Reference el kirel a Subeled er a Miting er a Klengar me a Omesiunged
© 2024 Watch Tower Bible and Tract Society of Pennsylvania
JANUARY 6-12
MEKREOS EL TEKOI EL NGAR ER A BIBLIA PSALM 127-134
Ruungalek, Molemolem Lomekerreu er a Mekreos el Sengk er Kemiu
Mongreos er a Basio er Kau er a Telungalek er a Jehovah
9 A Jehovah a mla mesterir a rechad a techellir el mo oungalek, e dirrek el mla mesterir a ngerechelir el mo olisechakl er a rengelekir el mo betik a rengrir er Ngii e mesiou er Ngii. A lsekum koungalek, e kau, ke oba omereng el saul el kirel tia el kmal ileakl el sengk? Alta rechanghel a mukngeltengat er a Jehovah engdi ngdiak loba tia el ileakl el techall el mo oungalek. Me a lsekum e koungalek e mongreos er tia el ileakl el techall el mobang. A ruungalek a mla nguu a ileakl el ngerachel el mo omekeroul er a rengelekir “el oba omellach ma osisechakl er a Rubak.” (Efe. 6:4; Dut. 6:5-7; Psa. 127:3) E a Jehovah a oeak a cheldebechellel e ngmla mesterir a ruungalek a ngeso el uaike el babilenged el mengai er a Biblia, video, ongngak, me aike el suobel el debetik er a website er kid. Me ngbleketakl el kmo a Demad el ngar er a eanged me a Ngelekel a kmal betik a rengrir er a rengalek. (Lk. 18:15-17) A ruungalek sel lultuil er a Jehovah e lebora tkurrebab el sebechir el omekerreu er a rengelekir, e a Jehovah kmal mo dmeu a rengul. Tirka el oungalek a dirrek el mesterir a rengelekir a techellir el mo chedal a telungalek er a Jehovah el mo cherechar!
Ruungalek—Mosisecheklterir a Rengelekiu el Mo Betik a Rengrir er a Jehovah
20 Bo mungil medengelterir a rengelekem. A Psalm 127 a omekesiu er a rengalek el mora kelel a balech. (Monguiu er a Psalm 127:4.) Me ngdi ua kelel a balech el rruul er a kakerous el klekedall e di kakerous a meklungel, a derta el ngalek a kakerous. Me a ruungalek a kirir el mo medengei el kmo ngua ngera rolel a lolisechakl er a derta er tir. A ta el obekel er a Israel er chelecha el taem el mle ungil mekuruleterir a reteru el ngelekir el mo mesiou er a Jehovah a ouchais a tekoi el ngilsuterir el kmo, “Aki milsuub a Biblia el obengkel a derta er tir er a kakerous el taem.” Nguaisei, a bdelul a bek el telungalek a ngerechelel el melilt er a chouaisei el rolel a omesuub.
Morriter er a Tekingel a Dios
Bo el Deu a Rengum er Aike el Moruul el Olengeriakl er a Omesiungem!
6 A ta er a klou a ultutelel el tekoi el sebechir a rechedam me a rechedil el suubii a debetik er ngii er a Psalm 131:1, 2. (Monguiu.) A King David a dilu el kmo ngdiak ‘longesang er ngii er a meklou el tekoi’ me a lechub e ngtekoi el engelakl er a klisichel. A klengariourreng er ngii me a tabesul el osengel el kirel a ‘chilleklii’ a rengul. Ngera sebechir a ruungalek el suubii er a tekingel a David? A rechedam me a rechedil a diak di loba klengariourreng me a tabesul el uldasu el kirel aike el sebecherir el remuul ngdirrek el kirir el meruul uaisei el kirir a rengelekir. Ngsebechir el olterekokl a rengrir a rengelekir loeak sel bo lodengei aike el sebechir el meruul me a diak, e lolengeseu er tir el meruul a turrekong el sebechir el oltaut. A odos el Marina a melekoi el kmo: “A delak a kmal dimlak a ta el lomekesiu er ngak er a rebebil er ngak me a lechub e ngbebil er a rengalek. Ngulsisecheklak el kmo a rechad a kakerous a duch er tir e a derta me a derta er kid a mekreos er osengel a Jehovah. Ngii a uchul me ngdiak kumekesiu er ngak er a rebebil.”
JANUARY 13-19
MEKREOS EL TEKOI EL NGAR ER A BIBLIA PSALM 135-137
“A RUBAK a Ngarbab, Ng Ngarbab er a Rokui el Chelid”
A Kristus a Klisichel a Dios
15 A Kristus a nguu a klisichel er a Jehovah, me kede medengei el kmo a Dios el Olab a Bek el Klisiich a sebechel el meruul a chouaika el mengasireng el tekoi. El ua tiang, a uchei er a lebo er ngii a Ieleb e a Jehovah a dilu el kmo: “Ng di medechel ku euid el sils e ak mo oietii a chull el mer a beluulchad el 40 el llomes ma 40 el klebesei.” (Gen. 7:4) Me a Exodus 14:21 a kmo: “Ma RUBAK a ullutii a daob el oba mesisiich el eltel ongos.” E ngar er a Jona 1:4 e ngkmo: A “RUBAK a uldureklii a mesisiich el eolt el mor a daob; ng kmal mlo meringel oiu me kilo ng metemall a diall.” Ngkmal dmeu a rengud sel dodengei el kmo ngar er a chelsel a beches el beluulechad e a Jehovah a di mo blechoel el omtebechel a eolt me a daob me a chutem.
