Ngungil el Kired a “Dekeed er a Dios”!

1-2. (a) Ngera usbechall a lebo er ngii a kmes el deleuill er kid me a chad? (b) Ngera kede mo mesaod er tia el suobel?

KAU, ngngar ngii a kmeed el sechelim? Ke milekera mo sechelil? Kulterekokl el milengoit a taem el lobengkel, mlo medengei omelsemai el blo lechebangel, e mlo medengei a soal me a chetil. Ke miles a ungil el blekerdelel el soam el dirrek el mo olab. Ngmlo betik a rengum er ngika el sechelim.

² A lebo er ngii a kmes el deleuill er kid me a chad e ngousbech a taem me a effort. Ngkmal di osisiu el kirel a lebo er ngii a kmes el deleuill er kid me a Jehovah el Dios. Tia el suobel a mo mesaod er a rolel e ngsebeched el mo kmeed er a Dios me a klungiolel a doruul el uaisei. A kot, e molatk er a uchul me ngungil a bo dekeed er a best Friend er kid el Jehovah.

3. Ngera uchul me ngungil a dolebedebek er a klungiolel sel bo dekeed er a Jehovah? Momekesiu.

³ Ke ulterekokl el kongei el kmo ngungil a bo dekeed er a Jehovah. Engdi sel dolebedebek el kmo ngmera el uangerang lungil a bo dekeed er ngii e ngsebechel lodbechid el mo melemolem lolekeed er kid er ngii. (Psa. 63:​6-8) El ua tiang, kede medengei el kmo ngungil el kired sel doltirakl er a ungil el diet, deblechoel el exercise, le enough a cheliued, e deblechoel el melim a ralm. Me nguaisei te betok el chad a diak lolatk aikang e diak lomekerreu er a health er tir. Engdi sel bo deblechoel el melatk er a rolel e ngungil el kired e ngmo soad el blechoel el meruul. Ngdi osisiu, kede locha medengei el kmo ngungil el kired sel bo dekeed er a Jehovah, engdi sel dolebedebek er a klungiolel a doruul el uaisei e ngsebechel lodbechid el mo melemolem el lolekeed er ngii er ngika el Sechelid.—Psa. 119:​27-30.

4. Ngera ngdilung a milluches er a Psalm 73:28?

⁴ Monguiu er a Psalm 73:28. A milluches er a Psalm 73 a mle Levait e miltutk el mo ta er a chad er a ongngak er a templo er a Jehovah. Ngika ulterekokl el mla mesiou er a Jehovah loba blakerreng el betok el rak. Engdi ngdirk mle feel el kmo ngkirel di ngii lomeklatk er ngii me a rebebil er a uchul me ngungil el kirel e dirrek lungil el kirir a bo “[lekeed] er a Dios.” Ngera uchul me ngungil a bo dungil medengelii a Jehovah e desisichii a deleuill er kid me ngii?

A BO “DEKEED ER A DIOS” A UCHUL A DEURRENG

5. (a) Ngera uchul me a deluut el mo kmeed er a Jehovah a meskid a deurreng? (b) Ngua lolekoi a Osisechakl 2:​6-16, mouchais a specific el rolel e a llomeserreng er a Jehovah omekerreu er kid e uchul a klungioled.

⁵ Sel deluut el mo kmeed er a Jehovah e nglmuut el mo klou a deuil a rengud. (Psa. 65:​4, NW) Ngbetok a uchul me tia klemerang el tekoi. El ua tiang, sel donguiu aike el louchais er kid a Jehovah er a Biblia e doltirakl, e ngmo mellomes a rengud. Tia el llomeserreng a mo mekerreuid er aike el tekoi el mo tomellid, e ngosukid me ngdiak bo deruul oberaod el cheleuid. (Monguiu er a Osisechakl 2:​6-16.) Tiakid a uchul me a Biblia kmo: “Ngeltengat ngikel chad el mo mellomes a rengul, el ngikel nguu a sekutaberreng.”—Osi. 3:13.

