Abraham​—A Chad el Uleba Klou el Klaumerang

A Abraham a dechor er rikl er a kebesesengei. Ngomes el bedul bab er a eanged el kmal klebokel el betok a btuch er ngii, e melatk er a telbilel a Dios el kmo a ruldidellel a rsechel a mo ua ildisel a btuch. (Genesis 15:5) Me ngngar er a osengel, e ngomes aika el meues el btuch el ua lomeklatk er ngii er a telbilel a Jehovah. E ngii el btuch a olechotel a telbiil el mera el mo tmaut. E le a lsekum a Jehovah a ngar ngii a klisichel el mebii tia el cheldellel a eanged me a chutem me aike el rokui el bleob el ngar er a chelsel, e ngulterekokl el kmal sebechel el rullii ngii me a Sara el mo er ngii a ngelekir. Tiaikid a olechotel a klaumerang er a Abraham.

NGERANG A KLAUMERANG? A tekoi el “klaumerang” el lousbech er ngii a Biblia a mesaod el kirel a chad el mesisiich el oumerang er a tekoi el diak lesang, engdi ngngar er ngii a uchetemel el okiu a bleketakl el olechotel a tekoi. Me a chad el oumerang er a Dios a ultaut a osengel er a otutel a telbilel a Jehovah, el ulterekokl a rengul el kmo nguai a bla lemutaut.

NGMILEKERANG A ABRAHAM E OCHOTII A KLAUMERANG ER NGII? A Abraham a ulechotii el kmo nguluumerang a telbilel a Dios. Me ngoeak tiakid el klaumerang er ngii, e ngchilitii a beluu el lemilechell er ngii, el mle ulterekokl a rengul el kmo a Jehovah a mo lomolem a Telbilel el mo ochotii er ngii a beluu el kirel el mo er ngii. Ngdirrek el uleak tia el klaumerang er ngii, e ngmilleuaoch er a beluu er a Kanaan el mle ulterekokl a rengul el kmo a ruldidellel a rsechel a mo oubeluu er ngii el beluu. E dirrek el uleak ngii el klaumerang, e ngullengesenges er a Jehovah e mo melenget er a Isak el ua delaol tenget, e mle ulterekokl a rengul el kmo a Jehovah a sebechel el okisii a Isak er a kodall. ​—Hebru 11:8, 9, 17-​19.

A Abraham a mle ulturk a osengel er a ngar medal el klebesei, er a bai lomes el beduluriul. Me alta e ngii me a Sara a kmal mle ungilbesul a klengar er tir er a Ur el kuk ngaruchei er a klengar er tir er a Kanaan, engdi ngdimlak di ‘lolebedebek er sel beluu el le tilobed er ngii.’ (Hebru 11:15) Te bai mle ulturk a osengir er sel rolel a Dios a bo lomekngeltengat er tir me a rengelekir er a ngar mederir el klebesei.​—Hebru 11:16.

Ngmla er ngii a ungil el uchul a klaumerang er a Abraham? Ngkmal mla er ngii. A Jehovah a uleltaut a bek el telbilel. A ruldidellel a rsechel a Abraham a mirrael el mo obdois el mo ta el renged el Israel a ngklel. Ngmlo er ngii a taem e tir el chad er a Israel a mlo kiei er a Kanaan, el ngii a beluu el Jehovah a tilbir el mo msang a Abraham.​—Josua 11:23.

NGERANG A KLUBELED EL DENGAI ER TIANG? Ngsebechel el mo ulterekokl a rengud el kmo a Jehovah a mo otaut a telbilel. Me alta e a rechad a omdasu el kmo ngdiak el sebechel el mo tekoi, engdi ngkired el mo mui el oumerang el kmo a “Dios a di sebechel a ngiidi le ngerang.”​—Matteus 19:26.

A kerebil a Abraham a dirrek el osisecheklid el mo uldellomel a osenged er a tekoi el bo doldeu a rengud er ngii er a ngar medad el klebesei, el diak el tekoi er a ngar er a mong. Tiaikid el omeruul a lesilubii a chad el ngklel a Jason. Ngika el chad a chuarm er a meringel el secher el meruul er a bedengel me ngmelemolem el chitechut. Ngmelekoi el kmo: “Ak melechesukak el mo blechoel el melatk aike el tekoi er a ngar er a mong. Ak dirrek el kmal mo oureng aike el temek el mle sebechek el omechull er a bechik er a Amanda.”

Me nguaisei, engdi a Jason a kmal mui el oumerang el kmo a Jehovah a mo otaut a telbilel, el uldimukl er a telbilel el kmo tia el chutem a mo paradis, me a reblak a rengrir el chad a mo kiei el cherrungel a klisichel a bedengir el diak a ulebengelel.a (Psalm 37:10, 11, 29; Isaia 35:5, 6; Chocholt 21:3, 4) Me ngmelekoi el kmo: “Ak blechoel el melatk aike el ungil el taem el mo er ngii er a ngar medad el klebesei, el sel taem el mera el mo diak a ringelel a uldasu, klengiterreng, me a mekngit el ukltked.” Ngmera el ungil el kerebai el kirel a klaumerang el di ua Abraham!

[Footnote]