Klengar el Mui er a Meklou a Ultutelel el Tekoi el Bla Ksuub er a Ngarbab el Sensei er Kid

KEREBIL A RECHAD ER A BLIK

Ngar er a ulebengelel aike el rak er a 1950 e a rechad er a blik a mlara Itali e melukl el mora Kindersley, el ngar er a Saskatchewan, Canada. Kedeb el taem er uriul e te silubii a klemerang, me a klengar er kemam a mlo iliuekl er a klemerang. Ak melatk er ngak er a kngalek e kungoit a kemanget el sils lomerk er a klumech lobengkel a telungalek er ngak, me a lebebil a kuungelakel el kmo ak mle “auxiliary pioneer” er a le eai a rekik!

A rechad er a blik a mle chebuul engdi te kiltmeklii a ungil kerebai el milengoit a tekoi er a klengar er tir me bo lsebechir el msa Jehovah a lmuut el betok. El ua tiang, a 1963 e te ulterau a betok er a kloklir me bo lsebechir el chemudel a ududir e mora international convention el mlara Pasadena, California er a beluu er a Merikel. E a 1972 e aki millukl el bekord el 620 el mael el mora Trail, British Columbia, Canada el mo olengeseu el lomerk el mora rechad el melekoi a tekoi er a Itali. A demak a uluureor el janitor. Ngmle kotouar a betok el promotion me bo lsebechel nguu omesiungel el mora Jehovah el mo kot.

Ak mera el oba omereng el saul el kirel a kerebai el lekiltmeklii a rechad er a blik el kirek ngak me a rebebil er ngak. Tia kiltmeklii a uchetemel a training er omesiou el mora Jehovah, el uldimukl er ngii a tekoi el dirkak kubes er ngii er a klemengetel a klengar er ngak: A lsekum ak nguu a Renged el mo kot, e a Jehovah mo omekerreu er ngak.—Mt. 6:33.

CHORMII A MUI EL TAEM EL OMESIOU

A 1980 e ak mlo bechil a Debbie, el klebokel lodos el kmal mle ulturk osengel er omesiungel el mora Jehovah. Ngmle somam el mora mui el taem me a edei el buil er uriul er aki bo bechiil e a Debbie ulemuchel el pioneer. Ta el rak er uriul er aki bo bechiil e aki millukl el mora kekerei el ongdibel el uluusbech a ngeso me ngak a dirrek el mlo pioneer.

Omerollel a taem e ngmlo mechitechut a rengmam e mlo somam el melukl. Engdi a kot aki milengedecheduch er a circuit overseer. Nguleba bltikerreng e di mle bleketakl el dmu er kemam el kmo: “Kemiu a part er a mondai. Kom di melatk a kngtil a blekeradel. Engdi obo mosiik a klungiolel e ko mo metik.” Ngomesmechokl el kmal ki muluusbech er ngii. (Psa. 141:​5, NW) Aki di mle mereched el mo oltaut aika el tekingel e mlo mtebengii el kmo ngkmal mle betok a klungiolel a blekeradel el ki mla er ngii. Rebebil er a ongdibel a mle sorir el meruul a lmuut el betok el ngar er a omesiungir, luldimukl er a rengalek, me a rebebil el becherir a dimlak el ngar er a klemerang. Tia kmal klou a ultutelel el tekoi el ki msilubii. Aki silubii el mo omes a klungiolel a tekoi e mengiil er a Jehovah el mo mesmechokl er a blekeradel el kora kmal meringel. (Mik. 7:7) Aki liluut el mo oba deurreng me a blekeradel er a klengar er kemam a mlo ungil.

Tirke el ullisechakl er a kot el pioneer skuul el ki blo er ngii a mle ta el taem losiou el ngar er a ngodech el beluu. Te ullecholt a siasing e mesaod a ringel me a klengeltengat el ble le experience. Tia rirellemam el mo somam el mesiou el missionari. Me aki rirellii el mo turrekong er kemam.

Aki mlo oureor el kirel tia el turrekong er kemam me a 1984 e aki millukl el mora part er a Quebec el melekoi a tekoi er a French el ngii a 2,485 el mael a cherridel er a British Columbia. Ngmle kiram el suubii a beches el omelekoi me a siukang. A lmuut el ta er a omelsemai a ngii a mle blechoel el mo ngesonges a ududam. A ta el taem aki di milengang a potato er a sersel a ta el chad el milchikemam me aki meridm er a sersel. A Debbie a kmal mlo meduch el meruul a kakerous el kall el lousbech a potato! Alta ki mlo chobangel aika el omelsemai engdi aki mle ulturk osengam er a mo outekangel loba deurreng. Me a lmuut el tang, aki milsang el kmo a Jehovah omekerreu er kemam.—Psa. 64:10.

