Ongeai el Suobel
A Klengar er a Telungalek el Loldeu er a Rengul a Dios
Ngerang a deruchellel a bechiil el sechal er a chelsel a telungalek? (1)
Ngkirel el ua ngerang a omerellel a bechiil el sechal el mo er a bechil el redil? (2)
Ngerang a ngerechelel a chedam? (3)
Ngerang a deruchellel a bechiil el redil er a chelsel a telungalek? (4)
Ngerang a soal a Dios a loruul a rechedam ma rechedil ma dirrek a rengalek? (5)
Ngerang a osengel a Biblia el kirir a rebechiil el mo chacheroid ma dirrek el dertel a chebechiil? (6, 7)
1. A Biblia a melekoi el kmo a bechiil el sechal a bdelul a telungalek er ngii. (1 Korinth 11:3) A bechiil el sechal a kirel el di ta bechil el redil. E a chebechiielir a kirel el bleketakl el lullecholt el loltirakl a llach.—1 Timoteus 3:2; Titus 3:1.
2. A bechiil el sechal a kirel el mo betik a rengul er a bechil el redil el ua lebetik a rengul er a di ngii. A omerellel el mo er ngii a kirel el mo ua omerellel a Jesus el mo er a rulebengkel. (Efesus 5:25, 28, 29) Ngkmal diak el kirel el mengelebed er a bechil ma lechub el mekngit a omerellel el mo er ngii. Ngbai, kirel el lolecholt el kmo ngmengull e melengmes er ngii.—Kolose 3:19; 1 Petrus 3:7.
3. A chedam a kmal kirel el meringel el loureor el losiik aike el lousbech a telungalek er ngii. Ngkirel el losiik a kall, ma bail, ma blai el kirel a bechil el redil ma rengelekir. A chedam a dirrek el kirel el lomsa telungalek er ngii aike el lousbech el tekoi er a klereng. (1 Timoteus 5:8) Ngii a kot el lomuchel el mo olengeseu er a telungalek er ngii el mo mesuub el kirel a Dios ma moktek er Ngii.—Duteronomi 6:4-9; Efesus 6:4.
4. A bechiil el redil a kirel el mo ungil el ngosuir a bechil el sechal. (Genesis 2:18) Ngkirel el lolengeseu er a bechil el sechal er a rolel a osisechakl ma ulekrael el mo er a rengelekir. (Osisechakl 1:8) A Jehovah a soal a rebechiil el redil a lomekerreu er a telungalek er tir el loba bltikerreng. (Osisechakl 31:10, 15, 26, 27; Titus 2:4, 5) Ngkmal kirel el mo oba dmolech el omengull el mo er a bechil el sechal.—Efesus 5:22, 23, 33.
5. A Dios a soal a rengalek a bo lolengesenges er a redemerir ma rederrir. (Efesus 6:1-3) E soal a rechedam ma rechedil a bo lollach e lomeklemalt er a rengelekir. A rechedam ma rechedil a kirir el mengoit a taem el obengterir a rengelekir e mesuub a Biblia el lobengterir, e omekerreu aike el lousbech el tekoi er a klereng ma dirrek el okurulel a uldesuir ma rengrir. (Duteronomi 11:18, 19; Osisechakl 22:6, 15) A rechedam ma rechedil a kmal diak el kirir el mellach er a rengelekir el lousbech a kmal meringel e mekngit el lomeruul.—Kolose 3:21.
6. A reteru el lobekel sel bo er ngii a mondai er a delongelir, e ngkmal kirir el mo melasem el loltirakl a omellach er a Biblia. A Biblia a mengelechel er kid el mo oba bltikerreng e mo ousubes. (Kolose 3:12-14) A Tekingel a Dios a diak lolisiich er a rubekel me bo lechacheroid el ua lrolel a semecheklel a mekekere el mondai er a delongelir. Engdi a bechiil el redil a sebechel el ngiltii el mo cheroid er a bechil el sechal a lsekum (1) ngdiak lekengei el mesiou er a telungalek er ngii, ma lechub (2) ngkmal meringel el loldechelakl er ngii el sebechel el mo uchul a secherel ma lechub a kodellel, ma lechub (3) e ngkmal imis el lomtok er ngii me ngmo diak a ngii di el rolel el sebechel el mo mengull er a Jehovah.—1 Korinth 7:12, 13.
7. A rubekel a kmal kirir el mo kaumerang. A laokreng a klengit el bedul a Dios ma dirrek el chad el debechil. (Hebru 13:4) A durs er a ikrel a chebechiil a di ta el luchul a dertel a chebechiil el lekengei er ngii a Bades e a chad a sebechel el mo mimokl el lemuut el mo bechiil. (Matteus 19:6-9; Rom 7:2, 3) A dertel a chebechiil el diak a chuchetemel er a Bades e kuk mo bechil a ngodech el chad, a omeruul el kmal louketui er ngii a Jehovah.—Malakai 2:14-16.
[Siasing el ngar er a 16, 17 el llel]
A Dios a soal a rechedam ma rechedil a lolisechakl e lomeklemalt er a rengelekir
[Siasing el ngar er a 17 el llel]
A betik a rengul el chedam a omekerreu aike el lousbech a telungalek er ngii er a klengar er tir ma dirrek el klereng er tir