Bo Dolecholt er a Klou el Omereng el Saul er Kid
Chedaol el Blsoil el Mo er Ngii er a April 17
1. Ngera el tekoi a lulechesuar ngike el milluches er a psalm el kmal ungil el kirel a temel a Chedaol el Blsoil?
1 Ngoeak a omereng el saul er ngii el kirel a klechubechub me a osobel er a Jehovah, e ngike el milluches er a psalm a uleker el kmo: “Ng ngera sebechek el msa [Jehovah] el kirel a ikel rokui el klungiolel el mer ngak?” (Psa. 116:12) Chelecha el taem e a remesiungel a Dios a ngar er ngii a lmuut el betok el uchul e te oba omereng el saul. Betok el dart el rak er a uriul er a lemeluches aika el tekoi, e a Jehovah a milsa klechad a kot el ungil el sengk, el ngii a olubet. Me chelecha el dongetmokl er kid el mo mengedaol er a kodellel a Jesus er a April 17, e ngngar er ngii a kmal ungil el uchul e kede olecholt el kmo kede oba omereng el saul.—Kol. 3:15.
2. Ngera bebil er a tekoi el uchul me ngkired el oba klou el omereng el saul el kirel a olubet el tenget?
2 Klengeltengat el Mei el Okiu a Olubet el Tenget: Ngoeak a olubet el tengetengel a Jesus, e ngmo sebechel el ‘musubes a kngtid.’ (Kol. 1:13, 14) E tiang a rullid el mo mengull er a Jehovah el oba klikiid el ukltked. (Heb. 9:13, 14) Ngsebeched el oldeu a rengud er a techelled el mengedecheduch er a Jehovah sel debo er ngii el oeak a nglunguuch. (Heb. 4:14-16) Me tirke el otuil a klaumerang er tir er a olubet el tenget a mo er ngii a klou el omeltkir el mo nguu a klengar el mo cherechar!—Jn. 3:16.
3. Kede mekerang e ochotii el kmo kede oba omereng el saul el mo er a Jehovah el kirel a olubet el tenget?
3 A Rolel a Dolecholt a Omereng el Saul: A ta er a rolel e kede olecholt er a dmolech el omereng el saul er kid a oeak a donguiu er a omengiuel a Biblia el kirel a Chedaol el Blsoil er a bek el sils e dolebedebek er ngii. Ngdirrek el sebeched el ouchais er a Jehovah el okiu a nglunguuch el kmo kede kmal oba klou el omereng el saul el kirel a olubet el tenget. (1 Th. 5:17, 18) Kede dirrek el olecholt a omereng el saul sel debo er a Chedaol el Blsoil el oltirakl er a omellach er a Jesus. (1 Ko. 11:24, 25) Ngsebeched el oukerebai er a klou el bltkil a rengul a Jehovah e ouetkeu er a rebetok el chad el me obengked.—Isa. 55:1-3.
4. Ngkirel el mo ua ngerang a blakerreng er kid?
4 Tirke el mesiungel a Jehovah el oba omereng el saul a diak bo lomes er tia el Chedaol el Blsoil el ua el kuk di ta er a miting. Tiang a kmal klou a ultutelel el miting el ngar er ngii er a bek el rak! Me sel lolekedang a temel a Chedaol el Blsoil, e a blakerreng er kid bo el uai ngike el milluches er a psalm el millekoi el kmo: “Moldanges er a [Jehovah], kaul renguk, e lak mobes el kmo ng ua ngeral bekokuii.”—Psa. 103:2.