Reference el kirel a Subeled er a Miting er a Klengar me a Omesiunged

Reference el kirel a Subeled er a Miting er a Klengar me a Omesiunged

May 4-10

MEKREOS EL TEKOI EL NGAR ER A BIBLIA | GENESIS 36-37

“A Josef a Chilarm el Chelechei a Uchul”

w14-E 8/1 12-13

“Ka Mrengesii a Mle Berrusek”

A Biblia a kmo: “Me tirkal bebil er ngii er a lesa el kmo a demerir a kuk ngarbab a bltikerreng er ngii el mor a Josef er a mor tir, e te kmal mlo ouketui er ochellir me ng mlo diak lungil mengedecheduch er ngii.” (Genesis 37:4) Alta ngar ngii a uchul me te mlo mechechei, engdi tir el uleltirakl er a chellechingel a rengrir a mlo uchul a tellemall. (Osisechakl 14:30; 27:4) Ngmla ta el msal mo mechechei er a chad el ngiluu a chetengakl el mle soam? Molatk er a rubekul a Josef. A chellechingel a rengrir a mlo uchul e te riruul a tekoi el blo louuchel a rengrir er ngii er a uriul. Me a blekerdelir a omeklatk er a Rekristiano el kmo nguchul a llomeserreng a ‘bo ledeu a rengud el obengterir a re dmeu a rengrir.’—Rom 12:15.

A Josef a ulterekokl el mle medengei el kmo a rubekul a uluuketui er ngii. Me ngdimlak loubail er tia el bilel sel lekeed er tirka obekul? Nglocha mlo soal meruul uaisei. Me nguaisei, engdi a Jakob a mle soal tia el ikrel a bail a lochotii a kengei er ngii me a bltkil a rengul. Me a Josef a mle soal loldeu er a rengul a demal, me ngdi uluubail er tia el bilel. Tia kmal ungil kerebai el kired. Alta e a Demad el ngar a eanged a diak longetukel, engdi lebebil er a taem e ngmesterir a rebebil mesiungel a ileakl el chetengakl. Me a lmuut el kung, ngsoal a bo decholt el ileakl el ngodech er a rechad er tia el chebirukel e kikiongel el beluulechad. Me a omerellir a remera el Kristiano a rulleterir el mo ileakl er a chad el iliuekl er tir, el di ua sel ileakl el ikrel a bilel a Josef. A lebebil er a taem e a chouaika el blekeradel a sebechel mo uchul a mesisiich el kltui me a chelechei. (1 Petrus 4:4) Me a Kristiano, ngkirel lomart er ngii el kmo ngmesiungel a Dios? Ngdiak, te di ua Josef el dimlak lomart er a ikrel a bilel.—Lukas 11:33.

w14-E 8/1 13 par. 2-4

“Ka Mrengesii a Mle Berrusek”

A berrous a mlara Jehovah el Dios el mei. Aika mle ulaoch, e a Dios a mle soal a Josef a bo louchais er a klemechel. Me a Josef a mlo meruul er a tekoi el uriul e a rokui el profet a mlo meruul, el ouchais a klemechel a Dios me a kerrekerilel el mora rediak el bekongesenges el Chedal.

A Josef a mle ungil mengedecheduch er a rubekul el kmo: “Ka mrengesii a mle berrusek.” A rubekul a mle medengelii a belkul a berrusel e kmal dimlak el sorir. Te dilu el kmo: “‘Kau komdasu el kmo ke mo king er kemam? Kau ke mo merreder er kemam?’ Itia e te mengal mocha ouketui er ngii el ikel le dilung el kirel a berrusel a uchul.” Me sel taem el Josef a liluut louchais el kirel a ongeru el berrusel el mora demal me a rubekul, e te liluut el kmal mo kesib a rengrir er ngii. Kede menguiu el kmo: “Ma demal a chileklii el kmo, ‘Ngeral berrous cho birrusii? Komdasu el kmo ngak ma delam ma rubekum a me osus er kau?’” Me nguaisei, engdi a Jakob a di millebedebek aika el tekoi. Nglocha millatk el kmo, a Jehovah ngmengedecheduch er ngika el buik.—Genesis 37:6, 8, 10, 11.

