Rolel a Dengesuterir Tirke el Meringel er Tir el Menguiu

1. Ngera el omelsemai a mo er ngii sel dolisechakl a Biblia el mo er tirke el meringel er tir el menguiu?

¹ A rechad el doldingel er tir el meringel er tir el menguiu a locha sorir el mo medengei a Tekingel a Dios, engdi te locha mo medakt sel leues a Biblia me a kuk bebil er a babier. Me a lsekum e kede di kot e omesterir a Biblia Olisechakl el babier, e nglocha mo meringel er tir el chiuii. Me ngmekerang a dengesuterir tirka el chad el mo medengelii a Biblia? Aki uleker er a rengar er ngii a duch er tir el publisher er a kuk betok er a 20 el kakerous el beluu el kirel aike el tekoi el loruul. Aikaikid a uldesuir.

2. Ngera bebil er a babier el sebechel el ngosuir a chad el meringel er ngii el menguiu?

² Me a lsekum a chad el mesuub a meringel er ngii me a lechub e ngdiak el sebechel el menguiu, e ngsebechem el omuchel el oba brochure, el Listen to God me a lechub a Molengesenges er a Dios Me Bo Mkiei el Mo Cherechar. A ta el pioneer er a beluu er a Merikel a ocholt aika el teblo el brochure e sola e oker er a chad er sel soal el mo menguiu er ngii. A branch office er a Kenya a melekoi el kmo aika el babier a kmal ungil e le ngar er a beluu er a Africa, e a rolel a lemosisechakl a tekoi a rechad er a uchelel el mei a okiu a medung er a ngor el cheldecheduch er a bai lokiu a ker me a nger. Me alta e a chad el ngar er ngii a skulel a sebechel el kongei er a omenguiu el obengkel a ker, engdi tiang a sebechel el mo meringel er a chad el diak a kmal skulel. Me a lsekum ngike el chad el mesuub a sebechel el telkib el menguiu, e a rebetok el publisher a omuchel el ousbech a babier el Ungil Chais el Mla er a Dios! me a lechub a Ngsebechem el Mo Sechelil a Dios! me a lechub A Babilengek el kirel a Cheldecheduch er a Biblia.

3. Ngera el sekutaberreng a kired el obang el kirir tirke el diak el sebechir el menguiu, a mo ngosukid el mo meduch el lolisechakl er tir?

³ Mchetengii: Tirke el dirkak losuub el mo menguiu a locha mo merur, e a rebetok er tir a diak el sal ungil a uldesuir el kirir. Me sel dengesuterir el mo diak lomdasu el uaisei, a kot el bakes me bo el sebeched el osisecheklterir er a klemerang. A rebetok el chad el diak el sebechir el menguiu a mellomes a rengrir e sebechir el mesuub a tekoi. Mochotii a omengull me a omelengmes el kirir. (1 Pe. 3:​15, 16) Tiang a mo melisiich er tir el mo melemolem el mesuub a lsekum te melechesuar el kmo a omelasem el lerirellii a mla er ngii a belkul me tir a olengeriakl er a omesubir er a tekingel a Dios. Me bo bekokeuii sel omchat er tir.

4. Ngmekerang a dolisiich er tirke el telkib el meduch el menguiu el mo mengetmokl el kirel a omesubir?

⁴ Me a lsekum e ngika el mesuub a ngar er ngii a telkib el dechal er a omenguiu, e molisiich er ngii el mo mengetmokl el kirel a omesubel. A rebebil el publisher er a South Africa a melisiich er tirke el mesuub el mo olengit er a ta er a chedal a telungalek me a lechub a sechelirir el meduch el menguiu me lengesuterir. A publisher el ngar er a Britain a melisiich er tirke el mesuub el mo mengetmokl el kirel a omesubir, sel lebechititerir me lousbech er a babilengel e losuub a bebil el parakurab er a temel a omesubir, me bo el sebechir el mesa el kmo ngkmal beot a bo lebetik a nger sel le underline. A ta el odam el ngar er a India a melisiich er tirke el mesuub el mo omes a siasing el ngar er a suobel el bo losaod er ngii er a ongingil el sandei e lolebedebek el kirel er a uchei.

5. Ngmekerang a dolecholt a kllourreng sel dosuub el obengkel a chad?

⁵ Moba Kllourreng: Me a ngii di el babier el mousbech er ngii, e di momes aike el meklou a belkul el suobel, e mngesuir ngike el mesuub el mo ungil medengelii a belkul el suobel. Sel momuchel, e ngungil a di mosaod er a suobel el 10 el mo er a 15 el bung. Lak molasem el mesuub a betok el suobel, e bai mosaod a bebil el parakurab er a bek el omesubiu. Moba kllourreng a lsekum ngike el mesuub a meoud el menguiu. Ngulterekokl el mo melemolem el mo ungil a duch er ngii er a omengiuel sel lomekeroul er a omereng el saul el mo er a Jehovah. Me a bo mngesuir ngike el mesuub el mo meruul er tiang, e ngungil a mongemedaol er ngii el mei er a miting er a uchelel a omesubel.

6. Ngmekerang a dengesuterir a rechad el mo meduch el menguiu?

⁶ A lsekum tirke el mesuub a Biblia a mo meduch el menguiu, e te mo mereched el olengeriakl er a omesubir. (Psa. 1:​1-3) A rebetok a mla ngosuterir tirke el losuub el obengterir el ousbech er a brochure el Apply Yourself to Reading and Writing er a sesei el bung er a uriul er a omesubir. Me a lsekum e ngmo mechitechut a rengul ngike el mesuub, e nglocha sebechem el melisiich er ngii el oeak a omosaod a bebil er a tekoi el mla mo sebechel el meruul. Moterekeklii el mo er ngii el kmo a Jehovah a mo omekngeltengat a omelasem er ngii, e molisiich er ngii me loluluuch el kirel a ngeso. (Osi. 16:3; 1 Jn. 5:​14, 15) A rebebil el publisher er a Britain a melisiich er tirke el mesuub el obengterir el mo mengetmokl aike el sebechir el otaut e dirrek el olengeriakl er ngii el turrekong, el locha mo medengei a blechebechel a llechukl el ua abc, e losiik e longuiu a mlengilt el bades, e longuiu aike el beot a omesodel el babier el mengai er a Biblia. A dengesuterir a rechad el mo meduch el menguiu a blechoel el uldimukl er a dolisiich er tir el mo sorir el meruul er ngii, el diak di dosisecheklterir er a rolel a loruul er ngii.

7. Ngera me ngdiak el kired el omai er a rengud el ochotii a klemerang el mo er tirke el meringel er tir el menguiu?

⁷ A Jehovah a diak el metengel a osengel el kirir tirke el diak a kmal skulir. (Job 34:​19) A Jehovah a merriter er a rengul a chad. (1 Kr. 28:⁠9) Me lak momai er a rengum el ochotii a klemerang el mo er tirke el chad el meringel er tir el menguiu. Ngbetok a ungil el babier el sebechem el ousbech el mo omuchel er tiang. E a cherengel a taem, e ngsebechem el mo mesuub er a Biblia Olisechakl el babier e omsang a mui el klemedengei er a Biblia.