“ Kau a Kmal Mekreos el Chad”!

1-2. Ngera sebechel ngosukid el mo ulterekokl a rengud el kmo kede mekreos er osengel a Jehovah?

A REMESIUNGEL a Jehovah a kmal mekreos er osengel, engdi te ngar ngii a rebebil er tir el diak el feel el uaisei. Nglocha ngar ngii a chad el mla rulleterir el mo feel el kmo ngkmal diak a ultutelir. Ngmla ta el bom feel el uaisei? Ngera sebechel ngosukau el mo ulterekokl a rengum el kmo ke mekreos er osengel a Jehovah?

² A ta er a tekoi el sebechel ngosukau a omonguiu a cheldecheduch er a Biblia el ngii ochotii a rolel e a Jehovah soal a bo domes e doruul el mora rechad. A Ngelekel er a Jesus a milengull er a rechad e mle ungil omerellel el mo er tir. Ngulechotii el kmo ngii me a Demal a kmal mekreos er osengir tirke el ngariou a uldesuir el kirir, el tir omdasu el kmo ngdiak el meklou a ultutelir. (Jn. 5:19; Heb. 1:3) Ngar tia el suobel e kede mo mesaod er a: (1) rolel e a Jesus a ngilsuterir a rechad el mo mesa el kmo te kmal mekreos er osengel a Jehovah me a (2) rolel e ngsebeched el di kid el olterekokl er a rengud el kmo kede kmal mekreos er osengel a Dios.—Hag. 2:​7, NW.

ROLEL E A JESUS A NGILSUTERIR A RECHAD EL MO MESA EL KMO TE KMAL MEKREOS

3. Ngmle uangerang omerellel a Jesus el mora rechad er a Galilea el mlo olengit a ngeso er ngii?

³ A ongedei er a taem el Jesus a mlo omerk er a Galilea e te betok el chad a mlei er ngii el mo orrenges er ngii e ngomekungil er tir. A Jesus a miltebengii el kmo te “mle suebek a rengrir e metacherbesrir, el ua sib el diak a mengkerengel.” (Mt. 9:36) A remengeteklel a klechelid a miltengel osengir er tir e melekoi er tir el kmo te ‘delebeakl’ el chad. (Jn. 7:​47-49) Engdi Jesus a ulechotii er tir el kmo te meklou a ultutelir loeak a longoit a taem el olisechakl er tir e omekungil er tir er a secherir. (Mt. 9:35) Me a lmuut kung ngmle train er a rechapostol er ngii el mo meruul er a ureor er a berkel a klumech e dilu er tir me lomekungil er a resmecher me lsebechir a relmuut el betok el chad el mongeseu.—Mt. 10:​5-8.

4. Ngera kede suubii er a omerellel a Jesus el mo er tirke el miltengel osengir a rechad er tir?

⁴ A ungil omerellel a Jesus el mora rurrenges er ngii me a olechotel omengull el mo er tir ulechotii el kmo ngii me a Demal omes er tirke el rechad a metengel osengir er tir el kmal mekreos. A lsekum ke mesiou er a Jehovah engdi ngdiak em feel el kmo ke mekreos er osengel, e molatk a omerellel a Jesus el mora rechad el mle sorir el melai a klubelir er ngii. Sel moruul el uaisei e ngmo ngosukau el mo mesa kerresem er a osengel a Jehovah.

5. Mosaod er a blekeradel el lemla er ngii a ta el redil er a Galilea el blo lodengelii a Jesus.

⁵ A Jesus a dimlak di lolisechakl er a seked ngdirrek el milengoit a taem el olisechakl e olengeseu er a rederta el chad. El ua tiang, sera lomerk er a Galilea e ngmlo medengelii a redil el mla mo 12 el rak el di lsecher el di merael a rsechel. (Mk. 5:25) Secherel a uchul me a doltirakl er a Llach e ngdimlak el klikiid me a ngii di el chad el rutechii a dirrek el mo diak el klikiid. Me ngika el redil a locha dimlak el sebechel lobengterir a rechad e locha blechoel el di ngii el tang. Me ngii a dirrek el diak el sebechel el teloi er a rebebil el mengull e meruul aike el chedaol el sils. (Lev. 15:​19, 25) Me ngika el redil a dimlak di lsecher ngdirrek el ulterekokl el mle feel el kmo ngcheitel e diak a ultutelel.—Mk. 5:26.

