Ngdiak Di Lekid el Tang

1-2. (a) Ngera uchul me ngsebeched el melekoi el kmo sel lebo er ngii a chelebengeled e ngdiak di lekid el tang? (b) Ngera kede mo mesaod er tia el suobel?

SEL bo dechebangel oberaod el omelsemai e kede locha mo feel el kmo ngkmal di kid el tang el ngar er a chert er a belngel a kereker el mekngit a eanged. Me nguaisei engdi ngdiak lak olengeseu er kid. A betik a rengul el Demad el ngar er a eanged a mes a chelebengeled e dirrek el tibir el kmo ngmo ngosukid el loutekangel. A Jehovah olterekokl a rengrir a reblak a rengrir el mesiungel el kmo: “Ak mo . . . ngosukau.”—Isa. 41:10.

² Tia el suobel a mo mesaod a rolel e a Jehovah olengeseu er kid loeak a (1) ngomekrael er kid, (2) ngomeskid aike el dousbech, (3) ng protect er kid, me a (4) ngmengelaod er kid. A Jehovah olterekokl er a rengud el kmo a ngii di el ngerang el bo dechebangel er a klengar e ngkmal diak bo lobes er kid. Ngdiak a ta el bo lechitid. Me ngkmal diak di bo lekid el tang.

JEHOVAH OMEKRAEL ER KID

3-4. Ngmekera Jehovah lomekrael er kid? (Psalm 48:14)

³ Monguiu er a Psalm 48:14. A Jehovah medengei el kmo ngdiak el sebeched el di kid lomekrael er kid e ousbech er ngii lomekrael. Ngmekera lomekrael er a remesiungel er chelecha el taem? A ta er ngii a oeak a Biblia. (Psa. 119:105) A Jehovah oeak a mlukreng el Tekingel e ngolengeseu er kid el meruul omelilt e omekeroul a ungil blekeradel el mo uchul a klou el deurreng el kired er chelechang me a diak a ulebengelel el klengar er a ngar medad.a El ua tiang, ngolisechakl er kid el mo diak dongemekl a kngtil a rengud, mo honest er a rokui el tekoi el doruul, e mo mekeald a bltkil a rengud el mora rebebil. (Psa. 37:8; Heb. 13:​18, NW; 1 Pe. 1:​22, BT) Sel dolecholt aika el blekerdelel a Dios e kede mo ungil chedam me a chedil, ungil bechiil el sechal me a bechiil el redil, e ungil el sechelei.

⁴ Me a lmuut kung, a Jehovah liluches er a Tekingel a tekoi el dilubech el mora rechad el mlo chobangel a ringel me a feelings el osisiu er kid. (1 Ko. 10:13; Jak. 5:17) Sel donguiu aika el cheldecheduch e doltaut aike el desuub er ngii e ngmo uchul a klungioled el ngar er a eru el rolel. A kot, kede mo medengei el kmo ngkmal diak di lekid el tang. Te ngar ngii a mla chobangel a osisiu el blekeradel er kid e mle sebechir el outekangel. (1 Pe. 5:9) Ongerung, kede suubii el mo meduch loutekangel a ringeled.—Rom 15:4.

5. A Jehovah ngousbech er techang lomekrael er kid er a rael el mora klengar?

⁵ A Jehovah dirrek el lousbech er a rekldemed er a klemerang lomekrael er kid.b El ua tiang, a re circuit overseer a blechoel loldingel a ongdibel el melisiich. A cheldecheduch loltobed a melisiich er a klaumerang er kid e ngosukid el mengeluolu er a kltarreng er kid. (Rel. 15:40–16:5) A remechuodel er a ongdibel a dirrek el meringel loureor lolengeseu er a rederta el chad er a ongdibel el mo melemolem el kmeed er a Jehovah. (1 Pe. 5:​2, 3, BT) A ruungalek dirrek lolisechakl er a rengelekir el mo betik a rengrir er a Jehovah, e olengeseu er tir el mo ungil melilt e mo olab a ungil teletael. (Osi. 22:6) Me a remla mukeroul er a klereng el odos olengeseu er a remekekerei el odos loeak sel leketmeklii a ungil kerebai, lomesterir a advice, e lolisiich er tir.—Tit. 2:​3-5.

6. Ngera kired el meruul er ngii me dengai a klungioled er a ulekrael er a Jehovah?

⁶ A Jehovah mla rullii a part er ngii e mla meskid a ulekrael el dousbech. Ngmekera dochotii el kmo kede oba omereng el saul el kirel aike el bla leruul el kired? A Osisechakl 3:​5, 6 (NW) a kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum.” Sel doruul el uaisei e “ngmo meklemeltii a [roled],” el belkul a kmo ngmo ngosukid el choridid er a betok el mondai e oldeu a rengud er a deurreng el klengar. Kede mera el oba omereng el saul el Jehovah mla msa derta er kid a ulekrael el lousbech!—Psa. 32:8.

