Chisel a Renged No. 38 el Bo Dorous er Ngii er a December!
1. Ngera kerrir a rechad el kirir a rulekoad, e mekerang e monger aika el ker er a December?
1 A kodall a cherrouir a rokui el chad, alta ngkakerous a klaumerang er tir. (1 Ko. 15:26) A rebetok a sorir el mo medengei el kmo te ngar ker a rulekoad e sebeched el lmuut el mo mesterir me a lechub e ngdiak. Seikid a uchul me a ongdibel el meliuekl er a beluulechad el rokir a mo ta el buil el lorous er a Chisel a Renged No. 38 el dai er ngii a kmo Ngmera el Sebechir a Rulekoad el Lmuut el Me Ngar? Tia el ileakl el ureor a mo omuchel er a December 1. Uriul er tiang, e tia el Chisel a Renged No. 38 a bo dorous er ngii el ua tract sel doldingel obliil.
2. Ngua ngerang a oketmeklel a Chisel a Renged No. 38?
2 Ngua Ngerang a Oketmeklel: A Chisel a Renged No. 38 a sebeched el dour er a belngel me ngmo chemolt a dai me aike el tekoi el “Ke mo onger el kmo . . . chochoi? ngdiak? nglocha sebechir?” Me a chad sel bisii tia el Chisel a Renged, e ngmo omes aike el lolekoi a Biblia el onger er tia el ker me a telbilel a Biblia el kirel. Ngdirrek el mo omes aike el uchul me ngsebechel el oumerang er a Biblia. A ikrel tia el Chisel a Renged a oker er a ungil el ker el bo lolebedebek er ngii e olengit er ngii me bo losuub a lmuut el betok.
3. Ngmekerang a bo dorous er a Chisel a Renged No. 38?
3 Rolel a Bo Dorous er Ngii: Tia el ureor a di ua teletelel a dorous a invitation el kirel a Chedaol Blsoil me aike el meklou el ongdibel er kid. A remechuodel a mo omekrael er a rolel a doureor er a basio el doldingel er ngii, el oltirakl er sel babier el lengiluu er a April 1, 2013. Aike el ongdibel el di mekekerei a basio el loldingel er ngii a sebechir el olengeseu aike el kmeed el ongdibel el meklou a basio el loldingel er ngii. Me sel bo molai a Chisel a Renged No. 38 er kemiu, e di mngai aike el sebechem el ousbech el ta el sandei. Me a uriul er a bla dorous er tia el Chisel a Renged er a rokui el blai, e ngsebeched el merous er ngii er a basio er a buai. Me a lsekum e kede mla remous a rokui el Chisel a Renged er a uchei er a ulebengelel a buil, e ngsebeched el merous er sel babier el kired el merous er ngii er a December. Ngar sel kot el Sebadong, e kede di mo teloi er tia el ileakl el ureor er a bai domuchel a omesubel a Biblia. E sel Sebadong me a Sandei, e ngsebeched el dirrek el merous a magazine. Kau ke mo kutmokl a chelsengum me bo el sebechem el mo teloi er tia el ileakl el ureor?