Mrellii a Jehovah el Mo Risois er Kau

1. Ngar er a Psalm 18:46 (NW) e a David ngulemekesiu er a Jehovah el mora ngerang?

KEDE kiei er a beluulechad el sebechel di kiul duubech a mondai el rullii a klengar el mo meringel me a lechub e ngmengodech a klengar er kid. Me kede mera el oba omereng el saul el sebeched el mora Jehovah el Dios el kirel a ngeso! Ngar er a uleak uchei el suobel e kede mluklatk el kmo a Jehovah a di ngar el Dios el kltmokl el lolengeseu er kid. Sel de experience er a ulengesuil e ngolterekokl er a rengud el kmo a “Jehovah a ngar.” (Monguiu er a Psalm 18:​46, NW.a) Me nguaisei engdi a uriul er a ledu aika el tekoi a David e ngmillekoi el kirel a Dios el kmo ng “Risois er ngak.” Ngera uchul me ngomekesiu er a Jehovah el dingar el Dios el mora risois, el diak a klengar er ngii?

2. Ngera uchul me ngungil a bo desemeriar er a uchul me a David ulemekedong er a Jehovah el kmo, “Risois er ngak”?

² Ngar tia el suobel e kede mo mesaod er a uchul me a Jehovah okedongall el risois me a rolel e ngosisecheklid el kirel. Kede dirrek el mo suubii a rolel e ngsebeched el mo omes er ngii el Risois er kid. E a ulebongel e kede mo mesaod a rolel e ngsebeched el loukerebai a blekerdelel a Jehovah el rullii el mo ua risois.

A UCHUL ME A JEHOVAH A RISOIS

3. A Biblia ngblechoel el lousbech er a tekoi el “risois” el uangerang? (Momes er a siasing.)

³ A Biblia ousbech er a tekoi el “risois” el lolengeseu er kid el mo medengei a bebil er a blekerdelel a Jehovah. Kede blechoel metik er a tekoi el risois er aike el bades el oldanges er a Jehovah el kmo ng Dios el diak a mo mekesiur. A kot el taem el Biblia el melekoi er a Jehovah el kmo ng “Risois” a ngar er a Duteronomi 32:4 (NW). E ngar er a nglunguchel a Hana e ngdilu el kmo: “Ngdiak a risois el ua Dios er kid.” (1 Sa. 2:​2, NW) Me a Habakuk ulemekedong er a Jehovah el kmo, “Risois er ngak.” (Hab. 1:​12, NW) E ngike el milluches er a Psalm 73 ulemekedong er a Dios el “risois er a renguk.” (Psa. 73:​26, NW) Me a Jehovah dirrek el di ngii el mesaod er ngii el kmo ngrisois. (Isa. 44:​8, NW) Ka me dosaod edei el blekerdelel a Jehovah el rullii el mo ua risois e desuubii a rolel e ngsebeched el rullii el mo “Risois er kid.”—Dut. 32:​31, NW.

4. Ngmekera Jehovah e blil osebechakl? (Psalm 94:22)

⁴ Jehovah blil osebechakl. Ngdi ua ii er a klou el risois el sebechel a chad el mo er ngii e omdor er a mesisiich el eolt, a Jehovah omekerreu er kid sel bo dechebangel a meringel el blekeradel er a klengar er kid. (Monguiu er a Psalm 94:22.) Ngngosukid el mekerreuii a deleuill er kid me ngii e olterekokl a rengud el kmo, ngdiak a ngerang el mo uchul a telemelled el diak a ulebengelel. Ngdirrek el tuib a lmuut el betok: Ngmo choroid aike el rokui el melemall er kid me a budech er kid.—Ese. 34:​25, 26.

5. Ngmekera Jehovah e sebechel mo Osebechekled?

⁵ A ta er a rolel e kede rullii a Jehovah el mo Risois er kid e Osebechekled a oeak sel doluluuch el mo er ngii. Sel doluluuch e a Jehovah meskid a “budech er a Dios” el ngii a mo kokerengii a rengud me a uldesued. (Fil. 4:​6, 7) Molatk er a Artem el mlekelebus el kirel a klaumerang er ngii. Ngika mlo betok el taem el le interrogate er ngii a ta el sechal el kmal ulerrimel e omekrur er ngii. Ngkmo: “Ak kmal mo feel er a klou el stress sel be lolai er ngak. . . . Me ak mle blechoel el meluluuch el mora Jehovah. A kullengit er ngii me lomudech er a renguk e lebeskak a llomeserreng. Me a odelecheklel a dimlak loureor er ngak. . . . Ngoeak a ngelsuil a Jehovah e ngmle ua kdechor er medal a kboub el cheldukl el bad.”