A ta er a klebesei e aki ngiluu okedong el kmal dimlak ki em expect er ngii. Ngmle invitation el mo mesiou el ngar er a Bethel er a Canada. Aki mle apply el mora Skuul er a Gilead me ngkora mle teloadel a rengmam. Me nguaisei engdi aki kilengei er a okedong. Sera ki bong e aki uleker er a Brother Kenneth Little el ta er a chedal a Branch Committee el kmo, “Engdi application er kemam el mora Gilead a mekerang?” Me ngdilu el kmo, “Kede mo mesaod er ngii sel mnguu okedong.”

A ta el sandei er uriul e aki mlo mesaod er ngii e le te mle invite er kemam el mora Gilead. Me ngmle kiram el melilt. A Brother Little a dilu el kmo: “Ngii di el omelilt el mrellii, me ngii a mo er ngii aike el sils el bo moureng ulekum ke ngileltii sel tang. Ngdiak a ta er aika el omelilt el lmuut el lungil er sel tang. A Jehovah sebechel lomekngeltengat er a ngii di el ta er ngii.” Me aki kilengei er a invitation el mora Gilead. Chelsel aika el mereko el rak e aki mla mesa el kmo ngkmal klemerang a tekingel a Brother Little. Aki blechoel lomelekl aika el tekingel el mora rebebil el tir a melilt el kirel a assignment el lebo lekengei er ngii.

KLENGAR EL MISSIONARI

Aki kmal mle semeriar el mo ta er tirke el 24 el ngalek er a skuul er a 83 el klas er a Gilead el mlara Brooklyn, New York er a April 1987. A odam el Ulysses Glass me a Jack Redford a tirke el mle main el lolisechakl er tia el skuul. Ngdi mle mereched el mo merek a eim el buil me a omelilt a mlo er ngii er a September 6, 1987. Te mle assign er kemam el mora Haiti, kemam me a John me a Marie Goode.

Sera 1962 er a lotebedeterir a remissionari er a Haiti e ngdirkak a ta el missionari el tilobed er a Gilead el mla mong. Edei el sandei er uriul er a ki mtobed er a skuul e aki mlo teloi er a kekerei el ongdibel er a Haiti el ngar er a rois e kmal cheroid er a rechad. Te mle 35 a re publisher er ngii el ongdibel. Aki dirk mle mekekerei e diak a kmal experience er kemam me ngii a di mle kemam el tang el kiei er a blirir a remissionari. A rechad a kmal mle chebuul me a ruumesingd er tir a metitur el menguiu. Sera ki mkiei er tiang e ngkmal mlo klou a uldikel er a beluu el mondai er a kabelment a uchul me a rechad el millasem el melai er a kabelment, omeleseb a sersel a rael, e dirrek el mlo er ngii a mesisiich el eolt.

Ngkmal mle sebechemam el suub a betok er a rudam me a rudos er a Haiti el kmal mle meduch a rengrir e oba deurreng. Betok er tir a kmal mle meringel a klengar er tir, engdi ngkmal mle betik a rengrir er a Jehovah me a berkel a klumech. A ta el chudelang lodos a mle metitur el menguiu engdi ngmle memorize a 150 el bades. Bek el sils a silsichii a rengmam el mo melemolem lomerk er a klumech er a Renged el kmo ngdi ta el ngii a mo sumechokl a mondai er a rechad. Ngkmal remutech a rengmam el mlo sebechemam el mesterir a re study er kemam el uriul e te mlo mesiou el regular pioneer, special pioneer, me a remechuodel er a ongdibel.

Sera kngar er a Haiti e ak mle meet er a Trevor el ngeasek el buik el missionari el chad er a Mormon. Ngmla er ngii aike el taem el ki mdilak el mesaod er a Biblia. Betok el rak el uriul e ak ngiluu a letter er ngii. Ngmilluches el kmo: “Ak mo metecholb er a next el assembly! Ngkmal soak el lmuut el mora Haiti el mo special pioneer er sel basio el kblo er ngii el missionari el chad er a Mormon.” Tiakid a lurruul er ngii ngii me a bechil el betok el rak.

