Ngungil Kired a Bo Dekeed er a Tang me a Tang!

1-2. Ngera ta er a tekoi el kmal klou a ultutelel er a Jehovah, e ngera soal a doruul er ngii?

A OMERELLED el mora rechad a kmal klou a ultutelel er a Jehovah. A Jesus a ullisechakl el kmo ngkired el mo betik a rengud er a rengar bita er kid el ua lebetik a rengud er kid. (Mt. 22:​37-39) Tia dirrek el melutk el kirir a rediak losiou er a Jehovah. Sel dolecholt er tia el ungilreng e kede oukerebai er a Jehovah el Dios el ngii a “meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.”—Mt. 5:45.

² Me alta Jehovah betik a rengul er a rokui el chad ngtokubets el betik a rengul er tirke el olengesenges er ngii. (Jn. 14:21) Ngsoal a doukerebai er ngii. Me ngmelisiich er kid el mo “mekeald a klaubltikerreng” er kid el mora rudam me a rudos er kid e mo ‘ungil kaubltikerreng.’ (1 Pe. 4:​8, BT; Rom 12:10) Sel domdasu er a olecholt er chouaitia el bltikerreng el mora chad e kede locha mo melatk er a bltikerreng el dobang el mora betik er a rengud el chedad me a lechub ngsechelid el de kmal close er ngii.

3. Ngera diak el kired el lobes er ngii el kirel a bltikerreng?

³ A bltikerreng a di ua dellomel el kired lomekerreu er ngii e ngmukeroul. A apostol Paulus a dilu er a Rekristiano el kmo: “A bltikerreng er kemiu er a klodam lolemolem.” (Heb. 13:​1, NW) A Jehovah soal a dolemolem lomekeroul er a bltkil a rengud el mora rebebil. Tia el suobel a mo mesaod er a uchul me ngkired el lmuut el mo kmeed er a rekldemed er a klemerang me a rolel e ngsebeched el melemolem el meruul er ngii.

UCHUL ME NGKIRED EL LMUUT EL MO KMEED ER A TANG ME A TANG

4. Ngua losaod er ngii a Psalm 133:​1, ngmekera sebeched el melemolem loba omereng el saul el kirel a kltarreng er a klodam er kid? (Dirrek el momes a siasing.)

⁴ Monguiu er a Psalm 133:1. Kede kongei aike el lulluches a ta er a milluches er a Psalm el dilu el kmo, a klausechelei er kid lobengterir tirke el betik a rengrir er a Jehovah a “meral ungil” e “deurreng.” Me nguaisei, ngdi ua chad el sebechel lobes er a klungel me a klungiolel a kerrekar le ngdi omes er ngii er a bek el sils, kid me ngdirrek el sebeched el lobes er a klebekelel a kltarreng er a klodam er kid. Kede blechoel el lomes er a rudam me a rudos er kid el locha betok el taem er a chelsel a ta el sandei. Ngmekera sebeched el melemolem el appreciate er tir? A bltikerreng er kid el mora rudam me a rudos er kid a sebechel melemolem el mukeroul a lsekum kede mengoit a taem el melatk er a kerresel a derta me a derta er tir el mei er kid me a chelsel a ongdibel.

5. A bltikerreng er a klodam ngera ngsebechel rullii el mora rebebil?

⁵ A rebebil er a reketengir el mei er a miting a kmal mechas a rengrir er a bltikerreng el dobang er a delongeled. Tiakid el bltikerreng er a delongeled a locha mo oterekokl a rengrir el kmo kede oba klemerang. A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.” (Jn. 13:35) Molatk er a experience er a Chaithra el ngalek er a skuul er a daingak el milsuub lobengkel a ta er a Sioning er a Jehovah. Ngkilengei el mora convention er a lenguu a invitation. Uriul er sel kot el sils er a convention e ngdilu er ngike el mesuub el lobengkel el kmo: “A rechad er a blik a dirkak a ta el hug er ngak. Engdi ngar er a convention er kemiu e ak ngilai a 52 el hug er a chelsel a di ta el sils! Ak mlo melechesuar a bltikerreng er a Jehovah loeak tia el telungalek er a klereng. Ngkmal soak el mo chedal tia el telungalek.” A Chaithra a millemolem el lolengeriakl e miltecholb er a 2024. Chochoi, a rebeches sel leues a ungil tekoi el doruul, luldimukl er a bltikerreng er a delongeled, e ngodbecheterir el mo mesiou er a Jehovah.—Mt. 5:16.

