A Ureor el Mo Ouchais el Kirel a Chedaol el Blsoil a Omuchel er a March 17
1. Ngera el ureor a mo omuchel er a March 17?
1 A Chedaol el Blsoil el ngar er ngii er a bek el rak a ouchais el kirel a kodellel a Jesus. (1 Ko. 11:26) Sei a uchul me ngsoad a rechad a be lobengked e lorrenges el kirel a olubet el sengk er a Jehovah. (Jn. 3:16) Chelecha el rak, e a urered el mengemedaol er a rechad el mei er a Chedaol el Blsoil a mo omuchel er a Sebadong el March 17. Kau ke melatk el mo meruul aike el sebechem er tia el ureor?
2. Ngera sebeched el melekoi sel dorous er a siotaikeng?
2 Aike el Bo Dolekoi: Ngungil a di lekedeb a cheldechedechad. Nglocha sebeched el melekoi el kmo: “Alii. Aki mlei el me omeskemiu tia el siotaikeng el kirel a kmal klou a ultutelel el tekoi el mo meketmokl el meliuekl er a beluulechad el rokir er a April 5. Ngmo er ngii a diak locheraol el cheldecheduch el mengai er a Biblia el mo mesaod el kmo ngerang ngkiltmeklii a kodellel a Jesus, e ngera ngmeruul er ngii a Jesus er chelechang. Tia el siotaikeng a mo ochotii a basio me a taem el lebo er ngii tia el tekoi.” Sel dorous er tia el siotaikeng er a Sebadong me a Sandei, e ngdirrek el kired el merous a makesin a lsekum e ngungilbesul.
3. Kede mekerang e mengemedaol er a rebetok el chad?
3 Mongemedaol er a Rebetok el Chad: A turrekong er kid a soad el mengemedaol er a rebetok el chad. Me a leuaisei, e bo leblak a rengud el mengemedaol er tirke el mesuub a Biblia, me a remle semeriar, me a rechedad, me a rechad er a urered, me tirke el dedak el ngar er a skuul, me a retonari er kid, me a rekuk di dekaodengei el chad. A remechuodel a mo meskid a ulekrael el kirel a rolel a doureor er a basio el doldingel er ngii. A urered el mengemedaol er a rechad el mei er a Chedaol el Blsoil er a bek el rak a ngar er ngii a leketmeklii. A ta el redil er a lsiseb er a blil a kldibel er tia el mlo merek el rak, e a ta el odam a mle soal el ngosuir el osiik er ngike el Sioning el milengemedaol er ngii el mei. Nguaisei, engdi ngii el redil a dilu el kmo ngdimlak a chad el lodengelii e le ngdirk ngiluu a siotaikeng er ngii er a chad el uleldingel a obliil er seikid el sils.
4. Ngera bebil er a uchul me ngkired el mo blak a rengud el teloi er tia el ureor?
4 Alta e a chad a mei er a Chedaol el Blsoil e le ngsiotaikeng el bilecherei er a blil a uchul. Me a lekengei el mei me a lak, engdi a blakerreng er kau a mo uchul a ungil el ocholt. Aike el siotaikeng el morous a mo olecholt el kmo a Jesus a mesisiich el King er chelechang. A blakerreng er kau el teloi er tia el ureor a mo ochotii el mo er a rokui el chad, el ileakl a Jehovah el kmo, ke kmal oba omereng el saul el kirel tia el sengk er a olubet.—Kol. 3:15.