“Melisiich Aike el Ongdibel”

1-3. (a) Ngtecha beches el lobengkel a Paulus el ngar er a omerollel el missionari, e ngika ngngua ngera el chad? (b) Ngera kede mo mesaod er tia el bliongel?

TE MERRAEL er a rael er a delongelel a beluu me a beluu, e a apostol Paulus omes er ngika el kekerei el chad el merael er a bita er ngii e kmal dmolech el melatk. A ngklel a Timothy. Ngika locha bekord el lluich a rekil e kmal mesisiich a bedengel e semeriar. A derta el blekeklel ocherir a rulleterir el lmuut el mo cheroid er a belual ngii el buik. A sils a ngoltang me a Listra me a Ikonium a di uangerang el mo dibus er ullir. Ngera mengiil er tir? A Paulus a mla er ngii a ngar er a uldesuel le tia ongeru el omerollel el missionari. Ngmedengei el kmo ngmo er ngii a betok el kengaol el blekeradel me a mondai. Ngmo uangerang ngika el buik el lobengkel?

² A Paulus a mla er ngii klaumerang er ngii er a Timothy, el locha lmuut el klou el klaumerang er a klaumera er a Timothy el kirel. Tekoi el dirk dilubech a mla oterekeklii a rengul a Paulus el kmo ngkirel ngiltii a melemalt el chad el mo obengkel. A Paulus a mle medengei el kmo a ureor el bo loruul er ngii el oldingel e melisiich a ongdibel ousbech er a kltarreng me a ducherreng. Ngera uchul me a Paulus a mle feel el uaisei? A ta er ngii a locha sel mondai el dilubech luchul me ngmlo kebii ngii me a Barnabas.

³ Ngar tia el bliongel e kede mesaod a ungil doruul sel lebo er ngii a klekakerous er a uldasu. Kede dirrek el mo mesaod er a uchul me a Paulus a ngileltii a Timothy el mo obengkel, e mo suub a lmuut el betok el kirel a klou a ultutelel el ureor el loruul er ngii a re circuit overseer er chelechang el taem.

“De Luut el Merael el Mo Oldingel er a Rudam” (Rellir 15:36)

4. Ngera mle soal meruul er ngii a Paulus er a ongeru el omerollel el missionari?

⁴ Ngar er a uleak uchei el bliongel e kede milsa rolel e a Paulus, Barnabas, Judas, me a Silas a silsichii a ongdibel er a Antiok er a lebong e louchais er tir er a omelilt er a governing body el kirel a mondai er a botk. Me ngera ngmillib el mo meruul er ngii a Paulus? Ngdilu er a Barnabas el kmo: “De luut el merael el mo oldingel er a rudam er kid er a ikel bek el beluu el dullisechakl er ngii a tekingel a Rubak, me bo dodengei el kmo te ua ngerang.” (Rel. 15:36) A Paulus a dimlak losaod er a omilil el di mo oldingel er tirka el beches el Kristiano. A babier er a Rellir ouchais er a mle moktek er a ongeru el omerollel a Paulus el missionari. A kot, e ngmo merael el lolab a ulekrael el miltib er a governing body el mora ika el ongdibel. (Rel. 16:4) Ongerung, ngkmal mle soal merael el loldingel ongdibel el melisiich a klaumerang er tir. (Rom 1:11, 12, BT) Ngmekera cheldebechel er a Resioning er a Jehovah er chelecha el taem e oltirakl er a kerebai el lekiltmeklii a rechapostol?

5. Ngmekera Governing Body er chelecha el taem e omekrael e melisiich a rokui el ongdibel?

⁵ Chelecha el taem e a Kristus ousbech er a Governing Body er a Resioning er a Jehovah el omekrael ongdibel er ngii. Ngoeak a letters er tir, babier me a video el loltobed er a Internet e print, miting, me a lmuut el bebil e tirka el blak a rengrir el ngellitel el odam omekrael e melisiich a rokui el ongdibel el meliuekl er a beluulechad el rokir. A Governing Body a dirrek el soal el mo kmeed er a derta el ongdibel. Seikid a uchul me ngoldurech er a rudam el mo merael el loldingel ongdibel. A Governing Body a mla tutketerir a rebetok el telael el mechuodel el meliuekl er a beluulechad el rokir el mo mesiou el circuit overseer.

6, 7. Ngera bebil er a ngerechelir a re circuit overseer?

