Bo Dongemedaol er a Rechad

1. Ngoingerang e ngmo omuchel a omerusel a invitation er a ileakl el ongdibel er kid?

¹ A lsekum ke mla choitii a klou el temem me a ududem el meruul er a ileakl el blengur el kirir a resechelim me a lechub a rechedam, e ke locha kmal mo blak a rengum el mengemedaol er tir el mei. Me nguaisei, ngkmal klou el ureor a mla mechoit el mengetmokl er a mur er a Tekingel a Dios el mo er ngii er a merael el mei el ileakl el ongdibel (regional convention) er kid. Me a edei el sandei er a uchei er a lomuchel tia el ongdibel, e a Jehovah a mo meskid a techelled el mengemedaol er a rebebil el mei. Ngera sebechel el ngosukid el mo blak a rengud el merous a invitation?

2. Ngera ngosukid el mo blak a rengud el teloi er tia el ureor el mengemedaol er a rechad?

² Ngmo blak a rengud el teloi er tia el ureor a lsekum e kede melebedebek a klungiaol el bo dengai er a osisechakl el lomeskid a Jehovah el okiu aika el ongdibel. (Isa. 65:13, 14) Lak dobes el kmo a urered er a bek el rak el mengemedaol er a rechad a ngar er ngii a leketmeklii. (Momes er a baks el “Ngar er Ngii a Lekiltmokl.”) A rebebil er a rechad el dongemedaol er tir a me obengked e a rebebil a kuk diak. Me alta ngdiak dodengelii a ildisir a rechad el mei, engdi a blakerreng er kid er tia el ureor a mo odengesii a Jehovah el kirel a omerellel el kmal bekururau.—Psa. 145:3, 7; Och. 22:17.

3. Ngmo ua ngerang a omerusel aika el invitation?

³ A derta el chelechad er a remechuodel a kirir el merriter er a rolel a ongdibel a bo loruul er a klou el omerusel aika el invitation, el uldimukl er a kmo kede omechei er aike el blai el diak a chad er ngii me a lechub e kede merous sel dousioning er a buai. Sel sebadong me a sandei e ngsebeched el merous a babier el obengkel a invitation. Me sel bo el merek tia el ureor, e ngkmal mo dmeu a rengud e le ngmle blak a rengud el teloi er tia el ureor el milengemedaol er a rebetok el chad el me mosisechakl er a Jehovah!

Ngar er Ngii a Lekiltmokl

A sesei el rak er a uchei e a ta el odos el mle teloi er a omerusel a invitation, a ulemdasu el kmo nglocha ngdiak a ngera el leketmeklii tia el ureor. Ngmillatk el kmo, ‘A rechad te locha mo kongei el me teloi er kid er tia el ongdibel?’ Sel tutau er a Sebadong e ngmilsang a ta el chad er a klechelid er a Sikh el dengchokl me ngmlo mengedecheduch er ngii e mlo medengei el kmo ngika el chad a mlei e le ngngiluu a ta er a invitation er kid. Ngmle betok a keril el mlo sebechel ngika el odos el onger. Me ngika el chad a dilu el kmo ngkmal dmeu a rengul el orrenges a prokuram e dirrek el kmal chilat er kid el kirel a rolel a doubail me a ungil el omerelled. Uriul er tiaikid el osisiu el sils e ngika el odos a mlo mengedecheduch er a ta el obekel el dilengchokl er bita er ngii. Tirkang a dirrek el ngiluu a invitation e mlo sebechir el mei el ngar er a bus. Ngkmal mle dmeu a rengrir er tia el ongdibel me te millatk el lmuut el mong er a Sandei. Me ngika el odos a mlo melechesuar el kmo ngkmal klou a ultutelel aika el omerusel a invitation.
Ngar er a ta er a klou el ongdibel e a ta el obekel el regular pioneer a mlo mengedecheduch er a ta el mechuodel el obekel el mle ketengir el mo er tia el ongdibel. Me tirka el pioneer a uleker er tir el kmo, “Ngtechang a milengemedaol er kemiu?” Me te dilu el kmo, “Aki mle remei e miltik er a invitation el ngar cheungel a chesimer.” Me te chiliuii e dirrek el liluches a tekoi el sorir er sel coupon el ngar er a ikrel. Me a rebebil el Sioning el mla er tia el ongdibel a milsterir a kelir tirka el obekel. Te kmal mle dmeu a rengrir el orrenges a prokuram e mlo sorir el mo er a ongingil el sils. Tiang a mlo uchul e ngmlo sebechir a rebebil er kid el mo oldingel er tir er a uriul.