Molatk er a Jesus el Chubechub el Ngarbab el Prist er Kid

1-2. (a) Ngera uchul me a Jehovah a ulderchii a Ngelekel el mei er a chutem? (b) Ngera kede mo mesaod er tia el suobel? (Hebru 5:​7-9)

BEKORD el 2,000 el rak er a mla me mong e a Jehovah ulderchii a kmal mekreos el Ngelekel el mei er tia el chutem. E ngerang? A ta er ngii a mle melubet er a rechad er a klengit me a kodall e omult a rokui el tellemall el bla lukdubech a Satan. (Jn. 3:16; 1 Jn. 3:8) A Jehovah dirrek el mle medengei el kmo a klengar er a Jesus er tia el chutem a mo prepare er ngii el mo chubechub el Ngarbab el Prist. A Jesus a milechelii tia el urerel el Ngarbab el Prist er a uriul er a lemetecholb er a 29 C.E.a

² Ngar tia el suobel e kede mo mesaod er a rolel e a klengar er a Jesus er tia el chutem a ngilsuir el mo chubechub el Ngarbab el Prist. Ngklou a ultutelel a bo dodengelii tiang e le ngmo ngosukid el mo mimokl el meluluuch el mora Jehovah e mo kmeed er ngii, tokubets sel lebo el mekngit a rengud el kngtid me a chelitechetud a uchul.—Monguiu er a Hebru 5:​7-9.

NGELEKEL A DIOS EL KMAL BETIK ER A RENGUL A MEI ER A CHUTEM

3-4. Ngera el klou el omelodech a blo lolechesuar a Jesus er a lemei er tia el chutem?

³ Rebetok er kid a ngar ngii a mla mengodech er a klengar er tir; kede locha mla melukl el tuobed er a blai el kmal soad e merael e choititerir a rechedad me a resechelid. Omelodech a diak el beot el tekoi. Engdi ngdiak a chad el mla chobangel aike el blo lechebangel a Jesus. A Jesus a mle kot el ngarbab e kot el klou a ultutelel el anghel er a eanged. A Jehovah kmal mle betik a rengul er ngii me a Jesus a dirrek el kmal mle dmeu a rengul loureor el lobengkel a Demal. (Psa. 16:11; Osi. 8:30) Engdi ngar er a Filipi 2:7 (BT) e ngmelekoi el kmo a Jesus a kilengei el “mechachongii” e choitii a ngarbab el deruchellel er a eanged e me kiei er a chutem el lobengterir a rediak el mecherrungel el chad.

⁴ Ka mdirrek el melatk er a cherellel a Jesus me a uchelel a klengar er ngii er tia el chutem. Ngmlechell el mora chebuul el telungalek, el ua lochotii a tengetengir er a bo lolenget er a uriul er a lemechell. (Lev. 12:8; Lk. 2:24) A mekngit el King Herodes er a bo lodengei el kirel a cherellel e ngmlo melasem lomekoad er ngii. Me ngii me a rechad er a blil a chiliis el mo kiei er a Ekipten el telkib el taem. (Mt. 2:​13, 15) Ngmera el mlengodech a klengar er ngii er sel mle klengar er ngii er a eanged!

5. Ngera ngmiles a Jesus er a lengar tia el chutem, e aikang ngmilekera e kutmeklii el kirel a urerel el Ngarbab el Prist? (Dirrek el momes er a siasing.)

⁵ A Jesus er a lengar er tia el chutem e ngdi ulemes er a rechad el meliuekl er ngii el chuarm. Ngdirrek el mle medengelii a ringelel a lemad a betik er a rengud, uldimukl er a Josef el ulemekeroul er ngii el demal. Sera loruul er a omesiungel e ngdirrek el mlo metik er a rechad el smecher el chebedes, meiko, diak el sebechir el merael, me a remla mlad a ngelekir me ngkmal mlo chubteterir. (Mt. 9:​2, 6; 15:30; 20:34; Mk. 1:​40, 41; Lk. 7:13) Ngmera el tekoi el kmo a lengar er a eanged e ngulemes er a rechad el chuarm. Me nguaisei engdi sera lemei er a chutem el chad el uaikid e ngkmal mlo ungil understand er a bo le feel er ngii a rechad sel lechuarm. (Isa. 53:​4, NW) Aike el blo lecharm a Jesus er tia el chutem a ngilsuir el mo understand a feelings, frustration, me a ringelir a rechad. E uaikid a rechad a Jesus a dirrek el mlo mesaul a bedengel, mekngit a rengul, e mo oberaod a rengul.

