Lmuut el Mo Ungil a Duch er Kid el Ngar er a Omesiunged—Omuchel a Cheldechedechad el Mo Ousioning er a Ngii Di el Taem

A Uchul Me Ngklou a Ultutelel: Sel doldingel a obliil, e ngblechoel el diak debetik er a rebetok el chad el ngar er a blai. Engdi nglocha sebeched el meseterir sel dengar er a olidiuul er a buai, me sel dengar er a obis er a toktang, me sel temel a ulengull er a ureor me a lechub a skuul. Me a Jehovah a soal a rokui el chad a lebo er ngii a techellir el rongesii a klumech er a Renged. (1 Ti. 2:3, 4) Me a bo el sebeched el ousioning el mo er a rokui el chad, e ngkired el omuchel el mengedecheduch er tir.

Rolel a Moruul er Ngii:

Moba sekutaberreng. Ngika el chad ngungil a rengul e soal el mengedecheduch? Ngungil el taem el sebechiu el chadecheduch? A rebebil el publisher a kora omes er a chad el klikmechur, e a lsekum a chad a omes er tir e dirrek el klikmechur, e te melasem el mengedecheduch er ngii.
Mdelii a kedeb el nglunguuch el ngar er a rengum, a lsekum ke medakt el mengedecheduch.—Neh. 2:4; Rel. 4:29.
Momuchel el oba kedeb el tekoi el ua isel mouetkeu er a chad. A Jesus a dimlak lomuchel a cheldechedechal el obengkel a redil er a Samaria el mesaod el kirel a Renged. (Jn. 4:⁠7) A lebebil er a taem e ngsebeched el omuchel a cheldecheduch el oeak a dechetengii a chad el kmo: “A rengelekem a kmal mekedung!” A doker a ker a lmuut el ta er a rolel a domuchel a cheldechedechad el ua tia el kmo: “Ke rirengesii sel chais er a kesus?”
Me sel lomuchel a cheldecheduch, e mosiik a techall el mo ouchais er a ungil chais, engdi lak di morreched el meruul er ngii. Bai becherei a cheldecheduch me lolemolem. Nglocha sebechem el mesaod er a tekoi el lesemeriar er ngii el rullii el mo oker a ker. El ua tiang, a lsekum a cheldecheduch a mesaod el kirel a tekoi er a telungalek, e nglocha sebechem el melekoi el kmo “Ak miltik a kmal ungil el ulekrael el kirel a okurulir a rengalek.” E a lsekum ke mesaod el kirel a chais er a beluu, e ngsebechem el melekoi el kmo, “Ak dirk chiliuii a kmal ungil chais er a beluu el kmal chilsir a renguk.” Lak bo lemekngit a rengum a lsekum a cheldecheduch a mo merek er a uchei er a omousioning el mo er ngii.
Molab a tract me a bebil er a babier el sebechem el msang a chad el semeriar.

Molasem er Tiang er Chelecha el Buil:

A bek el sandei e molasem el omuchel el mengedecheduch er a chad a lekesengil e ngta el taem, el oba omelatk el soam el mo ousioning er a ngii di el taem.