Melai a Klubeled er Aike el Ulebongel el Okeua el Klebesei er a Jesus er Tia el Chutem

1-2. Ngera dilubech er a lorael a reteru el disaiplo er a Jesus el mora Emmaus?

NG NISAN 16, 33 C.E. A redisaiplo er a Jesus a kmal mekngit a rengrir e medakt. A reteru er tir a tilobed er a Jerusalem e mlora Emmaus, el beluu el mle 7 el mael a cherridel er a Jerusalem. Tirka el chad a kmal mechitechut a rengrir e le Jesus el ngike el luleltirakl er ngii a bla lokodir. Ngmle omeltkir el kmo a Mesias a mo meruul a betok el lungil tekoi el kirel a Rechijudea engdi ngmla mad. Me nguaisei e ngngar ngii a dilubech.

² A ta el chad a mei er tir e merael el lobengterir. A redisaiplo ouchais er ngii a mekngit el tekoi el dilubech el mora Jesus. E ngii el chad a mocha omuchel el mesaod a tekoi er tir el mo ngodechii a klengar er tir. “Ng ulemuchel er a ikel babier er a Moses ma ikel bek el babier er a re profet” e ngmocha smodii el kmo a Mesias a mle kirel el mo chuarm e mad. Tir el tedei er a lebocha er a Emmaus e ngii el chad a mocha ouchais el kmo ng Jesus el mla mekiis er a kodall! Ngsebeched el di melatk er sel deurreng el blo lomelechesiu er ngii er a bo lodengei el kmo a Mesias a ngar!—Lk. 24:​13-35.

3-4. Ngera dilubech el mora redisaiplo er a Jesus, e ngera kede mo mesaod er tia el suobel? (Rellir 1:3)

³ A Jesus a mlo duum er a redisaiplo er ngii el betok el taem er a chelsel aike el ulebongel el 40 el klebesei er ngii er tia el chutem. (Monguiu er a Rellir 1:3.) Chelsel tiakid el taem e a redisaiplo er a Jesus el mle mekngit a rengrir e medakt a mlo dmeu a rengrir, e ulterekokl a rengrir, e bekeu el lomerk e olisechakl el kirel a Rengedel a Dios.a

⁴ Ngsebeched el ngmai a klungioled sel dosuub el kirel a klengar er a Jesus er tiakid el taem. Ngar tia el suobel e kede mo mesa rolel e a Jesus a uluusbech er tiakid el taem el mo (1) melisiich er a redisaiplo er ngii, (2) melechel a klemedengei er tir er a Bades, e (3) train er tir el mo melai a lmuut el meklou el ngerachel. Kede mo mesaod er a rolel e ngsebeched el loukerebai er a Jesus er a derta er aika el tekoi.

MOLISIICH ER A REBEBIL

5. Ngera uchul me a redisaiplo er a Jesus a uluusbech omelisiich?

⁵ A redisaiplo er a Jesus a uluusbech omelisiich. E ngerang? A rebebil er tir a mla chemoit a delengcheklir, telungalek er tir, me a siobai er tir e mo mesiou er a Jesus el mui el taem. (Mt. 19:27) A rekuk bebil er tir a dimlak lemelemalt omeruul el mo er tir le te mla mo disaiplo er a Jesus. (Jn. 9:22) Te kilengei el meruul aika el tekoi e le te uluumerang el kmo a Jesus a Mesias. (Mt. 16:16) Engdi sera lokodir a Jesus e ngmiltemall omeltkir me ngmlo mechitechut a rengrir.

6. Ngera ngmirruul a Jesus er uriul er a lebekiis er a kodall?

⁶ Me a Jesus a ulterekokl el miltebengii el kmo a kngtil a rengrir a redisaiplo er ngii a dimlak lolechotel a kmo te mla mo mechitechut er a klereng ngbai olechotel a kmo te urridii a kmal kmeed er tir. Me sel sils er a lebekiis er a kodall a Jesus e ngulemuchel el melisiich er a resechelil. El ua tiang, ngmlo duum er a Maria Magdalene er a llangel er a debellel. (Jn. 20:​11, 16) Ngdirrek el ua dulsaod er ngii er a uchelel tia el suobel, ngmlo duum er a reteru el disaiplo er ngii. E mlo duum er a apostol Petrus. (Lk. 24:34) Ngera sebeched el suub er a kerebil a Jesus? Molatk a dilubech er a lekot el duum er a uriul er a lebekiis.

7. Ngua losaod a Johanes 20:​11-16, a Jesus ngmilsa Maria el mekerang er a kmal dirk tutau er a Nisan 16, me ngngera ngmirruul er ngii? (Dirrek el momes er a siasing.)

