Rolel e a Omesubem er a Biblia a Mo Oureor e Uchul a Deuil a Rengum

A Josua el menguiu er a babier er a Llach; A cheotelel a Jeriko el mongkengkang e di blil a Rahab a melemolem el dechor; A Josua el oldars a chimal el bedul a eanged e meluluuch

A JOSUA a mlukngerachel el mo mengetakl er a renged er a Israel el mo soiseb er a Beluu er a Nglat. E tiang a mera el mlo meringel engdi Jehovah millisiich er ngii er a ledu el kmo: “Bo mesisiich, e bo bekeu.” Me ngdilu er a Josua el kmo a lsekum e ngmenguiu e olengesenges er a Llach e ngmo meruul a ungil omelilt e mo ungil a klengar er ngii.—Josua 1:7, 8.

Kid a kiei er a taem el “mo medbedubech a ikel mor ngii a ringel er ngii” me a klengar er kid a sebechel kmal mo meringel. (2 Timothy 3:1) Me a lsekum e ngsoad el mo ua Josua, e ngkired el mo oltirakl aike el ulekrael el lebilsang a Jehovah. Ngkired el menguiu er a Biblia er a bek el sils, e ousbech aike el desiluub el mo meruul a ungil el omelilt er a klengar er kid.

Engdi rebebil er kid a locha diak lodengelii a rolel a losuub, me a lechub ngdiak lesemeriar el mesuub. Me nguaisei engdi omesubel a Biblia el di kid el tang a kmal klou a ultutelel. Sel bo momes er sel baks el dai er ngii a kmo, “Molasem Aika el Tekoi,” e ngsebechem el metik a ngeso el mo ngosukau el mo ngmai a klungiolem e mo dmeu a rengum er a omesubem.

A ta er a milluches er a psalm a milengitakl el kmo: “Mrellak el mo olengesenges a llechum, ele seikid a kbetik er a deuil a renguk er ngii.” (Psalm 119:35) Me kau a sebechem el mo oldeu a rengum sel mosuub er a Tekingel a Dios. Ke mo metik a betok el ungil el uldasu sel molemolem el mesuub er a Biblia.

Me alta ngdiak mua Josua el mengetakl er a renged engdi ngar er ngii a ringel er a klengar er kau. Me kau a ua Josua el kirem el mesuub e olengesenges a Tekingel a Dios. E sel moruul el uaisei e ke mo meruul a ungil omelilt me ngii a mo ungil a klengar er kau.

MOLASEM AIKA EL TEKOI

Moluluuch er a uchei er a omesubem. A Biblia a ngar er ngii a uldesuel a Jehovah er a chelsel el ngii a milluches el mo uchul a klungiolem. Me sel monguiu er ngii, e molengit er a Jehovah me lengesukau el mo medengei aike el monguiu, e molebedebek, e mousbech el meruul a ungil omelilt er a klengar er kau.—Esra 7:10.
Di lekau el merriter er kau el ousbech a ker sel monguiu er a Biblia me a lechub aike el babier el mengai a uchetemel er a Biblia. El ua tiang, ‘Tia ngerang ngouchais er ngak el kirel a Jehovah? Tia ngerang ngrullii el kirel a dai er a Biblia? Ngmekera kuusbech aika el tekoi el mo ngosuterir a rebebil?’
Molebedebek aike el msuub. Mousbech a taem el melebedebek el kirel aike el mchiluiu. Morriter er kau el kmo: ‘Nguangera uldesuek el kirel tiang? Ngera me ngrullak el mo omdasu el uaisei? Tia ngerang rullii el mora ike el dilubech er a klengar er ngak er a ngar er a mong, e ngerang rullii er ngak er chelechang, me a lechub ngera ngmo rullii er a ngar medak el klebesei? Ngmekera kultaut aika el omellach er a Biblia me a lechub e ngtia el uleklatk er a klengar er ngak?’ (Job 23:5; Psalm 49:3) Me sel molebedebek aikang e mesa el kmo ngsebechem el smodii a uchul me a Jehovah mengerechir er a rechedal el mo mengeroid er tir er a bebil el omeruul. Me a lechub e molebedebek el kirel aike el telemall el mo er ngii a lsekum a chad el dirk mulenguiu a chisel a riruul a tekoi el ngar er a ta er a rolel.—Duteronomi 32:28, 29.
Mousbech er a uldesuem el melebedebek a tekoi sel monguiu. El ua tiang, ngsebechem el melatk er sel taem el rubekul a Josef er a loterur er a rechad er a Ismael? (Genesis 37:18-28) Ngera ke mesang, e rongesii, e turengur? Ka mkora melatk er kau el mle ta er tirke el chad el mla er isei. Ngmle uangera uldesuir? Sel mousbech er a uldesuem el melebedebek a tekoi, e a omesubem a mera el mo er ngii a belkul.
Mousbech a dongu el kirel a omesuub el loltobed a cheldebecheled. E aikang a sebechel el rullau el mo semeriar el meruul a research. Mosuub er a rolel a omousbech aike el dongu el mla mo er ngii el ngar er a omelekingem el ngar er a Internet me a mla print. Lak momai er a rengum el oker er a rebebil el mo ngosukau el mesuub er a rolel a bo blechoel el ousbech aika el dongu. El ua tiang, a Watch Tower Publications Index me a lechub a Research Guide for Jehovah’s Witnesses a mo ngosukau el metik aike el mla meluches el kirel a ulterekokl el tekoi e dirrek el mo mesaod a betok el bades er a Biblia. Mousbech er a babier el Ngeso el Kirel a Omesubel a Tekingel a Dios. Aikang a ngar er ngii a ungil el omesodel a beluu me a daob, me a blechebechel a tekoi el dilubech, me a berraod me a klemanget, me a lmuut el bebil el tekoi.
Mosaod a meklou a ultutelel el tekoi. Tiang a mo ngosukau el mo melatk el kirel aike el dirk msiluub. E sebechem el mo mengedecheduch er a rebebil el kirel aike el msiluub. Me ngera er ngii a sebechem el ousbech el kirel a omesiungem? Sel moruul aika el tekoi e ngdiak mobes aike el meklou a ultutelel el tekoi, me a rebebil a mo ngmai a klungiolir er a omesubem el dirrek.