Molecholt er a Respect el Mora Rebebil

1. Ngera uchul me a rechad a kmal sorir a dolecholt a respect el mo er tir? (Osisechakl 22:​1, NW)

KAU, ngsoam sel lolecholt er a respect el mo er kau? Ngulterekokl el uaisei. A respect a tekoi el lousbech er ngii a rokui el chad. Kede meloseb sel le respect er kid a rechad. Sei a uchul me a Biblia a melekoi el kmo “sel longull er kid a rechad e ngkuk ungil er a silber me a kolt”!—Monguiu er a Osisechakl 22:​1, NW.a

2-3. Ngera uchul me ngmo meringel er kid a lebebil lolecholt er a respect, e techa kired el lolecholt er a respect el mo er tir?

² A lebebil e ngmo meringel er kid olecholt er a respect el mora rebebil. A ta er a uchul me ngmo meringel, a kid el omes a chelitecheterir. Kede dirrek el kiei er a taem el rechad el iliuekl er kid a kmal diak a respect er tir. Engdi kid a kired el ngodech. E ngerang? E le Jehovah soal a dongull me a lechub e kede olecholt er a respect el mora “rokui el chad.”—1 Pe. 2:17.

³ Ngar tia el suobel e kede mesaod er a belkul a dolecholt er a respect el mora rechad me a rolel e ngsebeched lolecholt er ngii el mora (1) rechedal a telungalek er kid, (2) rekldemed er a klemerang, me (3) tirke el ngar er a ikrel a ongdibel. Kede dirrek el mo mesaod er a rolel e ngsebeched lolecholt er a respect er a chelsel a kmal meringel el blekeradel.

NGERA BELKUL A DE RESPECT ER A REBEBIL?

4. Ngera belkul a de respect er a rebebil?

⁴ Ngmekera omoliuid er a tekoi el respect? A respect a melutk el kirel a uldesued me a omerelled el bedul a chad. Sel desa el kmo a chad a ungil a blekerdelel, mla kutmokl a meklou el tekoi, me a lechub e ngngar ngii a deruchellel e kede ochotii a respect el ngar er a omerelled el mo er ngii. E kmal klou a ultutelel a doruul er tiang el mera el ngar er a rengud.—Mt. 15:8.

5. Ngera sebechel ngosukid el mo olecholt er a respect el mora rebebil?

⁵ A Jehovah soal a de respect er a rebebil. El ua tiang, ngdmu er kid el mo respect er a “re merreder er a beluu.” (Rom 13:​1, 7) Engdi a rebebil a locha mo dmu el kmo, “Ak di kongei el respect er tirke el earn er a respect er ngak.” Tiang, ngmelemalt el uldasu? Kid a remesiungel a Jehovah a medengei el kmo a respect er kid el mora rechad a diak lultuil er a omerellir. Ngbai lmuut el dmolech a uchetemel, el ngii a bltkil a rengud el mora Jehovah me a urunguled el mo odeuir a rengul.—Jos. 4:14; 1 Pe. 3:​15, 16a.

6. Ngsebeched lolecholt er a respect el mora chad el diak el respect er kid? Mosaod. (Dirrek el momes er a siasing.)

⁶ A rebebil a locha melatk, ‘Ngmera el sebechek el respect er a chad el diak el respect er ngak?’ Chochoi. Ka molatk a bebil el example. A King Saul a ulemekrur er a ngelekel er a Jonathan er a mederir a rechad. (1 Sa. 20:​30-34) Me nguaisei engdi a Jonathan a milengull er a demal e millemolem el loumekemad lobengkel el mo lmuut er sel sils er a lemad a Saul. (Exo. 20:12; 2 Sa. 1:23) A Ngarbab el Prist Eli uleltelechakl er a Hana el kmo ngcheltelaol. (1 Sa. 1:​12-14) Me nguaisei engdi Hana millemolem lolecholt er a omengull er a longedecheduch er ngii, alta rokui el chad a mle medengei el kmo a Eli a dimlak lomesmechokl er a rengelekel el mlo mekngit alta ngmle demerir e ngarbab el prist. (1 Sa. 1:​15-18; 2:​22-24) A rebebil el chad er a Athens a millekoi a kmal mekngit el kirel a Paulus e millekoi er ngii el kmo ng “cherodech.” (Rel. 17:​18, BT) Me nguaisei engdi a Paulus a millemolem lolecholt omengull er a longedecheduch er tir. (Rel. 17:22) Aika ochotii el kmo, sel le dmolech a bltkil a rengud el mora Jehovah e demedakt el tomellii a rengul e ngmo rullid el mo olecholt er a omengull el mora rebebil, er a diak di sel lebeot el taem ngdirrek el chelsel a meringel e taem. Ka me dosaod er tirke el rredemelel a nguu a respect er kid me a uchul te rredemelel a nguu omengull er kid.

