Kerrir A Rechad

◼ A redil el omerk er a klumech ngkirel melekedek er a bdelul a lsekum a sechal el omerk er a klumech a obengkel el ngar er a omesubel a Biblia er a medal a tuangel?

A redil el omerk er a klumech sel losuub a Biblia el obengkel a chad e a sechal el omerk er a klumech a obengkel, e ngkirel el melekedek er a bdelul. (1 Ko. 11:​3-​10) A July 15, 2002, el The Watchtower er a 27 el llel, a mesaod el kmo: “Tiang a mla moterekokl el omesubel a Biblia el loungerachel er ngii ngike el miluchelii tia el omesuub. Ngar er aika el blekeradel, e sel omesuub a di ua lengar er a chelsel a blil a ongdibel. Me a lsekum a mla metecholb el redil a mesuub el obengkel a chad e a mla metecholb el sechal a ngar sei, e ngkirel el dokedekii a bdelul.” Tia kirel el motirakl a lsekum a omesuub a ngar er a chelsel a blai, ngar er a medal a tuangel, me a lechub a kuk ta er a basio.

Engdi a lsekum a omesubel a Biblia er a medal a tuangel a dirkak lemoterekokl, e a odos a diak lolekedek er a bdelul a lsekum a sechal el omerk el kirel a Renged a obengkel, el mo lmuut me a lsekum a moktek er tia el odingel a mo ochotii a rolel a omesubel a Biblia me a lechub e ngomesodel a suobel el ngar er a ta er aike el babier el dousbech el mesuub. A omesubel a Biblia er a medal a tuangel a diak di lemereched el meketmokl, e ngbai okiu a deblechoel el oldingel er tirke el semeriar, me tirke el omerk er a klumech a kirir el omtab a blekeradel me bo el sebechir el mo medengei el kmo ngoingera el taem e ngkirir el dokedek a bderrir.