Ngngera Belkul er Kau a Diak Lemengodech el Bltikerreng er a Jehovah?
16 Jehovah sel le Cheuoteled e kede mo omelechesiu er a ulekerreuil. Me nguaisei engdi nglocha ngar ngii aike el sils el bo lemechitechut a rengud e meringel er kid a di kid lokisid. Ngera ngmo meruul er ngii a Jehovah el lolengeseu er kid er choua ikakid el taem? (Monguiu er a Psalm 136:23, NW.) A chimal a mo melekau er kid, me ngii a mo mekekokil lokisid e ngosukid el lmuut el mo mesisiich. (Psa. 28:9; 94:18) Klungioled er ngii: Sel dodengei el kmo ngkmal sebeched lultuil er a ulengesuil a Jehovah e kede mukngeltengat el ngar er a eru el rolel. A kot, e a ngii di el basio el dengar ngii e kede medengei el kmo a Jehovah blechoel el omekerreu er kid. Ongerung, a betik a rengul Demad el ngar er a eanged a kmal betik a rengul er kid.
Morriter er a Tekingel a Dios
(Psalm 136:1, NW) Moreng a sulel a Jehovah e le ngii a ungil. A diak el mengodech el bltikerreng er ngii a diak a ulebengelel.
Ngngera Belkul er Kau a Diak Lemengodech el Bltikerreng er a Jehovah?
10 A diak lemengodech el bltikerreng er a Dios a diak a ulebengelel. Kede metik er tiang el 26 el taem er a Psalm 136, NW. Ngar sel kot el bades e kede menguiu el kmo: “Moreng a sulel a Jehovah e le ngii a ungil. A diak lemengodech el bltikerreng er ngii a diak a ulebengelel.” (Psa. 136:1, NW) Ngar er a 2 el mora 26 el kekerei el bades e kede menguiu el kmo, “e le diak lemengodech el bltikerreng er ngii a diak a ulebengelel.” Sel donguiu er tia el psalm, e ngkmal mo mechas a rengud er aike el betok el rolel e a Jehovah diak lemekimd lolecholt er a diak lemengodech el bltikerreng er ngii. A omeleklel a tekoi el “diak lemengodech el bltikerreng er ngii a diak a ulebengelel” olterekokl er a rengud el kmo, a bltkil a rengul a Dios el mora rechedal a diak lemengodech. Ngkmal rutechii a rengud sel dodengei el kmo a Jehovah diak di lemereched el mo otngeklii a mesiungel! Ngbai merekedii er ngii e melemolem el bereked er ngii, tokubets sel bo lechebangel a ringel. Klungioled er ngii: Kid el medengei el kmo a Jehovah diak bo lechitid a meskid a deurreng me a klisiich el mo outekangel a ringel e melemolem el merael er a rael el mora klengar.—Monguiu er a Psalm 31:7.
JANUARY 20-26
MEKREOS EL TEKOI EL NGAR ER A BIBLIA PSALM 138-139
Lak Becherei a Dektem Me Lestob er Kau
Moldanges er a Jehovah el Ngar er a Ongdibel
10 Kau, ngkora mekider a delechim er a bek el taem el molatk el oldars a chimam el onger? A leuaisei, e ngdiak el di el kau el tang. A ruumesingd er kid a melechesuar a telkib el dakt sel bo longer. Me a uchei er a bo el sebechem el mo mesisiich er tia el uldesuem, e ngkirem el mo medengelii a uchul me ke medakt. Kau ke medakt e le ke mo lobes aike el soam el mo melekoi me a lechub e ke dulii a cheleuid el tekoi? Ke bekikl el kmo a nger er kau a diak bo lungil el ua nger er a rebebil? A mera er ngii, a chouaika el rolel a dakt a olechotel a ungil tekoi. Ngochotii el kmo ngariou a rengum e omes er a rebebil el ngarbab er kau. E a Jehovah a kmal soal tiaikid el blekeradel. (Psa. 138:6; Fil. 2:3) Nguaisei engdi a Jehovah dirrek el soal a omoldanges er ngii e molisiich er a rudam me a rudos er kau sel omngar er a miting. (1 Th. 5:11) Ngbetik a rengul er kau e mo meskau a blekeu el kau a ousbech er ngii.
Mkasisiich er a Miting er a Ongdibel
7 Nglocha mo ngosukau sel momes a bebil ngeso er a uldasu el mla tobed er a A Ongkerongel. El ua tiang, bo mungil el prepare. (Osi. 21:5) Sel bo mungil medengelii a suobel e ngmo beot er kau a oldars chimam el onger. Ngdirrek el di lekedeb a nger er kau. (Osi. 15:23; 17:27) Kedeb el nger a rullii me ngdiak el sal mo ouedikel a rengum. A kedeb el nger, el ngii a locha di one me a lechub e ng two el sentence, a locha beot er a rudam me a rudos er kau el mo medengelii er a bai kemanget el nger el mesaod a betok el tekoi. Sel di lekedeb a nger er kau lousbech a tekingem, e kochotii el kmo ke mle ungil prepare me kau a ungil medengelii a suobel.