MOLECHOLT ER A RESPECT EL MORA RECHEDAL A TELUNGALEK ER KAU

7. Ngera sebechel rullii el mo meringel er kid olecholt omengull el mora rechedal a telungalek er kid?

⁷ Omelsemai. Kid a mengoit er a klou el taem lobengkel a telungalek er kid. Sei a uchul me kede medengei a klungiolir me a chelitecheterir. A rebebil er tir a locha ngar ngii a secherir el ngii a rullii el mo meringel er kid a omekerreu er tir me a lechub e te smecher el kmal di ngerang ngmo suebek a rengrir. A rekuk bebil a locha mo dmung me a lechub e te remuul a tekoi el tomellii a rengud. Kid a kired el ungil a rengud e beot er kid obengterir a rechedal a telungalek er kid. Engdi sel lak omengull er a delongelir a tang me a tang e ngsebechel mukdubech a ngasecherreng. Seikid a uchul me ngmo diak a kltarreng er a telungalek. Ngdi ua chad el smecher er a arthritis el bedengel a diak el sebechel lungil loureor el dmak lobengkel aike el bebil er a parts er a bedengel, me ngdi osisiu, sel lak omengull er a chelsel a telungalek e ngmo diak el sebechir el dmak lungil loureor. Me alta ngdiak el sebeched el di kid el mekerur a arthritis, me nguaisei engdi a telungalek a sebechir el suubii el mo obang omengull e olecholt er ngii er a chelsel a telungalek.

8. Ngera uchul me ngklou a ultutelel a dolecholt er a respect el mora rechedal a telungalek er kid? (1 Timothy 5:​4, 8, NW)

⁸ Ngera uchul me ngkired lolecholt er a respect? (Monguiu er a 1 Timothy 5:​4, 8, NW.b) Ngar er a kot el babilengel a Paulus el mora Timothy e ngmilsaod er a rolel e a rechedal a telungalek a kaukerreu er aike el lousbech. Ngsilodii el kmo ngdiak dongull er a rechedal a telungalek le ngii el kired ngbai e le ng “omengull el mora Dios.” Tia belkul a kmo kede meruul er ngii e le ngbetik a rengud er a Jehovah e omes er tiang el telengtengil omengull er kid. Me sel dolecholt er a respect el mora rechedal a telungalek er kid e a mera er ngii kede respect er a Jehovah el ngike el kiltmeklii a telungalek. (Efe. 3:​14, 15) Tia kmal klou a ultutelel el uchul me kede olecholt er a respect el mora rechedal a telungalek er kid!

9. Ngmekera sebechel a bechiil el sechal me a bechiil el redil el mo kaiuecholt er a respect? (Dirrek el momes a siasing.)