JEHOVAH OMESKID AIKE EL DOUSBECH

7. Ngera bebil er a rolel e a Jehovah omeskid aike el dousbech? (Filipi 4:19)

⁷ Monguiu er a Filipi 4:19. A Jehovah diak di lomekrael er kid ngdirrek el lomekngeltengat er kid sel demeringel loureor me ngmo sebechel ngar ngii a keled, biled, me a blid. (Mt. 6:33; 2 Th. 3:12) Alta ng normal a bo debekikl el kirel aike el dousbech er a bedenged, me nguaisei a Jehovah a diak el soal a desal kuk kmal mo imis el suebek a rengud el kirel. (Momes er a study note el kirel a Mateus 6:25.) E ngerang? E le Demad a kmal diak bo lechititerir a reblak a rengrir el mesiungel. (Mt. 6:8; Heb. 13:​5, BT) Ngkmal sebeched el loumerang er ngii sel ledu el kmo ngmo meskid aike el dousbech.

8. Ngera ngmirruul a Jehovah el kirel a David?

⁸ Molatk er a rolel e a Jehovah ngilsuir a David. Ngar aike el meringel el rak er a klengar er a David er a lechiis er a King Saul, e a Jehovah ulemsang aike el lousbech el mo melemolem el ngar ngii me a rechedal. A David a millatk er a ulekerreuil a Jehovah er aikakid el taem e dilu el kmo: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.” (Psa. 37:25) Ngdi ua David, kau me ke dirrek el ulterekokl el mla mesa rolel e a Jehovah milsterir a reblak a rengrir el mesiungel aike el lousbech.

9. Ngmekera Jehovah e omesterir a rechedal aike el lousbech sel lengar ngii a tellemall er a beluu? (Dirrek el momes a siasing.)

⁹ A Jehovah dirrek lomesterir a rechedal aike el lousbech sel leduubech a tellemall er a beluu. El ua tiang, sera lebo er ngii a bosech er a kall er a taem er a rekot el Kristiano, e a rudam me a rudos er a kakerous el beluu a uldurokl a ngeso el mora rekldemir er a klemerang lousbech a ngeso. (Rel. 11:​27-30; Rom 15:​25, 26) A rechedal a Dios er chelecha el taem me te dirrek loba osisiu el blekeruraurreng. Sel leduubech a tellemall e a Jehovah odbecheterir a rechedal el mo provide el mora rudam me a rudos er aika el beluu aike el lousbech el ua kall, ralm, bail, me a kar. E a team er a construction a meruul a meltemall el blai me a Blil a Ongdibel. Me a rechedal a Jehovah dirrek el kmal di mereched el mesterir tirke el mla oriid a kloklir me a lechub e ngbetik er a rengrir aike el lousbech er a uldesuir me a rengrir me a tekoi er a klereng.c

10-11. Ngera ke suub er a experience er a Borys?

¹⁰ A Jehovah dirrek el kmal bekururau el mo er tirke el dirkak el bo losiou er ngii. Ngdi osisiu, e kede osiik a techall el meruul a ungil el mo er tirke el diak losiou er a Jehovah. (Gal. 6:10) Tia blechoel el mo uchul a ungil sioning. Molatk er a Borys el principal er a skuul el kiei er a Ukraine. Alta Borys a diak el Sioning er a Jehovah, ngmle blechoel lungil omerellel el mora rengalek er a skuul el Sioning e mle respect a klaumerang er tir. Sera lolilt el chemiis er a mekemad el mora kuk ta er a basio er a belual el safe e a rudam me a rudos er kid a ngilsuir. A uriul e ngmlora Chedaol Belsoil er a kodellel a Kristus. Ngmelatk aike el rokui el leriruul a rudam el kirel e kmo: “A Resioning a kmal mle ungil omerellir el mei er ngak e ulemekerreu er ngak. Ak kmal loba omereng el saul el kirir a Resioning er a Jehovah.”

¹¹ Kid me ngdirrek el sebeched el loukerebai er a chubechub el Demad loeak sel dolecholt er a bltikerreng el mo er tirke el lousbech a ngeso, a le mesiungel a Jehovah me a lak. (Lk. 6:​31, 36) Ngomeltked el kmo a bltikerreng el dolecholt er ngii el mora rechad a mo odbecheterir el mo disaiplo er a Kristus. (1 Pe. 2:12) Engdi a lolilt el mo mesiou er a Jehovah me a lak, me kid a mo chormii a lmuut el klou deurreng sel dorous el mora rebebil.—Rel. 20:35.

