Chelecha el Mei el Blsechel a Chedaol Belsoil, e Kau Ke Mo Oukerebai er a Klemeriarreng er a Jehovah me a Jesus?
1. A Resioning er a Jehovah te melasem el mo er a tkurrebab el sebechir el mo mekerang er sel blsechel a Chedaol Belsoil?
1 A Jehovah a kmal semeriar el mo mengetmokl a moktek er ngii. A Isaia 9:7 a melekoi el kirel a bebil er a klengeltengat er a Rengedel a Dios el kmo: “A RUBAK el Olab a Bek el Klisiich a mla tibir er a rengul el mo meruul a ikal rokui.” Me ngdi osisiu, sera loruul er a omesiungel er tia el chutem, e ngika el Ngelekel a Dios a ulechotii a klou el klemeriarreng el kirel a mera el omengull. (Jn. 2:13-17; 4:34) A bek el rak er a temel a Chedaol Belsoil, e a rebetok el miliol el omerk er a klumech el meliuekl er a beluulechad el rokir a melasem el mo er a tkurrebab el sebechir el oukerebai er a klemeriarreng er a Jehovah me a Jesus el oeak sel longlou er a omesiungir. Kau ke mo ta er tir?
2. A klemeriarreng ngrullid el mo meruul a ngerang el omuchel er a March 7?
2 Ureor el Kirel a Chedaol Belsoil: A ureor el mo ouchais el kirel tia el Chedaol Belsoil er chelecha el rak a mo omuchel er a Sebadong, el March 7. Mongetmokl er kau er chelechang me bo el sebechem el mo semeriar el mo teloi er a ureor er a berkel a klumech. A ongdibel a kmal semeriar el mo teloi er tia el ureor el mo meruul aike el sebechir el rukui aike el basio el bo loldingel. Bo leblak a rengum el mengemedaol er a rechad el mosuub a Biblia el obengterir, tirke el semeriar el chad el moldingel er tir, rechad er a urerem, rechedam, me tirke el omdak el ngar er a skuul, el oeak sel momesterir a invitation me a lechub e ke ousbech er a jw.org.
3. Ngmekerang a bo donglou er a omesiunged er a March me a April?
3 Auxiliary Pioneer: A klemeriarreng a dirrek el melisiich er kid el mo menglou er a omesiunged. Ngulterekokl el betok el chad a mo sebechir el auxiliary pioneer er a March me a April, e le ngmo er ngii a techellir el oldingel el di melai a 30 el sikang. Me sel temel a omengull el telungalek er kemiu me a lechub a omesubem el di kau el tang, e bo mkerekikl el mo meluluuch el kmo ke mekerang e mo sebechem el meruul er tiang. (Osi. 15:22) A klemeriarreng er kau el kirel tia el ureor a sebechel el rulleterir a rebebil el mo blak a rengrir el meruul er tia el ureor. A lsekum ke mo merech a temem me bo el sebechem el mo meruul a lmuut el betok el tekoi, e ke mo oukerebai er a klemeriarreng er a Jesus.—Mk. 6:31-34.
4. Ngera el omeksaul a mo er ngii e le kede oukerebai er a klemeriarreng er a Jehovah me a Jesus?
4 A doukerebai er a klemeriarreng er a Jehovah me a Jesus er a temel a Chedaol Belsoil a mo uchul a betok el klengeltengat. A rebetok el chad el ngar er a basio el domerk er a klumech er ngii a sebechir el mo rongesii tia el klumech. Ngmo sebeched el melechesuar a klou el deurreng el mo er ngii er sel dosiou er a Jehovah e dorous el mo er a rebebil. (Rel. 20:35) E a klou a ultutelel er ngii e kede mo oldeu er a rengul a Dios me a Ngelekel el tir a olecholt er a klou el klemeriarreng.