Ngmle Ua Ngerang a Klengar er a Chelsel a Paradis?

A Jehovah a milsang a Adam me a Eba a betok el ungil el tekoi. Genesis 1:28

A Jehovah a milebii a kot el redil, el Eba, e ngiluu el msa Adam el mo bechil.​—Genesis 2:21, 22.

A Jehovah a ulemeob er tir el mle cherrungel a uldesuir me a bedengir, e dimlak a telemellir.

A Paradis el delengcheklir a mle sers er a Eden​—el mle basio el ngar er ngii a meklou e klebokel el omoachel me a dirrek el rodech me a kerrekar me a dirrek el charm.

A Jehovah a milengedecheduch e ullisechakl er tir. A lsekum te ullengesenges er ngii, e ngmo sebechir el kiei el diak a ulebengelel el ngar er a Paradis er tia el chutem.

A Dios a dilu el kmo ngdiak monga er a redechel a ta er aike el kerrekar. Genesis 2:16, 17

A Jehovah a ulechotii el mo er a Adam me a Eba a ta el ourodech el kerrekar el ngar er a sers e dilu er tir el kmo a lsekum e te mo kolii, e te mo mad.

A ta er a anghel a mlo omtok er a Dios. E ngika el mekngit el anghel a Satan el Diabelong.

A Satan a dimlak el soal a Adam me a Eba a lolengesenges er a Jehovah. Me nguluusbech er a bersoech el melekoi er a Eba el kmo a lsekum e ngmo kolii ngii el rodech, e ngkmal diak el mad e bai mo uai a Dios. Engdi tiang a di mle blulak el tekoi.​—Genesis 3:1-5.