A Josef a dimlak lekot me a lechub e lulebongel el mesiungel a Jehovah el mlo ouchais er a klumech el chetirir a rechad, el dirrek el mlo uchul a odechelakl. A Jesus ngike el ngarbab el olechotel tiang ngdirrek el dilu er a rultirakl er ngii el kmo: “A lsekum tuleldechelakl er ngak, e te dirrek el mo oldechelakl er kemiu.” (Johanes 15:20) Me a rokui el Kristiano el meklou me a remekekerei a sebechir el ngmai a klubelir er a klaumerang me a blekeurreng er a ngeasek el Josef.

Morriter er a Tekingel a Dios

it-1-E 678

Edom

(Eʹdom) [Bekerkard], Rechad er a Edom.

A Edom a mle ta er a ngklel a Esau el mle kebtot el obekul a Jakob. (Gen 36:1) Tia mlo ngklel e le ngii lulterur a llemeltel el kot el ngalek el di kirel a teleblengur el bekerkard el sub. (Gen 25:30-34) Me a Esau er a lemechell e ngkmal mle bekerkard a bedengel (Gen 25:25), e a uriul e sel mlo belual ngii me a ruldidellel a rsechel a dirrek el mle bekerkard a chetemel el beluu.

it-1-E 561-562

Oungerachel

A klekerengel a charm sel lekengei el mo oungerachel a delebechel el charm e ngochotii el kmo aikang a mo ngar cheungel a ulekerreuil. Tia mo oterekeklii a rengul a merreder er aika el charm el kmo ngmo omekang e diak a mo ruchorech, e le lak e ngkirel mo meluked a udoud el kirel. Me nguaisei engdi a llach el dulsaod er ngii er a uchei a ochotii el kmo, ngike el oungerachel a diak bo lobals el kirel a tekoi el dimlak el sebechel el mtebechelii el uai a lsekum e a tebelik el charm a mlo oldechelakl er a delebechel. Me ngika el chad a bo lemengubet er tia el ngerachel e ngkirel el msa merreder a olechotel, el uai a selesodel el charm. Ngike el oucharm a mo tirterii e tibir el kmo a chad el uluungerachel ngar ngii a telemellel me a lechub e ngdiak.

Tia el osisiu el omellach a dirrek el mora chad el oungerachel a klalo el dirrek el mo lmuut er a chelsel a telungalek el uai tiang, ngike el kot el klou el sechal a ngerechelel el mo omekerreu er a remekekerei el bebil er ngii. Tiaikid a uchul me kede medengelii a uldesuel a Ruben el kirel a klengar er a Josef, el ua losaod a Genesis 37:18-30, NW, er sel taem el rubekul a Josef a mesaod er a mo omekoad er ngii. “Ng dilu er tir el kmo, ‘Mei me lak domekoad er ngii. Lak momekoad e . . . lak molemall er ngii.’ Ngmillatk el kmo ngmo osebelii er a uriul e lmuut el olutii el mora demal.” Me a Ruben er a bo lodengei el kmo ngmla mo dibus a Josef e “ng tiltengii a bilel el olecholt er a klengiterreng” e dilu el kmo: “A buik a diak le ngar sei! Ak mo mekerang?” Ngmle medengei el kmo a klengar er a Josef a ngar a cheroel a chimal. Me a rebebil er ngii a mirruul a tekoi el ua lolecholt el kmo a tebelik el charm a milekodir a Josef me lak bo lobals el kirel a kngterir. Te ngiluu a bilel el dilechii er a rsechel a kaming. E ngiluu tia el bail el mo ochotii er a Jakob, el demerir e dirrek el ngike el chad er a kerrekeriil er a telungalek er tir me a Jakob a ngilebetii a Ruben er a ngii di el blals, e le bilel a Josef el di rasech el lulebang a rubekul el mong, a uchul me a Jakob a ulemdasu el kmo a Josef a mla mad.—Gen 37:31-33.