⁷ Monguiu er a Johanes 20:​11-16. Ngkmal dirk tutau er a Nisan 16, e a rebebil el redil a mlora debull el ble ledelekull er ngii a Jesus. (Lk. 24:​1, 10) Ka me dosaod er a experience er a Maria Magdalene el ta er tirka el redil. A Maria er a lebora debull e ngdi mle bechachau. Ngrirurt el mo ouchais er a Petrus me a Johanes e ulekiuellir er a lerurt el mei er a debull. Sera lesengei el kmo ngdi mle bechachau a debull e te liluut el mo remei. Engdi Maria di kiliei e lmangel. Ngkmal dimlak lodengei el kmo a Jesus a ulemes er ngii. Ngmilsang el lmangel e kmal mle soal mengelaod er ngii. Me ngmlo duum er a Maria e rirellii a beot el tekoi el kmal milengelaod er ngii. Ngmilengedecheduch er ngii e msang a ileakl el ngerachel el mo ouchais er a rudam er ngii el kmo ngmla mekiis er a kodall.—Jn. 20:​17, 18.

8. Ngmekera sebeched el loukerebai er a Jesus?

⁸ Ngmekera sebeched el loukerebai er a Jesus? Ngkmal sebeched el melisiich er a rudam me a rudos er kid el mo melemolem el mesiou er a Jehovah. Ngdi ua Jesus kede kerekikl lomtab a ringel el lechebangel e melasem el mo understand er tir e mengelaod er tir. Molatk er a experience er a odos el Jocelyn el mlad a ta er ngii el redil er a mekngit el accident. Ngmelekoi el kmo: “Ngmle betok el buil el kmal imis el mekngit a renguk.” Me nguaisei engdi odam me a bechil a mle invite er ngii el mei er a blirir, ulerrenges er ngii loba klechubechub, e ulterekokl er a rengul el kmo a Jehovah kmal mengreos er ngii. A Jocelyn a kmo: “Ak mle feel el kmo a Jehovah uluusbech er tir el kursak er a kereker el milkolk e meses a eolt el longesechak er a lifeboat. Te ngilsukak el lmuut el mo er ngii a urungulek el melemolem el mesiou er a Jehovah.” Kid me ngdirrek el sebeched el melisiich er a rebebil loeak sel dekerekikl lorrenges er tir e louchais aike el rokui el ngar er a rengrir e mengedecheduch er tir loba klechubechub, el moktek er kid a soad el smisicheterir el mo melemolem el mesiou er a Dios.—Rom 12:15.

MNGESUTERIR A REBEBIL EL MO MEDENGEI A BADES

9. Ngera milsemai er a redisaiplo er a Jesus, e milekera Jesus e ngosuterir?

⁹ A redisaiplo er a Jesus a kilengei er a Tekingel a Dios e mlora tkurrebab el klisichir el loltaut er ngii er a chelsel a klengar er tir. (Jn. 17:6) Me nguaisei engdi ngdimlak el sebechir el mtebengii a uchul me a Jesus a mlad el dengerenger el chad. A Jesus a miltebengii el kmo a redisaiplo er ngii a mla er ngii a klaumerang er tir e mle betik a rengrir er a Jehovah engdi te uluusbech a ngeso el mo ungil medengei a belkul a Bades. (Lk. 9:​44, 45; Jn. 20:9) Me ngullisechakl er tir el mo medengei a belkul a Bades. Momes er a rolel e ngmirruul er tiang er a lebo el duum er tirke el teru el disaiplo el mirrael el mora Emmaus.

10. Ngmilekera Jesus e olterekokl a rengrir a redisaiplo er ngii el kmo ng Mesias? (Lukas 24:​18-27)

¹⁰ Monguiu er a Lukas 24:​18-27. Mutebengii el kmo a Jesus a dimlak di lemereched el louchais er tir el kmo ngtechang. Ngbai uleker a ker. E ngerang? Nglocha mle soal a louchais er ngii aike el mlara uldesuir. Me te uluuchais er ngii. Te dilu er ngii el kmo te mle expect er a Jesus el mo osebelii a Israel er a rechad er a Rom. Me a Jesus a milechititerir me te ouchais aike el ngar er a rengrir. E mo merek e nguluusbech a Bades el ngosuterir el mo medengei a belkul a tekoi el dilubech.b Uriul er tia el kesus e a Jesus a milengoit a taem el olterekokl a rengrir tirke el lmuut el bebil er a redisaiplo er aika el klemerang. (Lk. 24:​33-48) Ngera sebeched el suub er tiang?