⁶ Rudam el oldingel ongdibel er chelecha el taem olecholt er a klemeriarreng el mora rokui el chedal ongdibel e melasem el melisiich er a klaumerang er a rudam me a rudos er tir. Ngmekera loruul er tiang? Te oltirakl er a kerebai el lekiltmeklii a rekot el Kristiano el ua Paulus. Ngdilu er a kldemel e dirrek el ta er a odam loldingel ongdibel er a Timothy el kmo: “Momerk a tikingel a Dios, a lungil a blsechel ma le mekngit, e di le blak a rengum er ngii el di oba kllourreng el olisechakl, e molekar a rengrir ar chad, e mollach, e mongelechel er tir. . . . Moruul a urerel chomerk ra evangkelio.”​—2 Ti. 4:2, 5, BT.

⁷ Ngoltirakl er tia el bades, e a circuit overseer me a bechil a lsekum e ngbechiil, a mo teloi er a ongdibel el omerk er a klumech. Tir el meduch lolisechakl e betik a rengrir er a berkel a klumech a ungil kerebai el kirir a rudam me a rudos er tir. (Rom 12:11; 2 Ti. 2:15) Tirke el teloi er a ureor el mesiou el oldingel ongdibel a lodengelterir el kirel a bltikerreng er tir el diak a cheleblad er ngii. Te dmeu a rengrir el mengoit a temir me a klisichel a bedengir el mesiou er a rebebil, e ngar omerael a lemekngit a eanged mo lmuut er a mora ike el kengaol el basio. (Fil. 2:3, 4) A re circuit overseer a dirrek el melisiich, olisechakl, e mengelechel a derta el ongdibel loeak a cheldecheduch el loltobed el mengai er a Biblia. A rokui el ngar ongdibel a dirrek el ngmai a klungiolir sel lolatk er a kerebai er a rudam el oldingel ongdibel e loukerebai er a klaumerang er tir.​—Heb. 13:7, NW.

“Meringel Klaititekangel” (Rellir 15:37-41)

8. Ngmilekera Barnabas er a ongtil a Paulus?

⁸ A Barnabas a kilengei el lobengkel a Paulus el “mo oldingel er a rudam.” (Rel. 15:36) Te mle dmak lungil loureor er a uchei e mle medengei aika el beluu me a rudam me a rudos er aika el ongdibel el lolatk a lmuut el mo oldingel. (Rel. 13:2–14:28) Me ngkora mle ungil uldasu a lluut el mo dmak loureor. Engdi ngdilubech a mondai. A Rellir 15:37 a kmo: “A Barnabas a mle soal el nguu a Johanes Markus me lobengterir.” A Barnabas a dimlak loker er a Paulus el kmo ngungil luldasu a lenguu a Markus. Ngmle “soal” nguu a ta er ngii er a Markus el mo obengterir el ngar tia el omerollir el missionari.

9. Ngera uchul me a Paulus a dimlak el kengei er a uldesuel a Barnabas?

⁹ A Paulus a dimlak lekengei er tiang. E ngerang? A Bades a kmo: “Ngdi Paulus a dimlak lomdasu el kmo ng ungil a lolai er ngii, ele ng dimlak le kiei el obengterir el mo lmuut er a ulebengelel a urerir, ng bai chilititerir er a Pamfilia e lmuut el mo remei.” (Rel. 15:38) A Markus a ulebengkel a Paulus me a Barnabas er a kot el omerollir el missionari engdi ngdimlak lemelemii a omerael el mora ulebengelel. (Rel. 12:25; 13:13) Uchelel omerael er a ledirk ngar er a Pamfilia e a Markus a chilitii a assignment er ngii e lmuut el mo remei er a Jerusalem. A Biblia diak louchais er a uchul me ngliluut el mo remei, me nguaisei a Paulus a ulemdasu el kmo ngdimlak el melemalt omerellel a Markus e uluumededenger el kmo ngsebechel lultuil er ngii.

10. Ngera dilubech er a bo el kaumondai a Paulus me a Barnabas?

¹⁰ Me nguaisei a Barnabas a rirellii er a rengul a melai er a Markus. A Paulus me ngdirrek el dimlak el soal ngodechii a uldesuel. A Rellir 15:39 a kmo: “Ng mlor ngii a meringel klaititekangel er a delongelir me tulebii.” A Barnabas a liluut el mora belual er a Siprus e ngiluu a Markus. A Paulus a millemolem er a telbilel. A Bades a kmo: “A Paulus a [ngileltii] a Silas el mo obengkel el merael. A ruumerang a ulelterekokl er tir er a krasia er a Rubak.” (Rel. 15:40) Te dilak el “mora Siria me a Silisia el melisiich aike el ongdibel.”​—Rel. 15:41, NW.

