Beches el Video el Kirel a Domuchel a Omesubel a Biblia

Te betok el chad a mla mesa sel kedeb el video el dai er ngii a kmo Ngera Me Ngkirem el Mesuub er a Biblia? el ngar er a jw.org. Tia el video a mileketmokl el mo melisiich er a resemeriar el chad el mo kongei er a diak locheraol el omesubel a Biblia. Ngsebeched el metik er ngii el okiu a debetir a “Molengit er a Omesubel a Biblia” el ngariou er a home page me a lechub e kede scan er a QR (quick response) code el llechukl er a ikrel a derta er aike el beches el tract er kid. Aikaikid a bebil er a rolel e ngsebeched el ungil el ousbech er tia el video.

Sel moldingel er a chad el semeriar, e molekoi er ngii el kmo: “Ngsebechek el ochotii tia el kedeb el video el mesaod er a rolel e ngsebechem el metik a nger er aike el kerim el kirel a Biblia?” A lsekum e ngkongei, e mochotii a video el ousbech er a mobile device er kau me a lechub a computer er ngii.
Me a lsekum e kede merous a ta er aike el beches el tract er a taem el diak doldingel me a lechub e kede oldingel er a buai, e ngsebeched el tutkii a QR code e melisiich er a chad el mo scan er ngii el ousbech er a mobile device er ngii. Ngar er a betok el omelekoi e sel debetir a QR code e ngoikid el mo er a video el ngar er a Web site er kid, me nglocha sebeched el orrael er tia el video er sel basio el dengar er ngii el ousbech er a mobile device er kid.
Mouchais er tirke el omdak el oureor, me tirke el omdak el ngar er a skuul, me a rechedam me a rekuk bebil er a rechad el kirel tia el video e mochotii el mo er tir. Me a lechub e ngsebechem el e-mail er a link el mo er tia el video, e molengit er tir el mo omes er ngii er a uriul.

Me sel bo dungil el ousbech er tia el beches el tekoi, e ngmo sebeched el omuchel a lmuut el betok el omesubel a Biblia el obengterir tirke el “kirir el mo nguu a diak a ullebengelel klengar” e ngosuterir el mo er ngii a deleuill er tir me a Dios.—Rel. 13:48, BT.