11-12. (a) Ngera sebeched el suubii er a rolel e a Jesus a ullisechakl a klemerang er a Biblia? (Dirrek el momes a siasing.) (b) Ngmilekera odam el mesuub lobengkel a Nortey e ngosuir?

¹¹ Ngmekera sebeched el loukerebai er a Jesus? A kot, e sel dolisechakl er a remesuub a Biblia e kede oker a ker el ngosuterir el mo ouchais aike el ngar er a uldesuir me a rengrir. (Osi. 20:5) Sel bom understand er tir e mngesuterir el metik a ileakl el bades el chatter er a blekeradel el lengar ngii. E lak mouchais er tir el kmo ngngera kirir el meruul. Bai moker er tir a ker el kirel ngii el bades e molisiich er tir el mo melatk aike el longuiu me a rolel e ngsebechir el lousbech er ngii er a klengar er tir. Molatk er a experience er a Nortey el odam er a Ghana.

¹² A Nortey a mle 16 a rekil er a lomuchel el mesuub a Biblia. Ngdi mle telkib e a telungalek er ngii a mlo omtok er ngii. Ngera ngilsuir el mo melemolem el mesuub? Ngike el milsuub a Biblia lobengkel a uluusbech er a 10 el bliongel er a Mateus el smodii el mo er ngii el kmo a remera el Kristiano a mo modechelakl. Me a Nortey a kmo: “Sera leduubech odechelakl e ngmlo ulterekokl a renguk el kmo ak mla metik er a klemerang.” Ngike el milsuub lobengkel a dirrek luluusbech er a Mateus 10:16 lolengeseu er ngii el mo mtebengii el kmo ngsebechel dirrek el mo kerekikl e a osisiu el taem e ngoba omengull el mesaod er a klaumerang er ngii el mora telungalek er ngii. Uriul er a lemetecholb a Nortey e ngmle soal lomuchel el pioneer engdi demal a mle soal a lebora daingak. Me a odam a dimlak louchais el kmo ngngera kirel el meruul er ngii ngbai uleker er ngii a ker el ngosuir el mo omdasu a omellach er a Biblia e mo ungil melilt. Me ngngera dilubech? A Nortey a ngileltii el mora mui el taem el omesiou. Me a demal a uldikii. Ngera uldesuel a Nortey el kirel a tekoi el dilubech? Ngkmo: “Ngkmal ulterekokl a renguk el kmo ak rirellii a melemalt el omelilt.” Kid sel de dirrek el mengoit a taem lousbech a Bades lolengeseu er a rebebil el mo melatk e ngsebeched el dirrek el ngosuterir el mo mesisiich el Kristiano.—Efe. 3:​16-19.

MNGESUTERIR A RUDAM EL MO “RECHAD EL SENGK”

13. Ngera ngmirruul er ngii a Jesus lolterekokl el kmo a urerel a Demal a mo melemolem el meketmokl? (Efesus 4:​8, NW)

¹³ A Jesus er a lengar tia el chutem e ngkiltmokl aike el lullengit er ngii a Demal el mo meruul. (Jn. 17:4) Me nguaisei engdi a Jesus a dimlak el lomdasu el kmo ngdi ngii el tang a sebechel kutmokl a soal a Jehovah. Ngar er a chelsel aike el edei el rak me a tedobech lomesiungel e ngdirrek el mle train er a rebebil. E a uchei er a lebora eanged e ngulemekrael er a redisaiplo er ngii el rebebil er tir a locha dirk mle lluich me a derengel a rekrir el mo omekerreu er a remekreos el sib er a Jehovah e omekrael er a ureor el omerk e olisechakl. (Monguiu er a Efesus 4:​8, NW.c) Ngmilekera Jesus e ousbech aike el ulebongel el 40 el klebesei er ngii er tia el chutem el olengeseu er a reblak a rengrir el odam el mo “rechad el sengk”?

14. Ngmilekera Jesus e ngosuterir a redisaiplo er ngii el mukeroul er a tekoi er a klereng er a chelsel aike el ulebongel el 40 el klebesei er ngii er tia el chutem? (Dirrek el momes er a siasing.)

¹⁴ A Jesus a milsterir a redisaiplo er ngii a bleketakl engdi ngolechotel a bltikerreng el omesmechokl. El ua tiang, ngmiltebengii el kmo a rebebil er tir a mla er ngii a blekerdelir el mo oumededenger, me ngmilsmechokl er tir. (Lk. 24:​25-27; Jn. 20:27) Ngdirrek el dilu er tir me lenguu a ureor el omekerreu er a rechedal a Jehovah el mo ngaruchei er a ureor el luchul a udoud. (Jn. 21:​15, NW) Ngulemeklatk er tir me lak lomekesiu aike el loruul er a omesiou el mora Jehovah er aike el sebechir a rebebil el meruul. (Jn. 21:​20-22) Ngdirrek el milsmechokl a bebil cheleuid el uldasu el lullab el kirel a Renged e ngilsuterir el mo ulturk osengir er a berkel a ungil chais. (Rel. 1:​6-8) Ngera sebechir a remechuodel el suub er a Jesus?