11. Ngera el blekeradel a meklou a ultutelel me lak lolemolem el mekngit a deleuill er kid me a chad el kilengtir a rengud?

¹¹ Tia el cheldecheduch a dirrek el lomeklatk er kid el kmo kede diak demecherrungel. A Paulus me a Barnabas a lullutk er tir a governing body. Me a Paulus a locha mlo chedal a governing body er a uriul. Engdi alta tir el terung a kmal mle ungil odam te mlo diak loreked a ngesechel a rengrir. Tia el tekoi ngmlo uchul me ngmiltemall a deleuill er tir? Alta te dimlak el mecherrungel engdi Paulus me a Barnabas a mle ngariou a rengrir el chad e uleba omelebedebekel a Kristus. Ngulterekokl el uriul e te mlo kausubes e lmuut el toketekii a deleuill er tir. (Efe. 4:1-3) Uriul e a Paulus me a Markus a liluut el mo dmak el oureor.a​—Kol. 4:10.

12. Ngera el blekeradel a kirir a remechuodel el olab el loukerebai er a Paulus me a Barnabas?

¹² Alta Paulus me a Barnabas a ngilasech a rengrir er tiakid el taem me nguaisei engdi tia diak el leblekerdelir. A Barnabas a ble lodengelii el kmo ngchubechub e bekururau a uchul te mlo diak loleker er ngii er a mera el ngklel el Josef e mlo oleker er ngii el Barnabas el belkul a kmo “Ngalek er chongelaod.” (Rel. 4:36, BT) A Paulus a dirrek el ble lodengelii a rechad el kmo ngmedemedemek. (1 Th. 2:7, 8) A remechuodel er chelecha el taem el mo lmuut er a rudam el oldingel ongdibel a kirir loukerebai er a Paulus me a Barnabas e mo ngariou a rengrir e mo ungil el mora rudam me a rudos er a ongdibel me a dirrek el ngar er a delongelir.​—1 Pe. 5:2, 3.

Mle “Ungil a Chisel” (Rellir 16:1-3)

13, 14. (a) Ngtecha Timothy, e milekera Paulus e mo medengelii? (b) Ngera uchul me a Paulus a tilab osengel er a Timothy? (c) Ngera el ngerachel a lengiluu a Timothy?

¹³ Ngar er a ongeru el omerollel a Paulus el missionari e ngmlora beluu er a Galatia el ngar cheungel a omengederederel a Rom el mla mo er ngii a bebil el ongdibel er ngii. Omerollel a taem e ng “mlor a Derbe ma Listra.” A Bades a kmo: “[Ngkiliei] er ngii a tal Kristiano el ngklel a Timothy. A delal el dirrek el mle Kristiano a redil er a Judea, e ngdi demal a chad er a Gris.”​—Rel. 16:1.b

¹⁴ A Paulus a mlo medengelii a telungalek er a Timothy er a kot el omerollel el mong er a bekord el 47 C.E. Ngar er a ongeru el omerollel el mong er a bekord el eru me a lechub ngedei el rak er uriul, e a Paulus a miltab osengel er a Timothy. E ngerang? E le Timothy a mle “ungil a chisel rar udam.” A Timothy mle ungil a chisel er a ongdibel er ngii me a dirrek aike el ongdibel el mle kmeed er tir. A bades a melekoi el kmo a rudam er a Listra me a Ikonium el mle bekord el 20 el mael a cherridel a millekoi a ungil el tekoi el kirel. (Rel. 16:2, BT) Ngoeak a ulekrolel a chedaol reng e a remechuodel a ulemekngerachel er a Timothy er a kmal oberaod el ngerachel el mo obengkel a Paulus me a Silas el merael el oldingel ongdibel.​—Rel. 16:3.

15, 16. Ngera uchul me a Timothy a kmal mle ungil a chisel?