Morriter er a Tekingel a Dios
‘Mkausubes er a Delongeliu’
15 Ngungil dokerang a lsekum a chad a rullii a kmal imis el meringel el tellemall el me er kid, e ka leko er a chochotii el kmo ngmlo er a klengit, ma ka lobult, ma lechub e loluluuch er kid el kirel a klausubes? (Osisechakl 28:13) A Bades a bleketakl el lolecholt el kmo a Jehovah a diak lousubes er tirkel diak lebo er a bult, e medecherecher a rengrir el ngar er a klengit. (Hebru 6:4-6; 10:26, 27) Engdi kid a mekerang? A Insight on the Scriptures a melekoi el kmo: “A Rekristiano a diak el kirir el lousubes er a redurengrir el ngar er a klengit e diak lobult. E le ouaisei el chad a mo cherreuel a Dios.” (Volume 1, page 862) Me ngdiak a ngii di el Kristiano el loutekangel a imis el chelebirukl, ma mekngit el lomeruul, ma mekngit el blekeradel el mo er ngii a kirel el lomelchesiu el kmo ng kmal kirel el lousubes a omerellel ngike el chad el diak lobult er a tekoi el loruul.—Psalm 139:21, 22.
JANUARY 27–FEBRUARY 2
MEKREOS EL TEKOI EL NGAR ER A BIBLIA PSALM 140-143
Moureor Lobengkel a Nglunguchem el Lolengit a Ngeso
“Bo Mungil el Orrenges . . . a Ikel Bla Le Dung a Re Mellomes a Rengrir”
13 Momes omesmechokl el olechotel a bltikerreng er a Dios. A Jehovah soal sel kot lungil el kired. (Osi. 4:20-22) A omesmechokl el dengai loeak a Tekingel, babilenged el mengai a uchetemel er a Biblia, me a lechub e ngta er a mesisiich er a klemerang el kldemed a olechotel a bltkil a rengul el mei er kid. A Hebru 12:9, 10 a kmo, ng “mesmechokl er kid el kirel a klungioled.”
14 Molatk er a omesmechokl, el diak el rolel a omngiluu. A lebebil e kede locha mo omdasu el kmo ngdimlak lungil a rolel a omesmechokl el dengiluu. Nguaisei el kirel a chad el mesmechokl el mo meruul er ngii el ngar er a rolel e ngmo beot er a chad a kongei er ngii. (Gal. 6:1) Engdi a lsekum e kede nguu omesmechokl e ngklou a ultutelel dolatk er a omesmechokl, mo lmuut me a lsekum e kede omdasu el kmo a chad a milsmechokl er kid el ngar er a mekngit el rolel. Ngsebeched el di kid loker: ‘Alta ngdimlak el soak a rolel e ngmilsmechokl er ngak, engdi ngngar ngii a sebechek el suub er ngii? Ngsebechek el lomes lengelakl er a kngtil ngika el milsmechokl er ngak e ngmai a klungiolek er a tekingel?’ Ngolechotel a llomeserreng sel dosiik a rolel e kede ngmai a klungioled er a omesmechokl el dengai.—Osi. 15:31.
w10 3/15 32 par. 4
Molemolem el Loba “Bliochelreng” er a Chelsel Aika el Meringel el Taem
Orimel er a rumtok, ringelel a keizai, me a oberaod el secher a mla omekberaod er a rebebil er a remesiungel a Dios. A chelsel aika el taem e ngdirrek el mo mengitechut a rengrir. Mo lmuut er a King David me ngmlo uaisei. Ngdilu el kmo: “Ng dikea kutekengelii a renguk, ak ngar a chelsel a kloul ringel.” (Psa. 143:4) Ngera silsichii? A David a mlo melatk omerellel a Dios el mora remesiungel me a dirrek el rolel e a Dios ulelsobel er ngii er a ngar er a mong. Ngmillebedebek aike el lurruul a Jehovah el kirel a ngarbab el ngklel. Ngmle blechoel el melatk a omerellel a Dios. (Psa. 143:5) Ngdi osisiu, sel dolebedebek el kirel a Ulemeob er kid me aike el rokui el bla leruul me a lolemolem el meruul el kired e ngmo ngosukid, mo lmuut me sel dechebangel a ringel.
Bo Bechiil el “Oltirakl er a Rubak” —Tiang Ngmelemalt el Tekoi?
A lebebil er a taem e ke locha mo ua David el dilu el kmo: “Morchedau el onger er ngak e RUBAK. Ng dikea klisichek! Lak molechib er a medam er ngak.” (Psa. 143:5-7, 10) Me lak bo lemechitechut a rengum, e bai bsang a techellel a Jehovah me lochotii a uldesuel er kau. Morrenges er Ngii el okiu a omengiuem er a Biblia e molebedebek a Tekingel. Tiang a ngosukau el mo medengei a soal a Jehovah e dirrek el mo medengei aike el rolel e ngullengeseu er a rechedal er a ngar er a mong. Me sel moruul aika el tekoi e ngrullau el mo ulterekokl a klaumerang er kau er Ngii.
Morriter er a Tekingel a Dios
Mongreos er a Techellem el Sebechem el Meluluuch
2 King David a ulemes er a nglunguuch el kmal mekreos. Ngmilengitakl el mora Jehovah el kmo: “A nglunguchek bo le ua ochod er medam.” (Psa. 141:1, 2) A reprist er a taem er a David a kmal mle kerekikl er a loruul er a ochod el luluusbech er ngii el kirel a mera el omengull. (Exo. 30:34, 35) Me a David el luluusbech er a ochod el mesaod er a nglunguuch a ochotii el kmo, ngmle soal mo kerekikl el melatk aike el bo lolekoi el mora Demal el ngar er a eanged. Tiakid a dirrek el soad el meruul er ngii. Ngkmal soad a nglunguched a lodeuir a rengul a Jehovah.