6. Ngera uchul me a milluches er a Psalm 73 a urridii a deurreng er ngii?

⁶ Chochoi mo lmuut er a resechelil a Jehovah me ngngar ngii aike el taem el bo lemekngit a rengrir. Ngike el milluches er a Psalm 73 me ngurridii a deurreng er ngii er a di bo lolatk a negative el uldasu. Ngmlo seselk a rengul er a rechad el dimlak lomekerreu er a Dios me a llechul e mlo mechechei er tir e le ngulemdasu el kmo ngmle beot a klengar er tir. Ngmlo omdasu el kmo a rechad el mekngit a blekerdelir e mekedidai a rengrir a merau, ungil a health er tir, e dimlak lechuarm. (Psa. 73:​3-7, 12) Tia kmal mlo mengesang er ngii me a ta el taem e ngmlo oumededenger er a klungiolel a dosiou er a Jehovah. Ngar er a kngtil a rengul e ngdilu el kmo: “A le ua isei, e ng kol di dimlak a belkul el kulengeroid er ngak er a klengit, ma chimak le klikiid er a klengit?”—Psa. 73:13.

7. A kngtil a rengud sel bo lolasem er a deurreng er kid, e ngngera sebeched el meruul er ngii? (Dirrek el momes er a siasing.)

⁷ Me nguaisei ngika el milluches er tia el Psalm a dimlak lebechere kngtil a rengul me lechoitechetur. Ngmirruul aike el mo ngosuir el ngodechii a uldesuel. Ngmlora “Templo er [a Dios]” me a Jehovah silmecheklii a uldesuel. (Psa. 73:​17-19) A Jehovah el best Friend er kid a medengei sel lebo el mekngit a rengud. A lsekum kede meluluuch lolengit a ulekrael er ngii e kongei er a ngeso el lomeskid loeak a Tekingel me a ongdibel, e ngmo smisichii a rengud el loutekangel er a kngtil a rengud. Mo lmuut me a demeeleb er a sebekreng e a Jehovah mo mengelaod er kid e rullii a rengud el mo ungil.—Psa. 94:19.a

A BO “DEKEED ER A DIOS” E NGMO ER NGII A MOKTEK ER A KLENGAR ER KID E MESKID OMELATK

8. Ngera lmuut el teblo el rolel e ngungil kired a bo dekeed er a Dios?

⁸ A bo dekeed er a Dios a ungil kired loeak eru el meklou a ultutelel el rolel. A kot e ngmo er ngii a moktek er a klengar er kid. Ongerung, ngmeskid a ulterekokl el omelatk el kirel a ngar medad. (Jer. 29:​11, NW) Ka me dedmolech el merriter aikang.

9. Ngmekera mo er ngii a moktek er a klengar er kid sel dolekeed er kid er a Jehovah?

⁹ Sel bo dekeed er a Jehovah e ngmo er ngii a moktek er a klengar er kid. Te betok er chelechang a kmo, ngdiak a Dios. Me te diak lodengelii a uchul me a rechad a ngar tia el beluulechad e omdasu el kmo a ngar medad e a rechad a mo mokngemed el mo diak. Me nguaisei engdi ngoeak omesubed er a Tekingel a Dios e ngmla mo ulterekokl a rengud el kmo, ngngar ngii a Dios e “ngii omesterir omeksullir tirke el blak a rengrir el losiik er ngii.” (Heb. 11:​6, NW) Mo lmuut er chelechang el taem me ngmera el dmeu a rengud e le kede meruul er sel de ulebeob el mo meruul er ngii, el ngii a mesiou er a Demad el ngar er a eanged el Jehovah.—Dut. 10:​12, 13.

10. Ngera ngtibir a Jehovah el mo er tirke el loumerang er ngii? (Psalm 37:29)

¹⁰ A rebetok a diak a mera el omeltkir. Te di oureor, mo bechiil e oungalek, e save el kirel sel lebo el retire. Ngdiak a Dios er a tekoi el loruul. Me nguaisei engdi remesiungel a Dios otuil omeltkir er ngii. (Psa. 25:​3-5; 1 Ti. 6:17) Kede oumerang er a Dios el bla bo dekeed er ngii, e oumerang aike el bla letib el mei er kid. Ngkmal betok a ungil domes el beduluchei el kirel, tokubets sel bo dongull er a Dios el mo cherechar er a Baradis.—Monguiu er a Psalm 37:29.

