Remechudelang, Kemiu a Kmal Meklou a Ultuteliu er a Ongdibel

Kau me nglocha ulterekokl el mla mo diak el sebechem el meruul a betok el ua sera omkekerei el chad. E alta ke mla mesiou er a Jehovah loba blakerreng el betok el rak, nglocha mo mechitechut a rengum sel momekesiu aike el murruul er a ngar er a mong er aike el moruul er chelechang. A leuaisei e ngera sebechel ngosukau el mo oba deurreng?

A LOLENGIT ER NGII ER KAU A JEHOVAH

Di lekau el oker, ‘Ngera ngolengit er ngii er ngak a Jehovah?’ A Duteronomi 6:5 a sebechel mengelaod er kau. Tia melekoi el kmo: “Bo le betik a rengum er a RUBAK el Dios er kau er a rengum el rokir ma klengar er kau el rokir ma klisichem el rokir.”

A doltirakl er tia el bades e a tekoi lolengit er ngii er kau a Jehovah a mo mesiou er ngii loba rengum, klengar er kau, me a klisichem el rokir. Tia el klemerang a sebechel ngosukau me ngdiak bo momekesiu er kau er a rebebil me a lechub momekesiu aike el moruul er chelechang el mora ike el murruul er a ngar er a mong.

Molatk er tiang: Ngera ke ulemsa Jehovah er a omkekerei el chad? A ruumesingd er a rechedal a Jehovah mo melekoi el kmo, te milsang sel kot lungil er tir. A denguu er kau e kau ulemsa Jehovah sel kot lungil er kau er tiakid el taem. Ngera sebechem el msang a Jehovah er chelecha el taem? Ke ulterekokl lomsang sel kot lungil er kau er chelechang el taem loltirakl aike el sebechem el meruul er chelechang. Sel molatk er ngii el uaisei e ke mo mesa el kmo, kau omsang a Jehovah osisiu el tekoi el mulemsang er a ngar er a mong. Ke milsang sel kot lungil er kau er seikid el taem e omsang sel kot lungil er kau er chelecha el taem.

NGKMAL SEBECHEM EL NGOSUTERIR A REBEBIL

Tiakid a dirrek el sebechem el melatk er ngii: Lak momes er a cheluodel el ua lolekebai er kau, bai momes er ngii el techall. Chelecha el omklungang e ngngar ngii a tekoi el sebechem el meruul el dimlak el sebechem el meruul er a omkekerei. El ua tiang, ngsebechem el meruul aikang:

Mouchais a experience er kau er a rebebil. Ka molatk aike el lolekoi a Biblia:

King David: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.”—Psa. 37:25.

Josua: “Chelechang e ak mochu er a kodall, e kemiu el rokui a medengei er a rengmiu ma chomeltkiu el kmo ng diak a tar a ikel rokui el le tilib a RUBAK el Dios er kemiu el kiriu el dimlak bo le tekoi. Ng rokui el le tilib a di mlo ungilbesul el dimlak a tal mlor ngii a ngelsengesel.”—Jos. 23:14.

Ke ulterekokl el mla dmung osisiu el tekoi. A David me a Josua a milengedecheduch el mesaod a experience er tir. Tirka el blak a rengrir el mesiungel a Jehovah uluuchais aike el lules me a lerirenges er aika el mereko el betok el rak er a klengar er tir a uchul me ngmla er ngii a berredel a tekingir.

A lsekum ke mla mesiou er a Jehovah el kemanget el taem e ngdirrek el sebechem el share a experience er kau e ouchais a klungiolel a dosiou er ngii. Ngngar ngii a taem el mulsang a Jehovah lolengeseu er a rechedal el kora kmal mekreos er a rengum? A leuaisei e mouchais er a rebebil el kirel! Tia sebechel mo melisiich er tir. Ke ulterekokl el mla mesa tia el tekoi el duubech. Me ngkmal sebechem el melisiich er a rudam me a rudos er kau sel em share a experience er kau lobengterir.—Rom 1:​11, 12.

A lmuut el ta er a rolel e ngsebechem el melisiich er a rudam me a rudos er kau a sel obora miting er a Blil a Ongdibel loltirakl er sel sebechem. Ngar isei e ngsebechem el melisiich er a rudam me a rudos er kau me tir a dirrek el sebechir el melisiich er kau. A Connie el dulsaod er ngii er a uchelel a kmo: “A mora miting er a Blil a Ongdibel a ngosukak me ngdiak lebo el mechitechut a renguk. A bltikerreng el kulai er ngii er a rudam me a rudos er a Blil a Ongdibel a uchul me ngdiak el sebechel mo mekngit a renguk. Ak melasem lolecholt er omereng el saul er ngak el mora rebebil loeak a kumesterir a mekekerei el omiange. Ak dirrek el make sure el mo obengterir a rudam me a rudos er ngak el meruul a tekoi er a klereng.”