6. Ngera uchul me ngsebeched el ultuil er a Jehovah? (Isaia 26:​3, 4, NW)

⁶ Jehovah sebeched el ultuil er ngii. Ngdi ua risois el diak el sebechel el mengukl, a Jehovah mo blechoel el ngar ngii el kired. Ngkmal sebeched el ultuil er ngii e le ngii a “Risois el diak a ulebengelel.” (Monguiu er a Isaia 26:​3, 4, NW.b) Ngdiak lemad me ngdi mo blechoel el oltaut a telbilel, orrenges a nglunguched, e omeskid a ngeso el dousbech. Ngdirrek el kmal sebeched el ultuil er a Jehovah e le ngii el oba blakerreng el mo er tirke el mesiou er ngii. (2 Sa. 22:​26, NW) Ngkmal diak lobes aike el doruul, e mo blechoel el omeskid omeksulled.—Heb. 6:10; 11:6.

7. Ngera kede mo experience sel bo dultuil er a Jehovah? (Dirrek el momes er a siasing.)

⁷ Kede rullii a Jehovah el mo Risois er kid sel de mui el ultuil er ngii. Kede oumerang el kmo ngmo uchul a klungioled sel dolengesenges er ngii, mo lmuut er a chelsel a meringel el taem. (Isa. 48:​17, 18) Sel de experience er a ulengesuil e a klaumerang er kid er ngii a mukeroul. Kede mo ungil kltmokl el chobangel a ringel el sebeched el loutekangel el di oeak a ngelsuil a Jehovah. Ngblechoel el chelsel aike el blekeradel el diak a chad el sebeched el mo er ngii el kirel a ngeso e kede mtebengii el kmo ngkmal sebeched el blechoel el ultuil er a Jehovah. A Vladimir a kmo: “A taem el kulengoit er ngii er a detention center a sel kot lungil taem er a deleuill er ngak me a Dios. Ak liluut el kmal mo oumerang el ulsirs er a Jehovah e le ngak el di mle ngak el tang e dimlak a klisichek er a blekeradel el kseluk er a chelsel.”

8. (a) Ngera uchul me ngsebeched el melekoi el kmo a Jehovah diak lemesim? (b) Ngera el klungiaol a dengai a bo le Risois er kid a Dios? (Psalm 62:​6, 7)

⁸ Jehovah diak lemesim. Ngdi ua klou el risois, a Jehovah diak el mesim e diak el mengodech. A blekerdelel me a moktek er ngii a diak lemengodech. (Mal. 3:6) Sera lebo er ngii a ultok er a Eden e ngdimlak lemengodech a moktek er ngii. Ngua lolekoi a apostol Paulus, “ng diak el sebechel el mo ngodech.” (2 Ti. 2:13) Tia belkul a kmo a ngii di el tekoi el duubech me a ngii di el tekoi el loruul a rebebil a diak bo lengedechii a blekerdelel, moktek, me a llechul a Jehovah el kirel a ungil me a mekngit. A Jehovah el diak lemengodech a uchul me ngsebeched el lomes el bedul ngii el kirel osobel me a ngeso el mo outekangel a ringel.—Monguiu er a Psalm 62:​6, 7.

9. Ngera ke suub er a experience er a Tatyana?

⁹ Kede rullii a Jehovah el mo Risois er kid loeak a dolebedebek a blekerdelel me a moktek er ngii el kirel a beluulechad me a rechad. Sel doruul el uaisei e ngngosukid el mo melemolem el chelellakl a rengud e melemolem el loba blakerreng el mo er ngii sel dechelebangel a ringel. (Psa. 16:8) Tia mle klemerang el kirel a odos el Tatyana el di mlo kelebus er a blil el kirel a klaumerang er ngii. Ngkmo: “Ngkmal di mlo ngak el tang. A uchelel e ngmle meringel. Ngmle blechoel el mo mechitechut a renguk.” Me nguaisei engdi sera lutebengii el kmo a omelsemai el lengar ngii a ulekuak er a Jehovah me a moktek er ngii e ngmlo sebechel loutekangel e mo mesisiich a rengul. Ngmelekoi el kmo: “Sera bok understand er a uchul me tia dilubech el mei er ngak e ngngilsukak el mo remember el kmo ng Jehovah uchul me a kchelebangel er tia el blekeradel. Tia ngilsukak el mo diak di kullatk er ngak.”