FEBRUARY 3-9
MEKREOS EL TEKOI EL NGAR ER A BIBLIA PSALM 144-146
“Ngdmeu a Rengrir Tirke el Chad el Dios er Tir a Jehovah!”
w18.04 32 par. 3-4
A Ker el Mla er a Remenguiu
2. Omelodech a chatter er tia el babier er a Psalm el rokir. A usbechellel a “seikid” el ngar er a 12 el kekerei el bades a belkul a kmo, aike el klengeltengat el losaod a 12 el mora 14 el kekerei el bades a melutk er a remelemalt, el tirke el lolengit osobel er a remekngit (11 el kekerei el bades). Tia el omelodech a dirrek el desang er a 15 el kekerei el bades el tekoi el “dmeu a rengrir” a lousbech er ngii el ngar er a positive el rolel. Me tia el deurreng a mora re osisiu el chad, el tir tirke el “ou Dios er a Jehovah!” Mutebengii el kmo a kot el taem er a lemeluches aikang e ngmle tekoi er a Hebru el ngii a dimlak lou punctuation mark el ua “quotation marks.” Me a ruliuid a kirir lomtab el kmo ngngera mera el belkul loeak a lomtab a rolel e ngmilluches, belkul a cherrengelel el rokir, me a lmuut el bebil er a bades el ulekuak el mo er ngii.
3. Omelodech a oltirakl aike el lmuut bebil er a bades el tibir el kmo ngmo er ngii a klengeltengat el mora rechedal a Dios loba blakerreng. Me a melemalt el omeldechel a belkul a tekoi el Asher a uchul me tia el babier er a Psalm a mla mo olecholt er a omelatk el luleba David el ngar ngii a uchetemel. Ngmle omeltkel el kmo a uriul er a Dios a losebelii a renged er a Israel er a recherrouel, e ngmo omekngeltengat er tir er a deurreng me tir a mo ungilbesrir. (Lev. 26:9, 10; Dut. 7:13; Psa. 128:1-6) El ua tiang, a Duteronomi 28:4 a kmo: “A RUBAK a mo omekngeltengat er kemiu me ng mo betok a re ngelekiu, e mo betok a dellemeliu, e mo betok a chermiu.” Me a temel omengederederel a ngelekel a David er a Salomon e a renged uleldeu a rengrir er a budech me a rechad a mle ungilbesrir. Me a lmuut kung a omengederederel a Salomon a millutk er a omengederederel a Mesias er a ngar medad.—1 Ki. 4:20, 21; Psa. 72:1-20.
Lolemolem el Mesisiich a Omeltkem
16 A omeltked er a diak a ulebengelel el klengar a mekreos el sengk er a Jehovah. Kede kmal omes el beduluchei el kirel a ungil el klengar er a ngar medad, el dodengelii el kmo ngmera el mo tmaut. Tia uai a uak, el omtebechel er kid me ngsebeched loutekangel a ringel, mo mesisiich odechelakl, e diak demedakt el mad. Ngua lkunged, lomekerreu er a uldesued me lsebeched lotngakl a cheleuid el uldasu e mo melemolem lurrekodel er a klemerang. A omeltked el mengai a uchetemel er a Biblia olekeed er kid er a Dios e ochotii a dmolech el bltkil a rengul el mei er kid. Nguchul a klungioled sel lolemolem el mesisiich omeltked.
17 A apostol Paulus a millekoi el ngar er a babilengel el mora rechad er a Rom el kmo, “A omeltkiu le rellemiu me di ledeu a rengmiu.” (Rom 12:12) A Paulus a mle sebechel dmeu a rengul e le ngmle ulterekokl a rengul el kmo a le lemelemii a blakerreng er ngii, e ngmo nguu a diak a ulebengelel el klengar er a eanged. A omeltked a dirrek el sebechel mo uchul a deuil a rengud e le ngulterekokl a rengud el kmo a Jehovah mo otaut a telbilel. Ngua lolekoi a ta er a milluches er a Psalm: “Ngdmeu a rengul ngikel chad el . . . omeltkel a ngar er a Jehovah el Dios, . . . el ngike el blechoel oltaut a telbilel.”—Psa. 146:5, 6, NW.
Ngua Ngera el Rolel a Bltikerreng a Mo Uchul a Mera el Deurreng?
19 Ngmla mo 6,000 el rak el beluulechad er a Satan a di omekcharm er a rechad. Ngar er aika el uriul sils er tia el mekngit el beluulechad er a Satan, e tia el chutem a mo mui er a rechad el di betik a rengrir er a di tir, e nguibes er a udoud, e betik a rengrir er a tametereng. Te di melatk el kirel aike el sebechir el ngmai, e remuul aike el sorir el tekoi el mo kot el meklou a ultutelel er a klengar er tir. Engdi a reuaisei el chad a kmal diak el sebechir el mo dmeu a rengrir! A Biblia a kmo: “Ngeltengat ngikel chad el Dios er a Jakob a olengeseu er ngii, ngikel ultuil er a RUBAK el Dios er ngii.”—Psalm 146:5.