May 11-17

MEKREOS EL TEKOI EL NGAR ER A BIBLIA | GENESIS 38-39

“A Jehovah Dimlak a Ta Lechitii a Josef”

w14-E 11/1 12 par. 4-5

“Ng Mekera e Sebechek el Mo Meruul er Cho Ua Tial Mekngit el Tekoi?”

“A Josef a milengai el mor a Ekipten er sel le mlar ngii a Potifar el chad er a Ekipten, el ofiser er a Farao e merreder er a re klekar er a blil a Farao, me ng milecherar er a re chad er a Ismael el tirkel ngiluu el mor a Ekipten.” (Genesis 39:1) Ngokiu aika el sesei el tekoi, e a cheldecheduch er a Biblia a ngosukid el mo melechesuar er a rur el blo lolechesuar er ngii er a lluut el moterau. Ngika di ua le klalo! Kede kora di melatk er a Josef el merael el okiuellel e ngika el beches el mastang er ngii er a delongelel a betok blil a makit el merael bedul tia el beches el mo blil.

Tia el beches el blil a Josef a kmal ngodech er a delengchokl el lemlukeroul er ngii. Ngmlukeroul el kiei a tento le te di meleklukl a delengcheklir e omekerreu a charm el sib. E chelechang, e a remerau el chad er a Ekipten el ua Potifar a kiei a meklou e klebokel a chesbereberel el blai. A rechad el mengiis a chutem e merriter a tekoi a mesaod el kmo aike el blirir a rechad er a Ekipten er a irechar a kmal mle klebokel, e klboub a mekesekesel el ngar ngii a kerrekar er ngii me a telelluk el ralm el delalem er ngii a papyrus, lotus, me a lmuut el bebil er a dellomel el duubech er a ralm. A bebil er ngii el blai, a ngar a delongelel a sers, el kmal mechecheluut, e ngarbab a mado er ngii me ngungil eltel, e betok a delemerab er ngii, e ngar ngii a klou el blil a blengur er ngii me a blirir a remesiou.

w14-E 11/1 14-15

“Ng Mekera e Sebechek el Mo Meruul er Cho Ua Tial Mekngit el Tekoi?”

Ngdiak a kmal klemedengei er kid el kirel a blil a kelebus er a rechad er a Ekipten er sel taem. Me nguaisei a remengiis a chutem a mla metik a meklou el blai el ngar ngii a blil a kelebus me a blai el ngar a chelsel a chutem. E a uriul e a Josef a milsaod er tia el basio lousbech er a tekoi el “kliokl,” el belkul a kmo ngmilkolk e basio el diak a omelatk er ngii. (Genesis 40:15, NW, footnote) Ngar a babier er a Psalm, e kede mesa klungel a ringel el blo lecharm er ngii a Josef: “A ochil a mle llechotel er a bombatel e mlar ngii a deel el meliuekl er a chiklel.” (Psalm 105:17, 18) A lebebil er a taem e a rechad er a Ekipten a omekcharm er a rekelebus el lmechet a bkul chimorir er ullir; e a bebil er tir a llecha deel el meliuekl er a chiklir. Ngkmal mle meringel el ongarm a mlora Josef el dimlak a ngera el letemellii!

A blekeradel a dimlak lemengodech. A Biblia a melekoi el kmo a Josef a di millemolem el ngar “sel le ngar ngii a re kelebus.” Ngmle kemanget el taem el lengar tia el kmal mekngit el basio! Ngdimlak lodengei el kmo ngmo tuobed er oingerang. Me ngar a chelsel aike el meringel el sils er a klengar er ngii el mocha melai a betok el sandei, me a betok el buil, e ngmilekera Josef e mle sebechel loutekangel e di uleba omelatk?

