A Omerusel a Siotaikeng er a Chedaol el Blsoil a Omuchel er a April 2
1. Kede mo merous er a siotaikeng er a Chedaol el Blsoil er oingerang, e ua ngerang a klungel a ultutelel a omerusel tia el siotaikeng?
1 Ngomuchel er a April 2 el mo er a April 17, e kede mo merous a siotaikeng er a kot el klou a ultutelel el tekoi el mo er ngii er chelecha el rak, el ngii a Chedaol el Blsoil el kirel a kodellel a Kristus. A ngar er a mong, e te betok el semeriar el chad a mle teloi er kid el mengedaol er tia el ileakl el tekoi. El uai tiang, ngar sel osisiu el sils er a Chedaol el Blsoil, e a ta el redil a ulemekedong er a obis er a branch er kid e dmu el kmo: “Ngak tia el dirk mle remei e milsang a siotaikeng el ngar cheungel a chesmerel a blik. Ngkmal soak el mong, engdi ngdiak kudengelii a taem.” Me a odam el milengedecheduch er ngii a ulechotii a rolel e ngsebechel el mo medengelii a temel tia el Chedaol el Blsoil. Me ngika el redil a milmesumech e tilbir el mo er ngika el odam el kmo: “Ak kmal mo er tia el miting er a kebesengei!”
2. Ngera sebeched el melekoi sel dorous er tia el siotaikeng?
2 Sel Rolel a Doruul er Tia el Tekoi: Ngii el kedeb a temed el rokir a basio el doldingel er ngii a uchul me ngungil a di el kedeb a cheldechedechad. Ngsebeched el melekoi el kmo: “Alii. Ngkmal somam el ouetkeu er kau me a telungalek er kau el me teloi er kemam el mengedaol er tia el kmal klou a ultutelel el tekoi el ngii a mo meketmokl el meliuekl er a beluulechad er a Sandei el April 17. [Modersii a siotaikeng el mo er ngii.] A temel tia el Chedaol el Blsoil a sel sils el lemlad er ngii a Jesus. Ngmo er ngii a diak el ocheraol el cheldecheduch el mesaod er a rolel e ngsebeched el mo ngmai a klungioled er a olubet el tengetengel a Kristus. Tia el siotaikeng a olecholt er a taem me a basio el lebo er ngii tia el Chedaol el Blsoil.”
3. Ngmekerang e mo sebeched el mengemedaol er a rebetok el chad el mei er tia el ileakl el sils?
3 A lsekum a ongdibel er kid a ngar er ngii a klou el basio el loldingel er ngii, e a remechuodel a sebechir el omekrael er a rechad el mo mechei a siotaikeng er aike el blai el diak a rechad er ngii, engdi ngkirir el mechei er aike el basio el diak a rengodech el chad el sebechir el mes. Ngdirrek el ungil a douetkeu er tirke el mle semeriar, me a rechedad, me a rechad er a urered me tirke el dedak el ngar er a skuul me tirke el kuk di dekaodengei. Me sel bo dorous er tia el siotaikeng sel le Sebadong me a le Sandei, e a lsekum e ngsebechel e ngungil a dorous a makesin el obengkel. Me kau ngsebechem el mo auxiliary pioneer er a Ongeua el Buil me lebo er ngii a techellem el mo teloi er tia el ureor el uchul a deuil a rengud?
4. Ngera uchul me ngsoad a resemeriar el chad a lemei er a Chedaol el Blsoil?
4 Tirke el semeriar el me teloi er kid a ulterekokl el mo mesang a kmal klou el ocholt el kirel tia el Chedaol el Blsoil! Te mo remenges a chisel a klou el bltkil a rengul a Jehovah er a lebeskid a olubet el tenget. (Jn. 3:16) Te mo suubii el kmo ngmekerang a Rengedel a Dios e mo uchul a klungiolel a klechad. (Isa. 65:21-23) Ngdirrek el mo er ngii a techellir el mo ouchais er tirke el odam el omtebechel el kmo ngsorir el mesuub a Biblia el mo medengei a lmuut el betok. Me ngngar er a nglunguched e kede olengit me a resemeriar el chad bo el kengei er tia el siotaikeng e be el teloi er kid el mengedaol er tia el Chedaol el Blsoil!