20 A remesiungel a Jehovah a mera el betik a rengrir er ngii, e bek el rak e te betok a mo medengelii, e dirrek el mo betik a rengrir er ngii. Tiang a ochotii el kmo a Rengedel a Dios a mengedereder, e kmal di kmedung e ngmo omeskid aike el klengeltengat el kmal diak el sebeched el lmatk! Me sel doruul aike el soal a Jehovah, e kede rullii el mo dmeu a rengul, e tiang a mo uchul a mera el deurreng er kid. Tirke el betik a rengrir er a Jehovah a mo dmeu a rengrir el diak a ulebengelel! Ngar er a ongingil el suobel, e kede mo mesaod a bebil el mekngit el blekeradel el mo er ngii lokiu a bechelechelingaol el bltikerreng. Kede dirrek el mo mesa rolel e aika el blekeradel a kuk ngodech er aike el ungil el blekerdelir a remesiungel a Jehovah.
Morriter er a Tekingel a Dios
w04 5/1 16-17 par. 19-22
A Jehovah a Mui er a Diak Lemekimd el Bltikerreng
19 A kmal klou a ultutelel el taem el kirel a omesodel a omengederederel a Jehovah a kmedang. El ua lulemlaoch a Esekiel er a 38 el klou el bliongel, ngdi kmedung e a Satan a mo churrengelii a ngerechelel el ua “Gog er a beluu er a Magog.”(NW) Tiang a mo uldimukl er ngii a odechelakl el mo er a rechedal a Jehovah er a beluulechad el rokir. A Satan a mo melasem er a tkurrebab el sebechel el melemall er a klaumerang er a reblak a rengrir el chedal a Dios. Ngkmal dimlak leuaisei er a ngar er a mong el me er a chelechang, e a remengull er a Jehovah a kmal kirir el mo blak a rengrir el omekedong er ngii, el dirrek el mo lmangel el olengit er a ngelseuil. A dektir el kirel a Dios ma bltikerreng er tir el mo er ngii ngmo diak a belkul? Ngdiak, e le Psalm 145 a melekoi el kmo: “Ngkmeed er tirkel rokui el omekedong er ngii, el tirkel omekedong er ngii el ngara klemerang. Ngmesterir a lousbech tirkel rokui el meluu er ngii; ngorrenges chongterir e olsobel er tir. Ngmesebechakl er tirkel betik a rengrir er ngii, ngdi mo tomelleterir a rokuil dengerenger.”—Psalm 145:18-20.
20 Ngkol mo ua ngera el deurreng a bo dolechesuar el kmo ngkmal di kmedung e a Jehovah ma klisichel el mo olsobel er sel bo lokngemedeterir a rokui el dengerenger! Me tia el klou a ultutelel taem el di ua ngera el kmal kmedang, e a Jehovah a di mo orrenges er “tirkel omekedong er ngii el ngara klemerang.” Ngkmal diak bo lorrenges er a recheblad el chad. A Tekingel a Dios a kmal bleketakl el olecholt el kmo a bo lousbech er a ngklel el ngar er tia el ullebengelel a taem a remekngit a blechoel el mlo chemolt el kmo ngmo diak a belkrir.—Osisechakl 1:28, 29; Mika 3:4; Lukas 13:24, 25.
21 Chelecha el taem a kmal orechudel el taem el kirir tirke el medakt er a Jehovah el mo “omekedong er ngii el ngara klemerang.” Tirke el blak a rengrir el chedal a kmal dmeu a rengrir el ousbech er a ngklel sel loluluuch me sel longer el ngar er aike el miting er tir. Te ousbech er sel chedaol el ngakl sel di letir el chachedecheduch. E te bekeu el ouchais er a ngklel a Jehovah el ngar er a omesiungir el ngar er a buai.—Rom 10:10, 13-15.
22 A bo dolemolem el melai a klungioled el okiu sel kmes el deleongel er kid ma Jehovah el Dios, e ngdirrek el kmal klou a ultutelel a dolemolem el omtok aike el tekoi el sebechel el melemall a klisichel a klereng er kid el ua ngibes er a kerruul, ma mekngit el omilil, ma reng el diak lsoal el ousubes, ma lechub a bleot el reng el kirir a remechebuul. (1 Johanes 2:15-17; 3:15-17) A lak bo lemuklemalt, e choua ike el uldasu ma blekeradel a sebechel el mo uchul a omerellel a klengit e mo uchul a oridel a kengei er a Jehovah. (1 Johanes 2:1, 2; 3:6) Ngrolel a llomeserreng a bo domdasu el kmo a Jehovah a mo melemolem el olecholt er a blekokeuii-el-bltikerreng, ma lechub a diak lemekimd el bltikerreng, el me er kid a lsekum e kede melemolem el blak a rengud el mo er ngii.—2 Samuel 22:26.
FEBRUARY 10-16
MEKREOS EL TEKOI EL NGAR ER A BIBLIA PSALM 147-150
Ngbetok a Uchul Me Kede Oldanges er a Jah
Ngera Uchul Me Ngkired Loldanges er a Jah?
5 A Jehovah a dimlak di lebesterir a ongelaod er a rechad er a Israel e lemerekong, e ngdirrek el milengelaod er a derta el chad. Me ngmeruul er a osisiu el tekoi el kired er chelechang. Ngike el milluches er tia el psalm a kmo “Ng omekungil a chelemuul el reng, e omkar a telemall er a bedengir.” (Psalm 147:3) Me sel bo desecher me a lechub e ngmo mekngit a rengud, e ngulterekokl a rengud el kmo a Jehovah a omekerreu er kid. Ngkmal soal el mengelaod er kid, e omekungil a telemall er a bedenged. (Psalm 34:18; Isaia 57:15) Ngmeskid a llomeserreng me a klisiich me ngsebeched el outekangel a ngii di el mondai el dechelebangel.—Jakobus 1:5.