6. Ngmilekera ngike el redil el di merael a rsechel e mo ungil er a secherel?

⁶ Ngika el redil el kmal chilarm a mle soal a Jesus a lomekungil er ngii. Me nguaisei engdi ngdimlak di el melemalt el mora Jesus. E ngerang? Nglocha mle merur er a secherel. Me a lechub nglocha medakt el kmo a Jesus a mo otngeklii e le ngdiak el klikiid e teloi er a rechad. Me ngdi rirtechii a rsel a bilel e le ngmle ulterekokl a rengul el kmo a di lerellii tiang e ngmo ungil er a secherel. (Mk. 5:​27, 28) Ngmlukngeltengat el kirel a mesisiich el klaumerang er ngii! Ngmlo ungil er a secherel. Me a Jesus uleker el kmo ngtecha rirtechii me ngika el redil a mlo er ngii e ouchais a klemerang. Ngmlo uangerang a omerellel a Jesus el mo er ngii?

7. Ngmle uangerang omerellel a Jesus el mora redil el kmal mle chuarm? (Markus 5:34)

⁷ A Jesus a mle ungil omerellel el mo er ngii e ulechotii omengull el mo er ngii. Ngmiltebengii el kmo ngika el redil a “omritel er a dakt.” (Mk. 5:33) A Jesus a millatk er ngii me a tekingel a milengelaod er a rengul ngika el redil. Ngdirrek el ulemekedong er ngii el kmo “rungalek” el ngii el tekoi a ulechotii omengull el mo er ngii el redil e ochotii a delemedemek me a bltikerreng. (Monguiu er a Markus 5:34.) Tia di chimo el taem er a chelsel a Biblia el Jesus a omekedong er a redil el “rungalek.” A Jesus a locha uluusbech er tia el tekoi er tiakid el taem e le ngmilsa el kmo ngika el redil a kmal mle medakt. Ngulterekokl el kmal mlo imis lungil a rengul ngika el redil! Ulekum a Jesus a dimlak lungil mengedecheduch er ngii e ngulterekokl el mirrael el mla mo ungil er a secherel engdi a ukltkel a di oldechelakl er ngii lengii el rirtechii a bilel e dirrek el mle teloi er a seked alta ngdiak el klikiid. Ngbai a Jesus a ngilsuir el mo mesa el kmo ngmera el mekreos el ngelekel a Chedam el ngar er a eanged el kmal betik a rengul er ngii.

8. Ngera omelsemai a blo lechebangel a odos er a Brazil?

⁸ A rebebil er a remesiungel a Dios er chelecha el taem me te dirrek el uaisei el smecher el secherir a sebechel rulleterir el mo feel el depressed e diak a ultutelir. A Mariaa el regular pioneer er a beluu er a Brazil a mlechell el diak ochil e diak a left el chimal. Ngmelekoi el kmo: “Te mle blechoel el bully er ngak er a skuul el kirel. Te ulleker er ngak a tekoi el kmal tomellii a renguk. Mo lmuut er a telungalek er ngak me ngrirellak el mo feel el diak a ultutelek.”

9. Ngera ngilsuir a Maria el mo medengei el kmo ngmekreos er osengel a Jehovah?

⁹ Ngera ngilsuir a Maria? Sera lebo el ta er a Sioning er a Jehovah e a rudam me a rudos er ngii er a ongdibel a ngilsuir el mo omes er ngii el ua lomes er ngii a Jehovah. A Maria kmo: “Ngkmal mo ngesonges a page er a notebook er ngak a bo kumasech a ngklir tirke el rokui el mla ngosukak! Ak mera el mereng a sulel a Jehovah loba renguk el rokir le ngii el mla meskak a telungalek er ngak er a klereng.” A rudam me a rudos er a Maria er a ongdibel a ngilsuir el mo feel el kmo ngkmal mekreos er osengel a Jehovah.

10. Ngera el mondai a ulemekcharm er a Maria Magdalene? (Dirrek el momes a siasing.)

¹⁰ Molatk er a Maria Magdalene el lmuut el ta er a chad el Jesus a ngilsuir. Ngika mle teluchel er a reteuid el mekngit el chelid! (Lk. 8:2) Aika el mekngit el chelid a ulterekokl el rirellii el mo ngodech a teletelel e meruul a ngodech el tekoi sei a uchul me a rechad a milengeroid er tir er ngii. Ngulterekokl el tiakid el taem er a klengar er ngii e ngmle feel el cheitel, diak a ultutelel, el diak a chad el betik a rengul er ngii e mo ngosuir. A Jesus a ultobed aika el mekngit el chelid er ngii me a Maria Magdalene a mlo ta er a redisaiplo er ngii. Ngera lmuut el ta er a rolel e a Jesus a ngilsuir a Maria Magdalene el mo feel el kmo ngkmal mekreos er osengel a Dios?