11. Ngera ngrullii el mei er kid sel bo dekeed er a Dios, e tia ngdirrek el ngera ngrullii el mora Dios?

¹¹ Ngngar ngii a lmuut el betok el rolel e a bo dekeed er a Dios a ungil el kired. El ua tiang, a Jehovah tibir el mo ousubes a kngtid sel dobult. (Isa. 1:18) Tiaikid a uchul me ngdiak dongol a berredel a klengit el deriruul er a ngar er a mong. (Psa. 32:​1-5) E mo dmeu a rengud sel derellii a Jehovah el mo dmeu a rengul. (Osi. 23:15) Kulterekokl el sebechem el lmatk a lmuut el bebil er a klengeltengat el bla mngai er a kmes el deleuill er kau me a Jehovah. Me nguaisei, engdi ngmekera sebechem el molemolem lolekeed er kau er a Dios?

ROLEL E KEDE MELEMOLEM LOLEKEED ER KID ER A DIOS

12. Ngera ke mla remuul el mo olekeed er kau er a Dios?

¹² Uchei er a ometecholb el ta er a Sioning er a Jehovah e ke riruul a betok el tekoi me bo lsebechem el mo sechelil a Jehovah. Ke siluub a betok el kirel a Jehovah el Dios me a Kristus Jesus, ulebult er a kngtim, ulechotii a mesisiich el klaumerang er kau er a Dios, e mlora tkurrebab el sebechem el lolengesenges er ngii. Me nguaisei engdi a deluut el mo kmeed er a Dios e ngkired el melemolem el meruul aika el tekoi.—Kol. 2:6.

13. Ngera el edei el tekoi a mo ngosukid el melemolem el lolekeed er kid er a Jehovah?

¹³ Ngera mo ngosukid el mo melemolem el lolekeed er kid er a Jehovah? (1) Ngkired el melemolem el menguiu e mesuub er a Biblia. Sel donguiu e ngdiak di dosuub el kirel a Dios. Ngbai kired el melasem el mo medengelii a soal a Dios el kired e mo kiei loltirakl omellach el ngar er a Tekingel. (Efe. 5:​15-17) (2) Ngkired el smisichii a klaumerang er kid loeak a dolebedebek aike el betok lochotel a bltkil a rengul el kired. (3) Ngkired el melemolem el louketui aike el tekoi el melemall er a rengul a Jehovah e diak domak a klausechelei er kid lobengterir a rechad el meruul ngii el tekoi.—Psa. 1:1; 101:3.

14. Ngua lolekoi a 1 Korinth 10:​31, ngera bebil er aike el tekoi el sebeched el meruul er a klengar er kid me bo dodeuir a rengul a Jehovah? (Dirrek el momes a siasing.)

¹⁴ Monguiu er a 1 Korinth 10:31. Ngklou a ultutelel a leblak a rengud el meruul aike el tekoi el lodeuir a rengul a Jehovah. Tiang a diak di lolutk er a omerk er a klumech e ngar er a miting. A ungil omeruul lodeuir a rengul a Jehovah uldimukl er aike el doruul er a klengar er kid er a bek el sils. El ua tiang, sel de honest er a rokui el tekoi e dorous aike el ngar ngii er kid el mora rebebil, e kede rullii a Jehovah el mo dmeu a rengul. (2 Ko. 8:​21, BT; 9:​7, BT) Ngdirrek el soal a dochotii a respect er kid el kirel a sengk er a klengar. Kede mo kmeed er ngike el Uchul a klengar loeak sel letabesul omengeled me a omelemed e doruul aike el tekoi el mo mekerreuii a health er kid. Aike el rokui el doruul el mo odeuir a rengul a Jehovah mo lmuut er aike el kora di ua lemekekerei el tekoi, a rullid el mo mekreos er osengel.—Lk. 16:10.

