A Dios a Milebii a Kot el Sechal me a Redil

A Jehovah dillemii a sers er a basio lokedongall el Eden. Tia el sers a mle betok a bung, kerrekar, me a charm er ngii. A uriul e ngmilebii a kot el chad el Adam el lousbech a chebechab er a chutem e dilekeuii a telil losisebii er a isngel. Ke medengei el kmo ngngera dilubech? Ngmlo ngar el chad! Ngrirellii a Adam el mo oungerachel er a sers e dilu er ngii me lomngakl a rokui el charm.

A Jehovah milsa Adam a klou a ultutelel el llach. Ngdilu er ngii el kmo: ‘Ngsebechem el menga rdechel a rokui el kerrekar engdi ngngar ngii a chimo el kerrekar el kmal diak el sebechem el rutechii. A lsekum ke kolii a rdechel e ke mo mad.’

Uriul e a Jehovah dilu el kmo: ‘Ak mo rullii a ngelsuil a Adam.’ A Jehovah milechiuii a Adam el kmal iliit a medal e uluusbech er a chiuesel a kekengel el rullii a bechil. A ngklel a Eva. Me a Adam me a Eva a mle kot el telungalek. Ngmle uangerang a uldesuel a Adam el kirel a bechil? Ngkmal mlo ungil a rengul me ngdilu el kmo: ‘Mesa bla lebebii a Jehovah lousbech er a chiuesel a kekengek! Ngmera el lungia renguk! Ngika kmal di uai ngak.’

A Jehovah dilu er a Adam me a Eva me bo loungalek e lebekekii a beluulechad er a rechad. Ngmle soal a ledak el loureor el dmeu a rengrir el meruul er a beluulechad el rokir el mo baradis me a lechub e ngklebokel el park, el di mo uai a sers er a Eden. Engdi ngdimlak lebo el uaisei. E ngerang? Kede mo medengei a lmuut el betok er a ongingil el suobel.