Moba Deurreng Sel Mongetmokl er Kau el kirel a Chedaol el Blsoil
1. A Chedaol el Blsoil ngmeskid a ileakl el techall el mo meruul a ngerang?
1 A Chedaol el Blsoil el mo er ngii er a Ongeru el Ureor el March 26, a meskid a ileakl el techall el mo oldeu a rengud er a rolel a osobel el lebilskid a Dios. (Isa. 61:10) Me sel ledeu a rengud er a uchei er a Chedaol el Blsoil, e tiang a mo ngosukid el mo ungil el kltmokl el kirel. Ngoeak a ngera el rolel?
2. Ngera rullid el mo soad el meruul aike el kirel el ketmekill er a Chedaol el Blsoil?
2 Mengetmokl er kid el kirel a Chedaol el Blsoil: A Chedaol el Blsoil er a Rubak a kmal klou el tekoi engdi ngbeot a oketmeklel. Me nguaisei, engdi ngkirel el mereched el meketmokl aike el kirel ketmekill, me lak dobes a ngii di el meklou a ultutelel el tekoi. (Osi. 21:5) Ngkirel el mengilt a taem me a ungil el basio, e dirrek el kired el melai aike el bilong me a blauang el mo usbechall er seikid el taem. Sel basio a dirrek el kirel el meketmokl, e ngike el odam el mo mengedecheduch a kirel kerekikl el mengetmokl er a cheldechedechal. Tirke el mo orrael aike el klekedall me tirke el rudam el omtebechel a kirir el mo medengei aike el bo loruul er sel taem. Ngulterekokl aika el tekoi el mla meketmokl. A omereng el saul er kid el kirel a olubet a rullid el mo soad el ungil el kltmokl el kirel a Chedaol el Blsoil.—1 Pe. 1:8, 9.
3. Ngmekerang a dongetmokl er a rengud el kirel a Chedaol el Blsoil er a Rubak?
3 Mengetmokl er a Rengud: Ngdirrek el kired el mo medengelii a klungel a ultutelel a Chedaol el Blsoil. (Esra 7:10) Me a leuaisei, e ngkired el kutmeklii a taem el mo melebedebek er a omengiuel a Biblia el kirel a Chedaol el Blsoil e di lekid el melatk el kirel aike el ulebongel el sils er a klengar er a Jesus er tia el chutem. Sel dolebedebek el kirel a blekerdelel a Jesus el kilengei el mo meruul er tia el tekoi e ngmo soad el oukerebai er ngii.—Gal. 2:20.
4. Ngera el klungiolel a olubet a meskau a klou el deurreng?
4 A kodellel a Kristus a ochotii el kmo a omengederederel a Jehovah a kot el ungil. Nguchul a olubet er a klengit me a kodall. (1 Jn. 2:2) Ngdirrek el uchul a ungil deleuill el obengkel a Dios e meskid a rolel e kede mo nguu a diak a ulebengelel el klengar. (Kol. 1:21, 22) Ngdirrek el ngosukid el mo melisiich er a urunguled el mo kiei el oltirakl er a telbilel a rengud el mo er a Jehovah e dolemolem el blak a rengud el disaiplo er a Kristus. (Mt. 16:24) Me bo leklou a deurreng er kid er chelecha el dongetmokl el kirel tia el merael el mei el Chedaol el Blsoil.