⁹ Rolel e kede ochotii a respect. A bechiil el sechal el respect er a bechil ochotii el kmo ngmekreos er a rengul sel ledi el tir el terung me sel leteloi er a rechad. (Osi. 31:28; 1 Pe. 3:7) Ngkmal diak lebo er ngii chimal er a bechil, lomekrur er ngii, me a lechub e lerellii el mo omdasu el kmo ngdiak a ultutelel. A Arielc el bechiil el sechal el kiei er a Argentina a kmo: “Secherel a bechik a uchul me ngngar ngii a bebil er a taem e ngmo dmu tekoi el temellii a renguk. Sel loruul er tiang e ngdi ngak el mengedecheduch er ngak el kmo tia diak lemera el uldesuel. Ak mo melatk er a 1 Korinth 13:​5, e tia ngosukak el mo olecholt er a respect sel kungedecheduch er ngii e diak kungedecheduch el kesib a renguk.” (Osi. 19:11) A bechiil el redil el respect er a bechil a diak bo lolekoi a mekngit el kirel el mora rebebil. (Efe. 5:33) Ngdiak lolekoi a kngtil me a lechub loungelakel el melekoi a mekngit el kirel, me a diak lomekedong er ngii er a diak lungil el tekoi. Ngmedengei el kmo a bo loruul aikang e ngmo tomellii a chebechiielel. (Osi. 14:1) A ta el odos er a Italy el bechil a ngar ngii a secherel a uldesuel el di ngerang ngmo suebek a rengul a kmo: “Ngar ngii a taem e ak mo feel el kmo aike el suebek a rengul a bechik er ngii a kmal diak el meklou el tekoi. A ngar er a mong e a medak me a tekingek a ochotii el kmo ngdiak respect er ngii. Engdi ak mla metik el kmo sel di kubengterir a rechad el olecholt omengull sel losaod el kirir a rebebil e ngodbechak el mo olecholt er a omengull el mora bechik.”

10. Ngmekera rengalek e sebechir lochotii a respect el mora rechad er a blirir?

¹⁰ Rengalek, molengesenges a rules el bla leruul el kirem a rechad er a blim. (Efe. 6:​1-3) Sel mongedecheduch er a rechad er a blim e mochotii a respect. (Exo. 21:17) Sel lorael mo meklou el chad a rechad er a blim e te ulterekokl el mo ousbech a lmuut el klou el ngeso er kau. Bora tkurrebab el klisichem el omekerreu er tir. Molatk er a kerebil a María el demal a diak el Sioning er a Jehovah. A demal er a bo lsecher e ngrirellii el kmal mo meringel er a María omekerreu er ngii. Ngkmo: “Ak milluluuch lolengit me a Jehovah lengesukak el diak di bo kungull er a demak ngdirrek el mo sebechek lochotii a respect el mo er ngii. Ak mlo melatk el kmo, a lsekum a Jehovah olengit er ngak el mo mengull er a rechad er a blik e ngulterekokl el sebechel smisichak el mo rullii. Cherengel a taem e ak mlo mtebengii el kmo, ngkirek el lochotii a respect el mora demak mo lmuut me a lak lemengodech a blekerdelel.” Sel bo de respect er a rechedal a telungalek er kid mo lmuut me a lemeringel er kid, e kede ochotii el kmo kede respect er a Jehovah el ngike el kiltmeklii a telungalek.

MOLECHOLT ER A RESPECT EL MORA REKLDEMEM ER A KLEMERANG

11. Ngera uchul me nglocha mo meringel er kid a melemolem el respect er a rekldemed er a klemerang?

¹¹ Omelsemai. A rekldemed er a klemerang a mora tkurrebab el sebechir el kiei loltirakl aike el lolisechakl a Biblia engdi a lebebil er a taem e ngmo diak lungil omerellir el mei er kid, oukerrekeriil er kid, me a lechub e te irritate er kid. A lsekum a kldemed er a klemerang a mo uchul a ‘klaotutakl ra delongeled’ e nglocha mo meringel er kid a melemolem el respect er ngii. (Kol. 3:​13, BT) Ngera sebechel ngosukid el mo melemolem lolecholt er a respect?