A JEHOVAH MENGREOS ER A BLAKERRENG ER KAU

A Bades a mui er a example er a rechad el Jehovah kmal mle betik a rengul er tir alta ngmla mo diak el sebechir el meruul a betok. Molatk er a Simeon el chuodel el chad er a Israel el kiliei er sel taem er a lemechell a Jesus. Ngika sel lebo loldingel er a templo e ngulterekokl el milsterir a remekekerei el chad el meruul a meklou a ultutelel el ureor er a templo. E ngii a mekerang? Ngar osengir a redi chad e ngmle sebechel mo omdasu el kmo ngmla mo diak el usbechall er a Jehovah e le ngchudelang. Engdi a Jehovah dimlak lomdasu el uaisei. Ngulemes er a Simeon el kmo ng “chad [el] melemalt e meluu ra Dios” me a Jehovah ulemekngeltengat er ngii me ngmlo sebechel mesa tolechoi el Jesus. A Jehovah dirrek luluusbech er a Simeon el mo omlaoch el kmo a Jesus a mo Mesias! (Lk. 2:​25-35, BT) Me ngbleketakl el kmo a Jehovah dimlak lomes er a mechetong el bedengel a Simeon ngbai milsa chad el kmal mesisiich a klaumerang er ngii me a “Chedaol Reng a kiliei er ngii.”

Kau me ngdirrek el sebechel mechelaod a rengum el kmo, alta ngdiak el sebechem el meruul a betok engdi a Jehovah mengreos er a blakerreng er kau. A denguu er a Jehovah e a “ikel ngar ngii er a chad a kmal di ungilbesul er a Dios, ele ng diak longerechir er a diak er a chad.”—2 Ko. 8:12.

Me bo el ulturk osengem er aike el sebechem el meruul. El ua tiang, ngera el bedengel a berkel a klumech a sebechem el teloi er ngii, mo lmuut me a lak el kemanget el taem? Ngsebechem el melisiich er a chad loeak omoudengua me a lechub ke luchesii a card el mo er ngii? Mekekerei el olechotel a bltikerreng a kmal sebechel klou a lerellii el mora rudam me a rudos er kau, tokubets sel lesa el kmo ke kmal meketeketang el mesiungel a Jehovah.

Me alta ngngar ngii a chelitechetul a bedengem engdi ngkmal dirk sebechem el msang a Jehovah sel kot lungil er kau e mo dmeu a rengum lomerk er a klumech. Molatk er a experience er a odos er a beluu er a Africa el ngar er a baks el “Ngmlo Uchul a Osebelel a Klengar er Ngii.”

Lak mobes el kmo a blakerreng er kau el mesiou er a Jehovah er aika el betok el rak a kmal sebechel melisiich er a rebebil. Kau a example er a chad el mla outekangel, e kmal sebechel mechelaod a rengum el kmo “a Dios a diak le chebirukel me di lobes a ureriu ma bltkil a rengmiu er ngii el mulechotii er cho mosiou er a re chedal.”—Heb. 6:10.

MOLEMOLEM EL MECHESANG EL MERUUL AIKE EL SEBECHEM

Omesuub ochotii el kmo a rebetok el mechudelang el sechal me a redil el lolengeseu er a rebebil a lmuut lungil a health er tir, mereched a bderrir, e kiei el kemanget el taem.

Me nguaisei omeruul lungil el mora rebebil a diak lecheroid a rokui el ringelel a cheluodel. Ngdi Rengedel a Dios a sebechel mult a rellel a cheluodel me a kodall er a klengit el duldiukes er ngii.—Rom 5:12.

Engdi mo lmuut er chelechang me a omesiungem el mora Jehovah luldimukl er ngii a olengeseu er a rebebil el mo medengelii, a rullii omeltkem me ngmelemolem el mesisiich e dirrek el lungil er a health er kau. Remechudelang, bo modengei el kmo a Jehovah kmal mengreos aike el moruul el mesiou er ngii me a ongdibel a dirrek el mengreos er a ungil kerebai er a klaumerang er kemiu.