Mousbech er a jw.org el ngar er a Omesiungem

A Web site er kid a kmal klou a ultutelel el dongu el sebeched el ousbech er ngii el merkii a ungil chais el mo er a “bek el beluu er a beluulchad.” (Rel. 1:8) A ruumesingd el chad er a blai a diak el sebechir el di tir el metik er a jw.org. Te bai di mo medengelii er a uriul er a re publisher a lochotii el mo er tir.

A ta el odam el oldingel a ongdibel a mla download er sel video el Ngera Me Ngkirem el Mesuub er a Biblia? el mo er a dengua er ngii e olecholt er ngii er a bek el techellel. El ua tiang, sel loldingel a obliil, e ngdmu el kmo: “Ak di oldingel el olengeseu er a rechad el mo metik a nger er a kldei el meklou a ultutelel el ker: Ngera uchul me a beluulechad a kmal betok a mondai er ngii? Ngmekera Dios a bo losmechokl? E mekerang a doutekangel er chelechang? Tia el kedeb el video a mo mesaod aika el ker.” E metir me ngmerael e ngii a omes er a medal a chad er a blai. Tia el video a kmal olechau a ues me a ruumesingd el chad a diak el mengai a mederir er ngii el mo lmuut er a bo lemerek. E sola e ngii el odam a dmu el kmo: “Ke dirk rirenges el kmo ngsebechem el olengit a omesubel a Biblia er a Internet. Engdi ngak tia el ngar tiang, me ak mo ochotii a kedeb el olechotel.” E a lsekum a chad er a blai a kongei, e ngochotii a rolel a omesuub el ousbech er a Ungil Chais el brochure. E a lsekum ngdiak a temel a chad er a blai, e ngkutmeklii a taem el sebechel el lmuut el mo oldingel er ngii. Sel lebo er a blil a kohi er a temel a ulengull, e ngdirrek el ousbech er tia el osisiu el rolel el omuchel a cheldechedechal el mo er a chad el dengchokl er bita er ngii . Me kau ke ousbech er a jw.org el ngar er a omesiungem?