3 EL SUOBEL
A Adam me a Eva Mlo Diak Lolengesenges er a Dios
A ta er a klebesei er a di bo lengii el tang a Eva e a bersoech a mlo mengedecheduch er ngii. Ngdilu el kmo: ‘A Dios ngmera el dilu el kmo ngdiak el sebechem el menga rdechel a ngii di el kerrekar?’ Me a Eva dilu el kmo: ‘Ngsebechemam el menga rdechel a rokui el kerrekar engdi ngngar ngii a chimong el diak el sebechemam. A lsekum aki mo kolii a rdechel e aki mo mad.’ Me a bersoech a kmo: ‘Ngkmal diak bo mad. Ngbai sel omkelii e ke mo uai a Dios.’ Tia ngmle klemerang? Ngdiak, ngulumulak. Engdi Eva uluumerang er ngii. Klteketel a taem el di lomes er tia el rodech a Eva e ngmenga el mlo soal el menga er ngii. Me ngkillii a rdechel e ngiluu el msang a Adam. A Adam a mle medengei el kmo te mo mad a bo lak lolengesenges er a Dios. Me nguaisei engdi ngkillii.
Uriul er tia el osisiu el sils e a Jehovah a mlo mengedecheduch er a Adam me a Eva. Nguleker er tir er a uchul me te mlo diak lolengesenges er ngii. A Eva ultelecheklii a bersoech e a Adam ultelecheklii a Eva. Tir el mlo diak lolengesenges a uchul me a Jehovah ultebedeterir er a sers. Ngiltiterir a rechanghel el mo mengkar er a siseball er a sers loba saider el kmard er a ngau me bo lak el sebechir el lmuut el soiseb er ngii.
A Jehovah dirrek el dilu el kmo ngike el millekngii a Eva a mo obals. Engdi ngdiak el bersoech ngike el mera el milengedecheduch er a Eva. A Jehovah a dimlak lebebii a bersoech el sebechel mengedecheduch. Ngmekngit el anghel a rirellii a bersoech el mo sebechel mengedecheduch. Ngmirruul er tiang el lomedikl er a Eva. Ngika el anghel a okedongall el Satan el Diabelong. A ngar medad e a Jehovah mo okngemedii a Satan me ngmo diak el sebechel lmuut el lomedikl er a rechad el mo meruul a mekngit.
“A Diabelong . . . a ngar a mong el mei e ng omekoad er a re chad e dirkak a tal le bor a klemerang, ele ng diak a klemerang er ngii.”—Johanes 8:44