JESUS OCHOTII A KLECHUBECHUB ER NGII EL MORA RECHAD

6. A okesiu el lousbech a profet Isaia ngera ngouchais er kid el kirel a bltikerreng me a klechubechub er a Jesus? (Isaia 42:​3, NW)

⁶ Temel omesiungel a Jesus el rokir e ngulechotii a klou el klechubechub el mo er tirke el mle mekngit omerellir a rechad el mo er tir. Tia ultutii a ulaoch. Ngar er aike el Bades el tekoi er a Hebru e ngomekesiu er tirke el merau e mesisiich el mora ungil a chetemel sers me a lechub ngmeklou e mesisiich el kerrekar. (Psa. 92:12; Isa. 61:3; Jer. 31:12) Engdi a remechebuul me a rengar er a kemikr a lomekesiu er tir el mora telemall el lild me a llut el mengchat el ngii el teblong a diak a usbechellel el mora chad. (Monguiu er a Isaia 42:​3, NW;b Mt. 12:​20, BT) A profet Isaia a mlukreng el mo ousbech aika el okesiu el lomlaoch er a bltikerreng me a klechubechub er a Jesus el mora redi hutsu el chad, el lomes er tir a rechad el kmo ngdiak a ultutelir.

7-8. Ngmilekera Jesus e otutii a ulochel a Isaia?

⁷ A Mateus el ta er a milluches a Ebangkelio a uluusbech aika el tekingel a Isaia el melutk er a Jesus el kmo: “Ngdiak longam ra telemall el lild ma ka lomekoad ra llut el mengchat.” A bebil er a mengasireng el tekoi el lurruul a Jesus a mlora rechad el longemikr er tir e mekngit omeruul el mo er tir, el tir a locha mle feel el kmo te kmal di ua telemall el lild me a lechub te feel el kmo ngdiak omeltkir le te di ua llut el mengchat el di kmedung e ngmad a chetul. A ta er tir a chad el kmal mle imis el smecher er a chebedes. Ngika ulterekokl el mle feel el kmo ngdiak omeltkel el lmuut el mo obengkel a telungalek er ngii me a resechelil. (Lk. 5:​12, 13) E mla er ngii a chad el bengong e diak el sebechel lungil mengedecheduch. Ka dim imagine er a blo le feel er ngii ngika el chad sel lomes er a rebebil el chadecheduch engdi ngii a diak el sebechel mo medengei a tekingir me a lechub e leteloi er tir. (Mk. 7:​32, 33) Engdi ngdiak di leuaisei e merekong.

⁸ A rebetok el Chijudea er a taem er a Jesus a uluumerang el kmo a rechad el ngar ngii a rektir me a lechub ngchelitechetul a bedengir a lomals er tir el kirel a kngterir me a lechub ngkngterir a rechad er a blirir. (Jn. 9:2) Tia el diak el melemalt el uldasu lulebang a uchul me te mirruul er a re chouaisei el chad el mo feel el kmo ngdiak a belkrir. Engdi a Jesus a ultutii a ulochel a Isaia e ulemekungil er tir e ngilsuterir el mo medengei el kmo a Dios a kmal omekerreu el kirir. Tia ngerang ngosisecheklid er chelecha el taem el kirel a Jesus?

9. Ngmekera Hebru 4:​15, 16 e ochotii el kmo a Ngarbab el Prist er kid a mera loba klechubechub el mora rediak el mecherrungel el chad?

⁹ Monguiu er a Hebru 4:​15, 16. Ngkmal sebechel mo ulterekokl a rengud el kmo a Jesus a mo blechoel lolecholt er a klechubechub el mei er kid. Ngera belkul tiang? A ringelel me a feelings er a chad a rutechii a rengul a chad el chubechubechad. A tekoi er a Grik el moiuid er tiang el “lolechesiu” a belkul a kmo kede mo feel er a ringelel me a kngtil a rengul a chad. Ngutebengall el kmo a Paulus a ousbech er a osisiu el tekoi er a Grik er a Hebru 10:34 el kmo kede mo chubteterir tirke el ngar er a kelebus. Aika el cheldecheduch el kirel a mengasireng el tekoi el lurruul a Jesus ochotii el kmo a Jesus a kmal mle chubteterir a rechad el chuarm. Ngdimlak di lomekungil er a rechad el ua le di lurerel. Ngkmal mle omekerreu el kirir e mle soal lolengeseu er tir. El ua tiang, sera lomekungil er ngike el chebedes el chad e ngmle sebechel di ngar er cheroid e omekungil er ngii. Engdi Jesus a bai rirtechii ngii el chad, el ngii a locha ketengel a ta er a chad el rutechii er a uriul er a betok el rak! A Jesus a millatk er ngike el bengong me ngngiluu el mo cheroid er a rechad e mora diak a cherrodech er ngii el basio e dimlak a rechad er ngii e omekungil er ngii. E a ta el Farisi er a lemetengel osengel er a redil el ulebult er a kngtil e ullab a iuechel a medal me a chiul el meriso e mesuld a ochil a Jesus e ngkmal milsebechakl er ngii el redil. (Mt. 8:3; Mk. 7:33; Lk. 7:44) A Jesus a dimlak longeroid er ngii er a rechad el mla er ngii a secherir me a re riruul a kmal oberaod el klengit. Ngbai mle soal a lebe er ngii me lochotii a bltkil a rengul el mo er tir. Ngkmal sebeched el loumerang el kmo ngoba osisiu el klechubechub el mei er kid.