6. Ngmekera sebechel mekerreuid sel bo dekeed er a rudam me a rudos er kid?

⁶ Sel bo dekeed er a rudam me a rudos er kid e ngdirrek el sebechel mekerreuid. A Paulus a milengelechel er a rekldemel el Kristiano el kmo: “Le bek el sils el mchachelechel, . . . me lak a tar kemiu el mo medecherecher a rengul el oeak a chelebeldil a klengit.” (Heb. 3:13) A lsekum ngmo mechitechut a rengud e mo meringel er kid a melemolem el meruul a llemalt, e a Jehovah sebechel lodbechii a ta er a kldemed er a klemerang el mo meskid a ngeso el dousbech er ngii. (Psa. 73:​2, 17, 23) Tia el omelisiich a kmal lungil el kired.

7. Ngmekera bltikerreng e ulekuak er a kltarreng? (Kolose 3:​13, 14, BT)

⁷ Kede melai a betok el klengeltengat e le kede chedal a delebechel er a rechad el meringel loureor el mo olecholt er a bltikerreng er a delongelir. (1 Jn. 4:11) El ua tiang, a bltikerreng odbechid el mo ‘kaberkakl a chetid rar chad’ e tia ngosukid el melechel er a kltarreng er a delongeled. (Monguiu er a Kolose 3:​13, 14, BT;a Efe. 4:​2-6) Tiakid a uchul me sel dengar er a miting er kid e kede oldeu a rengud er a blekeradel lungil a eltel el diak a ngii di el cheldebechel er tia el beluulechad el mo mekesiur.

MKAKULL

8. Ngmekera Jehovah e ngosukid el mo tang?

⁸ A kltarreng el dobang a mengasireng el tekoi. Tiakid a loruul er ngii a Jehovah alta ngdiak demecherrungel. (1 Ko. 12:​25, BT) A Biblia kmo kede “[mosisechakl] ra Dios el mo kaubltikerreng.” (1 Th. 4:​9, BT) Tia belkul a kmo a Jehovah ousbech a Bades louchais er kid aike el kired el meruul el mo kmeed er a tang me a tang. Ngsebeched el “[mosisechakl] ra Dios” loeak sel dekerekikl el merriter osisecheklel e doltaut. (Heb. 4:12; Jak. 1:25) Tiakid a lebora tkurrebab el klisichir a Resioning er a Jehovah el meruul er ngii.

9. Ngera kede suub er a Rom 12:​9-13 (BT) el kirel a bo dekakull?

⁹ Ngmekera Tekingel a Dios e olisechakl er kid el mo kmeed er a tang me a tang? Molatk aike el ledilu Paulus el kirel tiang, el ngar er a Rom 12:​9-13 (BT).b (Monguiu.) Mutebengii el kmo a Paulus a dilu el kmo “bo mkaidesachel el kakull.” Tia ngngera belkul? Ngsoad el kid a mo kot el ‘ungil loubltikerreng’ el mora rebebil loeak sel dekengei lousubes, domtechakl er a rechad, bo debekururau, me a lmuut el bebil. (Efe. 4:32) Ngdiak el kired el mengiil er a rudam me a rudos el mo kot el olekeed er kid. Ngbai soad el ‘mengaidesachel’ el mo rullii. A Jesus a dilu el kmo: “Ng bai klou el deurreng a dorous er a dolai.”—Rel. 20:35.