¹⁵ Ngmilekera Timothy el dirk ngeasek e ungil a chisel? Ngika ngmle mellomes a rengul, ungil a klebekelel er a ikrel, me a lechub e ngngar ngii a dechal? A rechad a blechoel el sorir chouaika el tekoi. Mo lmuut er a profet Samuel me ngmle ta el taem el lemechetakl er aike el lulemes er a ikrel. Me nguaisei engdi a Jehovah ulemeklatk er ngii el kmo: “Ngak a diak kulilt el ua chad a lolilt. A chad omes er a ikrel, e ngdi ngak omes er a rengul a chad.” (1 Sa. 16:7) Me a ungil blekerdelel a Timothy a uchul me ngrirellii a ungil el ngakl er a delongelir a rudam er ngii el Kristiano ngdiak el tekoi el lullab.

¹⁶ Betok el rak er uriul e a apostol Paulus a milsaod a bebil er a blekerdelir a Rekristiano el lullab a Timothy. A Paulus a milsaod er a ungil rengul a Timothy, bltikerreng er ngii el mora rudam, me a blakerreng er ngii el meruul a ngerechelel. (Fil. 2:20-22) A Timothy a dirrek el ble lodengelii a rechad el kmo ngoba “diak a klsuul er ngii el kloumerang.”​—2 Ti. 1:5, BT.

17. Te mekera rengeasek er chelecha el taem e oukerebai er a Timothy?

¹⁷ A rebetok el ngeasek er chelecha el taem oukerebai er a Timothy loeak a lomekeroul a ungil blekeradel. Te rullii a ungil chisir er a Jehovah me a rechedal, mo lmuut er a rekmal dirk mekekerei. (Osi. 22:1; 1 Ti. 4:15) Te ochotii a klaumerang el diak a cheleblad er ngii e kmal diak el lekengei el mo eru el bedengel a klengar er tir. (Psa. 26:4) Tiakid a uchul me a rebetok er a rengeasek a di ua Timothy el kmal meklou a ultutelir er a ongdibel. Te kmal melisiich er a rokui el betik a rengrir er a Jehovah el meliuekl er tir sel lebo el publisher er a ungil chais e le tibir a klengar er tir el mora Jehovah e metecholb!

“Menga el Mlo Mesisiich a Klaumerang er Tir” (Rellir 16:4, 5)

18. (a) Ngera el ileakl e techall a lulebang a Paulus me a Timothy el rudam el oldingel a ongdibel? (b) Ngera el klungiaol a lengilai a ongdibel?

¹⁸ A Paulus me a Timothy a dilak loureor el betok el rak. Te mirrael el loldingel ongdibel el meruul a betok el tekoi el kirel a governing body. A Bades a kmo: “Ser a lomais ngiil beluu e te milsterir a ruumerang a ikel llach el meltib er a re apostol ma re mechuodel el ngar a Jerusalem el kirir el mo oltirakl.” (Rel. 16:4) Aika el ongdibel a uleltaut aika el ulekrael er a rechapostol me a remechuodel er a Jerusalem. Blekongesenges er tir a uchul me “[aika] el ongdibel a menga el mlo mesisiich a klaumerang er tir, me a ildisir a mle bek el sils el lorael el mo betok.”​—Rel. 16:5, NW.

19, 20. Ngera uchul me a Rekristiano a kirir el lolengesenges er “tirke el omekrael”?

¹⁹ Ngdi osisiu a Resioning er a Jehovah er chelecha el taem a melai a betok el klengeltengat e le tir el kongei lolengesenges a ulekrael el lengai er “tirke el omekrael” er a delongelir. (Heb. 13:17, NW) A blekeradel er a beluulechad el di meldelodech a uchul me ngkmal klou a ultutelel a Rekristiano a lekerekikl el omtab e oltaut a ulekrael er a “blak a rengul e mellomes a rengul el mesiou.” (Mt. 24:45; 1 Ko. 7:29-31) A doruul el uaisei e kede oibngid er aike el mo tomellid er a klereng e ngosukid el mo diak demechesechusem er tia el beluulechad.​—Jak. 1:27.

²⁰ Ngklemerang el kmo a remechuodel me a rechedal a Governing Body a diak lemecherrungel el ua Paulus, Barnabas, Markus, me tirke el lmuut el bebil er a remechuodel er a taem er a rekot el Kristiano. (Rom 5:12; Jak. 3:2) Me nguaisei engdi Governing Body el kmal kerekikl loltirakl er a Tekingel a Dios e kerekikl loltirakl er a kerebai lekiltmeklii a rechapostol, a uchul me ngsebeched el loumerang er tir. (2 Ti. 1:13, 14) Tiakid a uchul me aika el ongdibel a menga el mla mo mesisiich a klaumerang er tir.