Ngmo er Ngii a Klou el Ocholt
1. Me nguldimukl er a cheldecheduch, e ngera dirrek el mo mechas a rengrir er ngii a rechad el mei er a Chedaol el Blsoil? Mosaod.
1 Er oingerang? Sel kesus er a Chedaol el Blsoil. Ngmileketmokl a klou el ureor el mo mengemedaol er a rechad el me obengked er seikid el taem. Aike el tekoi el lorrenges a diak el di el ikeikid a mo mechas a rengrir er ngii. A uriul er a lebo er a Chedaol el Blsoil a ta el redil, e ngmillekoi el kirel a omeruul el lulemes el kmo ngmle ungil a blekerdelir a rechad, e dirrek el kmal mle klebokel e ungil el kltmokl a basio. Me a leuaisei, e kid el rokui el uldimukl er ngike el odam el mengedecheduch, a kired el mo kaingeseu el ochotii a ungil el ocholt er tia el kmal klou a ultutelel el taem er a chelsel a ta el rak.—Efe. 4:16.
2. Ngmekerang e sebechel a derta er kid el mo ungil el ocholt el mo er tirke el mei er a Chedaol el Blsoil?
2 Bo Mungil el Outkeu er Tirke el Mei: A ungil el cheldechedechad me a klikm er kid el outkeu er tirke el mei a mo uchul a ungil el ocholt. (Jn. 13:35) Me alta ngdiak el sebechem el mengedecheduch er a rokui el chad, engdi ngdirk sebechem el outkeu er tirke el kiei er bita er kau. (Heb. 13:1, 2) Bo el biusech a medam er tirke el mlei el diak a chad el lodengelii. Sel taem er a dorous a siotaikeng e te locha ngilai a babilengir. Me nglocha sebechem el oker el kmo, “Ngketengem el mei?” Molengit er ngii el mo dengchokl er bita er kau, e mouchais er ngii el kmo ngsebechem el onger a keril a lengar er ngii. A lsekum a ongdibel er kau a kirel el mereched el merael er sel basio me bo el sebechel a ta er a ongdibel el ousbech er ngii, e ngsebechem el melekoi el kmo: “Ngkmal soak el mo medengelii a uldesuem el kirel tia el prokuram. Ngmekerang e sebeched el lmuut el mo chadecheduch?”
3. Kede mekerang a doutkeu er tirke el oudeleokl a omesiungir?
3 Moutkeu er Tirke el Oudeleokl a Omesiungir: Tirke el oudeleokl a omesiungir, el uldimukl er tirke el kuk di mei er a temel a Chedaol el Blsoil er a bek el rak a ulterekokl el me teloi er kid. Moutkeu er tir e mouchais er tir el kmo ngmera el dmeu a rengum el omes er tir. (Rom 15:7) A remechuodel a sebechir el mo er a blirir er a uriul el mo melisiich er tir el lmuut el me teloi er a ongdibel. Ngar er a nglunguched e kede oureng el kmo tirke el mei er a Chedaol el Blsoil a mo mengebkall er a Dios e le tir el ‘omes a ikel ungil lomerelled’ el diak el di loruul el uaisei loeak aike el bla lerenges e lemerekong.—1 Pe. 2:12.