12. Ngera uchul me ngklou a ultutelel el dolecholt er a respect el mora rekldemed er a klemerang? (2 Petrus 2:​10, 11, NW)

¹² Ngera uchul me ngkired lolecholt er a respect? (Monguiu er a 2 Petrus 2:​10, 11, NW.d) Ngar er a ongeru el babilengel a Petrus e ngmesaod el kmo a rebebil er a taem er a rekot el Kristiano a mlengedecheduch el diak el respect er “tirke el ngar ngii a klebkellir,” el tiang a melutk er a remechuodel er a ongdibel. Te milekerang a rechanghel el ulemes e ulerrenges er tirka el chad? “Te mengull er a Jehovah” me te dimlak a ta el lolekoi a mekngit el kirir tirka el chad. Ka di molatk er tiang! A rechanghel el mecherrungel a dimlak a ta el bo lolekoi a mekngit el kirir tirka el mekedidai a rengrir el chad. Te bai milecherei er a chimal a Jehovah me ngngii a mo oukerrekeriil e mesmechokl er tir. (Rom 14:​10-12; momekesiu er a Jude 9.) Ngkmal sebeched el ngmai a klubeled er a rechanghel. A lsekum kede olecholt omengull el mora rumtok er kid e nglmuut el kmal kired el mo olecholt er a respect el mora rekldemed er a klemerang. Ngkired el mo ‘kaidesachel’ el kakull. (Rom 12:​10, BT) Sel doruul el uaisei e kede ochotii el kmo kede respect er a Jehovah.

13-14. Ngmekera sebeched el lochotii a respect el mo er tirke el ngar er a ongdibel? Mouchais a example. (Dirrek el momes a siasing.)

¹³ Rolel e kede ochotii a respect. Remechuodel, sel molisechakl e moruul er ngii el ngar er a rolel a bltikerreng. (Flm. 8, 9) A lsekum ngmo kiriu el mesmechokl er a chad, e moruul er ngii el ngar er a ungil el rolel e diak el sel taem el seselk a rengmiu. Rudos, ngkmal sebechiu el ngosuterir a rengar er a ongdibel el mo kaiuecholt a omengull loeak sel lak moutulechoid el mesaod a mekngit el kirir a rechad me a lechub e moltuub er tir. (Tit. 2:​3-5) E kid el rokui a sebeched el lochotii el kmo kede respect er a remechuodel loeak sel de cooperate lobengterir e doreng a sulir el kirel a meringel el urerir el oltobed a miting er a ongdibel, omekrael er a ureor er a berkel a klumech, e olengeseu er tirke el ‘mla touchakl.’—Gal. 6:​1, NW; 1 Ti. 5:17.

¹⁴ A odos el Rocío a mle meringel er ngii a respect er a ta er a remechuodel el milsang a advice. Ngmelekoi el kmo: “Ngdimlak el soak e le kmle feel el kmo ngdimlak el lungil a rolel a lulengedecheduch er ngak. Ak mle blechoel el di melekoi a mekngit el kirel sel kngar er a blimam. E a lta kmillasem el diak kulecholt er ngii, me nguaisei ak mle feel el kmo ngdimlak lungil a moktek er ngii me ngdimlak kurrenges a advice er ngii.” Ngera ngilsuir a Rocío? Ngdmu el kmo: “Ngar er a omengiuek er a Biblia e ak chiliuii a 1 Thesalonika 5:​12, 13 (NW). Sera bo kutebengii el kmo ngak a diak kulecholt er a respect el mora odam er ngak e ngdi mlo mengesang er a ukltkek. Ak milluluuch el mora Jehovah e mirruul a research lousbech aika el babilenged losiik a ileakl el tekoi el sebechel ngosukak el adjust er a uldesuek. Tia ngilsukak el mo mesa el kmo a odam a diak el mondai ngbai kmal ngarbab a renguk. Ak mlo mesa el kmo a bok respect er a rebebil e ngkirel mo ngariou a renguk. Ak medengei el kmo ngdirk kirek el improve engdi sel kuureor er ngii e ak mo feel el kmo ngbudech a deleuill er ngak me a Jehovah.”

MOLECHOLT ER A RESPECT EL MO ER TIRKE EL NGAR ER A IKREL A ONGDIBEL

15. Ngera uchul me nglocha mo meringel er kid olecholt omengull el mo er tirke el ngar er a ikrel a ongdibel?

¹⁵ Omelsemai. Sel domerk er a klumech e kede blechoel el mo metik er a rechad el diak lomekerreu el kirel a Dios me a Biblia. (Efe. 4:18) Tekoi el lemlosisechakl el mo oumerang er a lengalek a uchul me a rebebil a kmal diak el kengei lorrenges er a klumech el dobang. A rebebil er a rechad el doureor me a lechub kede mora skuul lobengterir a mekngit omerellir me a boss er kid me a lechub ng teacher er kid a locha diak el soal a ureor el doruul er ngii. Cherengel a taem e ngsebechel mo diak a respect er kid el mo er tir e diak lungil omerelled el mo er tir.