6 A ongingil, e ngika el milluches er a psalm a ulemes el bedul a eanged e dilu el kmo a Jehovah a “olterekokl a ulecherengelel a btuch,” e dirrek el “melibech a ngklel a derta er ngii.” (Psalm 147:4) Ngika el chad a mle sebechel el omes a btuch, engdi ngkmal dimlak lodengei el kmo ngua ngera ildisel. Me chelecha el taem e a re scientist a medengei el kmo ngar er a chelsel tia el galaxy er kid e ngar er ngii a betok el biliol el btuch. E meliuekl er tia el melidiul e nglocha ngar er ngii a betok el triliol el btuch er a chelsel! Me a rechad a kmal diak el sebechir el mechur a rokui el btuch, engdi ngike el Ulemeob a sebechel. Ngmera el sebechel e le ngmedengei a derta er ngii el btuch e mla duibech a ngklel a derta er ngii. (1 Korinth 15:41) Me ngika el Dios el medengei a lengar er ngii a derta el btuch a dirrek el kmal ungil medengelkau. Ngdirrek el kmal ungil medengei el kmo ke kirel ker, e uangera uldesuem, e ngera kousbech!
Ngera Uchul Me Ngkired Loldanges er a Jah?
7 A Jehovah a kmal ungil medengei a ringeled, e kmal ngar er ngii a klisichel el ngosukid er a mondai er kid. (Monguiu er a Psalm 147:5.) Me kede locha mo omdasu el kmo a ringel el dechuarm er ngii a kmal meringel me ngdiak el sebeched el outekangel er ngii. Engdi Dios a kmal ungil medengei aike el sebeched, e le “ng melatk el kmo kid a di chebechab.” (Psalm 103:14) Me kid el diak demecherrungel a uchul me kede di mo remuul a cheleuid, el rullid el mo mechitechut a rengud. Me kede mo ouuchel a rengud er a tekoi el dullekoi, me a mekngit el urunguled, me a lechub a telkib el chelechei er a rengud! Engdi Jehovah a kmal diak a chelitechetul, e ungil medengei el kmo ngua ngera uldesued.—Isaia 40:28.
Ngera Uchul Me Ngkired Loldanges er a Jah?
18 Ngika el milluches er tia el psalm a mle medengei el kmo ngar er a chelsel a rokui el renged er tia el chutem e a Jehovah a ngileltii a renged er a Israel er a irechar el mo chedal. Me ngdi mle tir el tang a ngilai a “tekingel” a Dios me a “llechul.” (Monguiu er a Psalm 147:19, 20.) Me chelecha el taem e kede kmal oba ileakl el techall el mo omtechei er a ngklel a Dios. Kede oba omereng el saul e le kede mla mo medengelii, e dirrek el oba Tekingel el omekrael er kid, e dirrek el sebechel el mo er ngii a kmes el deleuill er kid me ngii. Me kede di ua ngika el milluches er a Psalm 147, el ngar er ngii a betok el ungil el uchul me kede ‘oldanges er a Jehovah’ e dirrek el melisiich er a rebebil el mo meruul er a osisiu el tekoi.
Morriter er a Tekingel a Dios
w04 9/1 21 par. 22
A Bleob a Ouchais er a Klebkellel a Dios!
22 A Psalm 148:10 a melekoi el kmo: “Ma rokuil charm, a turturk ma tebelik, ma melekesakou el charm ma suebek el charm!” A betok el charm er a beluu ma suebek el charm a olecholt a kmal mengasireng el blekeradel. A suebek el charm el Laysan albatross a sebechel el suebek el kmal mo cheroid (e a tang a silebek er a 25,000 el mael er a chelsel a di 90 el sils). A kuk ta er a suebek el charm el blackpoll warbler a ngklel a blechoel el suebek el ngar er a Diluches el Merikel el mo er a Dimes el Merikel, el suebek er a betok er a 80 el sikang el diak lolengull. A rakuda a oreked a ralm, el diak el ngar er sel tebull er a ulkel el ua lomdasu a rechad, e ngbai ngar er a chelsel a delel, el uchul e ngsebechel el merael el meketeket e diak bo lengesonges a ralm er a bedengel. Misei a uchul, ma remeduch el meruul a klalo a kmal kerekikl el merritel er a charm sel lolatk el mo meruul a mesil ma lechub a beches el klalo. A Gail Cleere, el chad er a omeluches a milluches el kmo: “A lsekum ngsoam el mo meruul a klalo el sebechel el ungil el oureor . . . e diak lolemall er a chutem el meliuekl er kid, e ngulterekokl el sebechem el metik er a ungil el okesiu er ngii el ngar er aike el bleob.”
FEBRUARY 17-23
MEKREOS EL TEKOI EL NGAR ER A BIBLIA OSISECHAKL 1
Rengeasek, Ko Mo Orrenges er Techang?
Lak Becherei a Ngii Di el Tekoi Me Lorrob er Kau Me Lak Mnguu a Nguked
16 Me a lechub ke ngeasek e mo omdasu el kmo a rechad er a blim a kmal diak lodengelkau, me a lechub e ngkmal meringel a tekingir. Tiang a locha mo uchul e ngmo kesib a rengum e mo omdasu el kmo ngdiak lsoam el mesiou er a Jehovah. Engdi a lsekum ke mo cheroid er a Jehovah, e ke mo metik el kmo ngdiak a ta el chad el ngar tia el beluulechad el betik a rengul er kau el ua Kristiano el demam me a delam me a dirrek el resechelim el ngar a ongdibel.