A cheldecheduch a mengelaod er kid el kmo: “Ngdi RUBAK a ulebengkel a Josef, e mle bekokuii el bedul ngii.” (Genesis 39:21) Ngdiak a ngii di el blil a kelebus, bombatel, me a milkolk el kliokl el sebechel torebengii a bltkil a rengul a Jehovah me lak lebo er a remesiungel. (Rom 8:38, 39) Kede kora melatk er a Josef el meluluuch el louchais er a Demal el ngar er a eanged a rokui el ringelel e mo melechesuar er a budech me a chelellakl el reng el di ta el “Dios er a bek longelaod” a sebechel meskid. (2 Korinth 1:3, 4, BT; Filipi 4:6, 7) Ngera lmuut el bebil er a tekoi el Jehovah a riruul el mora Josef? Kede menguiu el kmo, a Jehovah a millemolem el obengkel “me ng mlo ungil er a rengul a merreder er a kelebus.”

w14-E 11/1 15 par. 2

“Ng Mekera e Sebechek el Mo Meruul er Cho Ua Tial Mekngit el Tekoi?”

Morriter er a Tekingel a Dios

it-2-E 555

Onan

(Oʹnan) [mengai er a tekoi el belkul a kmo “uchul a cheroll”].

A Onan el ongeru el ngelekel a Juda el sechal er a redil er a Kanaan el Sua. (Gen 38:2-4; 1Kr 2:3) A Jehovah er a lokodir a obekul er a Er el kngtil a uchul, e a demal er a Juda a dilu er ngii el mobengkel a bechil a Er el Tamar me leketmeklii a ngerechelel el mo bechil a obekul e le ngii el mlad el diak a ngelekel. A lsekum e ngmo er ngii a ngalek el sechal, e ngika mo ua lengelekel a Er me ngmo ngmai a blingelel a kot el ngalek engdi a lsekum e ngdiak a ngalek e a Onan a moudiukes er a blingelel a kot el ngalek. Me a Onan er a bo lobengkel a Tamar, e ngmle “chemoit er a chutem a ikel omekdubech er a ngalek me lak le bo er ngii a ngelekel a obekul.” A omerellel a Onan a dimlak el kora rolel a omengelooch, e le bades a melekoi el kmo ngmlo ‘obengkel a bechil a obekul’ engdi ngchiloit aike el omekdubech er a ngalek. Me tia el blekeradel a ochotii el kmo a Onan a mlo bad el obengkel a Tamar engdi dimlak lekengei el rullii el mo dioll. Me a Onan a dimlak lolengesenges er a demal, e di uleltirakl er a ngelbesel a rengul, e ulemtok er a ketmeklel a chebechiil el bla lerellii a Dios, a uchul me a Jehovah milekodir el dirrek el di dimlak a ngelekel.—Gen 38:6-10; 46:12; Ule 26:19.

w04-E 1/15 30 par. 4-5

A Ker el Mla er a Remenguiu

A Juda a rirellii a klengit e le ngdimlak lenguu a Tamar el msa ngelekel sechal el Sela el ua letilbir. Ngdirrek el mlo obengkel a redil el ngii a ulemdasu el kmo ngoteruul dil er a templo. E tia omtok er a moktek er a Dios e le tekoi er a durs a kirel di meketmokl er a chelsel a chebechiil. (Genesis 2:24) Me nguaisei, a Juda a dimlak bo lobengkel a oteruul dil. Ngbai dimlak lodengei e kutmeklii a ngerechelel a Sela e le ngmlo demerir a rengelekel a Tamar.

Me a omerellel a Tamar a dimlak le deleboes. Me a rekebtot el ngelekel sechal a dimlak le ngalek er a laokreng. Sel taem er a Boas er a bo lebechil a Ruth el mengetmokl er tia el ngerachel el kirel a mlad el ta er ngii, e a remechuodel a mle ungil a tekingir el mesaod er a ngelekel a Tamar er a Peres el mora Boas el kmo: “Ma rengalek el bo le beskau a Rubak el oeak ngii el kekerel dil bo le rellii a telungalek er kau el mo ua telungalek er a Peres el ngelekel a Juda ma Tamar.” (Ruth 4:12) A Peres a dirrek el llechukl a ngklel el ta er a uldidellel a rsechel a Jesus Kristus.—Mateus 1:1-3; Lukas 3:23-33.