16. Ngera uchul me ngklou a ultutelel a dolecholt omengull el mo er tirke el dirkak bo losiou er a Jehovah? (1 Petrus 2:12; 3:​15, 16a)

¹⁶ Ngera uchul me ngkired lolecholt er a respect? Lak mobes el kmo a Jehovah omes omerelled el mo er tirke el diak losiou er ngii. A apostol Petrus a dilu er a Rekristiano el kmo a ungil omerellir a sebechel odbecheterir a rebebil el mo “oldanges er a Dios.” Tiakid a uchul me ngmilengelechel er tir el mo mesaod er a klaumerang er tir el “oba delemedemekerreng ma omengull.” (Monguiu er a 1 Petrus 2:12; 3:​15, 16a.) A Rekristiano a ble le kirir el mesaod er a klaumerang er tir er medal a kerrekeriil me a lechub e losebechakl er a klaumerang er tir el mora rengar bita er tir, me tir a mle kirir el blechoel el lolecholt er omengull el ua lengar medal a Dios. A Jehovah omes e orrenges aike el dolekoi me a rolel a dongedecheduch. Ngkmal klou a ultutelel luchul me kede olecholt a respect el mo er tirke el ngar er a ikrel a ongdibel!

17. Ngmekera sebeched lochotii omengull el mo er tirke el ngar er a ikrel a ongdibel?

¹⁷ Rolel e kede ochotii a respect. Sel domerk er a klumech e ngkmal diak el soad el rulleterir a rechad el mo feel el kmo kede lmuut el mellomes er tir e le ngdiak a kmal klemedengei er tir er a Biblia. Ngbai soad lomes er tir el mekreos er a Dios e lmuut el ngarbab er kid. (Hag. 2:​7, NW; Fil. 2:​3, BT) A lsekum a rechad a mo dmung a diak lungil tekoi er kau el klaumerang er kau a uchul e lak bo mekngit er tir. El ua tiang, ngkmal diak el soad el mo melekoi a tekoi el ngii a rullid el kmal mo kora smart e rulleterir el mo feel el kmo te mekebelung. (1 Pe. 2:23) A lsekum ke dulii a tekoi el mouchela er a rengum er ngii e di mereched el lolengit a klausubes. Ngmekera sebechem lochotii a respect el mo er tirke el moureor el lobengterir? Bo mungil chad er a ureor e molasem lomes a klungiolir tirke el moureor lobengterir me a dirrek el merredelem. (Tit. 2:​9, 10) Sel bom honest e mchad er a ureor e alta ngdiak mblechoel el mo remuul a rengrir a rechad engdi ke mo rullii a rengul a Dios.—Kol. 3:​22, 23.

18. Ngera uchul me ngungil a bo dobang a respect e dolecholt er ngii el mora rebebil?

¹⁸ Ngkmal betok a ungil luchul me ngkired el mo oba respect e mo olecholt er ngii el mora rebebil! Kede mla mesa el kmo sel dolecholt er a respect el mora telungalek er kid e kede kullii a Jehovah el Bdelul a telungalek er kid. Ngdi osisiu sel dolecholt er a respect el mora rekldemed er a klemerang e kede kullii a Demad el ngar er a eanged. E sel dolecholt er a respect el mo er tirke el ngar er a ikrel ongdibel e kede rullii el mo beot er tir er a ta er a klebesei el mo mengebkall er a ngarbab el Dios er kid. Mo lmuut me a lak lochotii a respect el mei er kid a rebebil me ngkmal dirk klou a ultutelel a dolecholt er a omengull el mo er tir. E ngerang? E le Jehovah mo omekngeltengat er kid. Ngtibir el kmo: “Ngak a . . . mo mengull er a re mengull er ngak.”—1 Sa. 2:30.