10. Ngmekera Jehovah e sebechel mo Risois er kid er chelechang?

¹⁰ Ngar er aika el merael el mei el sils e kede mo chobangel a ringel el lousbech er kid el mo ultuil er a Jehovah el ngaruchei er a ngii di el taem er a reksi. Chelechang e ngtaem el desisichii a klaumerang er kid el kmo, a Jehovah mo omeskid aike el rokui el dousbech el mo outekangel el loba blakerreng. Ngmekera doruul er tiang? Monguiu a cheldecheduch er a Biblia me a experience er a remesiungel a Jehovah er chelecha el taem er kid. Momtab a rolel e a Dios a mla olecholt a blekerdelel el ua risois el lolengeseu er a remesiungel. Bom dmolech el melebedebek aika el cheldecheduch. Sel moruul el uaisei e ngsebechel ngosukau el rullii a Jehovah el mo Risois er kau.

MOUKEREBAI A BLEKERDELEL A JEHOVAH EL UA RISOIS

11. Ngera uchul me ngsoad el mo oukerebai a blekerdelel a Jehovah el rullii el mo ua risois? (Dirrek el momes er a baks el “Turrekong el Kirir a Remekekerei el Odam.”)

¹¹ Kede mla smaod a rolel e a Jehovah ua risois. Chelecha e me dosaod er a rolel e ngsebeched el loukerebai aika el blekerdelel el rullii el mo ua risois. A lsekum kede mora tkurrebab el klisiched el loukerebai er ngii e ngmo sebeched el smisicheterir a rudam me a rudos er kid. El ua tiang, a Jesus a milsang a Simon a ngakl el Sefas (el moiuid el “Petrus”) el belkul a kmo, “risois.” (Jn. 1:42) Me a Jesus a ua lullekoi el kmo a Petrus a mo uchul a ongelaod me a omelisiich el mora ongdibel. A remechuodel er a ongdibel a losaod er tir el kmo te “chungel a kloul risois.” (Isa. 32:2) Me nguaisei ngmo uchul a klungiolel ongdibel el rokir a lsekum a rokui el odam me a odos oukerebai aika el blekerdelel a Jehovah el rullii el mo ua risois.—Efe. 5:1.

12. Mosaod a rolel e ngsebeched el mo blil osebechakl el kirir a rebebil.

¹² Bo blil osebechakl. Ngngar ngii aike el taem el sebeched el mo blil osebechakl el mora rudam er kid el ua sel leduubech a telemellel a beluu, uldikel er a chelsel a beluu, me a lechub e ngmekemad. Sel lorael el lmuut el mo mekngit a blekeradel er chelecha el “uriul sils” e ngulterekokl el mo klou a techelled el kaingeseu er a delongeled. (2 Ti. 3:​1, BT) Ngdirrek el sebeched el ngosuterir a rudam er kid er aike el lousbech er a uldesuir me a rengrir me a dirrek el tekoi er a klereng. A ta er a rolel e ngsebeched el meruul er tiang a doutkeu er tir er a Blil a Ongdibel, e rullii ongdibel el mo basio el domelechesiu er a bltikerreng me a omelisiich. Kede kiei er a beluulechad el rechad a mekngit omerellir me a rudam me a rudos er kid a sebechir el mo feel el stressed e diak oubltikerreng el mo er tir. Me sel lemei er a miting a rudam me a rudos er kid e doruul aike el rokui el sebeched el rulleterir el mo feel er a bltikerreng, ulengull, me a osebechakl.

13. Te mekera remechuodel e sebechir el mo blil osebechakl el kirir a rebebil? (Dirrek el momes er a siasing.)

¹³ A remechuodel a sebechir el mo blil osebechakl el kirir tirke el chelebangel a ses a eolt me a lechub e te chelebangel a blekeradel el sebeched el lomekesiu el mora ses el eolt. Temel a telemall er a beluu me a dirrek el emergency er a rolel a ukeruul e a remechuodel a di mereched el mo kutmokl a rolel e te olengeseu er a rudam me a rudos er tir. Te dirrek el omesterir omelisiich er a Biblia. A rudam me a rudos a mo beot er tir a mora mechuodel a lsekum a rechad a medengelii el blekerdelel a medemedemek, chubechub, e kongei el lorrenges. Chouaika el blekeradel a rulleterir el mo feel el kmo a mechuodel a betik a rengul er tir, me ngmo beot er tir a oltaut a ulekrael el mengai er a Biblia el mechuodel omesterir.—1 Th. 2:​7, 8, 11.