May 18-24

MEKREOS EL TEKOI EL NGAR ER A BIBLIA | GENESIS 40-41

“A Jehovah a Ulsebelii a Josef”

w15-E 2/1 14 par. 4-5

“Ngdi Dios a Meskid a Omesodel a Berrous”

Alta ngika el chad er a oitelel a bilong a ulebes er a Josef, engdi Jehovah a dimlak a ta el lobes er ngii. A ta el kesus, e a Dios a milsa berrusel a Farao el dimlak lsebechel lobes er ngii. Ngar a kot el berrusel a king, e ngmiles a kleuid el ungil e melaok el kerbou el ngme ngmasech er a Omoachel Nail, e a kleuid el mesengaked e kikiongel el kerbou a ulekiuellel. Aike el mesengaked a kila ike el kleuid el ungil e melaok. A uriul e a Farao a ulemerrous e milsa teluo el chelechedal a wheat el tilobed er ngii a kleuid el sikt el mle berikt e meduch. Engdi ngmla er ngii a lmuut el ta er a chelechedal a wheat el mle chachau e moalech el mirrekakl aike el kleuid el mle berikt e meduch. Me sel tutau, e a Farao a milekiis el kmal uluuedikel a rengul er a berrusel, me ngulemekedong er a rokui el mellomes a rengrir me a rechad er a olai el me oliuid aika el berrous. Engdi ngdimlak a ta er tir el sebechel loiuid. (Genesis 41:1-8) Ngdiak dodengei el kmo ngmlo mechas a rengrir er aika el berrous me a lechub e ngkuk di mle kakebosech a uldesuir. Me nguaisei ngdi a Farao a kmal mle soal el mo medengei a belkul aika el berrous.

Ngar tiaikid el taem e ngike el chad er a oitelel a bilong a liletkii a Josef! Ngmocha melechesuar er a telemellel me ngouchisa er a Farao el kirel a ta el kekerei el chad el eru rak er a uchei e ngmle melemalt el smaod a belkul a berrusel ngii me ngike el chad er omeruul el blauang. Me ngdi mle mereched a Farao el otebedii a Josef a kelebus.—Genesis 41:9-13.

w15-E 2/1 14-15

“Ngdi Dios a Meskid a Omesodel a Berrous”

A Jehovah a betik a rengul er a reblak a rengrir e ngariou a rengrir el chad, me ngsebeched el mesa uchul me ngmilsa belkul a berrous er a Josef el dimlak el sebechir tirke el mellomes a rengrir me a reprist el onger. A Josef a silodii el kmo aike el eru el berrusel a Farao a di osisiu a belkul. A Jehovah a ulemelekl er tia el klumech el olechotel a kmo a Dios a “mla kudmeklii” me ngdiak lokor el mo tmaut. Me a melaok el kerbou me a berikt el wheat a omtechei a euid el rak el kekuii a beluu er a Ekipten, e aike el mesengaked el kerbou me a moalech e chachau el wheat a omtechei a euid el rak el bosech el mo okiuellel aike el kekuii el rak. Tia el bosech a mo uchul a meringel el chelebuul er a beluu.—Genesis 41:25-32.

w15-E 2/1 15 par. 3

“Ngdi Dios a Meskid a Omesodel a Berrous”

Me a Farao a di mle mereched el milii a Josef er a ungil mamed el linen. E milsa olbingelel el kolt me a kebkebil a king, me a kuruma er ngii e kilengei er ngii el merael er a beluu el rokir el mo ultaut er a uldesuel. (Genesis 41:42-44) Ngdi mle chelsel a ta el sils, e a Josef a mlengai er a kelebus el mora blil a king. Ngmilekiis er a tutau el kelebus, e mlo mechiuaiu er sel kesus el ongeru el merreder er a beluu er a Ekipten. Ngsebeched el mesa el kmo a klaumerang er a Josef el mora Jehovah el Dios a mla er ngii a ultutelel! A Jehovah a miles a rokui el chelebirukel el lechilarm el betok el rak. Ngsilemechokl ngii el tekoi er a melemalt taem el ngar er a melemalt el rolel. Me a Jehovah a silemechokl a chelebirukel el mlora Josef e dirrek el ulemekerreu er a mo renged er a Israel. Kede mo mesa rolel e ngmirruul el uaisei er a ongingil el suobel.