17 Ka molatk er tiang: A lsekum a demam me a delam a dimlak losmechokl er kau, e ke mekera e mo medengei el kmo ngbetik a rengrir er kau? (Hebru 12:8) Kau a medengei el kmo tirkang a diak lemecherrungel, me a lebebil e sel rolel a losmechokl er kau a mo ongesechii a rengum. Engdi lak di molatk er a tekoi el ledilung. Bai molasem el mo medengelii sel luchul me te meruul, me a lechub e te dmung a tekoi. Me bo leklou a rengum me lak di mereched el outoketok. A Tekingel a Dios a kmo: “Ngikel diak di longedecheduch a ngar ngii a klemedengei er ngii, me ngikel di lmuk a sekutab.” (Osisechakl 17:27) Mrellii a turrekong er kau el mo meruul a tekoi el ua klou el chad el kongei er a omellach, e nguu a klubelem er ngii el diak lultuil er a rolel e ke ngiluu ngii el omellach. (Osisechakl 1:8) E lak mobes, ngkmal mekreos el sengk a lsekum a demam me a delam a betik a rengrir er a Jehovah, e le tirkang a kmal sorir el ngosukau el mo nguu a diak a ulebengelel klengar.
w05 6/1 17-18 par. 11-12
Domekerreu er Sel Deruchelled el Kristiano
11 Modeuir a rengul a Dios, el diak el chad. Ngsoad el oterekeklii a deruchelled sel bo deteloi er a bebil er a rechad. A rebek el chad a ousbech a klausechelei, e sel deteloi er tir e ngmo ungil a rengud. A taem er a klengeasek—ma ike el uriul el taem er a klengar—e a orrimel er a resechelirir a sebechel el kmal mo mesisiich, el odbechii a chad el mo soal el oltirakl ma lechub e ngmo oldeu a rengrir a rebebil. Engdi a resechelid ma rechad el dodengelterir a diak leblechoel el melatk er a ungil el kired. A lebebil er a taem e ngsorir a rebebil el mo obengterir el meruul a mekngit. (Osisechakl 1:11-19) Sel lsekum a Kristiano a mo mechitechut er a orrimel er a resechelirir, e ngblechoel el melasem el omart er a deruchellel. (Psalm 26:4) A apostol el Paulus a ulemeklatk el kmo: “E lako bo blekerdelel tial belulechad.” (Rom 12:2) A Jehovah a meskid a klisiich er a chelsed el dousbech me bo lsebeched el omtok er a ngii di el orrimel el ngar er a ikred.—Hebru 13:6.
12 Sel lsekum a orrimel er a ikred a sebechel el mengitechut er a deruchelled el Kristiano, e ngkired el melatk el kmo a blakerreng er kid el mo er a Jehovah a lmuut el klou a ultutelel er a uldesuir a rechad ma lechub a blekerdelel a klengar er a ruumesingd el chad. A tekoi el ngar er a Exodus 23:2 a ungil el omellach el kmo: “Kele moltirakl er a re betok el chad el mo meruul a mekngit.” Sel taem el ruumesingd el Ngalek er a Israel a uluumededenger er a klisichel a Jehovah el mo oltaut aike el telbilel, e a Kaleb a kmal dimlak lekengei el mo oltirakl er tir. Ngkmal mle ulterekokl a rengul el kmo aike el telbilel a Dios a ulterekokl, me ngmlukngeltengat el kirel a uldesuel. (Ulecherangel 13:30; Josua 14:6-11) Kau ke dirrek el kongei el mo omtok a orrimel er a merael a chisel el uldasu me bo lsebechem el omekerreu er a deleongel er kau ma Dios?
Morriter er a Tekingel a Dios
(Osisechakl 1:22, NW) Ngmo ua klteketel a ngerang el somiu el di diak modengei a ngerang kemiu el diak a klemedengei er kemiu? Ngmo ua klteketel a ngerang el di lesomiu omelenguul kemiu el melenguul? Ngmo ua klteketel a ngerang el mouketui er a klemedengei kemiu el mekebelung?
A Mera el Llomeserreng Omekedong el Klou a Ngerel
7 Tirke el “diak a klemedengei er [tir],” a tirke el beot er tir a mecheblad e mekesuseu. (Osi. 14:15, NW, ftn.) Kede blechoel el metik er a chouaitirka el chad sel doldingel. Molatk er tirke el betok el miliol el chad el longeuid er tir a remengeteklel a klechelid me a lechub a rechad er a balatiks. A rebebil a kmal mo mechas a rengrir sel bo lodengei el kmo tirka omulak er tir. Me nguaisei engdi tirke el losaod er tir a Osisechakl 1:22 (NW) a melilt el melemolem el diak a ngerang el lodengei le ngsorir el uaisei. (Jer. 5:31) Ngsorir el di meruul aike el sorir, e diak el sorir mo medengei aike el lolekoi a Biblia me a lechub e bo loltirakl aike el lolekoi. A rebetok er tir a di ua uldesuel a ta el chad er a Quebec, Canada el dilu er a Sioning el mlo oldingel er ngii el kmo, “A lsekum a prist er kemam a mengeuid er kemam, e ngkngtil el diak el kngtmam!” Ngkmal diak el soad el mo uai tirka el sorir el melemolem el di diak a ngerang lodengei!—Osi. 1:32; 27:12.