11. Ngmilekera Jesus e ochotii er a Maria Magdalene el kmo ngkmal mekreos er a rengul? (Dirrek el momes a siasing.)

¹¹ A Jesus a mle invite er a Maria Magdalene el mo obengkel ngii me a redisaiplo er ngii el merael el omerk er a klumech.b Me ngmlo sebechel melemolem lobengkel a Jesus e orrenges er ngii sel lolisechakl er a rebebil. A Jesus a dirrek el mlo duum er ngii er sel sils er a lebekiis er a kodall. A Maria Magdalene a mle ta er tirke el kot el disaiplo el lulengedecheduch er tir a Jesus er tiakid el sils. A Jesus a dirrek el ulemekngerachel er ngii el mo ouchais er a rechapostol er ngii el kmo ngmla mekiis er a kodall. Aika kmal klebokel lochotel a kmo ngmera el mekreos er osengel a Jehovah!—Jn. 20:​11-18.

12. Mosaod er a uchul me a Lidia mle feel el cheitel.

¹² Te betok er chelecha el taem a di ua Maria Magdalene el feel el kmo te cheitel e diak a chad el sebechel mo betik a rengul er tir. A Lidia el odos er a Spain a melekoi el kmo a uchei er a lemechell e a delal a mle soal melecheb er ngii. Ng remember er sera lekmal dirk kekerei el kmo a delal a di milengoit er ngii e millekoi a kmal mekngit el tekoi er ngii. Ngkmo: “A delak el dimlak lolecholt er a bltikerreng el mei er ngak a uchul me a kulsiik er a rechad el sebechir el kongei er ngak e mo betik a rengrir er ngak. Ak kmal mle bekikl el kmo nglocha diak el sebechek el nguu a bltikerreng er a rebebil e le delak a rirellak el mo oumerang el kmo ngak a mekngit el chad.”

13. Ngera ngilsuir a Lidia el mo mesa el kmo ngii a mekreos er osengel a Jehovah?

¹³ Engdi ngmlengodech a Lidia er a lomuchel el mesuub er a Biblia. Omeluluuch el mora Jehovah me a omesubel el di ngii el tang me a dirrek el ungil tekingir me a omerellir a rudam me a rudos er ngii a mla ngosuir el mo mesa el kmo ngmekreos er osengel a Jehovah. Ngdmu el kmo: “A bechik a blechoel el melekoi el kmo ngkmal betik a rengul er ngak. Ngblechoel el omeklatk er ngak el kirel aike el ungil blekerdelek. Me a resechelik me te dirrek el uaisei.” Ngngar ngii a chad el modengelii el locha ousbech a ngeso el mo mesa el kmo ngkmal mekreos er osengel a Jehovah?

ROLEL A BO DOMES ER KID EL UA LOMES ER KID A JEHOVAH

14. Ngmekera 1 Samuel 16:7 e ngosukid el mo omes er kid el ua lomes er kid a Jehovah? (Dirrek el momes er a baks el “Uchul me a Rechedal a Jehovah a Mekreos er Osengel.”)

¹⁴ Lak mobes el kmo a Jehovah diak lomes er kau el ua lomes er kau a rechad er tia el beluulechad. (Monguiu er a 1 Samuel 16:7.) Rebetok el chad er a beluulechad a melebodeb er a klungel a ultutelel a chad lotirakl er a teletelel er a ikrel, ildisel a ududel, deruchellel er a buai, me a lechub ngskulel. Engdi a Jehovah kmal diak el uaisei. (Isa. 55:​8, 9) Me lak molebodeb er a klungel a ultutelem me a lechub ngkerresem loltirakl er a beluulechad, bai momes er kau el ua lomes er kau a Jehovah. Monguiu a cheldecheduch er a Biblia el ngii ochotii el kmo a Jehovah a milengreos er tirke el ulemdasu el kmo te cheitel el uai a Elias, Naomi, me a Hana. Ngdirrek el sebechem el lemuches a tekoi el mla duubech er a klengar er kau el ngii ochotii er kau el kmo a Jehovah mera el betik a rengul er kau e mengreos er kau. Me a lmuut kung ngdirrek el sebechem el review aike el suobel el lochotii el kmo a Jehovah omes er kau el kmal mekreos.c

