Dolecholt a Omereng el Saul el kirel a Kot el Ngarbab el Sengk er a Dios
1. Ngera me kede kmal oba omereng el saul el mo er a Jehovah?
1 A olubet el lekiltmeklii a Ngelekel a Jehovah a kot el ngarbab el sengk er aike el bek el “lungil ngat” er ngii. (Jak. 1:17) Ngmo uchul a betok el klengeltengat, el uldimukl er a klausubes er a kngtid. (Efe. 1:7) Kede oba omereng el saul el kirel tiang. Sel leblsechel a Chedaol el Blsoil, e ngkired el chemoit a taem el melebedebek el kirel tia el mekreos el sengk.
2. Ngmekerang a domekeroul a omereng el saul er kid me a telungalek er kid el kirel a olubet?
2 Momekeroul er a Omereng el Saul er Kau: Ngar er aike el sandei er a uchei er a Chedaol el Blsoil er a March 30, e ngungil a mousbech er a temel a Omengull el Telungalek er kemiu el mo omelekl a tekoi el kirel a olubet, me bo el sebechiu el omekeroul a omereng el saul er kemiu el kirel. Ngdirrek el ungil a omdak el menguiu er sel ileakl el omengiuel a Biblia el kirel a Chedaol el Blsoil er a bek el sils. Di el kau el melatk el kmo ngmekerang a olubet e mlo uchul a klungiolem e ngera bla el ngedechii er a osengem el kirel a Jehovah, me kau, me a rebebil, me a ngar medam el klebesei. Ke dirrek el mo metik el kmo ngmo uchul a klungiolem a molasem aike teblo el chelitakl el bo dousbech er a Chedaol el Blsoil, el chelitakl 40 me a 44.—Psa. 77:12.
3. Kede mekera dolecholt a omereng el saul er kid?
3 Olechotel a Omereng el Saul: A doba omereng el saul el kirel a olubet e ngotbechid el mo ouchais er a rebebil el kirel a Jehovah me a klou el bltkil a rengul el uldureklii a Ngelekel. (Psa. 145:2-7) Ngar er a March, April me a May, e a bebil er a telungalek a olecholt a omereng el saul er tir el oeak a lolengeseu er a ta er tir el mo sebechel el auxiliary pioneer. A lsekum e ngdiak el sebechel e ngsebechem el “lousbech a techall” el menglou er a omesiungem? (Efe. 5:16) A omereng el saul a dirrek el rullid el mo soad el ngosuterir a rebebil el me obengked el ngar er a Chedaol el Blsoil. (Och. 22:17) Momuchel el meluches a ngklir tirke el semeriar, me a remesuub a Biblia, me a rechedam, me tirke el omdak el oureor, me a retonari er kau el soam el mengemedaol er tir, e sola mruul aike el sebechem er a ileakl el ureor er a omerusel a siotaikeng el kirel a Chedaol el Blsoil.
4. Ngoeak a ngera el rolel e ngsebeched el ungil el ousbech er a blsechel a Chedaol el Blsoil?
4 A blsechel a Chedaol el Blsoil a meskid a beches el techall el mo ochotii el mo er a Jehovah a omereng el saul er kid el kirel a sengk er ngii el mei er a klechad. Me bo dousbech er tia el taem el mo menglou e dolecholt er a omereng el saul er kid el kirel a olubet me a rokui el “diak le metuk el iltetel a Kristus.”—Efe. 3:8.