15-16. (a) Ngoeak a ngera el rolel e a remechuodel a sebechir el loukerebai er a Jesus? Mosaod. (b) Ngmilekera Patrick e ngmai a klungiolel er omesmechokl?

¹⁵ Ngmekera sebechir a remechuodel el loukerebai er a Jesus? Ngkirir el train e olengeseu er a rudam luldimukl er a remekekerei el odam el mo ngmai a lmuut el meklou el ngerachel.d A remechuodel a diak el expect er tirke el le train er tir el mo perfect. Ngbai kirir el lomesterir omesmechokl me tirka el mekekerei el odam bo lsebechir el ngmai a klemedengei e lesa klungel a ultutelel a bo lengariou a rengrir, e loba blakerreng, e lekengei el mesiou er a rebebil.—1 Ti. 3:​1, NW; 2 Ti. 2:2; 1 Pe. 5:5.

¹⁶ Molatk er a rolel e a odam el Patrick a ngilai a klungiolel er omesmechokl. Sera lekekerei e ngdimlak leblechoel lungil a tekingel e mle mekngit omerellel el mora rebebil luldimukl er a rudos. A ta er a remechuodel a miltebengii tia el chelitechetul me ngmilsang a bleketakl el omesmechokl engdi ngmirruul er ngii el ngar er a ungil rolel. A Patrick a kmo: “Ngkmal ungil a renguk le ngii el dilu er ngak. Ngmle blechoel el mo mechitechut a renguk sel kisterir a rudam el ngmai a ileakl e techall el mle soak. Engdi omesmechokl er ngika el ta er a remechuodel a ngilsukak el mo ulturk osengek er a oba klengariourreng el mesiou er a rudam me a rudos er ngak el diak el omelai el ileakl el ngerachel er a ongdibel.” Tia ngilsuir a Patrick el mo metutk el mo ta er a remechuodel er a lluich me a edei a rekil.—Osi. 27:9.

17. Ngmilekera Jesus e ochotii el kmo nguluumerang er a redisaiplo er ngii?

¹⁷ A Jesus a milsterir a redisaiplo er ngii a ngerachel el diak di bo lomerk ngdirrek el kirir el lolisechakl. A redisaiplo a locha mlo omdasu el kmo ngdiak el sebechir el kutmeklii ongtil a Jesus. Me nguaisei engdi a Jesus a mle ulterekokl a rengul el kmo ngsebechir el kutmeklii e uluuchais er tir el uaisei. Ngdilu el kmo: “Ak mo oldurech er kemiu el di ua Chedam el uderchak.”—Jn. 20:21.

18. Ngmekera sebechir a remechuodel el loukerebai er a Jesus?

¹⁸ Ngmekera sebechir a remechuodel el loukerebai er a Jesus? A remechuodel el loba llomeserreng a merous a ngerachel. (Fil. 2:​19-22) El ua tiang, ngsebechir el olengit er a remekekerei me te olengeseu el clean e maintain er a Blil a Ongdibel. Uriul er a lomekngerachel a ngerachel er a rudam e ngsebechir el lochotii a klaumerang er tir el kmo tirka el odam a mo kutmokl ngii el ureor loeak a le train er tir e lebechititerir me loruul. A Matthew el ta er a beches el remechuodel a melekoi el kmo ngkmal oba omereng el saul el kirir a remechuodel el mle train er ngii el meruul er a ngerachel e uluumerang er ngii el kmo ngmo churrengelii. Ngmelekoi el kmo: “Sera kruul a cheleuid e te ngilsukak el mo omes aike el sebechek el suub er ngii e improve er a next taem.”e

19. Ngera kired el rullii er a rengud el mo meruul er ngii?

¹⁹ A Jesus a uluusbech aike el ulebongel el 40 el klebesei er ngii er tia el chutem el mo melisiich, olisechakl, e train er a rebebil. Derellii er a rengud el mo kerekikl el oltirakl er a kerebai er ngii. (1 Pe. 2:21) Ngika mo ngosukid el meruul er tiang. Ngtilbir el kmo: “Ngak a mo [obengkem] el di blechoel el mo lmuut er a ulebongel er a beluulchad.”—Mt. 28:20.