Ngera Uchul Me Ngkirel el Mo er Ngii a Library er Kid?

A ta er a klou el uchul a kmo a omesuub el di kid el tang a klou a ultutelel el mo er a Resioning er a Jehovah. (Jn. 17:3) Ngungil sel lengar er ngii a library er kid er a blid me bo el sebeched el meruul a research, e dosiik a nger er a kerid, e dongetmokl er kid el kirel a miting er a Rekristiano. Ngkmal klou a ultutelel a lengar er ngii a beot el rolel e ngsebeched el ngmai a suobel el mengai er a Biblia.

A lmuut el ta er a uchul e ngkirel el ngar er ngii a library er kid er a blai a uldimukl er a tekoi el kmo a derta el Kristiano a kirir el “chemur choberaod, el di telechellir.” (Gal. 6:5) Sel lebo er ngii a kerid, e ngungil a bo el ngar er ngii a blekerdeled el me a kot e kede meruul a research er kid e sola e mochu oker a ker er a rebebil a lsekum e ngkmal kirel. Ngsebeched el mekeroul a duch er kid el omtab e mo medengei a tekoi el oeak a bo dekerekikl el mesuub a Tekingel a Dios e bo dungil el ousbech a library er kid er a blai.​—Heb. 5:11-14.

Me a bo denguu a klemedengei er a tekingel a Dios e kede ousbech er a ngeso er a oureor el klisichel a Jehovah me aike el klekedall el lomeskid a cheldebechellel. (Rel. 8:30, 31) A ta er aika el meklou a ultutelel el klekedall a Ongkerongel. A derta er ngii a kired el kutmokl e locha er a library er kid. Me sel donguiu er a omesodel me a otutel aika el bades er a Biblia el ngar er a babilenged, e nglocha mo soad el luchesii a ngklel a babier me a llel er a bita er a bades el ngar er a Biblia me bo el sebeched el mereched el metik er ngii er a kuk ta er a taem.

A rebebil er a rengalek a mla mongeseu er a redemerir me a rederrir el di tir el meruul a library er tir, el melatk el kirel aike el lousbech er chelechang me a ngar er a mederir el klebesei. Ngsebechir el ousbech a di tang me a lechub e ngeru el tana el smuk aike el babier el lousbech el kirel a omesubir el di tir el tang me a omesubel a telungalek er tir. Ngulterekokl el kmal klou a ultutelel a lengar er ngii a library er a blirir a Rekristiano.