FEBRUARY 24–MARCH 2
MEKREOS EL TEKOI EL NGAR ER A BIBLIA OSISECHAKL 2
Ngera Uchul Me Ngungil Omlia Rengum er a Omesubem el Di Kau el Tang?
“[Moltirakl] er a Klemerang”
16 Ngdiak el kid el rokui a soad el menguiu e mesuub. Me nguaisei engdi Jehovah mengemedaol er kid el mo melemolem el ‘osiik’ a dmolech el klemedengei er a klemerang. (Monguiu er a Osisechakl 2:4-6.) Sel doureor el meringel el meruul er tiang e ngdi mo uchul a klungioled. A Corey a mesaod el kirel a omengiuel er a Biblia el kmo, ngdi omes a derta el bades. Ngdmu el kmo: “Ak chemuiu a rokui el footnote, omes a rokui el cross-reference, e meruul a lmuut el bebil er a research. . . . Ngkmal betok a kngai sel kuruul el uaisei!” Me a dousbech er tia el rolel omesuub me a lechub e ngkuk tang, kede ochotii omereng el saul er kid el kirel a klemerang sel doureor el meringel el mengoit a taem el mesuub er ngii.—Psa. 1:1-3.
A Mera el Llomeserreng Omekedong el Klou a Ngerel
3 A llomeserreng a sebechel melutk el kirel sel duch er kid el sebeched lousbech aike el dodengei el meruul a ungil omelilt. Me nguaisei a mera el llomeserreng a lmuut el ngaruchei er tiang. A Biblia kmo: “A omeluu er a RUBAK a uchelel a llomeserreng, ma klemedengei er Ngikel Chedaol a sekutaberreng.” (Osi. 9:10) Me sel lebo el kired el meruul a meklou a ultutelel el omelilt e ngkirel a omelilt er kid el mengai a uchetemel er a uldesuel a Jehovah, el ngii a “klemedengei er Ngikel Chedaol.” Ngsebeched el meruul el uaisei sel dosuub er a Biblia me aike el babilenged el mengai er a Biblia. Seikid e kede mo ochotii a mera el llomeserreng.—Osi. 2:5-7.
4 Ngdi ta el Jehovah sebechel meskid a mera el llomeserreng. (Rom 16:27) Ngera uchul me ngsebeched el melekoi el kmo a llomeserreng a ngar er a Jehovah el mei? A kot, e ngika Ulemeob me ngika medengei a rokui el tekoi el kirel a blebelel. (Psa. 104:24) Ongerung, aike el rokui loruul a Jehovah ochotii a llemesel a rengul. (Rom 11:33) Ongedei, a mellomes el ulekrael er a Jehovah di mo uchul a klungiolir tirke el oltaut. (Osi. 2:10-12) Me a lsoad el nguu a mera el llomeserreng, e ngkired el kongei aika el edei el klemerang er a Biblia e mechei me ngomekrael omelilt er kid me a omerelled.
Kemiu el Ngeasek, Molisiich a Klaumerang er Kemiu
2 A rebetok el chad er chelechang a oumerang el kmo a Dios a dimlak lomeob er kid. Me a lsekum ke ngeasek el mesiungel a Jehovah me a lechub e ke mesuub el kirel, e nglocha mo er ngii a taem e ke mo omdasu el kmo ak mekerang e meketeklii el kmo Ngii ngike el Ulemeob er kid. A Biblia a dirrek el sebechel el ngosukid el mo kerekikl el omtab aike el tekoi el derenges me a dechuiu e osisecheklid el mo meduch el mesaod er tia el tekoi. A Tekingel a Dios a kmo: “A llemesem ma sekutaberreng er kau a mo sobecheklau.” El okiu a ngera el rolel? Ngmo ngosukau el mo meduch el oltngakl a blulak el tekoi e dirrek el smisichii a klaumerang er kau er a Jehovah.—Monguiu er a Osisechakl 2:10-12.
3 A mesisiich el klaumerang er kid er a Jehovah a mo er ngii el okiu sel bo dungil el medengelii. (1 Ti. 2:4) Me sel monguiu er a Biblia me aike el babilenged, e ngklou a ultutelel el bo mchelellakl e momtab aike el tekoi el losaod, e molasem el mo medengei a belkul a tekoi el monguiu. (Mt. 13:23) Tiaikid el rolel a omesuub a mo uchul e ngsebechem el metik a betok el olechotel el kmo a Jehovah a ngike el Ulemeob er kid, e a Biblia a babilengel.—Heb. 11:1.
Morriter er a Tekingel a Dios
Molemolem el Ngar er a Bltikerreng er a Dios
10 A lsoad el mo kmeed er a Jehovah e ngkmal klou a ultutelel a dosuub el kirel. E tia tekoi el kired el melemolem el meruul er ngii. El uai tiang, a lsekum e ke mla er rikl e ngii a kmal mlo mekelekolt me ke chumlii a ngau me bo lsebechem el mengeald er kau, e ke mo mecherei tia el ngau me ngmad a ngeuil? Ngdiak, ke locha bai di omelecha idungel er ngii me ngmelemolem el kmard e mekeald. Me ngua idungel el meruul er a ngau me ngdiak el mad a ngeuil, a “klemedengei er a Dios” a meruul er a bltikerreng er kid el mo er a Jehovah me ngdi mesisiich.—Osisechakl 2:1-5.