MO OUKEREBAI ER A NGARBAB EL PRIST ER KID

10. Ngera sebeched el lousbech lolengeseu er a rebengong me a remeiko? (Dirrek el momes a siasing.)

¹⁰ Kid el blak a rengud el oltirakl er a Jesus a uchul me kede melasem el mora tkurrebab el klisiched el olecholt er a bltikerreng me a klechubechub el mora rebebil. (1 Pe. 2:21; 3:8) Alta ngdiak el sebeched el omekungil er a rebengong me a remeiko engdi ngkmal sebeched el ngosuterir er a tekoi er a klereng. El ua tiang, a babier el mengai er a Biblia a mla motobed el ngar er a betok er a 100 el bedengel a sign language. Ngdirrek el mla tuobed a braille el babier el ngar er a betok er a 60 el omelekoi e aika el video er kid a loltobed a audio description er ngii el ngar er a betok er a 100 el omelekoi. Aikang a olengeseu er a rebengong me a remeiko el mo kmeed er a Jehovah me a Ngelekel.

11. Ngmekera cheldebechelel a Jehovah e olecholt er a osisiu el klechubechub el lobang a Jesus el mora rokui el bedengir a rechad? (Rellir 2:​5-7, 33) (Dirrek el momes a siasing.)

¹¹ A cheldebechelel a Jehovah a melasem lolengeseu er a rokui el bedengir a rechad el mo kmeed er ngii. Molatk el kmo a uriul er a lebekiis a Jesus e ngultelii a chedaol reng me a rokui el mle kldibel er a chedaol el sils er a Pentekost a mlo sebechir el rongesii a ungil chais el ngar er a ‘tekoi er a belurir.’ (Monguiu er a Rellir 2:​5-7, 33.) Me a cheldebechel oltirakl er a ulekrolel a Jesus e oltobed a babier el mengai er a Biblia el ngar er a betok er a 1,000 el omelekoi, el bebil er ngii el omelekoi a di mekesai a rechad el lousbech. El ua tiang, a bebil el omelekoi a lousbech a rekmal mekesai el chad el kiei er a North me a South America. Me nguaisei engdi mla motobed a babier el ngar er a betok er a 160 er aika el omelekoi me bo lsebechir a rokui el melekoi aika el tekoi el mo rongesii a ungil chais. A babilenged a dirrek el mla motobed el ngar er a betok er a 20 el omelekingir a rechad er a Roma. A rebetok el telael el chad el ousbech aika el omelekoi a mla kongei er a klemerang.

12. Ngera ngdirrek el meruul a cheldebechelel a Jehovah er chelecha el taem el kirir a rechad?

¹² A cheldebechelel a Jehovah diak di lolengeseu er a rechad el mo medengelii a klemerang ngdirrek el olengeseu er tirke el chuarm e le ngdilubech a tellemall er a beluu. Rebetok el telael el odam me a odos a mla volunteer el mo olengeseu er a rekldemir er a klemerang el lousbech a ngeso. A cheldebechel a dirrek el meruul a simple el basio el sebechir a rechad el mo kldibel er ngii e mesuub a lmuut el betok el kirel a bltkil a rengul a Dios el mo er tir.