EUROPE EL MORA AFRICA

A ureor er a Europe a mirrael el mo beot me te mle assign er kemam el mong. Me a 1992 e aki mlora Ljubljana, Slovenia el ngii a mle kmeed er sel lemlukeroul er ngii a rechad er a blik er uchei er a lolukl el mora Itali. Seikid el taem e ngdirk mla er ngii a mekemad er sel mle Yugoslavia. A branch office el mlara Vienna, Austria, me a dirrek el ngar er a Zagreb, Croatia, me a Belgrade, Serbia a uluungerachel er a ureor er a berkel a klumech er a Yugoslavia. Me nguaisei engdi tia el mle Yugoslavia el mla obii el mo betok el independent el beluu a mocha di tir el loungerachel er tir me ngmlo er ngii a Bethel er a derta er ngii.

Tia mle belkul a kmo ngmocha kiram el suubii a lmuut el ta er a beches el omelekoi me a siukang. A rechad er a beluu a blechoel el melekoi el kmo “Jezik je težek,” el belkul a kmo “A omelekoi a kmal meringel.” E mera el mle meringel! Aki kmal chilat er a blakerreng er a rudam me a rudos el mle kltmokl loltirakl a omelodech el loruul a cheldebechel, e mle sebechemam el mesa Jehovah lomekngeltengat er tir. Aki liluut el mesa Jehovah loba bltikerreng el mesmechokl a blekeradel er a melemalt el temel. Aike el rak el ki bla er a Slovenia liluut el smisiich aike el tekoi el ki msiluub e ulsisecheklemam er a beches.

Engdi a lmuut el bebil er a omelodech a dirk mirrael el mei. Te mle assign er kemam er a 2000 el mora Côte d’Ivoire, el ngar er a West Africa. Klaumekemad er a delongelir a rechad er a beluu a uchul me a November 2002 aki chiliis el mora Sierra Leone. Ngkmal dirk mlo merek er tiang a 11 el rak el mekemad er a delongelir a rechad er a beluu. Ngmle meringel er kemam a di kiul el choitii a Côte d’Ivoire engdi a tekoi el ki bla msuub a ngilsukemam el mo melemolem el loba deurreng.

Aki mlo focus er a bekerredechel el territory er kemam me a rudam me a rudos el uluutekangel er a mekemad el betok el rak. Alta te kmal mle chebuul engdi ngkmal mle sorir el merous aike el ngar ngii er tir. A ta el odos a mle offer a bebil el bail el mora Debbie. A Debbie er a lomai er a rengul el kongei, e a odos a mle muri e dmu el kmo: “Temel a mekemad e a rudam me a rudos er a bebil el beluu a ullengeseu er kemam. Chelechang e ngtemam el lolengeseu.” Aki rirellii er a rengmam el mo oukerebai er tir.

Cherengel a taem e aki liluut el mora Côte d’Ivoire, engdi mondai er a balatiks a uchul me ngliluut el mo er ngii a uldikel me a ultok. Me a November 2004 e aki chiliis el ngmasech er a helicopter el dersta er kemam a di uleba 22 el bond el telechull. Aki mle bad er a ulolel a base er a resoldau er a France er tiakid el kesus e a bo lekukuk aki silebek el mora Switzerland. Sera ki bora branch er a Switzerland er a mocha ieta sils e a rechedal a Branch Committee me a rudam lullisechakl er a Ministerial Training School me a rebecherir a uluuetkeu er kemam e ulemechull er kemam, e ulemeka er kemam e milskemam a betok el Swiss chocolate. Tia kmal remutech a rengmam.

Te mle assign er kemam el mora Ghana el di temporary e liluut el mora Côte d’Ivoire er a bo le telkib el chelellakl a beluu. A ungilreng er a klodam a ngilsukemam el loutekangel a stress er a ki mchiis a beluu me a dirrek el assignment er kemam el dimlak el lultebechel. Ngak me a Debbie a kongei el kmo alta bltikerreng er a klodam a normal el tekoi er a chelsel a cheldebechelel a Jehovah, engdi ngkmal diak ki bo morrekakl er ngii. A lmuut kung, aki mlo mtebengii el kmo aika el blekeradel a mle klou a ultutelel el part er a training er kemam.