JEHOVAH PROTECT ER KID

12. Ngera el protection a letibir a Jehovah el mora rechedal? (Psalm 91:​1, 2, 14)

¹² Monguiu er a Psalm 91:​1, 2, 14. A Jehovah tibir er chelecha el taem el mo protect er kid er a tekoi er a klereng. Ngkmal diak bo lebecherei a Satan me le bekidekelii a mera el omengull. (Jn. 17:15) E sel letaut a “kloul ringel” e ngkmal sebechel mo ulterekokl a rengud el kmo a Jehovah mo otutii a telbilel el mo mekerreuid er a tekoi er a klereng e osebelid.—Och. 7:​9, 14, BT.

13. A Jehovah ngmekera le protect er a rederta er kid?

¹³ Ngera el protection a lomesterir a rederta er kid a Jehovah? Ngoeak a Bades e a Jehovah olengeseu er kid el merriter a ungil me a mekngit. (Heb. 5:14) Sel dekiei loltirakl omellach el ngar er a Tekingel a Dios e kede mosebechakl er aike el mo melemall er a bedenged me a tekoi er a klereng er kid. (Psa. 91:4) Me a lmuut kung a Jehovah protect er kid loeak ongdibel. (Isa. 32:​1, 2) Sel bo de iliuekl er a rechad el betik a rengrir er a Jehovah e kiei el oltirakl omellach er ngii, e kede ngmai omelisiich e meteketek el mo oltngakl a mekngit.—Osi. 13:20.

14. (a) Ngera uchul me a Dios a mechikid me kede mo chelebangel a ringel? (b) Ngera ngolterekokl er a rengud er ngii a Psalm 9:10? (Dirrek el momes er a footnote.)

¹⁴ A Jehovah a ngar ngii aike el taem er a irechar el ble le protect er a rechedal me te dimlak lemekesakl. Engdi ngdimlak el bek el taem el loruul el uaisei. A lebebil e ngduubech a “bkaischemrungel” el tekoi. (Oli. 9:​11, NW) Me a lmuut kung a Jehovah dirrek el mla mechititerir a rechedal me te mo modechelakl e mad lomeketakl el kmo a Satan a bulak. (Job 2:​4-6; Mt. 23:34) Tia dirrek el klemerang el kired er chelecha el taem. Alta Jehovah diak bo lecheroid a ringeled, ngkmal sebechel mo ulterekokl a rengud el kmo ngdiak bo lebechititerir tirke el betik a rengrir er ngii.d—Psa. 9:10.

JEHOVAH MENGELAOD ER KID

15. Kede mekera ngmai ongelaod loeak a nglunguuch, Tekingel a Dios, me a rudam me a rudos? (2 Korinth 1:​3, 4, BT)

¹⁵ Monguiu er a 2 Korinth 1:​3, 4 (BT).e A lebebil e kede mo chobangel a klengiterreng, sebekreng, me a lechub e ng stress. Ke locha chelebangel er a blekeradel er chelechang el rullau el mo feel el kmo ngdi kau el tang. Ngngar ngii a chad el understand er a feeling er kau? A Jehovah medengelii a feeling er kau. Ngdiak di lolechesuar er a ringel el mngar ngii ngdirrek el “mengelaod er kid sel de ngara chelsel a ngiidil ringel.” Ngmekera loruul er tiang? Sel doluluuch louchais er ngii aike el rokui el ngar er a rengud e ngmeskid a “budech er a Dios, el diak el sebechel a chad el mo cherrungel el medengelii.” (Fil. 4:​6, 7) Kede dirrek el metik ongelaod sel donguiu a tekingel el mei er kid er a Biblia. Aika el mlukreng el tekoi er a bltikerreng, llomeserreng, me a omelatk a sebechel rullid el mo ungil a rengud. Me a miting er a ongdibel a dirrek el melisiich er kid loeak rudam me a rudos er kid me a tekoi er omelisiich er a Biblia.

