios el kirir a rechanghel. (Gen. 6:2, 4) Me a lmuut kung tirka el anghel a mirruul a deleboes el tekoi el obengterir a redil. A Dios a dimlak lomeob er a rechanghel el mo meruul a durs er a chebechiil lobengterir a redil. (Gen. 5:2) Tirka el mekngit el anghel a bo lolekngemed er tir a Dios er a kmal di mereched el taem. Engdi chelechang e a Judas a melekoi el kmo tirka ngar er a ‘ilkolk’, el ngii a ua kelebus er a tekoi er a klereng.
Oingerang e milekera Jesus a losubed er tirka el “reng el ngara kelebus”? A Petrus a meluches el kmo tia dilubech er sel er a le “mlukngar el reng.” (1 Pe. 3:18, 19, BT) A dirrek el lutebengall a kmo a Petrus a dilu el kmo a Jesus a “mlo mesubed.” Tia ochotii el kmo a Jesus a milsubed er tir er uchei er a Petrus a le llechesii a kot el babilengel. Me nglocha telkib el taem er uriul er a lemokiis a Jesus e ngmlo mesubed er tirka el mekngit el anghel el kirel a mereku el kerrekeriil el mo er tir. Tia dimlak el subed el lomesterir a omelatk. Ngmle subed er a kerrekeriil. (Jona 1:1, 2) Sel taem el Jesus a ulechotii a klaumerang me a blakerreng er ngii el mo lmuut er a kodall e mekiis el olecholt el kmo a Diabelong a dimlak a klisichel er ngii, e a Jesus a mlo er ngii a klisichel el mesubed er tia el mereku el telemellir tirka el mekngit el anghel.—Jn. 14:30; 16:8-11.
Ngar er a ngar medad el taem e a Jesus a mo lochetii a Satan me a remekngit el anghel er ngii e mideklterir er a diak a btil deliobech. (Lk. 8:30, 31; Och. 20:1-3) Me alta te dirk mengiil er tia el sils engdi chelecha el taem e tirka el mekngit el anghel a ngar er a chelsel a klou el ilkolk me a mereku el telemellir a ulterekokl.—Och. 20:7-10.
A Omesodel a Babier er a Jakobus me a Petrus
4:6—Te rua techang tirke el “mla mad,” el “evangkelio” a mluchais el mo er tir? Tirka tirke el “mle ulekoad ra teluchakl ma klengit” me a lechub e te mle ulekoad er a klereng er a uchei er a lrengesii tia el ungil el chais. (Efesus 2:1) Engdi a uriul er a bo loumerang er a ungil el chais, e te mlo omuchel el ngar er a klereng.
October 28–November 3
MEKREOS EL TEKOI EL NGAR ER A BIBLIA | 2 PETRUS 1-3
“Cho Mongiil e Morreched er Sel Sils er a Dios el Mei”
A Jehovah a Mo ‘Smodeterir a Rengellitel er Ngii’
11 Engdi, ngera mle belkul a tekingel a Jesus er a ledu el kmo a Jehovah a ‘dimereched’ el oltaut er a kerrekerilel? A Tekingel a Dios a olecholt el kmo alta e a Jehovah a “mechiiteterir el di uaisei el mo meketeket,” engdi ngii a mereched el oukerrekeriil a lemei a blsechel. (Lukas 18:7, 8; 2 Petrus 3:9, 10) Sera lebo er ngii a ieleb er a taem er a Noah, e a remekngit a di ngilemed el rokui. E mlo uaisei er a taem er a Lot er sera lemetengel a ngau er a eanged, el okngemedeterir a remekngit el chad el rokui. A Jesus a dilu el kmo: “A Ngelekel a chad a be ldum er sel sils, e ngmo uaisei.” (Lukas 17:27-30) Chochoi, a remekngit el chad a mo chormii a “tellemall.” (1 Thesalonika 5:2, 3) Me ngulterekokl a rengud el kmo a llemalt er a Jehovah a uchul me ngdiak lebecherei a beluulechad er a Satan me lolemolem el nguu a ta er a sils.
“A Kloul Sils er a Jehovah a Kmedang”
18 Sei a uchul ma apostol el Petrus a mengelechel er kid el di melatk er a ‘klsel a Jehovah’! Ngmekera doruul el uaisei? A ta er a rolel a deblechoel ‘loba chedaol blekeradel ma chomeluu ra Dios.’ (2 Petrus 3:11, 12) A bo demechesang er a choua ika el tekoi a mo ngosukid el mengiil er a ‘klsel a Jehovah.’ Sel tekoi er a Grik el mloiuid el kmo “mengiil” a belkul a kmo “el orreched.” Kid a diak el sebeched el orreched er a taem el dirk medechel el kirel a sils er a Jehovah. Me nguaisei, engdi lsekum e kede mechesang er a urerel a Dios, e a taem a ua bo lemereched el chengelakl.—1 Korinth 15:58.
Morriter er a Tekingel a Dios
A Omesodel a Babier er a Jakobus me a Petrus
1:19—Ngtecha ngike el “chemeraech,” e oingerang e ngme duum, me kid kede mekerang e mo medengei el kmo ngmla mo er ngii tia el tekoi? Ngike el “chemeraech” a Jesus Kristus el lolab a klisichel a omengederederel a Renged. (Chocholt 22:16) Sera 1914, e a Jesus a ngilasech er a mederir a rebek el bleob el ua Messias el King, el lomeketakl er a uchelel a beches el sils. Sel ues er a lemengodech a Jesus a di mla uchei e ngmeskid a osenged er a klebkellel me a klisichel a Rengedel, el lomeketakl er a kmo ngkmal ulterekokl el mo motaut a ulaoch el ngar er a tekingel a Dios. Me a dekerekikl el omtab ngii el tekoi e ngmo dmiich er a chelsel a rengud, e rullid el mo melechesuar el kmo ngii el Chemeraech a mla ngmasech.
A Omesodel a Babier er a Jakobus me a Petrus
2:4—Ngerang a “beluu ra datk,” e oingerang e tirke el mlo omtok el anghel a milchoit er a chelsel? A “beluu ra datk” a mloiuid el kmo “Tartarus” el tekoi er a Griik. A Tartarus a blekeradel el ua kelebus el di kirir a rebleob el reng el diak a rechad el mo mechesimer er ngii. Ngblekeradel er a klou el ilkolk er a uldasu me a klemedengei el kirel a bleketakl el moktek er a Dios. Me tirke el ngar er a Tartarus a diak a omelatk er a klengar er a ngar er a mederir. Me a Dios a mildekelterir tirke el mlo diak lolengesenges el anghel er a chelsel a Tartarus er a taem er a Noah, me te melemolem el ngar er isel blekeradel el mo lmuut er sel taem el bo lolekngemed er tir a Dios.