10. Ngmekera sebeched el mo blak a rengud el “kakull”? (Dirrek el momes er a siasing.)

¹⁰ Ngutebengall el kmo a uriul er a ledu Paulus el kmo bo mkaidesachel el kakull e ngkmo, “bo le blak a rengmiu el diak bo mesaik.” A chad el blak a rengul a chad er a ureor e meringel loureor. Sel lenguu a ngerachel e ngkerekikl el meruul er ngii. A Osisechakl 3:​27, 28 (NW) a melisiich er kid el kmo: “Lak morreked a ungil er tirke el ungil obesterir a lsekum e ngngar ngii a klisichem el ngosuir.” Me sel desa chad el lousbech a ngeso e kede mereched el mo remuul aike el sebeched el ngosuir. Ngdiak domekmeoud me a lechub e bo domdasu el kmo, ngngar ngii a chad el mo kutmeklii.—1 Jn. 3:​17, 18.

11. Ngera sebechel ngosukid el mo kmeed er a tang me a tang?

¹¹ A lmuut el ta er a rolel e ngsebeched lochotii omengull el mora rebebil a oeak sel demereched el lousubes er tir sel letemellii a rengud. A Efesus 4:26 a kmo: “Lak di le kesib a rengmiu el ongeltii a sils.” E ngerang? A 27 el kekerei el bades a kmo sel doruul el uaisei e kede “[msa] techall a Diabelong.” A Jehovah betok el taem el louchais er kid el ngar er a Tekingel el kmo bo dekausubes. A Kolose 3:13 a melisiich er kid el kmo ‘bo dekausubes.’ A ta er a kot lungil rolel e kede mo kmeed er a rebebil a sel dousubes a cheleuid el omerellir. Sel dousubes er tir e kede olengeseu el “[omtebechel] er a kltarreng el loliukes er ngii a Chedaol Reng el okiu a budech el merenged el oldak er [kid].” (Efe. 4:3) Ngbleketakl el kmo sel dousubes er a rebebil e kede melechel er a kltarreng me a budech er a delongeled.

12. Ngmekera Jehovah e ngosukid el mo ousubes?

¹² Me nguaisei, nglocha meringel er kid ousubes er tirke el mla tomellii a rengud. Engdi ngsebeched el rullii tiang loeak a ngelsuil a chedaol reng er a Jehovah. Uriul er a lolisiich er kid a Bades el mo ‘ungil el kaubltikerreng’ e ‘mo blak a rengud’ e ngmelisiich er kid el kmo: “Bo mkard ra klereng.” A chad el “kmard” a mui er a blakerreng me a klemeriarreng el chedaol reng a uchul. Me a chedaol reng er a Dios a sebechel ngosukid el mo blak a rengud e semeriar loubltikerreng e ousubes er a rebebil. Sei a uchul me kede kmal meluluuch lolengit er a ngelsuil a Jehovah.—Lk. 11:13.

NG “DIAK EL KIREL NGAR NGII OMELEKIAKL ER A DELONGELIU”

13. Ngera sebechel mo uchul a klekakeakl er a delongeled?

¹³ A ongdibel a rruul er a bek bedengir a rechad el kakerous a ulekurulir me a siukang er tir. (1 Ti. 2:​3, 4) Tiaikid a uchul me ngkakerous omelilt er kid er a rolel a doubail e dongetmokl er kid, domekerreu er a health er kid, me a tekoi er ongelaod el soad. A lsekum ngdiak dekerekikl e a klekakerous er a delongeled a sebechel mo uchul e kede mo kakeakl. (Rom 14:4; 1 Ko. 1:​10, NW) Engdi kid el mla “[mosisechakl] ra Dios el mo kaubltikerreng” a uchul me kede kerekikl me ngdiak bo dolisiich el kmo omelilt er kid a lmuut el lungil er a rebebil.—Fil. 2:3.