Morriter er a Tekingel a Dios

w15-E 11/1 9 par. 1-3

Ke Medengei el Kmo Ngerang?

Ngera uchul me a Josef a millamk er uchei er a bo lomes er a Farao?

Ngar er a babier er a Genesis e kede mesa el kmo a Farao a dilu me lemereched el mengai a Josef el mo smodii a belkul a berrusel. Ngar tia el taem, e a Josef a mle kelebus el betok el rak. Me alta ngmle orechudel a tekingel a Farao, engdi a Josef a millamk er a uchei er a bo lomes er ngii. (Genesis 39:20-23; 41:1, 14) Me a milluches el milsaod er tia el kora diak el klou a ultutelel el tekoi a ochotii el kmo ngmle medengei a siukang er a rechad Ekipten.

Ngmle blekerdelir a rechad er a irechar el uldimukl er a rechad er a Hebru el omekeroul a chesemir. Me nguaisei engdi a Cyclopedia of Biblical, Theological, and Ecclesiastical Literature er a McClintock me a Strong a melekoi el kmo “A rechad er a Ekipten er a irechar a di mle ta el beluu er a ongos el dimlak el sorir a le ngar ngii a chesemir.”

Me a omelamk ngdi melutk el kirel a chesemel a chad? A babier el Biblical Archaeology Review a melekoi el kmo ngar er a siukang er a rechad Ekipten e ngkirel a chad el kutmeklii er a uchei er a bo lomes er a Farao el di ua chad a bo el siseb er a templo. Me a lsekum e nguaisei e a Josef a mle kirel tuamk a rokui el chui er a bdelul me a bedengel.

w09 11/1 31 par. 14

A Remesiungel a Dios a Kirir el Olecholt a Ungil el Omeruul

A rechedam me a rechedil el milluu er a Dios er a taem er a omelechesel a Biblia, a ulsisechakl er a rengelekir el kirel a ungil el omeruul sel lengar er a blirir. Ka momtab er sel rolel a le chadecheduch a Abraham me a ngelekel er a Isak, el llechukl er a Genesis 22:7. A omerellel a Josef a olechotel a ungil el osisechakl el le ngiluu er a rechad er a blil. Sel taem er a lengar er a kelebus e ngmillemolem el meruul a ungil el mo er a rechad el le dilak el kelebus. (Genesis 40:8, 14) A cheldechedechal el mo er a Farao a ulechotii el kmo ngmilsuub el mo meduch el mengedecheduch er a rengar er a bab el chad.—Genesis 41:16, 33, 34.

May 25-31

MEKREOS EL TEKOI EL NGAR ER A BIBLIA | GENESIS 42-43

“A Josef a Uleba Klou el Ulserechakl el Reng”

w15-E 5/1 13 par. 5

“Ng Diak el Sebechek el Mor a Deruchellel a Dios”

Ngera ngmo meruul er ngii a Josef? Ngdi mle mereched el dongcheterir a rubekul! Me a lmuut el kung, sera lesterir losus er ngii e ngmlo melatk er a dirk lekekerei. A Biblia melekoi el kmo, “A Josef a liltkii a berrusel” el Jehovah milsang er a dirk lekekerei el buik, ngberrous lomlaoch el kirel a taem el rubekul a mo osus er medal el ua loruul er ngii er chelechang! (Genesis 37:2, 5-9; 42:7, 9) Ngmo mekerang a Josef? Ngmo omechull er tir? Ngmo melaitechei?

w15-E 5/1 14 par. 1

“Ng Diak el Sebechek el Mor a Deruchellel a Dios”