MORA MIDDLE EAST

A 2006 e aki ngiluu a babier er a World Headquarters el kirel a beches el assignment er kemam el mora Middle East. Me aki liluut el experience a beches el tekoi, omelsemai, omelekoi, me a siukang. Ngkmal mle betok a kiram el suub el kirel tia el beluu el kmal mesisiich a uldesuir a rechad er ngii el kirel a tekoi er a balatiks me a klechelid. Ngkmal mle somam aike el kakerous el omelekingir a rechad er a ongdibel me a kltarreng el mla er ngii e le te ultirakl a ulekrael er a cheldebechelel a Jehovah. Aki kmal chilat er a rudam e le oumesingd er tir a mle kirir loba blekeu loutekangel a ultok er a rechedal a telungalek er tir, rengalek er a skulir, rechad er a urerir, me a retonari er tir.

Aki mlora special convention el mlo er ngii er a Tel Aviv, Israel er a 2012. Tia el convention a mle kot el taem er tiakid el beluu el lebo el kldibel a rechedal a Jehovah el uai sei a ildisir el uai a taem er a Pentekost 33 C.E. Ngmera el diak sebeched el obes er ngii!

Chelsel aikakid el rak e aki mlodurech el mo oldingel er a beluu el olekebai er a urered. Aki ngilai a bebil er a babilenged el mong, dilak lomerk er a klumech, e mlora mekekerei el assembly. Te mle betok a resoldau el merael el lolab a boes me a betok el checkpoint er ker me a ker, engdi aki mle feel el selebechakl e uleba sekutaberreng el merael lobengterir a redi kesai el publisher.

LMUUT EL MORA AFRICA

A 2013 e aki ngiluu a ngodech el assignment el mo mesiou el ngar er a branch er a Kinshasa, Congo, el kmal klou e klebokel el beluu engdi ngmla chobangel a meklou el chelebuul me a betok el mekemad. A uchelel e aki dilu el kmo, “Aki medengelii a Africa, me aki kltmokl el kirel.” Engdi ngkmal dirk mle betok a kiram el suub, tokubets sel ki bora aike el basio el diak a rael me a did er ngii. Ngkmal mle betok a positive el tekoi el sebecham el focus el kirel, luldimukl er ngii a ducherreng me a deurreng er a rudam alta ngmla er ngii a mondai er a keizai er a beluu, bltkil a rengrir er a berkel a klumech, me a blakerreng er tir el ngar er a miting me a assembly. Aki milsa er a medemam a rolel e a ureor er a Renged a mirrael el beduluchei el ngii a di oeak a ngelsuil me a klengeltengat er a Jehovah. A omesiungam el mui el taem er a Congo ulsisecheklemam er a meklou a ultutelel el tekoi e killungii a telungalek er kemam.

A ulebengelel a 2017 e aki liluut el nguu a ta er a assignment el ngii a South Africa. Tia sel kot el klou el branch el ki bla mosiou el ngar ngii, mo lmuut er a ngerechelam er a Bethel me ngmle beches el kiram. Ngmocha kiram el lmuut el mesuub a betok engdi tekoi el ki msiluub er a uchei a ngilsukemam e ulemekrael er kemam. Ngkmal betik a rengmam er tirka el betok el odam me a odos el mla oba blakerreng el loutekangel el betok el rak. E mera el mengasireng el tekoi sel domes er a rechedal a telungalek er a Bethel el dmak loureor el ngar er a kltarreng alta te chad er a kakerous el beluu el kakerous a siukang er tir. Ngkmal sebeched el bleketakl el mesa el kmo a Jehovah omekngeltengat er a rechedal er a budech e le te oubail er ngike el beches el chad e oltaut omellach er a Biblia.

Chelsel aika el mereko el mla mo merek el rak e ngak me a Debbie a ngilai a kmal exciting el assignment e siluub a kakerous el siukang me a betok el omelekoi. Ngdimlak lebeot engdi aki mle blechoel el melechesuar er a diak lemengodech el bltikerreng er a Jehovah loeak a cheldebechelel me a klodam er kid. (Psa. 144:​2, NW) Aki oumerang el kmo a training el ki bla mnguu er a mui el taem el omesiou a mla rullemam el lmuut el mo ungil mesiungel a Jehovah.

Ak kmal mengreos er a rolel e a rechad er a blik ulemekeroul er ngak, support er a bechik er a Debbie, me tirke el betok lungil kerebai er a telungalek er kid er a klereng el meliuekl er a beluulechad el rokir. Chelecha el ki molatk er a ngar medad ngak me a bechik, e aki mla rullii er a rengmam el mo melemolem el melai a klubelam er aike el lolisechakl a Ngarbab el Sensei er kid.