16. Ngera ke suub er a experience er a Nathan me a Priscilla?

¹⁶ Ngsebeched el mesa rolel e a Jehovah omeskid ongelaod me a omelisiich loeak a Tekingel er a experience er a Nathan me a Priscilla el kiei er a Merikel. A tela el rak er uchei e te millukl el mo kiei er a beluu lousbech a ngeso er a ruumerk er a klumech er a Renged. A Nathan a kmo: “Aki uluumerang el kmo a Jehovah mo omekngeltengat er kemam.” Me nguaisei engdi sera lebong e ngmlo er ngii a mondai er a health er tir me a rolel a udoud. Tirka el obekel a mlo kirir el lmuut el mo remei, e dirk mle chelebangel a ringelel a udoud. A Nathan a kmo: “Ak mlo melatk, ngera uchul me a Dios a dimlak lomekngeltengat er kemam el ua ki muluumerang el kmo ngmo rullii. Ak dirrek el mlo melatk el kmo ngak ngngar ngii a mekngit el bla krellii.” Cherengel a taem e a Nathan me a Priscilla a mlo mtebengii el kmo a Dios a dimlak lechititerir. A Nathan a melekoi el kmo: “Chelsel aika el meringel el taem e a Biblia mlo ua teletelel a mellomes a rengul el sechelei lomeskemam omelisiich me a ulekrael. Sera lak kim focus er a ringel el ki mchelebangel er ngii e bai mlo ulturk a osengam er a rolel e a Jehovah ngilsukemam el loutekangel e ngkiltmeklemam el mo outekangel a ringel er a ngar medemam loba klaumerang.”

17. Ngmilekera odos el Helga e ngmai omelisiich? (Dirrek el momes er a siasing.)

¹⁷ A rudam me a rudos er kid a dirrek el sebechir el meskid a lmuut el bebil er a ongelaod. Loeak a ngera el rolel? Molatk er a Helga el kiei er a Hungary. Ngmle betok el rak el loutekangel a kakerous el meringel el mondai el rirellii el mo feel el di stress e ua lak a ultutelel. Engdi sel lolatk aika el taem e ngmle sebechel mesa el kmo a Jehovah milengelaod er ngii lokiu ongdibel. Ngmeluches el kmo: “A Jehovah mle blechoel el lolengeseu er ngak er a bo lak a klisichek a bedengek er a urerek, omekerreu er a smecher el ngelekek, me a lmuut el bebil er a mondai. Ngbek el sils er aika el mereko el 30 el rak e ngultutii a telbilel el kmo ngmo chemolodak. Ngblechoel el melisiich er ngak loeak a ungil e melisiich el tekingir a rebebil. Ak blechoel ngmai a message, card, me a lechub e ngtekoi el chemat er ngak er sel taem el kmal kuluusbech er ngii.”

18. Ngmekera sebeched el mengelaod er a rebebil?

¹⁸ Ngngar ngii a ileakl el techelled el loukerebai er a Jehovah loeak sel dolisiich er a rebebil. Ngmekera doruul er tiang? Ngsebeched loba kllourreng el lorrenges er tir, mengedecheduch el mengelaod er tir, e olengeseu er tir. (Osi. 3:27) Kede melasem el mengelaod er a rokui el chad luldimukl er tirke el dirkak bo losiou er a Dios. A retonari er kid a lsekum te chuarm er a klengiterreng, ngngar ngii a secherel a bedengir, me a lechub e ngberraod er a uldesuir, e kede oldingel er tir, orrenges er tir, e share el mo er tir a bades er a Biblia el melisiich. Sel doukerebai er a Jehovah el “Dios er a bek longelaod,” e kede ngosuterir a rekldemed er a klemerang loutekangel a ringelir e locha dirrek el mo domedemek a rengrir a rediak loumerang el mo sorir el mei er a bliochel el omengull.—Mt. 5:16.

A JEHOVAH BLECHOEL EL NGAR NGII EL KIRED

19. Ngera ngmeruul a Jehovah el kired, e mekera sebeched el loukerebai er ngii?

¹⁹ A Jehovah kmal omekerreu el kirir tirke el rokui el betik a rengrir er ngii. Ngdiak lechitid sel dechuarm. Ngdi ua betik a rengul el chedam me a lechub e ngchedil lomekerreu er a ngelekel, a Jehovah omekerreu er a reblak a rengrir el mesiungel. Ngomekrael er kid, omeskid aike el dousbech, protect er kid, e mengelaod er kid. Kede oukerebai er a Demad el ngar er a eanged sel dolengeseu e dolisiich er a rebebil er a temel a ringelir. Alta kede mo chobangel a ringel me a klengiterreng, engdi ngkmal sebechel mechelaod a rengud el kmo a Jehovah obengked. Ngmla tibir el mei er kid el kmo: “Lak medakt e ak ubengkem.” (Isa. 41:10) Tia kmal olterekokl er a rengud! Ngkmal diak di lekid el tang.