A Dios Ngmelatk er Kau?

Ngmle melemalt a uldesuel a David a lomdasu el kmo a Dios a melatk er ngii? Me a Dios ngmelatk er kau? A rebetok el chad a meringel er tir el mo oumerang el kmo a Dios el olab a rokui el klisiich a semeriar er tir. E ngera uchul?

A ta er a uchul a kmo, a Dios a lmuut el kmal ngarbab er a redi chad. Me ngar er a osengel e a bek el beluu a “di ua ngimech el ralm, ma ikel cheroid el iungs a di kebekakl el ua chebechab.” (Isaia 40:15) Me a ta er a chad er a omeluches el diak loumerang er a Dios a lilechesii a kmal mesisiich el tekingel el kmo, “ngolechotel a ngarbab el kldidairreng a lsekum kede omdasu el kmo ngar er ngii a Dios el kerekikl el melatk er kid e kmal semeriar aike el tekoi el doruul.”

Ngdirrek el ngar er ngii a rebebil el omdasu el kmo a mekngit el omerellir a uchul me a Dios a diak lolatk er tir. El ua tiang, a Jim a dmu el kmo: “Ak mle blechoel el meluluuch me bo el budech a uldesuek e bo el chelellakl a renguk, engdi ngdi blechoel el mo ngmasech a renguk er a uriul. Me a cherengel a taem e ak mlo omdasu el kmo ngak a kmal mekngit el chad me a Dios a diak el sebechel el ngosukak.”

Me a Dios ngkmal cheroid er a rechad me ngdiak el sebechel el mesekid? Ngua ngera uldesuel el kirir a reblebelel el tir a diak lemecherrungel? A lsekum a Dios a dimlak louchais er kid, e ngdiak a ta el chad el ngar er ngii a llemeltel el mesaod el kirel a Dios e onger aika el ker. Me a Biblia el ngii a mlukrael el babilengel a Dios el mo er a rechad a mengelaod er kid e le ngmeketeklii el kmo ngdi kmeed er kid e dirrek el omekerreu er kid. A Biblia a kmo: “Ngdi Dios a diak le cheroid er a derta er kid.” (Rellir 17:27) Me ngar er aika el ongingil el eua el suobel, e kede mo mesaod el kirel aike el louchais er kid a Dios el kirel a klemeriarreng er ngii el mo er a derta er kid me a rolel e ngmla ochotii tia el klemeriarreng er ngii el mo er a rechad el uai kau me a ngak.