Siotaikeng er a Chedaol el Blsoil el Mo Ruikl er a Beluulechad el Rokir!
1. Ngera el tokubets el ureor a mo meketmokl er a beluulechad el rokir er a uchei er a Chedaol el Blsoil?
1 “Me ko mo meruul el uaisei el omekltkiu er ngak.” (Lk. 22:19) A lolengesenges er tia el omellach el mla er a Jesus, e a remesiou er a Jehovah a mo obengterir a resemeriar er a March 30, 2010 el mo mengemedaol er a kodellel a Jesus. A ileakl el siotaikeng el mo er a Chedaol el Blsoil a mo ruikl er a beluulechad el rokir el omuchel er a March 13 el mo lmuut er a March 30.
2. Ngmekerang e sebeched el merous er tia el siotaikeng?
2 Rolel a Doruul er Ngii: Nglocha sebechem el nguu a siotaikeng el msang a chad er a blai me bo el sebechel el mesa siasing el ngar er a medal, e sola e mdu el kmo: “Sel kebesengei er a March 30, e a rebetok el miliol el chad el meliuekl er a beluulechad el rokir a mo mengemedaol er a kodellel a Jesus. Ak mlei el me omeskau me a telungalek er kau tia el siotaikeng me bo el sebechiu el mei. A resechelim me te dirrek el sebechir el mei.” A lsekum e ngdi ungilbesul, e nglocha sebechem el lochotii a Bades el mesaod el kirel a uchul me kede mengemedaol er tia el tekoi me a taem me a basio el mo er ngii. Engdi ngdiak mobes el kmo ngdi kedeb a temed el rokir a basio el doldingel er ngii, me ngungil a lekedeb a cheldechedechad.
3. Te rua techang a sebechem el mengemedaol er tir?
3 A lsekum a ongdibel el omngar er ngii a klou a basio el loldingel er ngii, e a remechuodel a sebechir el kongei er kau me ke mechei a siotaikeng er aike el blai el diak a rechad er ngii sel omkot el mong. E a lsekum e ngdi ungilbesul, e besterir a babier el obengkel a siotaikeng. Lak mobes el mengemedaol er tirke el semeriar, me a remesuub a Biblia, me tirke el omdak el oureor, me tirke el omdak el ngar er a skuul, me a rechedam me a retonari er kau, me a rekuk di mkaodengei el chad.
4. A doba omereng el saul el kirel a bltkil a rengul a Jehovah el milskid a olubet ngotbechid el mo meruul a ngerang?
4 Mketmeklau el Mo Menglou er a Omesiungem: A blsechel a Chedaol el Blsoil a kmal ungil el taem el sebechem el mo menglou er a omesiungem. Ngsebechem el ngodechii a temem me bo el sebechem el auxiliary pioneer? Ngar er ngii a rengelekem me a lechub e te mesuub a Biblia el obengkem el olengeriakl er a tekoi er a klereng? A leuaisei, e mongedecheduch er a remechuodel a lsekum e ngsebechir el mo teloi er tia el tokubets el ureor el ua dirkak el metecholb el chad el mla mo oldingel a obliil. A omereng el saul er kid el kirel a bltkil a rengul a Jehovah el milskid a olubet a otbechid el mo er a Chedaol el Blsoil e dirrek el mo mengemedaol er a rebetok el chad el me dmak el obengked.—Johanes 3:16.