Kau Ke Mengetmokl el Kirel a Chedaol Belsoil?

Ngmle Nisan 13 er a rak er a 33, e a Jesus a mle medengei el kmo ngdi medechel a ta el kesus er ngii el lobengterir a rulebengkel er a uchei er a kodellel. Ngmo mengedaol er a ulebongel el Baskua el obengterir e mo muchelii a beches el tekoi, el ngii a Chedaol Belsoil er a Rubak. E a uai tia el klou a ultutelel el kldibel a kmal uluusbech a omengetmokl. Sei a uchul me nguleldurech er a Petrus me a Johanes el mo mengetmokl el kirel. (Lk. 22:7-13) E ulemuchel er seikid el rak el mei, e a Rekristiano el sorir el mengedaol er a Chedaol Belsoil a kirir el mengetmokl el kirel er a bek el rak. (Lk. 22:19) Ngera el tekoi a kired el mengetmokl el kirel a Chedaol Belsoil el mo er ngii er a April 3?

Omengetmokl el loruul er ngii a Remechuodel:

Mketmeklii a Blil a Ongdibel me a lechub a kuk ta er a basio el sebeched el mo ousbech er ngii. Ngkirel ungil a ildisel a kingall er ngii, e ungil a dengki me a osisebellel a eolt er ngii. Moterekeklii a taem er a uchei el mo ungil el mengetmokl er tia el basio el bo dousbech er ngii.
Mousbech er a ngar er ngii a duch er ngii el odam el mo mengedecheduch, me a odam el oungerachel, me a rudam el mo meluluuch el kirel aike el klekedall er a Chedaol Belsoil.
A lsekum e ngmo er ngii a kuk betok er a ta el prokuram er a osisiu el basio, e mruul a temel a miting me bo el sebeched el soiseb e tuobed er a parking lot el diak deketitech.
Mngilteterir tirke el odam el olengeseu me tirke el mo merous a blauang me a bilong e mouchais er tir er a uchei aike el kirir el mo meruul.
Mketmokl aike el kired el mo ousbech el blauang me a bilong, me a belatong, klas er a bilong, tebel, me a dekedekel a tebel.

Omengetmokl el loruul er ngii Tirke el Oldingel a Obliil:

Mketmeklau el mo mui el teloi er tia el ureor er a omerusel a invitation er a Chedaol Belsoil.
Mluches a ngklir tirke el mosuub a Biblia el obengterir, rechedam, tirke el omdak el ngar er a skuul, tirke el moureor el obengterir, me a rekuk di mkaodengei el chad, e mongemedaol er tir.
Monguiu e molebedebek er a omengiuel a Biblia el kirel a Chedaol Belsoil.
Mei er a Chedaol Belsoil el kltmokl el mo ouetkeu er a rokui el chad.