14. Ngera kired el mora tkurrebab el sebeched el meruul er ngii, e ngerang?

¹⁴ Ngdirrek el sebeched el tomall aike el mo uchul a klekakeakl er a delongeled loeak sel debora tkurrebab el sebeched er a bek el taem el mo omekbeches e melisiich a reng. (1 Th. 5:​11, BT) Te betok el mle inactive me a lechub e te milsuld a ngklir a mla lmuut el mei er a ongdibel. Me kede kmal outkeu er tir! (2 Ko. 2:8) Mutebengii a dilubech er a lluut el mei er a ongdibel a odos el mle inactive el teruich el rak. Ngkmo: “A rokui el chad a mle smile e urrekedii a chimak.” (Rel. 3:​19, BT) Ngera ngrirellii el mo er ngii aika el ungil lomerellir? Ngkmo, “Tia rirellak el mo feel el kmo a Jehovah ulemekrael er ngak el lmuut el mo metik er a deurreng.” Sel dolisiich er a rokui el chad e ngsebechel a Kristus lousbech er kid el mo omekbeches a rengrir tirke el “chorma er oberaod el chelungel.”—Mt. 11:​28, 29.

15. Ngera ta er a rolel e ngsebeched el melisiich er a kltarreng? (Dirrek el momes er a siasing.)

¹⁵ A lmuut el ta er a rolel e ngsebeched el melisiich er a kltarreng a oeak cheldechedechad. A Job 12:11 (NW) a kmo: “A ding ngdiak longarm a tekoi el ua churad a longarm a kall?” Ngdi ua chad el meruul a kall el mengarm er a kall er a uchei er a le serve er ngii el mora rechad, me kid me ngungil dekerekikl el melatk a tekinged er a uchei er a dongedecheduch. (Psa. 141:3) Ngkmal soad loterekeklii el kmo a tekoi el bo dolekoi a meleketek, melisiich, e “klungiaol el morar chad el orrenges.”—Efe. 4:​29, BT.

16. Ngtecha tokubets el kirel el melisiich a tekoi el lolekoi?

¹⁶ A rebechiil el sechal me a ruungalek a tokubets el kirir el kerekikl me a rolel a longedecheduch a melisiich. (Kol. 3:​19, 21, BT; Tit. 2:4) A remechuodel me ngdirrek el kirel a tekoi el lolekoi el mo uchul omelisiich me a ongelaod el mora resib er a Jehovah. (Isa. 32:​1, 2; Gal. 6:1) A Biblia kmo: “[Ng] kmal ungil a tekoi el medung er a melemalt el taem!”—Osi. 15:​23, NW.

“DOBA CHOMERUUL MA KLEMERANG EL KAUBLTIKERRENG”

17. Ngmekera doterekeklii el kmo a bltkil a rengud el mora rudam me a rudos a mera el ngar er a rengud?

¹⁷ A apostol Johanes a melisiich er kid me “lak di doba chomelekoi ma berdel a ngor loubltikerreng, e bai doba chomeruul ma klemerang el kaubltikerreng.” (1 Jn. 3:​18, BT) Ngsoad a bltkil a rengud el mora rudam me a rudos a bo lemera el ngar er a rengud el me tuobed. Ngmekera sebeched el meruul er tiang? A lsekum nglmuut el mo klou a taem el dongoit lobengterir a rudam me a rudos er kid e kede lmuut el kmal mo kmeed er tir me a bltikerreng er a delongeled me nglmuut el mo mesisiich. Me moruul a techall el mo mengoit a taem lobengterir er a temel a miting me a odingel. Mongoit a taem el loldingel er tir. Sel doruul el uaisei e kede ochotii el kmo kede mla “[mosisechakl] ra Dios el mo kaubltikerreng.” (1 Th. 4:​9, BT) Kede dirrek el mo melemolem el experience er a rolel e “ng meral ungil, e deurreng sel le dak el kiei a rudam el ta rengrir!”—Psa. 133:1.