15. Ngera uchul me a Jehovah ulemes er a Daniel el “kmal mekreos el chad”? (Daniel 9:​23, NW)

¹⁵ Mblechoel el di kau lomeklatk er kau el kmo a blakerreng er kau a rullau el mo mekreos er osengel a Jehovah. Ta el taem er a klengar er a profet Daniel er a locha lebochu el dart a rekil e ngkmal mlo mechitechut a rengul. (Dan. 9:​20, 21, NW) Ngmilekera Jehovah e melisiich er ngii? Ngulderechii a anghel el Gabriel el mo omeklatk er a Daniel el kmo ng “kmal mekreos el chad” me a Dios a mla remenges a nglunguchel. (Monguiu er a Daniel 9:​23, NW.d) Ngera uchul me a Daniel a kmal mle mekreos er osengel a Dios? E le Daniel a uleba blakerreng e betik a rengul er a llemalt. (Ese. 14:14) A Jehovah lilechesii tia el cheldecheduch er a Tekingel el mengelaod er kid. (Rom 15:​4, BT) A Jehovah me ngdirrek el lorrenges a nglunguchem me kau a kmal mekreos er osengel e le koba blakerreng el ngar omesiungem el mo er ngii e betik a rengum er a llemalt.—Mik. 6:8; Heb. 6:10.

16. Ngera sebechel ngosukau el mo omes er a Jehovah el Demam el betik a rengul er kau?

¹⁶ Momes er a Jehovah el Demam el betik a rengul er kau. Ngdiak el soal losiik a kngtim; ngsoal el olengeseu er kau. (Psa. 130:3; Mt. 7:11; Lk. 12:​6, 7) A rebetok el kmal ngariou a uldesuir el kirir a mla mongeseu e le te melebedebek el kirel tiang. El ua tiang, a bechil a Michelle el odos er a Spain a di millekoi a kmal mekngit el tekoi el mo er ngii el betok el rak me tia rirellii el mo feel el kmo ngcheitel e diak a ultutelel. Ngmelekoi el kmo: “Sel bok feel el kmo ngkmal diak a ultutelek e ak mo imagine er a Jehovah el menguoku er ngak e oubltikerreng el mei er ngak e mesebechakl er ngak.” (Psa. 28:​9, NW) A Lauren el odos er a South Africa a di ngii el omeklatk er ngii el kmo, “A lsekum a Jehovah a milkrolak el mo er ngii, e mla ngosukak el melemolem el kmeed er ngii, e mla ousbech er ngak el lolisechakl er a rebebil, e ngulterekokl lomes er ngak el mekreos e ngar ngii a ultutelek.”—Hos. 11:4.

17. Ngera sebechel ngosukau el mo ulterekokl a rengum el kmo koba kengei er a Jehovah? (Psalm 5:​12, NW) (Dirrek el momes er a siasing.)

¹⁷ Bo lulterekokl a rengum el kmo koba kengei er a Jehovah. (Monguiu er a Psalm 5:​12, NW.e) A David ulemekesiu er a kengei er a Jehovah el mora “klou el omekreakl” el ngii a omekerreu er a remelemalt el chad. Sel modengei el kmo koba kengei me a support er a Jehovah e ngsebechel mekerreuii a uldesuem er aike el mo rullau el mo feel el kmo ngdiak a ultutelem. Ngmekera sebechel mo ulterekokl a rengum el kmo koba kengei er a Jehovah? Kede mla smodii el kmo a Jehovah olterekokl er a rengud loeak a Tekingel. Ngdirrek lousbech er a remechuodel, rekmeed el sechelim, me a relmuut el bebil el omeklatk er kau el kmo ke kmal mekreos er osengel. Ngkirem el mekerang sel omngai chouaisei el omelisiich?

18. Ngera uchul me ngdiak el kirem el oltngakl a bliochel el tekingir me a chetengir a rebebil?

¹⁸ Lak moltngakl a bliochel el tekingir me a chetengir tirke el medengelkau e betik a rengrir er kau. E lak mobes el kmo a Jehovah a locha ousbech er tir el olterekokl er a rengum el kmo ke oba kengei er ngii. A Michelle el dulsaod er ngii er a uchei a kmo: “Ngmekekokil a renguk el mocha suubii el mo kongei e oumerang a ungil tekingir a rebebil. Ngdirk meringel engdi ak medengei el kmo tiakid a soal a Jehovah a kuruul er ngii.” A remechuodel a dirrek el mla ngosuir a Michelle el mo mesa el kmo ngoba kengei er a Jehovah. Chelechang e ngmesiou el pioneer e remote volunteer er a Bethel.

19. Ngera uchul me ngsebechel mo ulterekokl a rengum el kmo ke kmal mekreos er osengel a Dios?

¹⁹ A Jesus a omeklatk er kid el kmo ngkmal klou a ultuteled er osengel a Demad el ngar er a eanged. (Lk. 12:24) Me ngkmal sebechel mo ulterekokl a rengud el kmo a Jehovah omes er kid el kmal mekreos. Me lak dobes er tiang! E debora tkurrebab el klisiched el olengeseu er a rebebil el mo mesa el kmo te kmal mekreos er osengel a Dios!