A NGARBAB EL PRIST ER KID A SEBECHEL NGOSUKAU

13. Ngera bebil er a rolel e a Jesus a olengeseu er kid?

¹³ A ungil mengkerengel a sib er kid a dirrek el make sure el kmo a rederta me a rederta er kid a melai aike el lousbech el mo melemolem el kmeed er a Jehovah. (Jn. 10:14; Efe. 4:7) A lebebil e a blekeradel er a klengar a sebechel rullid el mo feel el uai a llut el mengchat el di kmedung e ngmad me a lechub ngtelemall el lild. Oberaod el sechered a sebechel mo uchul me ngkmal mo mechitechut a rengud me a lechub ngsebechel kmal mo mechitechut a rengud er a cheleuid el derirellii me a lechub ngmo mechitechut a rengud e le ngmla metemall a deleuill er kid me a kldemed er a klemerang. Nglocha mo meringel er kid a omes el bedul luchei el mora omelatk el dobang e bai di mo melatk a ringel el dechelebangel er chelechang. Lak mobes el kmo a Jesus a mes a mchebangel e understand er a om feel er ngii. A klechubechub er ngii a odbechii el mo ngosukau. El ua tiang, ngsebechel lousbech er a chedaol reng el smisichau sel bom mechitechut. (Jn. 16:7; Tit. 3:6) Me a lmuut kung, a Jesus ousbech er a “rechad el sengk” me a rekldemem er a klemerang el melisiich er kau e olengeseu er kau.—Efe. 4:​8, NW.

14. Ngera sebeched el meruul er ngii sel bo de feel el kmo ngmechitechetong a rengud?

¹⁴ A lsekum ngmechitechetong a rengum e molatk er a Ngarbab el Prist er kid el Jesus e bom dmolech el melebedebek er a belkul tiang el kirem. Lak mobes el kmo a Jehovah a ulderchii el mei er a chutem el mo mad el kired el olbeted engdi tia dirrek el ngilsuir a Jesus el mo ungil el understand a mondai el lechebangel a rediak el mecherrungel el chad. Sel bo lemechitechut a rengum el kngtim me a lechub ngchelitechetum a uchul, e a Jesus a kmal kltmokl e dirrek el kmal soal el lolengeseu er kau er ‘sel mousbech er ngii.’—Heb. 4:​15, 16.

15. Mouchais er a ta er a experience el ngii ochotii a rolel e a chad el mo cheroid er a delebechel er a Jehovah a sebechel mongeseu e lmuut el mei er a ongdibel.

¹⁵ A Jesus a dirrek el omekrael er a rechad el mo osiik e olengeseu er tirke el mla mo cheroid er a delebechel er a Jehovah. (Mt. 18:​12, 13) Molatk er a experience er a Stefano.c Ngmilsuld a ngklel er a ongdibel. Ngmlo chuib a 12 el rak e ngii a liluut el mei er a miting er a ongdibel. Ngmelekoi el kmo: “Ngdimlak el beot el tekoi engdi ngmle soak el lmuut el mo mesiou er a Jehovah lobengterir a rudam me a rudos er ngak. A remechuodel el mle meet el lobengkek a kmal ulechotii a delemedemek me a bltikerreng el mei er ngak. Engdi a lebebil e ngblechoel el kmal mo mekngit a renguk e mo soak el give up e le ak milechikak me ak mo cheroid er a Jehovah. Engdi a rudam a ulemeklatk er ngak el kmo a Jehovah me a Jesus a diak el sorir ak give up. Sera ak reinstate e a ongdibel el rokir a ngilikak ngak me a telungalek er ngak loba bltikerreng. A cherengel a taem e a bechik a mlei er a klemerang e chelecha el taem e aki dmak el telungalek el mesiou er a Jehovah.” A Ngarbab el Prist er kid el kmal betik a rengul er kid a ulterekokl el kmal mo dmeu a rengul sel lomes er tirke el lobult e ngmai a ngeso lousbech e lmuut el mei er a ongdibel!

16. Ngera uchul me ke oba omereng el saul el kirel a chubechub el Ngarbab el Prist er kid?

¹⁶ A Jesus er a lengar tia el chutem e ngilsuterir a rebetok el chad er sel taem el kmal luluusbech er ngii. Chelecha el taem e ngdirrek el kmal sebechel mo ulterekokl a rengud el kmo sel bo dousbech er ngii e ngkmal mo ngosukid. E kmal di kmedung e ngmo ngosuterir a rebekongesenges el chad er a chelsel a beches el blekeradel el mo mimokl er a rokui el klengit e mo mecherrungel. Kede kmal oba omereng el saul el mora Dios er kid el Jehovah el klou el bltikerreng me a klechubechub er ngii a uldbechii el mo tutkii a chubechub el Ngelekel el mo Ngarbab el Prist er kid!