Ongeteruich ma Ongeim el Suobel

Dolengeseu er a Rebebil el Mo Medengei a Soal a Dios

Ngera me ngkirem el louchais er a rebebil a tekoi el mosuub? (1)

Te rua techang a sebechem el louchais er tir aika el lungil el chais? (2)

A blekerdelem ngngerang sebechel el rullii er a rebebil er a rechad? (2)

Oingerang e ngmo sebechem el mo omerk er a klumech el lobengkel a ongdibel? (3)

1. Me lmuut er a chelechang e ngkmal mla mo betok el tekoi a bla msuub er a Biblia. Tia el klaodengei er kau a kirel el mekrolau el mo omekeroul a blekerdelir a Rekristiano er a klengar er kau. (Efesus 4:22-24) Aika el klemedengei a meklou a ultutelel el kirel a osebelem el diak a ullebengelel. (Johanes 17:3) Me nguaisei, engdi rebebil a dirrek el kirir el mo orrenges er a ungil el chais me lsebechir el dirrek el mo suobel. Ma rokui el mera el Kristiano a kirir el mo omerk er a klumech el mo er a rebebil. Tiang a omellach el mla er a Dios el mei.—Rom 10:10; 1 Korinth 9:16; 1 Timoteus 4:16.

2. Ngsebechem el omuchel el louchais aike el lungil el tekoi el mosuub el mo er tirke el chad el kmeed er kau. Mouchais er a rechad er a blim, ma resechelim, me tirke el mdak el ngar er a skuul, ma rechad el omdak e loureor. Molecholt a klechubechub ma klloureng sel moruul el uaisei. (2 Timoteus 2:24, 25) Kele mobes el kmo a rechad a bai kerekikl el lomtab a omerellel a chad er a bai lorrenges a tekoi el lolekoi. Ma ungil el omerellem a sebechel el lochau a rengrir a rechad me te mo orrenges a tekoi el mouchais er tir.—Matteus 5:16; 1 Petrus 3:1, 2, 16.

3. Nglocha mo er ngii a taem, el bo lsebechem el mo teloi er a Resioning er a Jehovah el lomerk er a klumech. Tiang a kmal klou a ultutelel el bakes el kirem sel molengeriakl. (Matteus 24:14) Ngkol ua ngera el deurreng a obo momelechesiu er ngii sel mngeseuir a ta el chad el mo mesiou er a Jehovah e bo lenguu a diak a ullebengelel el klengar!—1 Thesalonika 2:19, 20.