A NGER ER AIKE EL KER ER A BIBLIA

Ngsebechel el mo er ngii a di chimo el kabelment er tia el beluulechad?

Ka di molatk er a rolel e ngmo sebechel a kabelment er a beluulechad el mo uchul a klungiolir a rechad. Chelecha el taem e te kmal betok el chad a chuarm el chelebulir a uchul, e a rebebil a kuk kmal imis el merau. Engdi a kabelment er a beluulechad el ngii a medengei aike el lousbech a rechad a ulterekokl el mo kutmokl aike el lousbech a rechad el rokui. Me a omomdasu, ngsebechir a rechad el mo toketekii a chouaitia el kabelment?​—Monguiu er a Jeremia 10:23.

Ngar er a reksi er a beluulechad e a rokui el kabelment el mla mengedereder a dirkak a ta el bo lsebechel el omekerreu e mesterir a rokui el chad aike el lousbech, el ileakl tirke el mechebuul el chad. Ngdirrek el ngar er ngii a bebil el kabelment el kmal mekngit. (Olisechakl 4:1; 8:9) Engdi a Dios el Olab a Bek el Klisiich a mla tibir el kmo ngmo toketekii a kabelment el mo mtechei aike el rokui el ngar er ngii el kabelment. E ngike el mo Merreder er ngii a mera el mo omekerreu er a rechad el chederedall er ngii.​—Monguiu er a Isaia 11:4; Daniel 2:44.

Ngera el tekoi a bo leketmokl a Rengedel a Dios?

A Jehovah el Dios a mla ngiltii a kot el ungil el Merreder el ngii a Ngelekel el Jesus. (Lukas 1:31-33) Sera dirk lengar er a chutem a Jesus, e ngmle semeriar el olengeseu er a rechad. Me chelecha el bla bo el King, e ngmo oldak er a rechad er a bek el renged e okngemed a rokui el ringel.​—Monguiu er a Psalm 72:8, 12-14.

Me a rokui el chad te kongei er a Jesus me ngmo Merredelir? Ngdiak, engdi a Jehovah a kmal klou a rengul. (2 Petrus 3:9) Me ngomesterir a techellir a rechad el mo kongei er a Jesus me ngmo Merredelir. Ngdi telkib kung e a Jesus a mo okngemedeterir a rokui el mekngit el chad, e dirrek el mo toketekii a budech me a ulekerreu er a beluulechad el rokir.​—Monguiu er a Mika 4:3, 4.