15. A Jehovah ng expect er kid el mo uangerang a omerelled el mora rechad?

¹⁵ A Jehovah ungil omerellel el mora remelemalt me a rediak el melemalt. (Mt. 5:​45, BT) Ng expect er kid el mo ungil omerelled el mora rebebil. El ua tiang, ngdiak ‘dolaes rar chad el ka dongaititekangel, . . . e diblechoel lolecholt ra delemedemek el mora rokuil chad.’ (Tit. 3:​2, BT) Tiakid a uchul me ngdiak lemetengel osenged er a rebebil le tir el ngodech a klaumerang er tir er kid. (2 Ti. 2:​23-25) Kede olekeed er kid er a Jehovah loeak a deblechoel el melatk er a rechad e lungil omerelled el mo er tir.

MO LMUUT ER A DEMESIBAS ME NGSEBECHED EL MO KMEED ER A DIOS

16. A uriul er a losiou er a Jehovah el telkib el taem a milluches er a Psalm 73, e ngera ngmlo omelechesiu er ngii?

¹⁶ Engdi ngmekerang okmo uriul e ke mo feel el kmo ngdiak mrredemelel a bltkil a rengul a Jehovah? Molatk er ngike el milluches er a Psalm 73. Ngdilu el kmo: “Ngdi ngak a kilo kmoubuu; kilo ktmorech.” (Psa. 73:2) Ngdi mle ngii el melekoi el kmo ngmlo er ngii a ‘cheluached er a uldesuel,’ e ‘mlo diak lomtab’ me a ‘omerellel a mlo ua omerellel a charm’ el bedul a Jehovah. (Psa. 73:​21, 22) Me ngii ngmlo feel el kmo a cheleuid el lerellii a uchul me ngdiak lerredemelel a bltkil a rengul a Jehovah?

17. (a) Mo lmuut er a lengar er a kmal low el point er a klengar er ngii a milluches er a Psalm, e ngmilekerang? (b) Ngera sebeched el suub er a experience er ngii? (Dirrek el momes a siasing.)

¹⁷ A lsekum ngika el milluches er tia el Psalm a mlo omdasu el kmo a Jehovah mla choitii, e ngdimlak lomdasu el uaisei el meketeket. Mo lmuut er a lengar er a kmal low el point er a klengar er ngii, me ngmle medengei el kmo ngkirel lolekeed er ngii er a Dios. Ngdilu el kmo: “Ngdi kdi blechoel el obengkem [e Jehovah], me korreked er a chimak. Ke mengetikaik er ngak el oba ngesou er a ungil uldasu er kau, e a uriul e ke ngoikak el oba chetengakl.” (Psa. 73:​23, 24) Kid sel lebo lemechitechut a rengud me a lechub e ngmechitechut a klaumerang er kid me ngkired el dirrek el lomes el bedul a Jehovah el tebecheled. (Psa. 73:​26, NW; 94:18) Mo lmuut me a lsekum me kede oberius el telkib el taem me ngdirk sebeched el lmuut el me er a Jehovah lulterekokl a rengud el kmo ng “ousubes a tellemall.” (Psa. 86:5) Sel dengar er a kmal low el point er a klengar er kid e ngtokubets el kired lolekeed er kid er a Dios er kid.—Psa. 103:​13, 14.

MOLEKEED ER KAU ER A DIOS EL MO CHERECHAR

18. Ngera uchul me ngsebeched el melemolem lolekeed er kid er a Jehovah el mo cherechar?

¹⁸ Ngkmal sebeched el melemolem lolekeed er kid er a Jehovah el mo cherechar. Ngkmal diak a ulebengelel a omesubed el kirel. A Biblia a kmo a rolel a Jehovah, llomeserreng er ngii, me a klemedengei er ngii a “a diak le motirakl!”—Rom 11:​33, BT.

19. Ngera ngolterekokl er a rengud er ngii a Psalm 73?

¹⁹ A Psalm 79:13 (NW) a kmo: “Isei e kemam el chedam e sib er a delebechel er kau, a mo mereng a sulem el mo cherechar; Aki mo ouchais odengesem er a bek el telecheroll.” Sel molemolem lolekeed er kau er a Dios, e kau me ngdirrek el sebechel mo ulterekokl a rengum el kmo ke mo mukngeltengat er ngii el mo cherechar e sebechem el melekoi el kmo: “Dios a risois er a renguk e blingelek el mo cherechar.”—Psa. 73:​26, NW.