14. Ngmekera dochotii el kmo ngsebechir a rechad el ultuil er kid?

¹⁴ Lsebeched el lultuil er kau. Ngsoad a rebebil a bo le sebechir el ultuil er kid, tokubets er a chelsel a meringel el taem. (Osi. 17:​17, NW) Ngmekera sebechel mo chised el kmo ngsebechir a rechad el ultuil er kid? Kede mora tkurrebab el klisiched el loukerebai er a Jehovah er a bek el sils, el ua oltaut a telbiled e mo olab a taem. (Mt. 5:37) Ngdirrek el sebeched el olengeseu er a rechad el dodengelterir el kmo te ousbech a ngeso. Me a lmuut kung, ngsebeched el make sure e kede kutmokl a ngerecheled loltirakl a ulekrael el dengai.

15. Ngmekera mo klungiolel ongdibel sel lsebechir el lultuil er a remechuodel?

¹⁵ A remechuodel el sebeched el ultuil er tir a klungiaol el mora ongdibel. Ngoeak a ngera el rolel? A re publisher a feel er a support er tir sel sebechir el di mereched el contact er a remechuodel, el ua ngike el overseer er a service group er tir. A re publisher a dirrek el mo feel el kmo te ulekerreu sel lodengei el kmo a remechuodel a kmal kongei el lolengeseu er tir. Me a remechuodel sel lomesterir a re publisher omesmechokl el mengai er a Biblia me a babier el loltobed a blak a rengul mesiou el diak el uldesuir, e a rekldemir er a klemerang a mo sebechir el loumerang er tir. Me a rudam me a rudos a kmal mo oumerang er a mechuodel el diak losaod a berrotel el tekoi el kirir e oltaut aike el ledu el kmo ngmo meruul.

16. Ngmekera mo uchul a klungioled kid me a rebebil sel lak demesim?

¹⁶ Lak mesim. Ngsebeched el mo ungil influence el kirir a rebebil sel lak lemesim a rengud el meruul a llemalt e doruul a omelilt el mengai a uchetemel er a omellach er a Biblia. Sel lemukeroul a melemalt el klemedengei er kid me a klaumerang er kid e kede mo mesisiich el dechor el kirel a klemerang. Ngdiak bo leteloadel a rengud, doudeleokl, me a lechub e lebeot er kid a mekesuseu er a klsuul el osisechakl me a uldasu er a beluulechad. (Efe. 4:14; Jak. 1:​6-8) A klaumerang er kid er a Jehovah me a telbilel a mengellakl er kid sel dengai a mekngit el chais. (Psa. 112:​7, 8) Ngdirrek el mo sebeched el olengeseu er tirke el chelebangel omelsemai.—1 Th. 3:​2, 3.

17. Te mekera remechuodel e ngosuterir a rebebil el mo diak lemesim?

¹⁷ A remechuodel a kirir el chelemekl a rengrir, ulserechakl a rengrir, ungil a blekerdelir, e medemedemek. Tirka el odam olengeseu er a ongdibel el mo diak lemesim a klaumerang er tir e smisicheterir loeak a ‘leblak a rengrir er a klemerang el bla le mosisechakl er ngii.’ (Tit. 1:9; 1 Ti. 3:​1-3, BT) Ngoeak a kerebai me a omengelechel er a remechuodel e te ngosuterir a re publisher el mo ngar er a miting, oldingel, e meruul omesubir el di tir el tang. A rudam me a rudos sel lebo lechebangel a mondai el rulleterir el mo ouedikel a rengrir e a remechuodel a sebechir lolengeseu er tir loeak a lolisiich er tir el mo ultuil er a Jehovah e ulturk osengir er a telbilel.

18. Ngera uchul me ngsoad el loldanges er a Jehovah e lmuut el mo kmeed er ngii? (Dirrek el momes er a baks el “Rolel e Kede Lmuut el Mo Kmeed er a Jehovah.”)

¹⁸ Uriul er a omerriter er kid er aika el blekerdelel a Jehovah e ngkmal sebeched el melekoi el ua King David el kmo: “Le modanges a Jehovah, el Risois er ngak.” (Psa. 144:​1, NW) Ngkmal sebeched el blechoel el ultuil er a Jehovah. Klengar er kid el rokir el mo lmuut er a cheluodel me ngngar ngii a ungil luchul me kede melekoi el kmo: “Ngii a Risois er ngak,” lulterekokl a rengud el kmo ngmo blechoel el olengeseu er kid el meloseb er a tekoi er a klereng.—Psa. 92:​14, 15, NW.