Nglocha diak bo mchelebangel a osisiu el tekoi. Me nguaisei, engdi a ultok me a klekakeakl er a chelsel a telungalek a blekeradel er chelechang. Me sel bo dechelebangel chouaika el tekoi, e nglocha soad el di moltirakl er a uldesued. Engdi llomeserreng a doukerebai er a Josef e dolasem el mo oba uldesuel a Jehovah sel doruul a tekoi. (Osisechakl 14:12) Lak mobes, alta ngklou a ultutelel el doleketek a budech er a delongeled kid me a chedal a telungalek er kid, engdi a budech lobengkel a Jehovah me a Ngelekel a lmuut el klou a ultutelel.—Mateus 10:37.

w15-E 5/1 14 par. 2

“Ng Diak el Sebechek el Mor a Deruchellel a Dios”

Me a Josef a millasem er a rubekul me bo lodengei a mera el ngar er a rengrir. Me nguluusbech er a chad oliuid a tekingel el oltelechakl er tir el kmo te ourabek. Te milsebechakl er tir, me te uluuchais er ngii el kirel a telungalek er tir me a chisel a ochellir el di mle kiei. A Josef a kmal mlo ungil a rengul. A ochellel ngmera el dirk chad? Ngmocha medengelii a tekoi el bo loruul er ngii. Ngdilu er tir el kmo: “Tiakid a rolel a omerriter el ekor kemiu,” ngmle kirel el mesa ngike el kot kekerei el ochellir. A uriul e ngkilengei er tir lmuut el mo remei, el nguu a kot el kekerei el mei a lsekum a ta er tir a kongei el di kiei.—Genesis 42:9-20.

it-2-E 108 par. 4

Josef

Tirka lobekul a di ulemes aika el tekoi el duubech e mlo omdasu el kmo a Dios omals er tir e le te lulterur a Josef el mo sibai. Me te di dimlak lodengei e ngar medal a ochellir e ouuchel a kngterir. Me a Josef er a lerengeseterir e bo lodengei el kmo te mla obult er a kngterir, e ngkmal mlo mekngit a rengul me ngmle kirel el mo mertii e lmangel. E sera lluut el mei, e ngdi mlara mederir a rubekul e dmu me le melechet a Simeon el mo lmuut er sel taem el lenguu a kot el kekerei el ochellir el mei.—Gen 42:21-24.

Morriter er a Tekingel a Dios

it-2-E 795

Ruben

A ungil blekerdelel a Ruben a mlo chemolt er sera longeluch er tirke el tetiu el odam er ngii me lak lomekoad er a Josef e bai lenguu mideklii er a chido e le ngmillatk el kmo a uriul e ngmo mertii e mo otebedii er a chido. (Gen 37:18-30) A betok er a 20 el rak er uriul, e tirka losisiu lobekul a Josef er a losaod el kmo te motelecheklang el ourabek er a Ekipten el mekngit lomerellir el mora Josef a uchul, e a Ruben a ulemeklatk er tir el kmo ngdimlak lechelsechusem er ngii el tekoi. (Gen 42:9-14, 21, 22) Me sel taem el Jakob a mle chetil a lorael a Benjamin lobengterir er a ongeru lomerollir el mora Ekipten, e a Ruben a kilengei er a reteru el ngelekel sechal el mo oltechil a Benjamin, ngdilu el kmo: “A lsekum ng diak kluut el nguu [a Benjamin] el mei, e ke mekodeterir a re ngelekek el terul sechal.”—Gen 42:37.

w04 2/1 31 par. 1

Omesodel a Babier er a Genesis—II

43:32—Ngera uchul me ngmle ketiaol a lomengur a Rechekipten el obengterir a rechad er a Hebru? A klou el uchul tiang a mle uldesuir el kmo ngkakerous a klechelid er tir me tir a dirrek el ngodech el chad. A Rechekipten a dirrek el kmal mle chetirir a remengkerengel a sib. (Genesis 46:34) E ngera uchul? E le remengkerengel a sib a locha mle ngar er a eou el chad er a beluu er a Ekipten. Me a lechub e ngmle olengesonges a chutem, me a rechad er a Ekipten a mle chetirir a rechad el osiik a chutem el mo omekeroul a delebechel el sib.